Festival de Titeres

Usamos cookies co obxectivo de mellorar a experiencia das persoas que nos visitan. Entra na páxina de Política de privacidade para coñecer máis detalles.

FESTIVAL INTERNACIONAL DE TÍTERES DE REDONDELA 2020

1 ao 6 de Setembro

O FIT de Redondela é o Festival mais importante da vila de Redondela.

Este 2020 contará con 21 anos nas súas luvas.

A Asociación Xente Titiriteira é a creadora e organizadora do evento, contando co apoio de diversos entes: Concello de Redondela, Concellaría de Cultura, Xunta de Galicia, Xacobeo 2021, Agadic, Deputación de Pontevedra, Inaem,...

A organización do evento mantén a vocación internacional do Festival, presentando nesta ocasión os traballos e espectáculos de compañías profesionais de: Arxentina e tamén de Cataluña, Madrid, Andalucía, Castela-León e Galicia (entre outras).

Unha festa da diversidade que encherá de novo Redondela de marionetas de fíos, monicreques tradicionais, vangardas creativas, xogos participativos, animación de rúa e un feixe de sorpresas.

Seguindo a filosofía do seu creador, Juanjo Amoedo, o Festival continúa na liña de involucrar na súa celebración a maior cantidade posible de institucións, de sectores sociais e de xentes do concello, para manter este acontecemento como a maior manifestación cultural de Redondela. Queremos manifestar que a complicidade co Concello de Redondela é máxima, xa que son parte fundamental no desenvolvemento do Festival.

Así, o Festival conta xa co apoio de diversas institucións políticas, económicas e sociais de índole autonómica, provincial e local, e na súa organización participan de forma voluntaria arredor de 250 persoas procedentes de diferentes colectivos e agrupacións locais que conforman a Asociación Xente Titiriteira.

Na pasada edición superouse sobradamente a cantidade de 30.000 espectadores, polo que as previsións para este ano son inmellorables.

A Asociación Xente Titiriteiria cre firmemente na necesidade máis ca nunca da maxia dos Títeres como catalizador e dinamizador social.

PROGRAMA DO FIT 2020

 

Para mais información, podedes acceder á páxina web do FIT    ou ó seu Facebook  .

 

 


 

O FESTIVAL DE TÍTERES É DO 13 AO 19 DE MAIO DE 2019


PROGRAMACIÓN 2019

O Festival Internacional de Títeres de Redondela é na actualidade o mellor festival que se celebra en Galicia no que se refire a espectáculos de rúa e é ademais un dos máis punteiros de España. Hoxe en día danse cita neste festival artistas de todo o planeta (dende a India, pasando por Hungría, Kenia, Hong Kong ou Arxentina) no que é unha incrible concentración cultural e artística, que medra ano tras ano, superando no 2012 os 30.000 visitantes segundo os cálculos do propio Concello de Redondela.

A edición de 2007 foi a oitava do festival, e a que consolidou o salto de calidade iniciado xa hai dez anos. Deste xeito o Festival supera o ámbito municipal para converterse en todo un referente artístico, cultural e turístico do sur de Galicia, xa que, na actualidade, colaboran numerosas administracións, dende o propio Concello, á Deputación Provincial de Pontevedra e a Xunta de Galicia.

As actuacións que se poden gozar neste festival son de primeiro nivel, tanto as que se executan ao aire libre, nas rúas, coma as realizadas no Auditorio do Multiúsos da Xunqueira. Ademais de contar cun amplo espectro de modalidades, dende os clásicos monicreques de man, pasando por bonecos a escala humana, bicicletas xigantes, zancudos, teatro de rúa, pallasos, malabaristas, sombras chinesas etc.

Todo isto dá un colorido moi especial á vila de Redondela que se enche nesa fin de semana das actuacións. Tradicionalmente celébrase a finais do mes de maio, polo xeral a última semana do mes.

O Festival pretende ser un escaparate de pobos e culturas tendendo deste xeito unha ponte entre a diversidade cultural do mundo do espectáculo.

http://www.festivaltiteresredondela.com