A primeira iniciativa #pegadasxlenda, busca percorrer 130 quilómetros do camiño de Santiago 'apadriñados' coa intención de recadar 1.604 € para a Asociación Lenda-Saúde Mental

Redondela, 23 de xuño de 2021. A alcaldesa de Redondela, Digna Rivas e a concelleira Olga García Ballesteros, reuníronse onte con Patricia Rodríguez e Heidi Vander Biest, promotoras da iniciativa #pegadasxlenda que se inclúe dentro de 'Pegadas con alma', unha proposta creada para impulsar accións de voluntariado social e crecemento persoal en Redondela.

Neste primeiro reto, Patricia Rodríguez e Heidi Vander Biest percorrerán 130 quilómetros do Camiño de Santiago que separan Triacastela de Santiago de Compostela. O farán entre o 2 e 9 de xullo coa intención de recadar os 1.604 euros que a Asociación Lenda-Saúde Mental precisa para a renovación do material deportivo utilizado polas persoas usuarias nas súas terapias.

Será un camiño de quilómetros 'apadriñados'. Así, calquera particular pode sumarse a iniciativa e cubrir, coa súa doazón, os quilómetros que desexen: 5 euros = 1 quilómetro. Ditas doazóns poden realizarse por transferencia ou ingreso na conta de Lenda en Abanca, a traves de PayPal e, próximamente en Bizum. Outro xeito de colaborar é a través das huchas que quedarán instaladas nos establecementos colaboradores que figuran os carteis anunciadores.

Ao igual que as persoas de xeito individual, as empresas, entidades ou colectivos tamén poden facer as súas achegas obtendo a cambio un detallado programa de presenza en redes sociais e outros beneficios.

Tanto a alcaldesa de Redondela, Digna Rivas, como a concelleira Olga García Ballesteros, expresaron a importancia desta iniciativa “que reflicte a propia esencia das e dos Redondeláns que sempre destacaron pola súa solidariedade e a súa capacidade de axudar, nos momentos máis difíciles, as persoas que máis o necesitan”.

Digna Rivas felicitou a Patricia Rodríguez e Heidi Vander Biest e expresou o seu total convencemento “de que a cifra que precisan de 1.604 euros, será superada con creces”.

Compre salientar que se a recadación final unha vez que remate a campaña, que estará vixente ata o 31 de xullo, os fondos recadados superasen o presuposto marcado para a compra de material deportivo, o superávit destinaríase á realización de actividades complementarias de Lenda-Saúde Mental nos seus programas de ocio e descanso familiar.