O venres 23 de febreiro, ás 20:30 h., na sala de exposicións do Multiúsos de Chapela, os Amigos das Bibliotecas xa nos teñen preparado un novo coloquio.

Desta vez o profesor de historia David Faro falaranos de "A España baleira". Así, baseándose no homónimo libro de Sergio del Molino "La España vacía: viaje por un país que nunca fue", percorreremos as peculiaridades dun país onde a despoboación progresiva do rural configura unha nova realidade xeográfica, onde as paisaxes fantasmagóricas e baleiras viven agochadas detrás da existencia do territorio coñecido.