– O evento deportivo reuniu onte a uns 450 atletas masculinos e femininos, desde os máis novos ata veteranos de máis de 70 anos de idade. O centro da vila convertiuse onte nunha verdadeira festa do atletismo galego. O público ateigou as rúas na contorna da Casa do Concello.

Redondela viviu onte unha auténtica festa do atletismo co XVII Campionato Xunta de Galicia de Milla en Ruta e 1 Km. Nesta proba, unha das máis relevantes do calendario oficial da Federación Galega de Atletismo, participaron uns 450 corredores e corredoras de todas as idades. Coa organización deste campionato, da man do club local CAR, Redondela reafirma a súa aposta pola promoción da vida saudable e o deporte, converténdose no epicentro do atletismo galego durante esta xornada.

Consulta aquí todos os resultados da proba: Resultados

La entrada Éxito do autonómico de un Km e Milla disputado en Redondela se publicó primero en Concello de Redondela.

– A tiradora do club MeigArco fíxose co ouro no Campionato de España de Sala de arco na modalidade longbow. No seu palmarés figuran tamén dous campionatos estatais, en equipo mixto e individual en anos anteriores, así como numerosos podios en probas autonómicas.

– A alcaldesa, Digna Rivas, sinalou que é “un exemplo” dos resultados que se acadan “con traballo e disciplina”. Mónica Ledo amosouse “moi ilusionada” por este recoñecemento. A próxima cita para a tiradora será na casa, cunha proba en Reboreda o 18 de abril organizada polo club MeigArco.

O Concello de Redondela celebrou onte a recepción á deportista de tiro con arco Mónica Ledo, do club MeigArco de Redondela. A tiradora acaba de gañar a medalla de ouro no Campionato de España de Sala de arco na modalidade longbow en categoría sénior feminina. Ledo, de 50 anos, recibiu o diploma “Orgullo redondelán” e a insignia do Concello de mans da alcaldesa, Digna Rivas, e o concelleiro de Deportes, Antonio Cabaleiro, como recoñecemento polo seu traballo e méritos deportivos a nivel estatal. A deportista, que comezou a practicar tiro con arco en 2015, amosouse “moi ilusionada” por este recoñecemento por parte do Concello nun deporte minoritario “no que o adestramento psicolóxico é case máis importante que o físico”. No palmarés de Mónica Ledo figuran outros dous ouros estatais, un no campionato de España ao Aire Libre de 2022 en categoría individual e no 2021 en equipo mixto, así como numerosos podios noutras edicións estatais e en campionatos autonómicos.

A alcaldesa destacou sinalou que Mónica é “un exemplo” dos grandes resultados que se acadan “con traballo e disciplina”. Tanto Rivas como Cabaleiro interesáronse polas próximas citas deportistas de Ledo e o club MeigArco e desexáronlle moita sorte para as citas autonómicas e estatais. A próxima competición será en Reboreda o 18 de abril cunha proba ao aire libre.

La entrada O Concello outorga a Mónica Ledo o recoñecemento “Orgullo redondelán” se publicó primero en Concello de Redondela.

– O evento deportivo, que reunirá a elite do atletismo autonómico, celebrarase o domingo 12 de abril no centro urbano, cun percorrido con saída e meta na Casa do Concello que garante espectáculo e proximidade co público.

– A alcaldesa, Digna Rivas, destaca que “a proba non vai defraudar” e convida a veciñanza a vivir esta festa do deporte na que participarán centos de atletas de todas as idades, tanto nenos e nenas como categorías absolutas e veteranos.

O Concello de Redondela reafirma o seu compromiso co deporte de alto nivel ao presentar esta mañá o XVII Campionato Xunta de Galicia de Milla en Ruta e 1 Km, que terá lugar no municipio o vindeiro 12 de abril. A presentación oficial celebrouse hoxe no Concello, coa presenza de representantes municipais, da Federación Galega de Atletismo, da Xunta de Galicia e da Asociación Deportiva C.A.R. de Redondela.

A alcaldesa, Digna Rivas, destacou o orgullo que supón para o municipio acoller esta competición, declarando que “Redondela será a capital galega do atletismo e esta proba non vai defraudar”. Rivas subliñou a importancia de levar o deporte ás rúas, anticipando que “a veciñanza sairá á rúa para esta festa do deporte, cunha gran participación de atletas do CAR”. Pola súa banda, Antonio Cabaleiro, Concelleiro de Deportes, salientou o alto nivel técnico da proba e o traballo realizado para o deseño do circuíto.

Un espectáculo deportivo no corazón da vila

O Campionato Xunta de Galicia de Milla e 1 Km en Ruta é unha das probas máis relevantes do calendario oficial da Federación Galega de Atletismo. A diferenza das competicións en pista, este formato en ruta transcorre por espazos urbanos pechados ao tráfico e permite un contacto directo coa cidadanía, aumentando o atractivo e a interacción co público. O ten o seu centro neurálxico na Casa Consistorial, onde se atopa a saída e a meta. O percorrido realizarase entre as rúas Alfonso XII, Ribeira e Xeneral Rubín. Os atletas da distancia de Milla darán 3 voltas, mentres que os de 1 km darán 2 voltas ao circuíto, garantindo un espectáculo rápido e intenso.

Á presentación asistiron, ademais da alcaldesa e o concelleiro de Deportes,o presidente da Federación Galega de Atletismo, Iván Pablo Sanmartín, e David Posada, delegado en Vigo da Federación, Blanca García-Señoráns, Directora Territorial da Consellería de Presidencia, Xustiza e Deportes e Ana María Romasanta, presidenta da Asociación Deportiva C.A.R. de Redondela. Coa organización deste campionato, Redondela reafirma a súa aposta pola promoción da vida saudable e o deporte, converténdose no epicentro do atletismo galego durante esta xornada.

La entrada Redondela, capital galega do atletismo co Campionato de Milla e KM en Ruta se publicó primero en Concello de Redondela.

Recreación da reforma no entorno do CEIP Porto Cabeiro que se aprobou no pleno de febreiro

– O pleno da corporación aprobou esta semana unha partida de 2,7 millóns para o plan de mellora dos camiños municipais cos votos de PSdG-PSOE, AER e PP, malia o voto en contra do BNG. Tamén saíu adiante por unanimidade a proposta do goberno local para transformar a contorna do CEIP Porto Cabeiro, cun investimento de 401.700 euros, e a reforma do campo municipal da Gándara, no Viso, por importe de 469.000 euros, coa abstención do BNG e o voto favorable do resto dos grupos. O proxecto do novo Museo Municipal destinado a albergar a obra de Ángel Barros non foi aprobado ao votar en contra os grupos municipais de PP e BNG. 

O pleno da corporación aprobou onte tres importantes propostas do goberno local, cun investimento total de 3,6 millóns de euros. O proxecto máis ambicioso é o plan de mellora e renovación de 68 camiños municipais de todas as parroquias, cunha partida de 2.759.339. Este programa de actuación aprobouse cos votos do PSdG-PSOE, AER e PP, malia o voto en contra do BNG. A alcaldesa, Digna Rivas, agradeceu o apoio dos populares neste punto, xa que se trata dunha inversión “extraordinaria” que responde ás necesidades de cada unha das parroquias “especialmente en materia de accesibilidade, seguridade viaria e cohesión territorial”. O concelleiro de Infraestruturas e Sostibilidade, Roberto Villar, lembra que as obras que recolle este plan “foron aprobadas por unanimidade en todos os Consellos Parroquiais e responden as demandas dos propios representantes veciñais”.

Na sesión celebrada na noite do xovesnoite tamén se aprobou, neste caso por unanimidade, a transformación do entorno do CEIP Porto Cabeiro. A reforma deste espazo, de case 3.0000 m² , será unha gran mellora para os barrios de Porto Cabeiro e A Millarada. Rivas explica que o obxectivo prioritario é “transformar un espazo actualmente dominado polos vehículos nun hábitat saudable, inclusivo e, sobre todo, seguro para a infancia”.

A reforma integral do campo de fútbol municipal da Gándara, no Viso, aprobouse cos votos do PSdG-PSOE, AER e PP, e coa abstención do BNG. A remodelación do campo incluirá unha nova base con asfaltado, o cambio do céspede e melloras na drenaxe e o rego. Rivas explica que o proxecto orixinal presentaba “importantes eivas na base do terreo de xogo, que agora deben emendarse”. O investimento , de 469.280 euros, asegura a viabilidade das instalacións cun estado óptimo “tanto agora como no futuro”.

Os votos negativos dos grupos da oposición impediron sacar adiante o proxecto do novo Museo Municipal destinado a albergar a obra de Ángel Barros. Esta agardada instalacións está incluída no PAI (Plan de Acción Integral) e conta con financiamento de Fondos Europeos. O novo edificio está proxectado no espazo das coñecidas como “vivendas dos mentres”, na avenida Mendiño. A rehabilitación do edificio e a súa musealización ascenden a 1.167.000 euros, dos que os Fondos Europeos cobren o 60%, e a cantidade restante, 466.800 euros, deben ser financiados polo Concello. A proposta do goberno local de financiar a obra con fondos do remanente de 2025 foi rexeitada polos grupos do PP e BNG.

O goberno de Rivas presentaba no pleno de febreiro investimentos por un valor superior aos 4 millóns de euros, a financiar con fondos propios procedentes do remanente de Tesourería, que ascende a 5,6 millóns. Finalmente aprobáronse tres das catro propostas, por un importe total de 3.630.319 euros.

La entrada O Concello de Redondela aproba investimentos por máis de 3,6 millóns de euros se publicó primero en Concello de Redondela.

– O Concello de Redondela levará ao Pleno desta noite a reforma integral do campo de fútbol da Gándara, no Viso, que incluirá unha nova base con asfaltado de toda a superficie, o cambio do céspede e melloras na drenaxe e o rego. Rivas explica que o proxecto orixinal presentaba “importantes eivas na base do terreo de xogo, que agora deben emendarse”.

-Os informes técnicos alertan de que o desgaste da base e a superficie actual “comprometen a seguridade dos xogadores e xogadoras”. Na sesión plenaria debaterase un investimento de 469.280 euros, a financiar con fondos propios, para asegurar a viabilidade das instalacións cun estado óptimo “tanto agora como no futuro”.

O Concello de Redondela presenta un proxecto para a reforma integral do Campo de Fútbol da Gándara, en Tuimil, na parroquia do Viso. A decisión do goberno local responde á necesidade urxente de intervir nunha instalación que presenta “un avanzado estado de deterioración, malia levar pouco tempo construída”, sinala a alcaldesa Digna Rivas. Segundo os informes técnicos, o terreo de xogo sofre deficiencias significativas tanto no céspede sintético como na súa base estrutural, o que afecta directamente á calidade do xogo e, fundamentalmente, á seguridade das persoas usuarias. Os expertos advirten que o sistema estrutural inferior “xa non garante unha superficie óptima, o que provoca irregularidades no terreo e problemas de drenaxe que aumentan o risco de lesións”.

A actuación proposta polo Concello non será un simple parche, senón unha renovación integral que incluirá a retirada completa da manta actual e da base elástica, a renovación da base con asfaltado de toda a superficie, novo céspede sintético de última xeración e melloras en canaletas, drenaxes, barandas, redes e sistemas de rego. A actuación, orzamentade en 469.280 euros, financiarase con fondos propios do Remanente de Tesouraría, para o que levará á aprobación do pleno ordinario deste mes . Dende o goberno local subliñan que o campo da Gándara “é unha peza esencial” para o tecido social de Redondela, sendo utilizado habitualmente por clubs e escolas deportivas. “Non actuar agora suporía un encarecemento futuro das obras e, o que é máis grave, a posible inutilización da instalación, prexudicando a centos de mozos e mozas”, sinala Rivas.

Rivas explica que o proxecto orixinal, realizado en 2017 polo anterior goberno, presentaba “importantes eivas, sobre todo na base da superficie baixo o terreo de xogo, e agora deben emendarse”. A actuación contratada “non se axustaba ás necesidades do terreo e das condicións meteorolóxicas da zona”. Segundo os técnicos, o material máis axeitado para este tipo de terreo, pola súa climatoloxía, sería unha base de asfalto. Pero o proxecto realizado estableceu que o firme fose de xabre, “o que está a xerar problemas de drenaxe baixo o céspede e provoca graves irregularidades no firme”.

La entrada Reforma integral no Campo da Gándara para garantir a seguridade e calidade deportiva se publicó primero en Concello de Redondela.

A alcaldesa, Digna Rivas, e o concelleiro de Ensino, Alverto Álvarez, na presentación da campaña “Unha semaniña enteira” no IES Chapela

– Centros de ensino, Anpas, clubs deportivos, asociacións, comercio e bibliotecas, entre outros colectivos, súmanse ao reto “Unha semaniña enteira” para promover o uso do galego entre a mocidade na semana que celebramos o Día de Rosalía.

– A alcaldesa, Digna Rivas, presentou a campaña no IES Chapela xunto con membros de centros de ensino participantes, a Asociación de Empresas, clubs e Escola de Música de Chapela. A programación contará con teatro, concertos, conferencias e charlas para a promoción da lingua galega.

O IES Chapela acolleu onte a presentación dos actos vencellados á celebración do Día de Rosalía. Un ano máis ponse en marcha o reto “Unha semaniña enteira”, unha iniciativa impulsada polos institutos de Redondela á que se suma o Concello de Redondela e cada vez máis sectores da sociedade. Este reto promove o uso do galego oral durante as 24 horas do día, os sete días da semana, do 20 ao 27 de febreiro. Participa toda a comunidade educativa do municipio, tanto centros de Infantil como de Primaria e Secundaria. Para arroupar esta campaña o Concello distribuirá 3.500 chapas feitas pola Asociación Lenda de Saúde Mental, colectivo ao que Rivas agradeceu “a súa implicación dende o inicio e o seu compromiso co idioma”. Como en edicións anteriores é tamén moi significativa a participación dos clubs deportivos, que promoverán o uso do galego oral para darlle continuidade á campaña “xa que moitos alumnos e alumnas practican algún deporte nos equipos locais”. As Bibliotecas Municipais e a Escola de Música de Chapela súmanse tamén ao reto.

Participación do comercio e a hostalaría

A alcaldesa, Digna Rivas, explicou que desde o Concello o obxectivo foi sempre implicar nesta campaña a distintos sectores da sociedade. Nesta ocasión deuse un impulso ao galego no comercio, coa colaboración da Asociación de Empresas. Repartiranse 1.000 bolsas de papel co logo de Rosalía destinadas aos establecementos de Chapela, e tamén marcapáxinas e unha camelia. Durante toda a semana, a hostalaría participante ofrecerá pratos relacionados con Rosalía, a súa obra ou inspirados na súa literatura. Os comensais que acudan a estes establecementos poderán optar a un sorteo do libro “Rosalía e a cociña”. Rivas agradeceu a implicación de todos os colectivos neste reto “par fomentar entre todos e todas o uso do galego entre a infancia e a mocidade”.

La entrada Ensino, deporte e comercio promoven o galego entre a rapazada “Unha semaniña enteira” se publicó primero en Concello de Redondela.

O Concello de Redondela acolleu onte a recepción a Guillermo García Alonso . O deportista acadou esta temporada grandes éxitos a nivel nacional e autonómico quedando 1º na Copa de España de ciclocross 2025/26 en categoría cadete, 1º no Campionato galego de XCO 2025 en categoría cadete e 3º no Campionato de España de ciclo cross 2025/26 en categoría cadete.

Guillermo recibiu o diploma “Orgullo redondelán” e a insignia do Concello de mans da alcaldesa, Digna Rivas, e do concelleiro de Deportes, Antonio Cabaleiro, como “recoñecemento e homenaxe polo seu traballo e méritos deportivos”. Para a alcaldesa é “un luxo” que este municipio conte con deportistas “ao máis alto nivel no ciclo cross e augúrolle “moitos éxitos” no futuro a Guillermo García que con tan só 15 anos destaca no panorama galego e estatal “como unha firme promesa do deporte”. Guillermo García conta cun gran palmarés desde o ano 2024 ata o día de hoxe:

-1º Copa Galicia de XCO 2024 en categoría infantil.

-1º Campionato galego de XCO en 2024 en categoría infantil.

-1º Campionato de España XCO 2024 en categoría infantil.

-1º Campionato galego de DH 2024 en categoría infantil.

-1º Copa Galicia de ciclo cross 2024/25 en categoría cadete.

-2º Campionato de Galicia de ciclo cross 2024/25.

-1º Copa Galicia de XCO 2025 en categoría cadete.

-1º Campionato galego de XCO 2025 en categoría cadete.

-1º Copa de España de ciclo cross en 2025/26 en categoría cadete.

-3º Campionato de España de ciclo cross 2025/26 en categoría cadete.

O acto de homenaxe celebrouse no antigo salon de plenos e particiaron tamén o pai do deportista, David García, e o voceiro do BNG na Corporación Municipal, Xoán Carlos González.

La entrada O Concello outorga a Guillermo García o recoñecemento “Orgullo redondelán” se publicó primero en Concello de Redondela.

– O proxecto para a reforma do Pavillón Municipal de Reboreda inclúe a renovación total da pista deportiva, que será de tarima, a reforma dos vestiarios e a mellora da accesibilidade cun novo acceso desde o exterior. A reforma ascende a 388.000 euros e transformará un espazo obsoleto nun complexo deportivo de vangarda.

– A alcaldesa, Digna Rivas, sinala que o obxectivo é ofrecer á veciñanza unhas instalacións “modernas, eficientes e cómodas”. O pavillón municipal forma parte do día a día da parroquia, xa que é empregado tanto polos clubs locais como polo alumnado do CEIP Reboreda, ao carecer o centro de instalacións deportivas propias.

O Concello de Redondela presenta o proxecto para as obras de reforma e modernización do pavillón municipal de Reboreda por un importe de 388.000 euros. As obras centraranse en tres eixos principais: a renovación da pista deportiva coa instalación de tarima que garanta a seguridade dos deportistas e optimice a práctica das distintas disciplinas; a modernización dos vestiarios cunha reforma integral das zonas de cambio e aseo, mellorando o confort e a eficiencia enerxética; e a mellora da accesibilidade coa creación dunha nova entrada desde o exterior para garantir a mobilidade e mellorar a experiencia do público que acode a presenciar os eventos. Tamén se reformará o almacén para facelo máis operativo e renovarase toda a instalación eléctrica.

A alcaldesa, Digna Rivas, explica que actualmente as instalacións “están deterioradas polo paso do tempo e a pista non reúne boas condicións para a práctica deportiva”. Por outra banda, os vestiarios están “obsoletos” e “non son accesibles para persoas con mobilidade reducida”. Tras a reforma Reboreda contará complexo deportivo “totalmente renovado, eficiente e acorde ás necesidades do século XXI”, afirma Rivas.

O pavillón de Reboreda é unha peza fundamental ns vida da parroquia xa que as súas instalacións son empregadas polos clubs de fútbol sala Casa Paco, Campito e Redondela, ademais de Meigarco. O pavillón municipal é empregado tamén a diario polo alumnado do CEIP de Reboreda para realizar a actividade de Educación Física, ao carecer o centro de instalacións deportivas propias da Consellería de Ensino.

Con este proxecto o Concello reafirma o seu compromiso co deporte base e a educación, asegurando que rapazada e adultos dispoñan de instalacións cómodas e seguras. “Queremos que usuarios e público desfruten dun pavillón funcional, eficiente e moderno para toda a parroquia”, sinalan dende o Concello.

A nova pista de tarima de madeira deportiva instalarase sobre compoñentes elásticos específicos para este tipo de instalacións. Os vestiarios serán totalmente renovados e contarán cunha cabina adaptada para persoas con mobilidade reducida. A mobilidade mellorará cun novo acceso desde o exterior para evitar que o público teña que entrar polo corredor de vestiarios. Nesta nova porta crearase unha pequena rampla para facer a entrada máis accesible. Co obxectivo de mellorar a iluminación e facela máis sostible, o proxecto inclúe a renovación de toda a instalación eléctrica, con novo cableado e iluminación con tecnoloxía LED de baixo consumo. A reforma do pavillón contempla tamén a división do almacén en tres espazos independentes para facelo máis operativo. O proxecto presentouse ao III Plan Extraordinario de Infraestruturas Deportivas da Deputación de Pontevedra para acadar o financiamento necesario.

La entrada O Concello proxecta a reforma do pavillón de Reboreda para modernizar as súas instalacións se publicó primero en Concello de Redondela.

Antonio Cabaleiro, Digna Rivas e Ramón Castro nas instalacións do campo de Santa Mariña

– Comezaron os traballos de reforma no Campo Municipal de Santa Mariña que consistirán na renovación integral dos vestiarios, almacén e outras instalacións. Os traballos ascenden a 249.386 euros que se financian co II Plan de Infraestruturas Deportivas da Deputación. O proxecto inclúe a substitución de toda a iluminación actual por tecnoloxía LED nos campos de fútbol e pistas de tenis anexas, o que suporá un aforro de máis de 30.000 euros ao ano.

– Digna Rivas salienta que se trata dunhas instalacións “totalmente obsoletas, con décadas de antigüidade e nun estado de conservación pésimo, xa nunca se realizaron traballos de mellora”. Esta reforma é “moi necesaria para os preto de 300 rapaces e rapazas que utilizan estas instalacións e que merecen uns vestiarios modernos, dignos e que cumpran coas súas necesidades”.

A alcaldesa, Digna Rivas, e o concelleiro de Deportes, Antonio Cabaleiro, visitaron o Campo de Fútbol Municipal de Santa Mariña xunto a Ramón Castro, da directiva do CD Choco. Os traballos de reforma xa comenzaron para acometer a renovación integral dos vestiarios, oficinas e almacén, así como unha nova iluminación LED. Estas instalacións municipais presentaban un estado de conservación pésimo, xa que teñen varias décadas de antigüidade e ata o de agora nunca se realizaran traballos de mellora. Digna Rivas salienta que se trata dunhas obras “moi necesarias” para os preto de 300 rapaces e rapazas que utilizan estas instalacións “e que merecen uns vestiarios modernos, dignos e que cumpran coas súas necesidades”.

A reforma incluirá todos os vestiarios, aseos e lavabos, a sala de fisioterapia, zona da lavandaría, sala de caldeira, local social e almacén. Instalarase un novo pavimento, tamén novas xanelas e portas que permitirán un illamento óptimo, renovarase toda a instalación de fontanaría e impermeabilizarase a cuberta para evitar filtracións.

Aposta pola eficiencia enerxética

O proxecto de reforma inclúe a substitución de toda a iluminación dos campos de fútbol e as pistas de tenis anexas por tecnoloxía LED máis eficiente. Isto vai permitir unha importante redución no consumo eléctrico cun aforro de máis de 30.000 euros anuais. A alcaldesa explica que este proxecto vai na liña da estratexia do Concello, que aposta pola eficiencia enerxética, un plan que xa se vén aplicando nos últimos anos. En 2024 renovouse o sistema de iluminación nos cinco pavillóns municipais, cun aforro medio de 15.000 euros ao ano na factura eléctrica grazas á iluminación LED.

O proxecto de reforma no Campo de Fútbol de Santa Mariña está valorado en 249.386 euros, e finánciase co II Plan de Infraestruturas Deportivas da Deputación de Pontevedra.

La entrada En marcha as obras dos novos vestiarios e iluminación no campo municipal de Santa Mariña se publicó primero en Concello de Redondela.

– Deportistas de todas as idades daranse cita o próximo sábado, día 20, en Redondela na V Carreira Popular Infantil e a IV Contrarreloxo por equipos. As dúas citas, organizadas polo Concello en colaboración co club de atletismo CAR, celébranse a partir das 18.00 horas coa proba infantil e ás 20.00 coa contrarreloxo. O prazo de inscrición para as dúas carreiras está aberto ata este mércores, día 17 de setembro, na páxina web de Cronotec.

– A alcaldesa de Redondela, Digna Rivas, e o concelleiro Antonio Cabaleiro presentaron esta cita deportiva que coincide co 13º aniversario do CAR, xunto aos directivos do club Pilar Nieto, Gabriel Corugeira e a presidenta Ana Romasanta. Tanto desde o Concello de Redondela como desde o club animan aos amantes do atletismo a sumarse a este evento para gozar dunha xornada de deporte e convivencia.

Deportistas de todas as idades daranse cita o próximo sábado, día 20, en Redondela coa V Carreira Popular Infantil e a IV Contrarreloxo por equipos. As dúas citas, organizadas polo Concello en colaboración co club de atletismo CAR, celébranse a partir das 18.00 horas coa proba infantil e ás 20.00 coa contrarreloxo. O prazo de inscrición para as dúas carreiras está aberto ata este mércores, día 17 de setembro, na páxina web de Cronotec.

Esta nova edición da carreira popular infantil está dirixida a nenos e nenas nacidos entre o 2010 e o 2023. A rapazada terá que percorrer diferentes distancias dependendo das súas idades. Así, a distancia da carreira será de 50 metros para os máis pequenos até os 2.300 metros para os maiores. A partir das 18.00 horas comezarán as carreiras na rúa Alfonso XII. A meta estará situada na mesma rúa, fronte á Casa do Concello.

Tamén está aberto o prazo de inscrición para a IV Carreira Contrarreloxo por Equipos que se celebrará na mesma xornada a partir das oito da tarde. Os equipos deberán estar formadas por entre 4 e 6 compoñentes. No caso dos equipos mixtos, un mínimo de 2 compoñentes terán que pertencer ao xénero contrario. O percorrido terá unha distancia de 5.000 metros que comezará no centro da vila e rematará diante do Concello, onde estará situada a meta. A inscrición inclúe os gastos de xestión e o prezo é de 8,50 euros.

Na proba infantil, a tres días de que pechen as inscricións, hai reservas de máis de 160 participantes, mentres que na contrarreloxo hai anotados máis de 70 corredores.

A alcaldesa de Redondela, Digna Rivas, e o concelleiro Antonio Cabaleiro presentaron esta cita deportiva que coincide co 13º aniversario do CAR, xunto aos directivos do club Pilar Nieto, Gabriel Corugeira e a presidenta Ana Romasanta. Tanto desde o Concello de Redondela como desde o club animan aos amantes do atletismo a sumarse a este evento para gozar dunha xornada de deporte e convivencia.

La entrada Redondela acolle a V Carreira Infantil e a IV Contrarreloxo por equipos se publicó primero en Concello de Redondela.

Esta fin de semana rematou o VII Aberto de Tenis e Pádel 2025 de Redondela, Memorial Sesé López. O torneo, organizado polo Concello de Redondela, disputouse nas pistas municipais coa colaboración do club Tenis e Pádel Redondela. A cita reuniu a 220 deportistas, o que supón un éxito total de participación. Os concelleiros Antonio Cabaleiro e Rita Pérez Táboas foron os encargados de entregar os trofeos.

Achegamos o listado de gañadores e gañadoras nas distintas categorías:

TENIS

DOBLES FEMININO:

2º.- María Arellano e Patricia Rodríguez

1º.- Vera Graña e Susana Varela

DOBLES MASCULINO:

2º.- Emilio Argibay e Miguel Bas

1º.- Eloy González e Cristian Pérez

DOBLES MIXTO

2º.- Susana Varela e Ricardo Troncoso

1º.- María Pazó e Alexandre Pérez

ABSOLUTO MASCULINO

2º.- Emilio Argibay

1º.- Alexandre Pérez

PÁDEL

2ª MIXTO

2º.- Nerea Bouzón e Lino Casal

1º.- Sonia Vidal e Jacobo Morterero

1ª MIXTO

2º.- Inés Domínguez e Adrián Fontenla

1º.- Raquel Freire e Marcos Vidal Carou

3ª MASCULINA

2º.- Felipe Álvarez e Gerardo Ramallo

1º.- Fernando Castro e Javier López

3ª FEMENINA

2º.- Rocío Abelleira e Silvia Aguión

1º.- Alba Romero e Paula Amoedo

2ª MASCULINA

2º.- Roberto Rebollo e Óscar Blanco

1º.- Javier Muras e Alexander Senra

2ª FEMININA

2º.- Nerea Bouzón e Carla Piñeiro

1º.- Margarita Ríos e Lupe Fabre

1ª MASCULINA

2º.- Miguel Regueiro e Ricardo Visite

1º.- Fernando Santos e Martín Danis

1ª FEMININA

2º.- Inés Domínguez e Raquel Freire

1º.- Marta Reguera e Paula Reguera

Trofeos das LIGAS SOCIAIS que se disputan ao longo da temporada

LIGA SOCIAL MIXTA TENIS

3º.- Pablo Couñago

2º.- Emilio Argibay

1º.- Roberto Montes

LIGA SOCIAL MASCULINA/MIXTA PÁDEL

3º.- Óscar Blanco e Roberto Rebollo

2º.- Ramón Miguélez e Alejandro Castro

1º.- Lucas Reguera e Mateo Reguera

LIGA SOCIAL FEMININA PADEL

3º.- Maria del Cueto e Noelia Rodríguez

2º.- Silvana Gómez e Guadalupe Fabre

1º.- Soraya Abelenda e Inés Domínguez

Recibiron tamén unha homenaxe os socios fundadores do Club:

Eugenio Ferreira Pérez (falecido) – Recolleu a metopa a súa muller Rosa.

José Ángel López Pérez “Sesé López” (falecido) – Recolleu a metopa súa muller, Piruca, e as súas fillas Chabela e Lucía.

Arsenio Freire Sobral (falecido) – Recolleu a metopa a súa filla Raquel Freire.

Francisco Reboredo Surís.

Alberto Pazos Docampo.

Generoso Muiños Reboredo.

La entrada Máis de 200 participantes no VII Aberto de Tenis e Pádel 2025 de Redondela se publicó primero en Concello de Redondela.

Antonio Cabaleiro, José Manuel Alonso, Digna Rivas e Nemesio Vázquez

Un grupo de cinco veciños e veciñas de Redondela emprenderán esta semana unha expedición ao Mulhacén, en Granada. A alcaldesa, Digna Rivas, e o concelleiro Antonio Cabaleiro, recibiron onte no Concello a José Manuel Alonso e Nemesio Vázquez, quen xunto a Laura Reboreda, Xurxo Alonso e Marisol Piñeiro tentarán facer cumio no pico máis alto da península ibérica, cunha elevación de 3.479 metros sobre o nivel do mar. Os deportistas recibiron de mans da alcaldesa unha bandeira do Concello de Redondela que ondeará no teito da península “se a montaña nos deixa facer cumio”, explicaba José Manuel.

A expedición partirá para Granada o mércores día 14, para aclimatarse e decidir a ruta que tomarán para facer o ascenso “en función das condicións meteorolóxicas”. Teñen previsto subirán á montaña o día 16. Aínda que todos os participantes teñen experiencia no mundo do montañismo, facendo cumio en Pena Trevinca ou no coñecido como “o quilómetro vertical do Caurel”, este ascenso ao Mulhacén vai a ser a montaña máis alta para todos eles. Tanto Rivas como Cabaleiro desexáronlles “toda a sorte do mundo” para disfrutar desta expedición “sen contratempos”

La entrada Sendeiristas redondeláns levarán a bandeira do Concello ao pico máis alto da península se publicó primero en Concello de Redondela.