– O Concello de Redondela recoñeceu oficialmente a traxectoria do xogador de fútbol sala Pablo García Lago, coñecido deportivamente como ‘Pachu’. Veciño do municipio, actualmente é xogador do CD Xota FS de Pamplona e foi convocado recentemente como internacional pola Selección Española de Fútbol Sala.

– A alcaldesa, Digna Rivas, destacou tamén o compromiso e a brillante faceta académica do internacional español, sinalando que é un exemplo “de formación e madurez” para a mocidade do municipio.

A alcaldesa de Redondela, Digna Rivas, xunto coa tenente de alcaldesa Rita Pérez e o concelleiro de deportes Antonio Cabaleiro, presidiu esta mañá o acto oficial de homenaxe a Pablo García ‘Pachu’ (Redondela, 2000). O veciño do municipio e actual xogador do CD Xota FS de Pamplona recibiu no Concello o recoñecemento “Orgullo redondelán” aproveitando os escasos días de descanso que o xogador pasa no municipio.

Rivas destacou que o distintivo ‘Orgullo redondelán’ premia un rendemento deportivo excepcional que tivo o seu cume este mesmo ano coa chamada da Selección Española absoluta. Durante a entrega, a alcaldesa fixo especial fincapé na faceta académica do galardoado, licenciado en Enxeñería Biomédica. “Pachu representa os mellores valores da nosa mocidade: o compromiso e a responsabilidade, unha demostración de que con traballo pódense alcanzar as metas máis altas tanto na pista como nas aulas. O edil de deportes gabou a traxectoria do xogador como un referente absoluto para toda a base do deporte local. O xogador estivo arroupado pola súa familia, e tamén asistiron ao acto os concelleiros da corporación municipal Iván Crespo e Julio Mougán.

Pablo García agradeceu o distintivo e amosou un fondo orgullo polas súas raíces, ao lembrar a súa participación como danzante na Festa da Coca no ano 2018, cando tiña 17 anos. O ala do Xota FS Pamplona falou desta experiencia persoal como un recordo que garda con especial cariño desta celebración.

Pachu converteuse nun dos xogadores máis determinantes do fútbol sala nacional grazas ao seu desborde e capacidade goleadora na máxima categoría. O pasado mes de abril cumpriu o soño de debutar coa absoluta nos partidos amigables disputados na cidade de Nokia (Finlandia), onde ademais se estreou como goleador coa camiseta de ‘La Roja’. Desde o Concello desexáronlle moita sorte na súa carreira deportiva, na que o xogador agarda volver formar parte do combinado vermello.

La entrada O Concello outorga o distintitvo “Orgullo Redondelán” ao xogador Pablo García “Pachu” se publicó primero en Concello de Redondela.

– Un total de 109 estudantes benefícianse desta medida pioneira que o Goberno local implantou en 2023. Malia que a competencia do transporte escolar é exclusiva da Xunta de Galicia, o Concello decidiu prestar este servizo gratuíto “para facilitar a conciliación familiar e garantindo que todo o alumnado teña as mesmas oportunidades e facilidades”, explica a alcaldesa, Digna Rivas

– Ás probas da PAU celébranse en Vigo os días 2, 3, 4. A distribución por centros reflicte a alta demanda do servizo: o IES Floriani achega 53 alumnos, do IES Mendiño son 44, e polo IES Chapela 12 usuarios. Para dar cobertura a todos eles, o Concello mobiliza dous autobuses que realizan as saídas desde Chapela e Redondela. Rivas desexou “o maior dos éxitos” a todos os mozos e mozas que afrontan estas xornadas.

O Concello de Redondela pon un servizo de transporte gratuíto a disposición do alumnado dos institutos públicos do municipio para que se desprace con total comodidade e seguridade ás probas de acceso á universidade (PAU) no campus de Vigo (CUVI).Esta iniciativa, que comezou a prestarse con éxito no ano 2023 a proposta das ANPAS no Consello Escolar Municipal, converteuse nunha ferramenta clave de equidade e apoio ás familias do municipio durante un dos momentos máis decisivos do curso académico.

Nesta ocasión, un total de 109 estudantes se beneficiarán desta medida pioneira. Malia que a competencia do transporte escolar é exclusiva da Xunta de Galicia, o Concello decidiu prestar este servizo gratuíto “para facilitar a conciliación familiar e garantindo que todo o alumnado teña as mesmas oportunidades e facilidades”, explica a alcaldesa, Digna Rivas. A distribución por centros reflicte a alta demanda do servizo: o IES Floriani achega 53 alumnos, o IES Mendiño un total de 44, e o IES Chapela conta con 12 usuarios. Para dar cobertura a todos eles, o Concello mobiliza dous autobuses que realizan as saídas desde Chapela e desde Redondela durante os tres días que duran os exames.

A alcaldesa, Digna Rivas, desexou “o maior dos éxitos” a todos os mozos e mozas que afrontan estas xornadas: “Con este servizo gratuíto que consolidamos ano tras ano, seguimos apostando firmemente pola nosa mocidade e por un ensino público de calidade para todos e todas, sen importar o lugar onde vivan”.

La entrada O Concello volve facilitar autobuses gratuítos ao alumnado que se traslada á PAU en Vigo se publicó primero en Concello de Redondela.

– A actuación presentouse aos fondos provinciais do programa Vía Depo e amplía as melloras planificadas inicialmente. O novo deseño técnico inclúe a construción de muros de contención en ambas as dúas marxes e o rebaixe do talude, o que amplía a calzada e garante unha seguridade total. O orzamento ascende a 146.372 euros.

– A alcaldesa, Digna Rivas, destacou o esforzo do Goberno local por perfeccionar o deseño antes de remitilo á administración provincial. “Non nos limitamos a poñer un parche onde caeu a terra, dende o Concello traballamos para mellorar o plan inicial co obxectivo de ofrecer unha solución definitiva e integral á veciñanza”, sinala Rivas.

O Concello de Redondela pon en marcha do proxecto de reparación urxente e mellora estrutural do camiño da Milixosa, na parroquia de Cabeiro. O Goberno municipal presentou formalmente esta actuación ante a Deputación de Pontevedra para o seu financiamento a través do programa Vía Depo, cun orzamento total de contrata que ascende a 146.372,49 euros. A novidade do proxecto definitivo radica na mellora técnica respecto ao plan inicial previsto. A proposta final non só contempla o levantamento do muro de contención na marxe dereita en sentido ascendente —zona que sufriu o colapso e desprendemento de terras por mor dos fortes temporais de choiva—, senón que estende as garantías de seguridade á marxe esquerda. Nesta outra banda da vía, os traballos incluirán o rebaixe do talude existente e a execución dunha nova barreira cun petril de pedra de granito de 50 centímetros de alto.

A alcaldesa de Redondela, Digna Rivas, destacou o esforzo do Goberno local por perfeccionar o deseño antes de remitilo á administración provincial. “Non nos limitamos a poñer un parche onde caeu a terra; dende o Concello traballamos para mellorar o plan inicial co obxectivo de ofrecer unha solución definitiva e integral. Con esta ampliación que abarca ambas as dúas marxes do camiño Milixosa, os veciños de Cabeiro contarán cunha vía moito máis segura, robusta e adaptada ás necesidades da parroquia”, sinala a rexedora.

Unha actuación ambiciosa en ambas marxes

O Concello optimiza a axuda provincial cunha reforma integral nun tramo de 80 metros de lonxitude que quedara moi danado. Na marxe dereita, o muro de contención na base do talude acadará alturas variables de entre 1,50 e 5 metros, asentado sobre unha cimentación robusta de ata 4,50 metros de profundidade para evitar novos movementos de terra.

O concelleiro de Infraestruturas e Sostibilidade, Roberto Villar, incidiu nos detalles técnicos que xustifican a intervención na marxe esquerda: “As intensas choivas amosaron a vulnerabilidade de todo o contorno da vía. Coo rebaixe do talude esquerdo e o novo petril de pedra, estabilizamos o terreo fronte a futuros temporais e tamén ampliamos a calzada ata un ancho medio de 7,50 metros, optimizando a drenaxe e mellorando a seguridade na circulación de vehículos e peóns”.

La entrada O Concello mellora o proxecto do camiño Milixosa para facer unha reforma integral se publicó primero en Concello de Redondela.

– A campaña “Espazos sen Fume” está impulsada pola Asociación Española contra o Cancro. Redondela súmase con dous céntricos espazos por iniciativa do grupo de traballo en Saúde Infanto-Xuvenil da Mesa Local de Saúde. Ontesinalizáronse oficialmente como “espazos libres de fume” o Paseo da Xunqueira e a Alameda de Castelao.

– Esta campaña busca promover unha vida libre de fume que protexa, sobre todo, á poboación infanto-xuvenil e desnormalizar o hábito de fumar en espazos públicos de convivencia. Os espazos escollidos nunha votación popular foron propostos polo alumnado dos institutos.

No marco do Día Mundial sen Tabaco, que se conmemora cada 31 de maio, o Concello de Redondela adheriuse á campaña ‘Espazos sen Fume’, impulsada pola Asociación Española Contra o Cancro, co obxectivo de fomentar hábitos de vida saudables e protexer á poboación, especialmente aos menores, da exposición ao fume do tabaco en espazos públicos. A iniciativa xurdiu no grupo de traballo en Saúde Infanto-Xuvenil da Mesa Local de Saúde. Os espazos sinalizados foron seleccionados mediante un proceso participativo, co obxectivo de implicar á cidadanía na elección de contornas máis saudables. Foi o alumnado dos institutos o que propuxo as posibles localizacións, que posteriormente se someteron a votación: o Paseo de Arealonga, proposto polo alumnado do IES Chapela; A Xunqueira, proposta do alumnado do Illa de San Simón; e A Xunqueira xunto coa Alameda de Castelao, proposta do IES Mendiño, sendo finalmente os espazos seleccionados o Paseo da Xunqueira e a Alameda de Castelao.

Ao acto de sinalización asistiron Patricia López, técnica de promoción da saúde da Asociación Española Contra o Cancro xunto a Amparo Alonso e Fani Daviña, presidenta e voluntaria da sede local da entidade en Redondela; xunto coa alcaldesa de Redondela, Digna Rivas e o concelleiro de Medio Ambiente e Saúde, Alberto Álvarez. Asistiron tamén a este acto: Iria Martínez, responsable da Rede Galega de Promoción da Saúde na Área Sanitaria de Vigo, alumando do IES Mendiño e integrantes da Asociación Lenda, que forman parte da Mesa Local de Saúde.

Patricia López sinala que “a creación destes Espazos sen Fume é un paso fundamental para protexer a poboación do impacto nocivo do tabaco e o vapeo e axuda a desnormalizar un hábito que segue a ser a principal causa evitable de cancro do mundo.” O obxectivo é fomentar unha vida libre de fume que protexa sobre todo á poboación infanto-xuvenil, desnormalizar o hábito de fumar en espazos convivenciais públicos reforzando o papel modélico positivo dos adultos en relación co consumo de tabaco e incentivar o abandono do hábito tabáquico e apoiar no proceso. Todo isto, co obxectivo final de conseguir que, no ano 2030, en liña coa Unión Europea, haxa a primeira xeración libre do fume do tabaco.

O abordaxe do tabaquismo na poboación xuvenil constitúe unha das prioridades estratéxicas da Asociación. Por iso, “queremos agradecer ao Concello de Redondela pola sua implicación e compromiso coa saúde pública, especialmente cos colectivos máis vulnerable como a poboación infanto-xuvenil, axudándonos a conseguir unha xeración libre de fume.”, afirman desde a entidade. Con esta adhesión, a Asociación Española Contra o Cancro e o Concello de Redondela unen esforzos para promover hábitos de vida saudables e protexer á cidadanía, especialmente aos menores, fronte á exposición ao fume do tabaco. Ambas entidades reafirman así o seu compromiso coa prevención de enfermidades e o impulso de contornas máis saudables para toda a poboación.

Pola súa banda, desde o Concello de Redondela, a alcaldesa destacou o firme compromiso do Concello co benestar público e coa educación en valores saudables: “Non se trata de prohibir, senón de concienciar, educar e, sobre todo, protexer á nosa infancia e mocidade”. Rivas quixo agradecer tamén a implicación directa da comunidade escolar neste fito: “É un orgullo ver como as nosas mozas e mozos foron os motores desta iniciativa a través das súas propostas e votacións. O Paseo da Xunqueira e a Alameda son espazos de xogo e convivencia, e desde hoxe son tamén un símbolo do noso compromiso colectivo contra o tabaquismo”.

Máis espazos sen fume, menos tabaquismo

O fume exhalado por un fumador supón unha mestura complexa de compoñentes entre os que se atopan substancias como a nicotina ou o monóxido de carbono e outros carcinóxenos. Non existe un nivel seguro de exposición ao fume ambiental do tabaco, xa que a poboación non percibe o risco de desenvolver cancro cando se inhala este fume tóxico. O tabaco produce cancro tanto nas persoas que fuman como nas que respiran o fume do tabaco doutras, xa que está demostrado que este fume contén máis de 70 substancias canceríxenas. Dos 8 millóns de persoas que falecen ao ano a causa do tabaco, 1 millón nunca fumou, e 65.000 son menores.

La entrada Alameda Castelao e Paseo da Xunqueira, novos Espazos Sen Fume se publicó primero en Concello de Redondela.

– O Concello de Redondela presentou as súas alegacións á proposta de Delimitación de Espazos e Usos Portuarios do Porto de Vigo. A alcaldesa reitera o seu rexeitamento á ampliación de usos comerciais e industriais no litoral de Chapela e Rande. O Goberno local demanda ao Porto que compatibilice actividade económica coa protección ambiental e o uso público do litoral.

– Rivas reitera a necesidade de garantir a protección do patrimonio cultural, da paisaxe e da contorna natural da enseada de San Simón. O Concello reclama que neste tramo do litoral a Autoridade Portuaria avance “cara a un modelo máis equilibrado priorizando a recuperación ambiental fronte aos usos de almacenaxe e apoio loxístico”.

O Concello de Redondela presentou formalmente as súas alegacións á proposta final recollida no Estudo Ambiental Estratéxico (Alternativa 4) de Delimitación de Espazos e Usos Portuarios (DEUP) da Autoridade Portuaria de Vigo. O Goberno local reitera o seu rexeitamento ao mantemento e ampliación de usos comerciais e industriais no litoral de Chapela e Rande. A alcaldesa, Digna Rivas, trasladou á Autoridade Portuaria a necesidade de revisar a proposta para garantir a protección do patrimonio cultural, da paisaxe e da contorna natural da enseada de San Simón. Desde o Concello considérase que o documento mantén un modelo centrado na actividade loxística e industrial que resulta incompatible coa recuperación ambiental do litoral para que a cidadanía poida gozar destes espazos. En especial, o Goberno local insiste na necesidade de actuar sobre a contorna do Peirao de Pedra e do cargadoiro de mineral de Coto-Wagner. Rivas insiste no elevado valor patrimonial, histórico e paisaxístico destes espazos. O Concello reclama que neste tramo do litoral a Autoridade Portuaria avance “cara a un modelo máis equilibrado de relación porto-cidade, priorizando a recuperación ambiental, a integración paisaxística e a posta en valor do patrimonio fronte aos usos de almacenaxe e apoio loxístico”. Así mesmo, o Concello solicita reducir a superficie destinada a usos complementarios industriais na zona, revisar a delimitación prevista e incorporar medidas efectivas de rexeneración ambiental que melloren a calidade de vida da veciñanza de Chapela e Rande. Con este escrito, o goberno municipal reafirma o seu compromiso coa defensa do litoral de Redondela, a conservación do seu patrimonio e a procura dun modelo sustentable “que compatibilice actividade económica, protección ambiental e uso público do bordo marítimo.

La entrada O Concello defende a protección de Rande e San Simón fronte ao plan de usos do Porto de Vigo se publicó primero en Concello de Redondela.

– O Concello de Redondela advirte que SEAGA non realizou as limpezas correspondentes aos anos 2024 e 2025. Hai dous anos a Consellería de Medio Rural comprometeuse a acometer a tala da biomasa en diferentes espazos, como a zona de Río Frío en Chapela, pero aínda non fixeron os traballos.

– A alcaldesa, Digna Rivas, esixe que estes traballos se realicen de maneira urxente nas denominadas “faixas secundarias” para previr incendios. Por convenio o SEAGA debe realizar a limpeza de 10 hectáreas cada ano. Desde o Concello ofrecen “toda a colaboración á administración autonómica para resolver esta situación”.

O Concello de Redondela advirte que a Empresa Pública de Servizos Agrarios Galegos que depende da Xunta, SEAGA, aínda non realizou as limpezas correspondentes aos anos 2024 e 2025. Hai xa dous anos que a Consellería de Medio Rural se compromete a acometer a limpeza e tala da biomasa en 17 parcelas, entre elas as da zona de Río Frío en Chapela, pero aínda non a realizou. A alcaldesa, Digna Rivas, esixe que estes traballos se realicen de maneira urxente nas denominadas “faixas secundarias” do municipio para previr incendios. Trátase de franxas de 50 metros ao redor de construcións e vivendas que deben manterse limpas e sen especies pirófitas, propensas a propagar lumes. Conservar estas zonas de monte correctamente “é esencial para evitar a proliferación de lumes en puntos sensibles”, sinala o concelleiro de Medio Ambiente, Alberto Álvarez. O edil explica que teñen conversas telefónicas co SEAGA en numerosas ocasións “onde nos transmiten a súa intención de actuar, pero o tempo pasa e as limpezas non se fan”. NA última comunicación a empresa de Medio Rural anunciou que realizaría a limpeza en marzo, “pero a piques de rematar o mes de maio aínda non actuaron”. Álvarez insiste en que o traballo do SEAGA é “esencial” para previr lumes. Desde o Concello ofrécese “toda a colaboración á administración autonómica para resolver esta situación e que se realicen os traballos”.

O Concello de Redondela, a Consellería do Medio Rural, a FEGAMP e o SEAGA asinaron o convenio para a xestión da biomasa en 2022. A través deste acordo a empresa pública debe acometer a limpeza de 10 hectáreas no municipio cada ano, pero aínda non se realizou. Álvarez, explica que “debe ser Medio Rural quen realice a xestión da biomasa e a retirada de especies arbóreas, na súa maior parte eucaliptos e piñeiros”. O concelleiro confía en que os traballos se realicen “no prazo de tempo máis breve posible”.

La entrada O Concello demanda ao SEAGA unha actuación urxente nas zonas de risco de incendio forestal se publicó primero en Concello de Redondela.

– O xestor ferroviario acepta a petición da alcaldesa e substituirá os pretiles de formigón por uns metálicos máis estreitos. Digna Rivas amosa a súa satisfacción por este cambio que permite ampliar a calzada de 4 a 6 metros e dar resposta ás demandas veciñais.

– A modificación na estrutura supón “un acto de xustiza para o barrio” e garante que a veciñanza vai ter un paso “que realmente cumpre coas súas necesidades do día a día”, afirma a alcaldesa. O ancho da calzada amplíase desde os 4 ata os 6 metros, permitindo un tránsito fluído de vehículos e peóns.

O Administrador de Infraestruturas Ferroviarias (Adif) aceptou os cambios propostos polo Concello para mellorar a circulación de vehículos e peóns no paso elevado da Portela. O xestor ferroviario confirmou oficialmente á alcaldesa a viabilidade técnica para ampliar o paso superior do camiño A Portela ata os 6 metros de ancho. Esta decisión responde ao escrito remitido desde o Concello a Adif no que se solicitaba unha mellora sobre o proxecto aprobado en decembro de 2023.

A alcaldesa amosou a súa satisfacción por este logro. “Conseguimos que Adif atendese as demandas dos veciños e veciñas”, declarou a rexedora. Rivas fixo fincapé en que este cambio estrutural supón “un acto de xustiza para o barrio”. A modificación do proxecto garante que a veciñanza da Portela teña un paso “que realmente cumpre coas súas necesidades do día a día e que os veciños merecen, logo de soportar durante meses unhas obras que lles causaron moitas molestias”, recalcou. A alcaldesa informou á veciñanza da Portela dos cambios no proxecto tan pronto chegou ao Concello a documentación oficial”. Rivas agradeceu tamén a Adif a súa disposición técnica para escoitar as demandas do Concello e dos veciños. “Demostrase que, cando se fan peticións con argumentos e pensando no ben común, as cousas saen adiante”.

Detalles técnicos do novo proxecto

O proxecto inicial de Adif contemplaba un ancho de calzada de 4 metros protexido por pretiles de formigón. Tras estudar a petición municipal o equipo técnico de Adif determinou que é viable reubicar os elementos na calzada, malia estar xa a obra avanzada. Para logralo, substituirán os bloques de formigón por pretiles metálicos máis estreitos, o que permite gañar 2 metros. Con este cambio, o paso superior amplíase a sección ata os 6 metros, cunha calzada compartida para tráfico rodado e peonil, sen beirarrúas elevadas. O resultado adáptase ao deseño do camiño antes e despois da ponte. Adif informou tamén que a instalación da valla antivandálica manterase de forma obrigatoria por estrita normativa de seguridade ferroviaria.

As obras atópanse actualmente en execución dentro do proxecto de renovación integral da liña Monforte de Lemos – Bifurcación Chapela.

La entrada Adif acepta o cambio proposto polo Concello e ampliará o paso superior da Portela se publicó primero en Concello de Redondela.

– A alcaldesa, Digna Rivas, sinalou o “orgullo” que supón ver a tantas persoas, rapazada e maiores, unidas pola cultura e compartindo sorrisos e lecturas nun espazo público tan vivo como a Alameda Castelao”.

– Houbo intercambio de marcadores de libros, lectura compartida e desfiles de contos nunha emotiva xornada na que grandes e pequenos gozaron desta convivencia interxeracional. A actuación de Barafunda e o obradoiro de Víctor Rivas foron o broche de outro á xornada.

A Alameda Castelao viviu unha exitosa xornada coa celebración da VI edición de “Lectura na Rúa”. O evento, celebrado onte, reuniu a máis de 700 persoas. O acto contou coa participación da alcaldesa, Digna Rivas, e do concelleiro de Ensino, Alberto Álvarez, quen compartiron a mañá cos participantes. O evento destaca polo compoñente internacional, con centos de alumnos de infantil, primaria e secundaria que compartiron espazo, lecturas e experiencias cos usuarios de centros da terceira idade. A alcaldesa destacou “o orgullo que supón ver a máis de 700 persoas de distintas xeracións unidas pola cultura nun espazo público tan vivo como a nosa Alameda”. Pola súa banda, o concelleiro de Ensino, Alberto Álvarez, valorou a iniciativa como “todo un éxito” e agradeceu ao CEP Santa Mariña, á ANPA Ernestina Otero e ás Bibliotecas Municipais a súa implicación na organización deste evento xunto co Concello. A alcaldesa, que conversou coa rapazada e os maiores, afirmou que o Concello “estará sempre apoiando iniciativas como esta, na que a cidadanía, tanto a infancia como os maiores, son protagonistas”.

A alameda converteuse nunha gran biblioteca ao aire libre onde se realizaron lecturas compartidas, intercambio de marcapáxinas e desfile de contos. Para pechar a xornada os máis pequenos divertíronse, cantaron e bailaron coa actuación do grupo Barafunda na propia Alameda. Pola súa banda, o alumnado de secundaria trasladouse ao Multiusos da Xunqueira onde participaron nun proveitoso obradoiro de ilustración impartido polo recoñecido artista Víctor Rivas.

Participaron a EEI A Marisma, EEI de San Pedro de Cesantes e Ventosela, os colexios Alexandre Bóveda, Cedeira, Igrexa Chapela, Outeiro das Penas, Quintela, Reboreda, Santa Mariña,Ponte Sampaio e colexio Vigo, así como os institutos Illa de San Simón, Mendiño e Pedro Floriani.

La entrada O encontro interxeracional “Lectura na rúa” reúne a máis de 700 escolares e maiores se publicó primero en Concello de Redondela.

– O Servizo de Normalización Lingüística do Concello organiza nos colexios do municipio un total de 10 sesións de contos musicados e ilustrados baixo o título “As legras de Begoña”, a cargo do “Colectivo Xurelo”.

– A alcaldesa, Digna Rivas, destacou o formato “visual e dinámico” dos contos con ilustracións e música en directo, o que fai que a actividade sexa “moi atractiva para nenos e nenas”. Hoxe comezaron nos CEIP Outeiro das Penas e Porto Cabeiro, e continuarán nos vindeiros días no resto de centros.

As actividades programadas polo Concello de Redondela co gallo do Día das Letras Galegas continúan en marcha co obxectivo de dar a coñecer a vida e a obra de Begoña Caamaño, a autora homenaxeada este ano. Con este propósito, o Servizo de Normalización Lingüística que dirixe a alcaldesa, Digna Rivas, organiza un ciclo de contacontos musicados e ilustrados que percorrerá os centros educativos do municipio.

As sesións corren a cargo de “Colectivo Xurelo”, grupo herdeiro de “Polo Correo do Vento”. O programa arrancou hoxe mesmo coas primeiras citas no CEIP Outeiro das Penas (Cesantes) e no CEP de Porto Cabeiro. A alcaldesa e o concelleiro de Ensino, Alberto Álvarez, compartiron a xornada co alumnado. En total, levaranse a cabo 10 sesións repartidas polas distintas escolas de Educación Infantil e Primaria do municipio e chegarán a máis de 250 nenos e nenas. As sesións están deseñadas cun formato moi visual e dinámico. “A combinación de narración oral, ilustración en vivo e música en directo fai que a actividade sexa moi atractiva para os nenos e nenas”.

Esta campaña serve como un complemento ideal á programación didáctica realizada previamente nas escolas. Nenos e nenas fixeron co profesorado un traballo de investigación sobre Begoña Caamaño antes da celebración das Legras Galegas, “e demostraron ter moitos coñecementos sobre a autora e tamén sobre o que significa a celebración do 17 de maio”, destacou Rivas. Isto permítelles seguir con moita máis facilidade as funcións de “Colectivo Xurelo”, que achega datos biográficos e literarios logrando así un reforzo lúdico dos seus coñecementos sobre Begoña Caamaño.

La entrada O Concello leva a figura de Begoña Caamaño aos colexios con contos ilustrados e musicados se publicó primero en Concello de Redondela.

– Redondela pon en marcha a súa I Semana sen Fume. A iniciativa nace da Mesa Local de Saúde para concienciar sobre os riscos do tabaquismo e promover hábitos saudables. O Concello declarará un espazo público “libre de fume”. A cidadanía poderá escoller entre o Paseo de Arealonga, a Xunqueira e a Alameda de Castelao, que son os lugares propostos polo alumnado dos institutos.

– A votación popular estará aberta na web e redes sociais municipais ata o vindeiro 24 de maio. A alcaldesa, Digna Rivas, afirma que coa votación popular “construímos xuntos un modelo de vila máis saudable, sostible e respectuosa co benestar de todos” .

Redondela pon en marcha a súa I Semana sen Fume, unha iniciativa xurdida do grupo de traballo en saúde infanto-xuvenil da Mesa Local de Saúde. O obxectivo prioritario desta campaña é concienciar á poboación sobre os riscos derivados do tabaquismo e fomentar hábitos de vida saudables en todo o termo municipal.

A primeira actividade da programación será a votación popular organizada en colaboración coa Asociación Española Contra o Cancro (AECC). As veciñas e veciños de Redondela poderán decidir que espazo público do municipio será declarado oficialmente como “Libre de Fume”. As opcións foron propostas polo alumnado dos institutos. A rapazada participou nun concurso de carteis e vídeos no que argumentaron os motivos para protexer estes lugares do fume do tabaco. Os espazos finalistas son: paseo de Arealonga (proposta do IES Chapela); a Xunqueira (proposta do IES Illa de San Simón) e a Xunqueira e alameda Castelao (proposta do IES Mendiño). A votación realízase de xeito telemático a través da páxina web e as redes do Concello, e estará aberta ata o 24 de maio. Pódese acceder á enquisa no seguinte enlace: Espazos.Sen.Fume.Redondela.

A alcaldesa, Digna Rivas, destacou o papel dos institutos nesta campaña: “O alumnado demostrou estar moi comprometido e deseñou as propostas. Agora será a veciñanza a que escolla o espazo público que se declarará libre de fume. Deste xeito construímos xuntos unha vila máis saudable e respectuosa co benestar de todas e todos”. Pola súa banda, o concelleiro de Medio Ambiente e Saúde, Alberto Álvarez, subliñou o dobre impacto da iniciativa: “Por unha banda melloramos a calidade do aire e a saúde pública, e ao mesmo tempo evitamos a contaminación das cabichas nestes espazos públicos.”

Obradoiros informativos e acto oficial. A programación continuará o xoves 28 de maio cun obradoiro impartido por persoal técnico da AECC. Estas charlas, dirixidas ao alumnado dos institutos, abordarán as consecuencias do consumo de tabaco e dos dispositivos de vapeo (vápers). As sesións celebraranse nos multiusos de Chapela e de Redondela. Como colofón da semana, o venres 29 de maio terá lugar o acto institucional de declaración oficial como “Espazo Libre de Fume” o lugar que resulte gañador na votación popular.

La entrada A cidadanía de Redondela escolle o próximo “Espazo sen fume” do municipio se publicó primero en Concello de Redondela.

– O municipio acollerá os actos centrais de San Honorato, patrón das panaderías e pastelerías. Será o 27 de maio na Casona da Torre. O evento contará con actos abertos ao público: unha exhibición do alumnado do CIFP Manuel Antonio, enfocada en potenciar a formación, e unha conferencia do xornalista e divulgador Ibán Yarza.

– A alcaldesa, Digna Rivas, destacou os actos de recoñecemento a persoas do sector, especialmente a homenaxe póstuma a JesúsTroiteiro, da Panadería Nosa Señora da Peneda, así como o recoñecemento ás mulleres do sector: “Foron o motor invisible que sostiña os fornos e sen o seu traballo non se entendería a excelencia da nosa terra”.

O Concello de Redondela foi elixido como a sede provincial para acoller a celebración de San Honorato 2026, o patrón dos panadeiros e panadeiras e das pastelerías. A alcaldesa de Redondela, Digna Rivas, xunto co presidente da Asociación Provincial de Industriais Panadeiros e Pasteleiros de Pontevedra (APROINPPA), Francisco Sánchez, o secretario, Antonio del Río, e a concelleira de Cultura, Rita Pérez, presentaron hoxe os detalles desta xornada que porá en valor a tradición e o futuro do sector.

A alcaldesa amosou a súa gratitude á asociación por elixir Redondela como sede dunha xornada tan importante e destacou o arraigo que o oficio do pan ten no municipio. Todos os actos concentraranse o vindeiro mércores 27 de maio na Casona da Torre, no que se reunirán máis dun cento de panadeiros e panadeiras. O evento contará cunha axenda completa que conxuga a aprendizaxe técnica co recoñecemento profesional.

A xornada comezará con dúas actividades abertas ao público en xeral. Ás 12.15 horas comezará unha exhibición a cargo do alumnado do CIFP Manuel Antonio de Vigo, enfocada en potenciar a formación e o relevo das novas xeracións de panadeiros e pasteleiros. Ás 13.00 horas o recoñecido autor, xornalista e divulgador da cultura do pan, Ibán Yarza, ofrecerá unha conferencia.

As actividades da tarde están reservadas aos socios, e centrarase nos tradicionais recoñecementos a persoas vinculadas ao sector. Entre os homenaxeados deste ano estará, a título póstumo, Jesús Troiteiro, da Panadería Nosa Señora da Peneda. Rivas salientou que se trata dun negocio familiar que chega á cuarta xeración “como referente de traballo e bo facer na parroquia do Viso”. Tamén se fará un recoñecemento público ás mulleres panadeiras e pasteleiras. A alcaldesa salienta esta posta en valor do traballo feminino por parte da asociación, xa que as mulleres “foron o motor invisible que sostiña os fornos e sen o seu traballo non se entendería a excelencia da nosa terra”.

A xornada rematará cun peche festivo cos cómicos Pedro Galocha e Jonathan Seoane.

La entrada Redondela reúne ás panaderías da provincia nunha xornada de formación e homenaxes se publicó primero en Concello de Redondela.

– A Alameda Castelao acolleu onte o VI Torneo Intercentros “Xadrez na Rúa”, que congregou a un total de 382 xogadores e xogadoras procedentes de 15 colexios e institutos. A alcaldesa, Digna Rivas, sinalou que este torneo demostra que o xadrez é “unha ferramenta educativa excepcional para aprender estratexia, respecto e convivencia fóra das aulas”. O certame está coordinado por Miguel Ángel Vidal, mestre do IES Floriani, coa colaboración do Concello de Redondela. 

No acto, ademais da rexedora local, tamén estiveron presentes o concelleiro de Deportes, Antonio Cabaleiro, e o concelleiro de Ensino, Alberto Álvarez, que acompañaron aos escolares durante o desenvolvemento das partidas e a posterior entrega de premios. O torneo contou coa participación de centros de Redondela e concellos veciños: CEIP Quintela, CEIP Reboreda, CEIP Cedeira, CEIP Alexandre Bóveda, CEIP Porto Cabeiro, CEP Santa Mariña, CEIP Outeiro das Penas, Colexio Vigo, IES Mendiño, IES San Simón, IES Pedro Floriani, IES Chapela, IES Soutomaior, e os dous centros de Tui, o IES Indalecio Pérez Tizón e o IES San Paio.

A alcaldesa de Redondela, Digna Rivas, amosou a súa satisfacción polo éxito de convocatoria desta sexta edición. “Ver a Alameda Castelao chea de mocidade compartindo unha xornada en torno ao xadrez é un orgullo para o noso municipio. Este torneo demostra que o xadrez é unha ferramenta educativa excepcional para aprender estratexia, respecto e convivencia fóra das aulas”, destacou a rexedora.

A xornada destacou polo alto nivel competitivo. Na categoría de Educación Primaria, o CEIP Outeiro das Penas fixo pleno ao copar o podio. O primeiro posto foi para Gorka Leirós, seguido de Daniel Ivanov en segunda posición e Romero Correa no terceiro lugar.

Na categoría de Educación Secundaria (ESO), o triunfo individual quedou en Redondela grazas a Andrés Ojea, do IES Mendiño, que se proclamou campión. O segundo e o terceiro posto viaxaron a Tui, correspondendo a Telmo Pazo e Martín Iglesias, ambos alumnos do IES Indalecio Pérez Tizón.

A organización subliñou que a participación neste torneo seguiu a tónica habitual deste deporte, cunha presenza maioritariamente masculina. Respecto a este feito, a alcaldesa incidiu no compromiso do goberno local por reverter esta situación: “Sabemos que a fenda de xénero no xadrez é unha realidade xeral. Por iso, iniciativas como o sorteo de libros Miradas de Campeonas buscan dar referentes ás nosas nenas, visibilizar o talento feminino na historia deste deporte e animalas a participar con forza e sen complexos”.

La entrada Preto de 400 estudantes participan no VI “Xadrez na Rúa” na Alameda Castelao se publicó primero en Concello de Redondela.