A Concellaría de Cultura de Redondela convida á veciñanza a visitar a exposición fotográfica "Fillos do Océano" de Javier Teniente no Museo Meirande.

Grazas á colaboración entre a Concellaría de Cultura e A Fundación (Obra Social Abanca) este Venres 26 de marzo chega a Redondela unha exposición dos traballos fotográficos de Javier Teniente en relación ó mundo do mar: os homes, as mulleres que viven do mundo mariño, os ecosistemas e a vida nos océanos.

"Fillos do Océano" é un proxecto que documenta, en diferentes lugares do mundo, a forma de vida dos pescadores artesanais. É tamén unha homenaxe a todos eses homes e mulleres que viven do mar e para o mar, e obteñen del todo o necesario para a súa supervivencia dunha forma sostible. Son eles e elas quen mellor coñecen como se desenvolve a vida nos océanos e os límites ecolóxicos do uso dos seus recursos, grazas a unha sabedoría ancestral que se vai transmitindo de pais a fillos e que continúan practicando. Ámano, veneran e saben que a súa supervivencia está intimamente ligada á conservación do medio natural que os rodea.

A exposición pretende tamén ser unha chamada de atención sobre a vulnerabilidade dos ecosistemas mariños fronte á destrución que hoxe os ameaza coa sobrepesca industrial e a contaminación, para que entendamos que o seu uso sostible é esencial para a vida e a saúde do planeta.

Vídeo presentación

 

Javier Teniente, o seu autor, é un recoñecido e premiado fotógrafo vigués que leva ás súas costas traballos relativos ós conflitos provocados pola acción da guerra, a marxinación e os desastres naturais en diferentes lugares do mundo, entre os que caben destacar as reportaxes realizadas en Centroamérica (Furacán Mitch 1998), Kósovo (1999), Iraq (2003), Haití (2004) e a cobertura do desastre provocado polo Tsunami en Banda Aceh, Indonesia (xaneiro 2005). Durante anos colaborou como fotógrafo con Nacións Unidas, Médicos do Mundo, Médicos sen Fronteiras, Acción contra a fame e outras organizacións internacionais.

Desta vez o traballo de Javier Teniente inaugura un novo espacio expositivo: por primeira vez as instalacións do Centro de interpretación de Meirande complementan o seu contido museístico cunha sala de exposicións no seu interior, na sala de audiovisuais. "Deste xeito pretendemos abrir Meirande a novos proxectos culturais relacionados co mundo do mar, nunha ubicación ideal: ó pé da ría. Para nós é moi importante ademáis, achegar ós colectivos escolares esta exposición. As restriccións do covid e a dificultade actual que teñen os centros escolares de Redondela dificulta moitísimo poder trasladarse a eventos culturais fóra do noso municipio; nós cremos que a pesar das limitacións actuais, a cultura debe estar presente na educación e na vida de todas as persoas do noso municipio.", comenta D. Daniel Boullosa, Concelleiro de Cultura do Concello

A exposición estárá ubicada do 26 de Marzo ata o 29 de Abril no Museo de Meirande, Fábrica do Alemán s/n Rande, Redondela. O seu horario, polo tanto é de Martes a Venres, de 16:00 a 19:00 e Sábados e Domingos de 11:00 a 14:00 e de 16:00 a 20:00. E o acceso será de balde sendo obrigatorio, en todo momento, manter as condicións de prevención do covid-19 (aforo limitado, mascarilla obrigatoria e desinfección de espacios e mans).

 

Dossier exposición (castelán)