Novas

Usamos cookies co obxectivo de mellorar a experiencia das persoas que nos visitan. Entra na páxina de Política de privacidade para coñecer máis detalles.

Xosé Ricardo Losada gaña o Premio Viadutos 2019 de novela

Concello de Redondela
03-07-2019
0
Xosé Ricardo Losada gaña o Premio Viadutos 2019 de novela

A obra A casa xunto ao volcán impúxose por unanimidade aos demais orixinais presentados nesta segunda edición que será publicada pola Editorial Galaxia o vindeiro outono.

Reunido nas dependencias municipais do Concello de Redondela o pasado sábado 29 de xuño, o xurado composto polas escritoras Iolanda Zúñiga e Anna R. Figueiredo (gañadora da pasada edición), a xornalista María Jesús Argibay, a profesora Patricia Arias Chachero, e a editora Malores Villanueva decidiu declarar gañadora a obra A casa xunto ao volcán do autor  Xosé Ricardo Losada.

O xurado salientou a fortaleza dunha voz feminina en construción que evoluciona ao longo do relato na busca da súa identidade. A través dunha adolescente o autor móstranos o pensamento crítico dunha sociedade na que a filosofía pode e debe ter un papel relevante e necesario. Losada logra ademais unha voz feminina plenamente crible e sorprendente. A casa xunto ao volcán é unha novela rebelde que invita a cuestionarse a orde social establecida.