– A alcaldesa, Digna Rivas, entregou os diplomas que acreditan a súa formación técnica en construción e reparación de redes e aparellos de pesca. A iniciativa, financiada pola Concello cun investimento de 13.000 euros, ofrece ás participantes unha alternativa laboral fronte á crise do marisqueo.

O Concello de Redondela e o Grupo Eurored celebraron hoxe o acto de clausura e entrega de diplomas do curso de formación técnica en redería dirixido a mariscadoras locais. Esta iniciativa pioneira, que contou coa participación de 12 mulleres, remata tras dous meses de intensa aprendizaxe teórica e práctica nas instalacións da empresa redondelá.

As alumnas recibiron o título que certifica os seus coñecementos en construción, montaxe e reparación de artes de pesca. O curso, impartido polo Director Técnico de Grupo Eurored, Javier Blanco, permitiulles dominar desde o uso de materiais e fibras ata cálculos de montaxe e técnicas de corte e confección.

A alcaldesa de Redondela, Digna Rivas, destacou a importancia estratéxica desta iniciativa: “Con esta formación damos un paso fundamental para garantir o futuro laboral das nosas mariscadoras. O sector do marisqueo vive momentos moi difíciles pola elevada mortaldade do marisco e o cambio climático. Con este curso dispoñen dunha alternativa de emprego nun oficio con moita demanda”.

Rivas subliñou que este proxecto, financiado pola área de Igualdade con máis de 13.000 euros, é un exemplo de colaboración público-privada: “Dende o Goberno local fixemos este esforzo porque cremos firmemente na formación como ferramenta de autonomía. Queremos que o traballo artesanal relacionado co mar evolucione cara a unha profesión técnica de alto nivel que poida ser un complemento ou unha saída laboral definitiva para elas”.

Pola súa banda, Blanco amosouse moi satisfeito cos resultados: “As alumnas teñen todos os coñecementos para traballar como redeiras, xa que dominan as técnicas que demanda a frota do sector náutico-pesqueiro para manter en perfecto estado as redes“.

As participantes valoraron moi positivamente esta oportunidade, que lles permita “diversificar” a súa actividade económica, especialmente nun contexto onde o marisqueo a pé está moi limitado pola estacionalidade e as vedas.

Ao acto de clausura tamén asistiron o concelleiro de Emprego, Alberto Álvarez, así como responsables do Grupo Eurored, quen reafirmaron o seu compromiso co fortalecemento do tecido laboral de Redondela.

La entrada Concello e Eurored clausuran un curso que capacita a doce mariscadoras como redeiras profesionais se publicó primero en Concello de Redondela.

Alumnos-traballadores nun obradoiro anterior.

– A alcaldesa de Redondela, Digna Rivas, destacou a importancia desta nova convocatoria porque a prioridade é dar ferramentas á veciñanza para que poida atopar un emprego. “Con ‘Redondela Natureza’ ofrecemos formación de primeiro nivel en sectores con demanda.

– Os alumnos e alumnas traballadores formaranse durante nove meses en carpintería e forestal-xardinería-agricultura, con clases teóricas e prácticas. Os participantes teñen un contrato de traballo desde o primeiro día”.

O Concello de Redondela reafirma o seu compromiso coa formación e o emprego local co lanzamento do novo Obradoiro Dual de Emprego “REDONDELA NATUREZA”. Esta iniciativa, que arrancará o vindeiro mes de xuño, permitirá que 20 persoas en situación de desemprego do municipio accedan a unha formación profesional de calidade combinada co desempeño dun traballo remunerado.

O obradoiro terá unha duración de 9 meses e dividirase en dúas especialidades formativas, con 10 prazas para cada unha. A de Forestal – Xardinería – Agricultura Ecolóxica, centrada en labores forestais, rozas, mantemento de zonas verdes, axardinamentos e produción agrícola; e a de Carpintería, orientada á restauración de mobiliario público e infraestruturas urbanas. As persoas seleccionadas serán contratadas durante 9 meses e percibirán mensualmente o SMI.

Melloras directas no municipio. As actuacións previstas no obradoiro terán un impacto directo no patrimonio e na paisaxe de Redondela. O equipo de Forestal traballará en zonas estratéxicas como o Monte Penide/Mirallo, o Paseo do Río Pexegueiro, Chapela, o Xardín da Leira da Xunqueira, a Alameda (Xeral Rubín), así como en diversas rotondas de Cabanas, Cedeira ou Vilavella, e na horta de Pousadouro. Pola súa banda, o módulo de Carpintería centrarase na restauración de varandas en paseos e na creación de novo mobiliario público para o disfrute da cidadanía.

A alcaldesa de Redondela, Digna Rivas, destacou a importancia desta nova convocatoria: “A nosa prioridade é dar ferramentas á nosa veciñanza para que poida atopar un emprego estable. Con ‘Redondela Natureza’, non só ofrecemos formación técnica de primeiro nivel en sectores con moita demanda, senón que o facemos cun contrato de traballo desde o primeiro día”. Rivas sinalou tamén o beneficio social do proxecto: “O traballo destes 20 alumnos e alumnas vai reverter directamente no coidado de Redondela. Van embelecer os nosos xardíns, protexer os nosos montes e restaurar elementos públicos, demostrando que o emprego verde é un dos grandes motores de futuro para o noso concello”.

As persoas interesadas deberán inscribirse na oficina de emprego de Redondela que lles corresponda do Servizo Público de Emprego de Galicia.  O Concello realizará o proceso de selección coas persoas preseleccionadas pola oficina de Emprego.

O proxecto conta cunha subvención de 454.552,00 euros concedida pola Consellería de Emprego, Comercio e Emigración da Xunta de Galicia, á que o Concello de Redondela suma unha achega municipal de 47.680,50 euros. En total, o investimento destinado a mellorar a empregabilidade dos veciños e veciñas ascende a 502.232,50 euros.

La entrada O Concello pon en marcha o obradoiro dual “Redondela natureza” para formar a 20 persoas en carpintería e xestión forestal se publicó primero en Concello de Redondela.

Recreación do futuro Viveiro de Empresas de Redondela

– O Consorcio licitará antes do verán o proxecto de rehabilitación da antiga casa de Ponte da Lima que albergará o novo centro empresariaL, iniciativa na que van da man a Zona Franca e o Concello de Redondela. Zona Franca recibiu o informe positivo de Patrimonio da Xunta ao proxecto, que era o trámite que se agardaba para poder avanzar.

– A alcaldesa de Redondela, Digna Rivas, destacou que é “unha moi boa nova para o Concello e para toda a cidadanía de Redondela”, porque este proxecto tan importante para a vila está “máis preto de facerse realidade?. Rivas agradeceu ao delegado do Estado na Zona Franca o seu compromiso con Redondela porque este Centro de Negocios e Viveiro de Empresas suporá “un impulso aos novos emprendedores e as pemes”.

A Zona Franca de Vigo sacará a licitación no primeiro semestre deste ano o proxecto de rehabilitación da antiga casa situada na Praza de Ponte da Lima, coñecida popularmente como Praza da Petanca, un inmoble icónico que albergará o futuro Centro de Negocios e Viveiro de Empresas da vila. Zona Franca recibiu o informe positivo de Patrimonio da Xunta de Galicia ao proxecto, que era o trámite que se agardaba para poder avanzar. O espazo, que atenderá os estándares de calidade, sostibilidade, accesibilidade e eficiencia enerxética, será un complexo de emprendemento para dar resposta á demanda do tecido empresarial e facilitará “un maior e mellor servizo ás persoas emprendedoras”.

O CZFV, que asumirá o custo do futuro Centro de Negocios cun investimento estimado de 1,3 millóns de euros, xa solicitou a licenza de obra ao Concello de Redondela e, unha vez obtida, licitará as obras que poderían comezar a final de ano. A redacción do proxecto estivo a cargo da UTE formada por Díaz e Díaz Arquitectos S.L.P. e Castroferro Arquitectos S.C.P. co obxectivo de volver pór en valor unha edificación singular cun marcado carácter representativo dunha época, dotándoa dun novo uso para volver pola no foco de actividade da vila. Contempla que o Centro e Viveiro dispoña, entre outras instalacións, de salas de reunións, salas de usos múltiples para coworkings, ou espazos para contido cultural/expositivo. O delegado do Estado, David Regades, sinalou que “imos en prazo, e unha vez conseguido o visto e prace de Patrimonio ao proxecto básico, temos o camiño aberto”. Lembrou a ampla experiencia de Zona Franca na área de emprendemento “con viveiros, incubadoras e aceleradoras de start-ups que actualmente son referentes en todo o Estado”, e mostrouse optimista “coa gran oportunidade que se lles dá ás persoas emprendedoras e á capacidade de atracción de Redondela como centro empresarial: facilítanselles espazos, apóstase polo seu talento, e serán asesorados por persoal especializado”. O obxectivo é claro, dixo Regades, “seguir impulsando a economía, xerando emprego e incrementando a colaboración público-privada”.

A alcaldesa de Redondela, Digna Rivas, destacou que “é unha moi boa nova para ou Concello e para toda a cidadanía de Redondela, porque este proxecto tan importante para a vila está máis preto de facerse realidade”. Rivas agradeceu ao delegado do Estado na Zona Franca o seu compromiso con Redondela porque este Viveiro de Empresas suporá “un impulso aos novos emprendedores e as pemes. En pouco tempo veremos xa a transformación deste edificio tan emblemático”.

Unha vez que finalicen as obras do Centro de Negocios, a Zona Franca seguirá colaborando co Concello na dinamización das instalacións. Será o Concello quen asuma a xestión do Viveiro, de iniciativa e promoción municipal, fixará os criterios de acceso para a selección dos proxectos nos que priorizará as propostas máis innovadoras e as que máis postos de traballo poidan crear, determinará o regulamento de funcionamento ou as tarifas. Encargarase tamén do mantemento do edificio, horarios, servizos ou ingresos, así como do persoal, que dependerá directamente do Consistorio. A Zona Franca tamén disporá dun espazo de atención para as persoas emprendedoras e colaborará na selección das persoas usuarias.

La entrada Zona Franca avanza no proxecto do Viveiro de Empresas de Redondela se publicó primero en Concello de Redondela.

– A alcaldesa de Redondela, Digna Rivas, e o director técnico de Eurored, Javier Blanco, presentaron unha formación pioneira de elaboración e reparación de redes dirixido a mariscadoras locais. Rivas explicou que o obxectivo deste curso é facilitar ás mariscadoras “unha alternativa laboral como complemento ao marisqueo dentro do sector do mar”.

– Blanco sinalou que este curso servirá para xerar emprego cualificado “cunha formación especializada de alto nivel”. No programa participan un total de 12 mariscadoras durante 2 meses con clases teóricas e prácticas nas que coñecerán “o segredos do oficio” que demanda a frota profesional.

O Concello de Redondela, a través da concellería de Igualdade, pon en marcha unha formación pioneira dirixida a mulleres mariscadoras. Trátase dun curso técnico de elaboración e reparación de redes de pesca impartido en colaboración con Grupo Eurored e que comezou a impartirse onte nas instalacións da empresa redondelá. A alcaldesa, Digna Rivas, explicou que o obxectivo desta formación técnica é a facilitar ás mariscadoras o acceso a un emprego cualificado. “Desde o Concello facemos un esforzo para dar ás mariscadoras esta oportunidade de formación, xa que o seu traballo é moi estacional, limitado polas vedas e as condicións climáticas”. Esta formación vailles permitir “unha alternativa de emprego real nun dos campos con máis demanda de profesionais dentro do sector do mar”. Javier Blanco, director técnico de Grupo Eurored, é o responsable de impartir a formación. Blanco, con más de 30 anos de experiencia no sector, puxo de relevo que é a primeira vez que a empresa imparte este tipo de cursos, e que a iniciativa xurdiu tras a petición da alcaldesa “para xerar emprego cualificado para as mariscadoras locais cunha formación especializada de alto nivel”. O programa dota ás traballadoras do mar de coñecementos técnicos en montaxe e reparación de artes de cerco, arrastre e artes menores “capacitándoas nunha das disciplinas máis demandadas e con menor substitución do sector náutico-pesqueiro”. A experiencia de Blanco garante que as alumnas non só aprendan a teoría, senón os “segredos do oficio” que demanda a frota profesional.

O temario do curso, de dous meses de duración, abarca desde a utilización de materiais e fibras até o cálculo complexo de montaxes. As alumnas aprenderán competencias claves para a industria actual, tales como o estudo dos diferentes materiais, técnicas de corte e confección, montaxe especializada e mantemento, enfocado na reparación de avarías en redes usadas para prolongar a súa vida útil. Para Grupo Eurored esta colaboración é unha oportunidade para fortalecer o tecido laboral local, pondo os seus recursos ao servizo dunha formación que garante que o traballo artesanal evolucione cara a unha profesión técnica cualificada e estable.

Ana Belén Sotelino, unha das mariscadoras que participa no curso de formación, destacou a importancia de contar cunha “capacitación dentro do sector do mar” que lle serva como alternativa laboral, “xa que a situación do marisqueo é cada ano máis complicada polo cambio climático, que provoca unha elevada mortaldade dos bivalvos”. Poder traballar como redeiras será un gran apoio para as familias.

Un total de 12 mariscadoras participan neste curso técnico de formación, que terá unha duración de 2 meses, e está financiado pola concellería de Igualdade do Concello de Redondela cun orzamento de máis de 13.000 euros.

Na presentación do curso Rivas e Blanco estiveron acompañados pola concelleira de Igualdade, Iria Vilaboa, o concelleiro de Medio Ambiente e Emprego, Alberto Álvarez e as responsables de Recursos Humanos, Prevención de Riscos e Formación de Grupo Eurored, Maryta Lazarte e Rosa Soliño.

A alcaldesa aproveitou a visita á factoría redondelá para agradecer a Grupo Eurered a súa colaboración na decoración da carpa da Festa do Choco de Redondela, na que participan cada ano desinteresadamente.

La entrada O Concello forma a mariscadoras como redeiras en colaboración con Grupo Eurored se publicó primero en Concello de Redondela.

– A alcaldesa animou aos participantes do XIII Programa Integrado de Emprego de Redondela a aproveitar a formación que lles ofrece este plan dun ano de duración. Digna Rivas Rivas destacou os bos resultados acadados no programa de emprego do ano pasado, no que 85 persoas conseguiron un contrato de traballo.

– No programa, cun ano de duración, participan cen veciños e veciñas de Redondela desempregados que reciben formación, orientación laboral, asesoramento na busca de emprego e prácticas en empresas. Hoxe recibiron unha charla da asesora Carol Juárez, experta en emprendemento.

O auditorio da Xunqueira acolleu este mércores a presentación do XIII Programa Integrado de Emprego do Concello de Redondela, no que participan un cento de veciños e veciñas desempregados do municipio. O obxectivo do plan é mellorar a formación destas persoas para que se incorporen ao mercado laboral. A alcaldesa, Digna Rivas, participou no acto xunto ao concelleiro de Emprego, Alberto Álvarez, e a responsable do programa Belén Oblanca.

Entre os cen participantes no Programa Integrado de Emprego hai diferentes perfís de persoas desempregadas: menores de 30 anos, maiores de 52, parados de longa duración, persoas con discapacidade, mulleres e persoas en risco de exclusión social, entre outros.

A rexedora deulles a benvida e felicitounos por formar parte deste programa “porque todos e todas tedes un gran potencial e co voso esforzo e a formación que ides recibir será posible acadar o obxectivo de atopar un emprego”. Rivas recoñeceu que “non será doado”, pero amosouse convencida que “con gañas e esforzo será posible”. Como exemplo a alcaldesa lembrou os datos acadados no programa celebrado o ano pasado, no que “se superou amplamente o obxectivo de inserción laboral”. Foron un total de 85 as persoas que acadaron un contrato de traballo en sectores como a industria da automoción, loxística, servizos e comercio.

Os participantes reciben formación en novas tecnoloxías e idiomas, técnicas de busca de traballo, orientación laboral e tamén poden realizar prácticas en empresas. As accións teñen sempre en conta as demandas do mercado laboral da comarca, así como as características profesionais dos participantes. O programa deste ano inclúe tamén as tecnoloxías emerxentes e a Intelixencia Artificial, que se empregarán para analizar postos de traballo, buscar ofertas de emprego, crear currículums profesionais ou preparar entrevistas de traballo. O contacto directo co mundo laboral é outra das vantaxes da programación, con visitas guiadas a empresas, xornadas de portas abertas, Masterclass, asistencia a feiras de emprego, etc. Hoxe participaron na charla “Ferramentas de coaching e técnicas motivacionais para a busca de emprego” a cargo da asesora Carol Juárez, experta en emprendemento.

O programa, cun orzamento de 256.000 euros, está financiado pola Consellería de Emprego e o Servizo Público de Emprego do Ministerio de Traballo, co cofinanciamento do Concello de Redondela.

La entrada Redondela aposta polo emprego cun programa de formación para cen persoas se publicó primero en Concello de Redondela.

– Redondela pon en marcha un Programa Integrado de Emprego 2025-26 cun total de 100 prazas para persoas en paro. O programa ofrece un plan de formación dun ano de duración con clases teóricas e prácticas. Os participantes reciben formación en novas tecnoloxías e idiomas, entre outras áreas, e tamén realizan prácticas en empresas.

– A alcaldesa, Digna Rivas, anima ás persoas desempregadas a participar neste programa e pon o foco “nos excelentes resultados de inserción laboral” obtidos no Programa Integrado de Emprego 2024-25, xa que “o 85% dos participantes atoparon traballo”.

O Concello de Redondela, un ano máis, pon en marcha un novo Programa Integrado de Emprego, o correspondente ao curso 2005-26. A iniciativa céntrase en mellorar a formación das persas participantes e promover a súa inserción laboral. O proxecto conta con 100 prazas para persoas demandantes de emprego de Redondela, e conta con prazas reservadas especialmente para parados con discapacidade, persoas e risco de exclusión social, menores de 30 anos, maiores de 52 anos, persoas desempregadas perceptoras de prestacións e subsidios, e mulleres en paro.

Ao longo dos meses que dura o programa os participantes reciben orientación e asesoramento, formación en novas tecnoloxías e idiomas, técnicas de busca de traballo e fomento da capacidade emprendedora, entre outras cuestións. A formación práctica está tamén moi presente, con prácticas non laborais en empresas. Ademais os demandantes de emprego reciben durante o programa ofertas de traballo en liña co seu perfil.

Como compensación, todos os participantes teñen dereito a percibir unha bolsa de 10 euros por cada día de asistencia ás accións do programa.

A alcaldesa, Digna Rivas, anima ás persoas en situación de desemprego a participar neste programa e pon o foco “nos excelentes resultados de inserción laboral” obtidos no Programa Integrado de Emprego 2024-25. Das 100 persoas que participaron no pasado curso, un total de 85 acadaron un emprego. Para Rivas esta elevada cifra de ocupación demostra “o gran éxito que supoñen estes proxectos para fomentar o emprego”. Os resultados superan, con moito, o obxectivo marcado ao inicio do programa, que establece o compromiso de acadar o 45% de inserción laboral dos participantes. A través dos convenios realizados con empresas da comarca, no programa anterior 30 participantes realizaron prácticas e 21 deles foron contratados nesa mesma empresa.

Información e solicitudes

As persoas interesadas poden informarse no Centro de Formación A Marisma, no paseo do Pexegueiro, 6, nos teléfonos de contacto 986 40 83 88 e 604 035 909 ou a través do enderezo electrónico per@redondela.gal. Tamén poden facelo na Oficina de Emprego de Redondela do Servizo Público de Emprego de Galicia que lles corresponda, solicitándolle na súa demanda o servizo de «Programas Experimentais (930)».

O programa está financiado pola Consellería Emprego, Comercio e Emigración cunha subvención de 220.000 euros co cofinanciamento do Concello de Redondela que achega aproximada de 36.000 euros.

La entrada O Programa de Emprego de Redondela selecciona a cen persoas para formarse durante un ano se publicó primero en Concello de Redondela.

– O Concello de Redondela acolleu onte a sinatura do convenio coa Confraría de Pescadores San Xoán. O acordo supón unha achega económica para o pósito de 10.000 euros. Estes fondos destinaranse a rexenerar os bancos marisqueiros con semente de ameixa.

– A alcaldesa, Digna Rivas, puxo de manifesto a importancia de apoiar desde o Concello a este colectivo, “que desenvolve unha labor económica fundamental na ría cun traballo artesanal e sostible”. Destacou especialmente “a gran labor das mulleres no mar, que realizan neste sector un duro traballo moitas veces invisibilizado”.

O Concello de Redondela acolleu onte o acto de sinatura do convenio coa Confraría de Pescadores San Xoán. O acordo asinárono a alcaldesa, Digna Rivas, e a Patroa Maior do pósito Nisi Otero. No acto participo tamén o concelleiro de Emprego, Alberto Álvarez. A través deste convenio o Concello de Redondela achega á Confraría unha subvención de 10.000 euros. Estes fondos servirán para a compra de semente de bivalvos, neste caso ameixa xaponesa, para repoboar os bancos marisqueiros nos que faena tanto o marisqueo a pé como a flote. Actualmente a confraría conta con 190 socios e socias. A alcaldesa puxo de manifesto a importancia de apoiar desde o Concello a este colectivo, “que desenvolve unha labor económica fundamental na ría cun traballo artesanal e sostible do que viven ducias de familias do noso municipio”. Rivas destacou especialmente “a gran labor das mulleres no mar, que realizan neste sector un duro traballo moitas veces invisibilizado”.

O convenio asinado hoxe súmase a outras subvencións aprobadas polo Concello para entidades sociais e asistencias, asociacións deportivas e culturais

A alcaldesa, Digna Rivas, sinala que é un compromiso do seu goberno “apoiar a labor que están a realizar en Redondela diferentes entidades en beneficio da veciñanza no ámbitos social, económico, cultural ou deportivo”.

La entrada O Concello subvenciona con 10.000 euros á Confraría para rexenerar bancos marisqueiros se publicó primero en Concello de Redondela.

Infografía do futuro centro sociocultural de Chapela

– Os proxectos presentados polo Concello de Redondela e que acadaron financiamento dos fondos FEDER inclúen un centro Cívico Sociocultural en Chapela, o Museo Etnográfico Ángel Barros, a reforma do Mercado de Redondela, humanizacións nas rúas Prata, Telmo Bernárdez, Padre Sarmiento e rúa do Muro, ademais da transformación da rúa Manuel Rodríguez Casal nun camiño seguro para escolares na contorna do CEIP Laredo.

– O investimento total ascende a 8.288.738 euros, dos que a UE achega o 60%, 4.973.243 euros. A alcaldesa sinala que este é o resultado do traballo “serio e rigoroso” por parte do Concello. “Con estes fondos seguiremos transformando Redondela con proxectos clave para o futuro do municipio que comezaremos a executar en 2026”, afirma Digna Rivas.

O Concello optaba este ano a fondos europeos cun ambicioso proxecto incluído no Plan de Actuación Integrado. A alcaldesa, Digna Rivas, anunciou con gran satisfacción que esta proposta con accións “estratéxicas” para Redondela e Chapela recibiu luz verde e recibirá financiamento dos fondos FEDER. Redondela recibe unha dotación de 4.973.243 de euros, o que supón un 60% do que investirá nas distintas obras, que ascenden a un total de 8.288.738. O 40% restante, 3.315.495 euros serán financiados polo propio Concello. Rivas explicou que o prazo de execución é de entre 2 e 4 anos, “polo que Redondela vivirá unha extraordinaria transformación a curto prazo”.

Entre as actuacións que recibirán fondos europeos está o novo Centro Cívico Sociocultural de Chapela. O edificio crearase no antigo colexio Igrexa e revitalizará este espazo emblemático da parroquia. “Será un novo lugar de encontro e actividades para a veciñanza, con biblioteca e espazos para actividades culturais, sociais e recreativas”, sinala Rivas. Trátase dunha infraestrutura “moi necesaria e demandada en Chapela” aclara a alcaldesa. A obra está orzamentada en 1,6 millóns.

O Plan de Acción Integrado inclúe a creación do Museo Etnográfico Ángel Barros con espazos de exposición, salas e aulas, que acollerá a obra do artista local do que recibe o seu nome. O museo ocupará o lugar da edificación das antigas vivendas dos mestres na avenida Mendiño, e contará cun investimento de 1.167.000 euros.

O acondicionamento do Mercado de Redondela é outros dos proxectos que recibe financiamento, cunha renovación integral do espazo e conservando as súas fachadas orixinais. Entre as accións contempladas inclúese a mellora no confort do edificio con sistemas de climatización, illamento e iluminación eficiente. Todo iso reforzado cun proceso de transformación dixital. O orzamento é de 2,6 millóns de euros.

Humanizacións e eliminación de barreiras arquitectónicas

O plan que recibirá os fondos europeos tamén inclúe obras como a humanización das rúas Prata, Telmo Bernárdez, Padre Sarmiento e rúa do Muro, entre outras. Eliminaranse barreiras arquitectónicas con novas áreas de lecer. Estas transformacións urbanísticas terán un deseño “inclusivo e funcional, que mellora a habitabilidade da contorna urbana tanto para os residentes como para os visitantes”, explica a rexedora. Esta mellora da mobilidade conta cun orzamento de 2,1 millóns.

A actuación contempla tamén transformación da rúa Manuel Rodríguez Casal, en Chapela, para crear “camiños escolares seguros” na contorna do CEIP Laredo. As obras inclúen a mellora ambiental da zona con vexetación autóctona, novo mobiliario urbano e iluminación eficiente. O proxecto conta cun orzamento superior aos 770.000 euros

Traballo “serio e rigoroso” do Concello

A alcaldesa afirma que a aprobación destes fondos é resultado do traballo “serio e rigoroso por parte do Concello, e grazas a este financiamento seguiremos transformando Redondela con proxectos clave que comezaremos a executar en 2026”. Rivas sinala que “unha vez máis” o goberno local saca adiante inversións “fundamentais” para o futuro do municipio.

La entrada O Concello acada preto de 5 millóns de Fondos Europeos para a gran transformación de Redondela se publicó primero en Concello de Redondela.

– A alcaldesa suliña que os resultados do programa “case duplican o obxectivo marcado”, que buscaba un 45% de inserción laboral. Os participantes, un total de 53 mulleres e 47 homes, presentaban un perfil moi variado tanto en rango de idades como de nivel formativo. Durante os 12 meses que dura o programa os participantes recibiron formación teórica e práctica adaptada ás súas características.

Das 100 persoas que participaron no Programa Integrado de Emprego do Concello de Redondela no curso 2025-2025, un total de 85 acadaron un emprego. Para a alcaldesa de Redondela, Digna Rivas, esta elevada cifra de integración laboral é “un gran éxito”. O programa, que comezou en outubro de 2024, remata hoxe, 30 de setembro, e faino cunhas cifras “inmellorables”. Os resultados superan, con moito, o obxectivo marcado ao inicio do programa, que buscaba acadar o 45% de inserción laboral dos participantes.

Os participantes, un total de 53 mulleres e 47 homes, presentaban un perfil moi variado: tanto mozo e mozas con baixa cualificación como outros que si tiñan formación previa, persoas con discapacidade, maiores de 45 anos, ou persoas en risco de exclusión social.

As persoas recibiron no programa unha formación integral e variada, tanto teórica como práctica, cun total de 985 horas de formación. Ao longo recibiron orientación e asesoramento, formación en novas tecnoloxías e idiomas e outros cursos orientados ao seu perfil. A través dos convenios realizados con empresas da comarca, 30 participantes realizaron prácticas e 21 deles foron contratados nesa mesma empresa.

O programa contou cun orzamento de 246.000 euros, dos que 220.000 foron financiados pola Consellería Comercio e Emprego, e os 36.000 resantes polo Concello de Redondela.

Está previsto que este curso se realice un novo programa. As persoas interesadas en participar na próxima edición poden enviar o seu CV a per@redondela.gal

La entrada O Programa Integrado de Emprego de Redondela acada un 85% de inserción laboral se publicó primero en Concello de Redondela.

Un total de 20 alumnos e alumnas dos Obradoiros de Emprego “Polo Mar de Redondela”, das especialidades de “Carpintería de Ribeira”, e “Forestal-Xardinería e Agricultura Ecolóxica” remataron a súa formación. Logo dun ano de formación teórica e práctica o alumnado obtivo os Certificados de Profesionalidade no pazo de Pousadouro. Na entrega dos diplomas participou a alcaldesa, Digna Rivas, o concelleiro de Emprego, Antonio Cabaleiro, a Delegada da Xunta, Ana Ortiz, o Director Territorial de Emprego, José Antonio Rodríguez, e a Directora do Obradoiro, Imelda Barrio.

A alcaldesa dirixiuse ao alumnado para agradecerlles “o esforzo e compromiso, as gañas de aprender e de superarvos para aproveitar tan ben todo o que as mestras e mestres vos ensinan.”. Rivas tivo tamén palabras de agradecemento para o equipo docente e a directora, “sempre preocupados e ocupados en ofrecerlle ao alumnado a mellor formación posible”. A alcaldesa lembrou que nestes meses de formación e traballo “xa teñen demostrado que son uns grandes profesionais”.

No caso do alumnado de Carpintería de Ribeira, a rexedora salientou que foron os artífices de crear “a réplica exacta do bote Manuel, todo un símbolo da Memoria Democrática de Redondela. Tamén se formaron noutros traballos de carpintería, e encargáronse da colocación de contras nas Casas dos Mestres e nova tarima no Multiúsos de Chapela.

Os alumnos-traballadores da modalidade de Forestal-Xardinería e Agricultura Ecolóxica realizaron traballos como a renovación e conservación de rotondas, os xardíns de Regojo e a Xunqueira e tarefas forestais como a roza da zona arqueolóxica de Monte Penide. Rivas puxo en valor tamén “a súa gran labor social”. Grazas ao convenio entre o Concello e Cáritas toda a produción da súa horta ecolóxica foi doada ao Banco de Alimentos “con máis de 1.500 quilos de produtos frescos ao longo do curso”.

Desde o Concello a alcaldesa e o edil de Emprego desexáronlle “o mellor” no seu futuro laboral, e fixeron un chamamento ás empresas destes sectores para que teñan en conta que se precisan facer contratacións “aquí poden contar con persoal moi cualificado”.

La entrada O alumnado dos Obradoiros de Emprego “Polo Mar de Redondela” remata a súa formación se publicó primero en Concello de Redondela.

Esta semana remata as súas prácticas no Servizo de Electricidade do Concello de Redondela Naira Cabaleiro, unha moza de 16 anos que completa os seus estudos de FP Básica. A alcaldesa, Digna Rivas, e o concelleiro de Infraestruturas e Sostibilidade, Roberto Villar, felicitárona hoxe por ter completado as prácticas nun encontro no que participou tamén o se titor no servizo, Aurelio Krook.

Villar destacou que foi “un verdadeiro pracer” ter a Naira no seu servizo e salientou que se trata dunha rapaza “cunha capacidade de traballo e unhas gañas de aprender admirables”. O edil sinala que se integrou moi ben no servizo “desde o primeiro día” e que calquera empresa que a contrate fará “unha gran inversión”.

A propia Naira dixo terse sentido “moi a gusto” ao realizar as prácticas no Concello, e cualifica a experiencia como “moi boa”, cun ambiente de traballo positivo con todos os compañeiros e compañeiras, dos que aprendeu moito. Este curso remata a FP Básica de Electricidade e Electrónica no IES Pedro Floriani, e a súa intención é seguir formándose nun Ciclo Medio da mesma rama.

A alcaldesa animou a que máis mozas tomen o exemplo de Naira e se formen “en calquera rama profesional que lles guste”. Desde o Concello “apostamos por rachar as barreiras de xénero e animamos a rapazas e mulleres a formarse e traballar en sectores que lles brinden un bo futuro laboral, aínda que estean tradicionalmente masculinizados”. De feito Naira Cabaleiro, veciña de Quintela, é a única alumna na súa clase do Floriani, onde o resto de compañeiros son rapaces. Con todo, ela conseguiu destacar e demostrou unha gran profesionalidade no período de prácticas.

La entrada O Concello anima ás rapazas a formarse en sectores profesionais como a electricidade se publicó primero en Concello de Redondela.

Redondela aposta pola integración das persoas con diversidade intelectual, e para iso é imprescindible alcanzar unha plena inclusión na sociedade, tamén no eido laboral. Con este obxectivo o Concello ten un convenio coa Asociación Aceesca e o seu Centro Especial de Emprego. Desde o seu servizo de xardinería encárganse do mantemento do cemiterio e parque dos Eidos, a onde se desprazaron a alcaldesa, Digna Rivas, e o concelleiro da área, Pedro Villaverde. Rivas destacou o gran traballo que están a facer tanto neste entorno como na Fonte do Mouro e o espazo coñecido como parque de Fenosa.

La entrada Redondela aposta pola integración laboral das persoas con diversidade intelectual se publicó primero en Concello de Redondela.