O grupo de participación da Infancia e Adolescencia de Redondela, Axentes do Cambio, están comprometidos coa diversidade sexual e o respecto a todas as minorías. Como voz de interlocución directa co Concello de Redondela, propuxeron levar a cabo algunha actividade para apoiar e darlle visibilidade ao colectivo LGTBIQ+

Esta proactividade recibiu boa resposta por parte do Concello, convidando ao grupo a participar no descurso de celebración do Día LGTBIQ+. Asimesmo, e como resposta a unha petición da rapazada redondelá a través Consello Municipal de Infancia e Adolescencia, o Concello decide pintar un mural na Senda Verde de Chapela, sobre o edificio do antigo apeadeiro, mural que se centrará nesta temática.

Este acordo entre o concello e o grupo de participación foi moi celebrado por estes representantes. O mural será pintado polos membros de Axentes do Cambio, segundo o deseño da pintora redondelá Paula Amoedo, artista elixida para realizar o deseño e acompañar e orientar ao grupo durante a actividade.
Por mor da choiva, primeiro, e a vaga de calor, despois, a data prevista para a súa realización, 28 de xuño, tivo que pospoñerse, e foi onte, 21 de xuño cando o traballo de realización do mural foi iniciado.

Xa podedes ver parte do mesmo se paseades pola Senda Verde de Chapela. Na vindeira semana reunirase o grupo de novo coa pintora para rematar a súa realización.

Dende o Concello de Redondela animámosvos a gozar deste muro e a respectalo, pois nel está o traballo da nosa rapazada.