Novas

Usamos cookies co obxectivo de mellorar a experiencia das persoas que nos visitan. Entra na páxina de Política de privacidade para coñecer máis detalles.

Redondela presenta a segunda edición de “Memoria da Estirpe”

Concello de Redondela
28-04-2023
0
 Redondela presenta a segunda edición de “Memoria da Estirpe”

O programa pioneiro no municipio está adicado a recuperar, conservar e poñer en valor o patrimonio oral das persoas maiores do municipio. ‘Memoria da Estirpe’ é un proxecto promovido polo Servizo de Normalización Lingüística dependente da concellería que xestiona a alcaldesa Digna Rivas que busca recuperar, conservar e poñer en valor o patimonio oral do municipio. Trátase dun ambicioso plan de traballo co que se pretenden custodiar unha parte importante da historia de Redondela. Esta iniciativa diríxese aos centros de día para que as persoas usuarias participen cedendo como legado a súa vida e experiencias. O pasado 18 de abril celebrouse unha xuntanza nas dependencias municipais para retomar o proxecto de "A memoria da estirpe". Na reunión estiveron presentes o director do Centro de Día Os Cortizos, a responsable da execución do proxecto, Rocío Marín directora de Mekané Didáccti, e a Alcaldesa, Digna Rivas. Durante este encontro púxose en valor a experiencia do pasado ano no Centro de Día de Cesantes, que tivo tan bos e frutíferos resultados. Neste sentido, o proxecto agora continúa nos Cortizos co mesmo obxectivo de recuperar léxico, toponimia, fotografía antiga, coplas populares e datos antropolóxicos referidos á vida na infancia ou laboral, entre outras cusas. Por tanto, segundo a rexedora local, “a continuación deste proxecto supón un xeito de consolidar unha iniciativa sen comparación en Galicia e que presenta ambiciosos obxectivos. Por un lado, concienciar ao pobo da importancia da memoria popular, do que fomos e dos esforzos que se fixeron noutrora; pero tamén supón fornecer do xusto protagonismo as persoas maiores que levan consigo historias verdadeiramente incríbles e que acumulan unha sabedoría oral que está en perigo con cada morte”. O Concello de Redondela, a través do seu Servizo de Normalización, afiánza un punto de referencia en canto ao traballo cos centros de días e a participación das persoas maiores como suxeitos protagonistas da historia. Digna Rivas, sinalou que "todas estas persoas compoñen anaquiños da historia local de Redondela. É fundamental conservala. Por iso este proxecto é fundamental para que Redondela garde e custodide este saber popular e que as vindeiras xeracións coñezan o pasado e comprendan ou valoren os esforzos que se fixeron". Por outra parte, a rexedora  indicou que "a experiencia do pasado ano en Cesantes revelou datos moi importantes. Por exemplo, en cuestións sobre o traballo dos carpinteiros de ribeira en Cesantes ou a memoria das mulleres que vivían na casa situacións difíciles sen que tivesen nin tempo para queixarse". Finalmente, dende o Concello queren diríxirse á Xunta de Galicia denunciando que "o pasado ano enviamos unha solicitude de reunión coa Consellaría de Política Social. Queríamos presentarlles este proxecto porque cremos que pode ser útil e moi necesario para a cultura galega. Ademais, é unha forma de xuntar moitísimos testemuños que comporían unha imaxe da Galicia que se está indo. De maneira lamentable, a Xunta non respondeu nin tan sequera á nosa solicitude demostrando así que existen concellos con liña directa en San Caetano e concellos en listas de espera". «A memoria da estirpe» divídese en cinco grandes áreas de traballo: antropoloxía, toponimia, memoria fotográfica, léxico e música. A través de entrevistas individualizadas coas persoas maiores e contando previamente cos permisos tanto da persoa en si como das súas familias, así como coa colaboración do propio centro, vaise recollendo unha información de enorme interese. Porque a Galicia de hai medio século cambiou radicalmente á que hoxe coñecemos. Por iso, dende o SNL de Redondela, rexistrouse esta iniciativa pioneira co propósito de non perder todo este acervo cultural. O proxecto comezou a executarse ao longo do verán de 2022 no Centro de Día de Cesantes e continuará noutros centros de día de Redondela para, dese xeito, seguir ampliando este tesouro patrimonial.