O proxecto RELEVO2, que está a levar a cabo o Galp Ría de Vigo- A Guarda no noso territorio
O que este proxecto pretende é trasladar ao alumnado dos centros de ensino, de xeito ameno, dinámico e práctico, as posibilidades que ofrece o sector pesqueiro para que mozos e mozas sexan coñecedores do que deben facer/estudar para entrar a formar parte do sector e constituír o verdadeiro relevo xeracional. Ademais entre os seus obxectivos tamén se atopan: Poñer en valor o sector pesqueiro entre a comunidade escolar en idade de traballar e/ou de escoller estudos superiores, valorizar o sector pesqueiro en termos económicos, dando a coñecer a demanda real existente para diferentes postos de traballo no mar e dando a coñecer as saídas profesionais existentes no mesmo, e ofrecer unha formación máis cuantitativa, que pretende achegar a realidade do sector pesqueiro en termos de oportunidades laborais, a fin de captar persoas que conformen ese relevo xeracional.
A iniciativa vai dirixida aos centros educativos de educación secundaria obrigatoria (concretamente a alumnado de 4º de E.S.O. ) que estean nalgún dos concellos que conforman os territorios dos GALP promotores.
O proxecto RELEVO 2_Mocidade Abordo trata de achegar o sector pesqueiro, marisqueiro e acuícola ao alumnado a fin de que coñezan as saídas profesionais e todo o que este sector lle ofrece na nosa comunidade.
Consiste nun programa a realizar nos diferentes IES interesados que se inscriban no que se poñerá en valor e se darán a coñecer os recursos do sector a disposición dos mozos e mozas para que poidan formarse e telos coma unha opción de futuro.
Trátase dun proxecto, que está a levar a cabo o Galp Ría de Vigo-A Guarda no noso territorio, de colaboración promovido polos Grupos de Acción Local do Sector Pesqueiro que van de seguido:
GALP A MARIÑA - ORTEGAL.
GALP GOLFO ÁRTABRO NORTE.
GALP GOLFO ÁRTABRO SUR.
GALP RÍA DE AROUSA.
GALP RÍA DE PONTEVEDRA.
GALP RÍA DE VIGO – A GUARDA.
O programa abordará o desenvolvemento da ECONOMÍA AZUL e fará fincapé especialmente en:
a) PESCA E ACUICULTURA
b) TRANSFORMACIÓN E COMERCIALIZACIÓN
c) TURISMO E DEPORTES NÁUTICOS.
Dentro de cada un destes bloques haberá unha serie de contidos que se abordarán de xeito ameno e dinámico nas aulas, ben a través de sesións de formación e divulgación ou ben mediante a visita de diferentes persoas profesionais do sector.
A información detallada, carteis e o formulario de inscrición atópanse no espazo web www.relevo2.org