O acto tivo lugar o mércores 22 no Multiusos da Xunqueira ás 12:00 horas e participaron 280 mozos e mozas dos tres institutos. O 21 de marzo, celebramos o Día da Poesía. Para o Concello de Redondela é importante a posta en valor da lectura e de todo tipo de xéneros literarios, polo que conmemorou o día a través dun acto no Multiusos da Xunqueira. O dúo poético Aldaolado, composto por Lucía Aldao e María Lado, foron as encargadas de levar a poesía á mocidade de forma educativa e entretenida.

A alcaldesa Digna Rivas quixo resaltar que “é importante, pola responsabilidade que temos como pobo, a celebración da poesía ou da narrativa en lingua galega. Na nosa literatura contamos con grandísimos poetas, de antes e de agora. Os premios que recibiron autoras como Yolanda Castaño ou Gonzalo Hermo demostran a boa saúde da nosa poesía”.

Aldaolado está composto por Lucía Aldao e María Lado, dúas mulleres que xa levan unha traxectoria no eido da literatura en galego e que enfoca o seu traballo de forma divertida e educativa. Con elas, a través da poesía, do conto ou da música, os mozos e mozas redondeláns puideron gozar dunha verdadeira homenaxe á poesía.

Por este motivo, pola importancia da poesía e da lingua, o Concello de Redondela organizaou este acto onde participaron 280 alumnos e alumnas dos institutos IES Pedro Floriani, IES Mendiño e IES Illa de San Simón. “Queremos agradecerlle ao equipo de dinamización dos institutos a súa proposta e toda a colaboración. Así mesmo agradecer ao profesorado por acudir a este acto e axudar a divulgar a poesía entre a mocidade”, conclúe Rivas.