– O Festival Internacional de Títeres celebra a súa 27ª edición do 11 ao 17 de maio, consolidándose como unha das citas máis prestixiosas a nivel nacional e internacional. Durante sete días, as rúas, prazas e auditorios do municipio encheranse de vida con máis de 60 funcións e actividades para públicos de todas as idades.

– A alcaldesa, Digna Rivas, subliña a importancia do festival como unha ferramenta fundamental para a formación cultural das novas xeracións. A rexedora puxo o acento no éxito da campaña escolar, que este ano contará coa participación de preto de 1.500 nenos e nenas de centros educativos do municipio.

A 27ª edición do Festival Internacional de Títeres “Memorial Juanjo Amoedo” foi presentada por Eduardo Rodríguez «Tatán» (presidente de Xente Titiriteira) e Luís Crespo (director do festival), xunto coa alcaldesa de Redondela, Digna Rivas, o deputado de Cultura da Deputación, Jorge Cubela, e Jacobo Sutil, director de Agadic. O festival ofrece máis de 60 funcións que combinan a tradición galega coa vangarda internacional. Compañías de Francia, Arxentina, Italia, Uruguai e Portugal traerán espectáculos premiados, xunto a referentes galegos como os redondeláns Tanxarina, Alakrán ou Troula Animación.

O luns comeza a programación escolar, que Rivas cualificou como a “semente” do festival, destacando que permite rapazada sentir “o amor polo teatro” dende idades temperás e garantir que a cultura sexa accesible para todo o alumnado de Redondela. A alcaldesa lembrou que o festival forma parte do patrimonio “cultural e emocional de Redondela”, destacando o seu carácter interxeracional. Na súa intervención, resaltou que a participación de compañías de prestixio internacional permite que os escolares redondeláns teñan acceso a espectáculos de vangarda sen saír do municipio.

En canto aos espectáculos itinerantes destacan «Os Extintos» do Sindicato de Monstros, unhas marionetas de gran formato, e «Agosinho e Felicidade» de Boca de Cao, dúas marionetas humanas que interactúan co público. Na Pista da Xunqueira atoparemos unha instalación temática interactiva «Os Monicreques» de Galiot Teatre. Un espazo con 16 pequenos teatros de monicreques para que todas as familias poidan usalos. Na praza de Ponteareas poderemos gozar da instalación de xogos de madeira «Un Mar de Xogos».

O programa tamén inclúe a actividade “De flor en flor” ou a fantástica viaxe do invisible, que convida á cidadanía a participar disfrazándose de calquera insecto para celebrar o proceso esencial da polinización. E no Multiusos da Xunqueira podemos gozar coa exposición «Os Monicreques de Kukas», ata o 21 de maio. O clásico Mercadiño Titireiro realizarase os días 16 e 17 de maio na Alameda, con horario de 11:00 a 22:30 horas.

Do mesmo xeito que nas últimas edicións, algunhas das funcións serán con intérprete en lingua de signos. As representacións de sala serán no Multiusos dá Xunqueira cun prezo de 7 € á venda no despacho de billetes do Auditorio (se sobraron da venda anticipada). O resto de programación, representacións en todos os escenarios de rúa e itinerantes son gratuítas.

A representación de Galicia é especialmente potente nesta ocasión. A veterana compañía local Tanxarina encabeza un cartel que inclúe nomes imprescindibles como Monicreques Alakrán, Babaluva, Micromina, Trécola Produccións, Troula Animación e Bico de Toupa. Entre as montaxes máis esperadas figura «A Biblioteca Galáctica contra a IA Fantástica» da compañía redondelá, peza recoñecida nos prestixiosos premios María Casares 2026.

La entrada O XXVII Festival Internacional de Títeres trae a Redondela máis de 60 funcións de 6 países se publicó primero en Concello de Redondela.

Máis información no teléfono 986403876 e no mail oficina.conservatorio@redondela.gal .

La entrada ABERTO PRAZO DE MATRÍCULA PARA O CURSO 2026/2027 se publicó primero en Concello de Redondela.

A concelleira Iria Vilaboa e a alcaldesa Digna Rivas nunha visita ao campamento do conservatorio nunha edición anterior.

– Os campamentos están dirixidos á rapazada con idades de 3 a 12 anos, con actividades nos meses de xullo e agosto, en horario de 09:00 a 14:00 horas, e con opción tamén de entrada ás 08.00 horas co servizo matinal. O obxectivo do Concello é ofrecer ás familias unha alternativa de lecer lúdica e didáctica para facilitar a conciliación laboral durante as vacacións escolares.

– Haberá campamentos en sete emprazamentos diferentes: Cedeira, Cesantes, Chapela, Quintela, Reboreda, Vilar e Redondela. Deste xeito o Concello aposta por achegar os servizos a toda a veciñanza, tanto na vila como nas parroquias. O prazo de inscrición estará aberto do 11 ao 22 de maio, ambos incluídos.

A Concellería de Igualdade do Concello de Redondela organiza un ano máis o Programa Municipal de Conciliación nos meses de xullo e agosto para nenos e nenas de 3 a 12 anos de idade. Deste xeito o departamento que dirixe Iria Vilaboa ofrece un servizo ás familias “que favorece a conciliación de responsabilidades familiares e laborais, ao tempo que permite a nenos e nenas participar en actividades lúdicas”. O servizo prestarase en horario de 09:00 a 14:00 horas, de luns a venres, coa opción de Aula matinal, en horario de 8:00 a 9:00 horas. O número de prazas ofertadas é de 300 para o mes de xullo e 180 para agosto, e establécese unha taxa para cada quincena.

O servizo poderase solicitar por quincenas e levarase a cabo nos centros escolares de Cedeira, Cesantes, Chapela, Quintela e Porto Cabeiro, ademais da SLC de Reboreda e no Conservatorio Municipal Víctor Ureña de Redondela.

Deste xeito o Concello “aposta por achegar os servizos a toda a veciñanza, tanto na vila como nas parroquias, para facilitar o acceso aos campamentos e reducir os desprazamentos das familias”, explica a alcaldesa Digna Rivas.

O prazo de inscrición estará aberto do 11 ao 22 de maio, ambos incluídos. A documentación estará dispoñible desde o día 11 na páxina web do Concello de Redondela e tamén nas oficinas do Concello e nas do Centro de Información á Muller (CIM) en Redondela. Máis información no teléfono do CIM 986 40 80 43.

La entrada O Concello abre a inscrición para os campamentos de verán con 480 prazas se publicó primero en Concello de Redondela.

Operarios realizando unha inspección técnica nunha festa anterior.

– O Goberno local confirma que só se autorizará a instalación das que conten con toda a documentación en regra e superen as inspeccións técnicas pertinentes. A alcaldesa, Digna Rivas, advirte: “A seguridade é o máis importante para nós e non imos correr ningún risco. Non se permitirá a instalación de ningunha atracción que non teña pasado as inspeccións técnicas ou que careza dos certificados de seguridade que esixe a normativa vixente”.

O Concello de Redondela informa de que, de cara á celebración da Festa do Choco que terá lugar esta fin de semana, aplicarase unha política de “tolerancia cero” coas atraccións que non cumpran escrupulosamente coa legalidade. Así, o Goberno local confirma que só se autorizará a instalación das que conten con toda a documentación en regra e superen as inspeccións técnicas pertinentes. Dende o Concello subliñase que a prioridade absoluta da organización é o benestar e a integridade de todas as persoas que se acheguen a gozar do recinto festivo, especialmente da infancia. Por este motivo, os servizos técnicos e de seguridade supervisarán cada instalación antes da súa posta en marcha. A alcaldesa de Redondela, Digna Rivas, foi tallante ao respecto: “A seguridade é o máis importante para nós e non imos correr ningún risco. Non se permitirá a instalación de ningunha atracción que non teña pasado as inspeccións técnicas preceptivas ou que careza dos certificados de seguridade que esixe a normativa vixente”.

Con esta medida, o Concello quere trasladar unha mensaxe de tranquilidade ás familias, asegurando que a Festa do Choco será, un ano máis, un espazo de lecer seguro onde a calidade e a protección dos asistentes estean por riba de calquera outra consideración.

Punto violeta

O Concello de Redondela aposta tamén por unhas festas inclusivas e libres de violencias machistas. Para iso, instalarase un Punto Violeta informativo e de atención na carpa principal da festa, situada no Campo da Feira. Este espazo, atendido por persoal técnico en Igualdade, estará o venres e sábado en horario de 20:00 a 03:00 horas e o domingo de 17:00 a 21:00 horas.

O Punto Violeta ofrecerá tamén un servizo de atención inclusiva. Co obxectivo de que as persoas con hipersensibilidade auditiva poidan gozar da programación musical, farase entrega de tapóns auditivos de balde. Con esta iniciativa, o Goberno local reafirma o seu compromiso de facer da Festa do Choco un evento accesible e seguro para toda a veciñanza e visitantes.

La entrada O Concello garante a seguridade na Festa do Choco cun estrito control das atraccións se publicó primero en Concello de Redondela.

“Crea a túa historia como Begoña Caamaño”.

Seguindo a vida e a obra da homenaxeada das Letras Galegas 2026, Begoña Caamaño, como fío condutor, a biblioteca ofrece esta actividade onde faremos a nosa pequena incursión na creación e edición dun “minilibro”.

Da man de Noa L. Lorenzo, este xogo de escrita e composición está pensada para nenos e nenas a partir de 8 anos.

Xoves 14 de maio, de 17:30 a 19:30 h.

Prazas limitadas. Inscrición na biblioteca:

• 📫bibliotecachapela@redondela.gal
• 📞986-454-226

La entrada Creación literaria para homenaxear a Begoña Caamaño na Biblioteca Xela Arias de Chapela se publicó primero en Concello de Redondela.

– A alcaldesa, Digna Rivas, destaca que o proxecto busca converter este edificio histórico nun espazo senlleiro para a Biblioteca Municipal que combine rehabilitación e modernidade. “Confiamos en que a singularidade deste proxecto atraerá propostas de excelencia que poñan en valor o patrimonio de Redondela”, afirma Rivas.

– O certame, que contará cun xurado profesional, contempla premios por valor de 20.000 euros e un investimento previsto en obra de máis de 2,5 millóns de euros. O Colexio de Arquitectos agarda unha alta participación no concurso con proxectos de gran calidade para este emblemático edificio.

O Concello de Redondela avanza na creación dunha nova Biblioteca Municipal en Villa Elisa. A alcaldesa, Digna Rivas, xunto co decano do Colexio Oficial de Arquitectos de Galicia (COAG), Luciano González, e o presidente da delegación de Vigo do COAG, Manuel Martínez, formalizaron hoxe o convenio de colaboración que regulará un concurso de proxectos para a rehabilitación e ampliación deste inmoble histórico. O obxectivo deste acordo é garantir “a máxima calidade arquitectónica” nunha intervención que o Goberno local cualifica de “emblemática”. Rivas subliñou que “Villa Elisa non só será unha biblioteca, senón un símbolo da Redondela do futuro, onde o respecto polo noso patrimonio conviva coas necesidades culturais e sociais do século XXI”. Dende o COAG agardan unha alta participación no concurso “con propostas de gran nivel arquitectónico para un espazo tan emblemático como Villa Elisa”.

Concurso en dúas fases e con premios profesionais. Grazas ao asesoramento técnico do COAG, o concurso realizarase en dúas etapas: unha primeira fase de ideas e unha segunda de anteproxectos. O Concello establece unha contía total de 20.000 euros en premios, distribuídos en catro recoñecementos de 5.000 euros cada un. O gañador, ademais, será o adxudicatario do contrato para a redacción do proxecto básico e de execución, así como da dirección da obra. O orzamento estimado para realizar a rehabilitación de Villa Elisa supera os 2,5 millóns de euros. A intervención dividirase en dúas partes: a rehabilitación da edificación existente e a construción dunha nova zona de ampliación que se integrará na parcela, situada estratexicamente no centro urbano.

Xurado especializado e prazos. O xurado estará presidido pola alcaldesa e composto maioritariamente por expertos independentes, incluíndo arquitectos municipais, do COAG e de Patrimonio da Xunta de Galicia, garantindo así a imparcialidade e a excelencia técnica. Unha vez asinado este convenio, o Concello publicará os pregos para que os profesionais poidan presentar as súas propostas.

A alcaldesa sinala que este proxecto “reafirma o compromiso do Concello de Redondela coa recuperación do seu patrimonio inmobiliario para o uso e desfrute de toda a veciñanza”.

La entrada Concello e Colexio de Arquitectos celebran un concurso de ideas para rehabilitar Villa Elisa se publicó primero en Concello de Redondela.

– A alcaldesa, Digna Rivas, asinou co club o convenio para a temporada 2026, destacando o ascenso do equipo masculino á Liga ACT e a consolidación do feminino na LGT-F.

– A achega municipal increméntase un 160% respecto ao ano anterior para facer fronte ás novas esixencias deportivas do club e garantir a igualdade das axudas entre as categorías masculinas e femininas.

O Concello de Redondela e o Club de Remo Chapela oficializaron o convenio de colaboración para a presente temporada 2026. O acordo, asinado pola alcaldesa Digna Rivas e o presidente do club, Antonio Viaño, supón un fito no apoio ao deporte local. O Goberno municipal destina este ano un total de 55.000 euros á entidade deportiva, o que representa unha aposta económica sen precedentes para o remo redondelán. Este incremento no orzamento, que supón un 160% máis que os 21.000 euros achegados o pasado ano, vén motivado polo excelente nivel competitivo do club. Na actualidade, a traiñeira masculina de Chapela compite na elite nacional, a Liga ACT, mentres que o barco feminino mantense firme na LGT-F.

A alcaldesa, Digna Rivas, quixo poñer en valor o “gran esforzo económico” que realiza o Concello, xustificado polo compromiso de acompañar ao club nos novos retos deportivos. “Somos conscientes da esixencia que supón estar na máxima categoría e desde o Goberno local estamos para apoiar aos nosos deportistas”, sinalou a rexedora.

Igualdade no remo. Ademais do apoio á competición, a alcaldesa destacou un avance fundamental en materia de xustiza social: a equiparación económica das subvencións nas categorías masculinas e femininas. Esta medida forma parte dunha “aposta decidida pola igualdade real no deporte”, explica Rivas.

Con este novo convenio, o Concello de Redondela asegura a estabilidade dunha das entidades máis emblemáticas da vila, recoñecendo o esforzo dos deportistas, do corpo técnico e da directiva por manter viva a tradición do remo no máis alto nivel.

La entrada O Concello reafirma o seu apoio ao remo cunha subvención de 55.000 euros para o CR Chapela se publicó primero en Concello de Redondela.

– A alcaldesa, Digna Rivas, destaca que a modalidade de autoxestión permite aos centros de ensino facer fronte aos seus gastos “dun xeito directo e máis áxil”. O obxectivo do Concello é “que os centros públicos estean nas mellores condicións posibles para o alumnado e o profesorado”, explicou a alcaldesa.

– O Concello advirte que a maioría dos centros públicos teñen décadas de antigüidade e están obsoletos. Rivas lembra que malia as reiteradas demandas da comunidade educativa para obras urxentes seguen á espera dunha solución por parte da Xunta de Galicia.

Oito colexios públicos de Educación Infantil e Primaria (CEIP) terán 105.000 euros de fondos do Concello para mantemento, pequenos arranxos e melloras nos centros. A alcaldesa, Digna Rivas, asinou coa dirección dos colexios os convenios económicos para cubrir as necesidades das instalacións escolares, un acto no que particiou tamén o concelleiro de Ensino, Alberto Álvarez. Rivas explicou que co programa de autoxestión os centros escolares afrontan directamente o mantemento, conservación e reparación das súas instalacións. Os colexios que se adheriron a este convenio de autoxestión son os CEIP Alexandre Bóveda, Cedeira, Igrexa, Laredo, Outeiro das Penas, Porto Cabeiro, Quintela e Reboreda.

A alcaldesa, Digna Rivas, destacou que esta modalidade de colaboración permite aos centros de ensino facer fronte aos seus gastos “dun xeito directo e máis áxil”, sen ter que depender de trámites administrativos para intervencións urxentes ou básicas. A achega municipal está destinada a cubrir gastos correntes derivados de traballos de mantemento e reparacións ordinarias en áreas como a xardinería, carpintería, pintura, fontanería, albanelaría ou electricidade. “O noso obxectivo é que os colexios públicos estean nas mellores condicións posibles para o alumnado e o profesorado”.

O Concello advirte que a maioría dos centros públicos do municipio teñen décadas de antigüidade e están obsoletos. Están detalladas deficiencias graves nunha ducia de colexios que xa foron trasladadas hai meses á Xunta de Galicia, adeministración que ten as competencias en Ensino. Unha das actuacións máis urxentes é a renovación da cuberta do CEIP Laredo. Malia existir un informe técnico e unha orde de execución desde xaneiro 2025 o colexio de Chapela segue á espera da actuación da Xunta. “Por responsabilidade e para evitar riscos” o Concello adoptour medidas de seguridade preventivas cun valado perimetral. No EEI A Marisma e CEP Santa Mariña precisan habilitar comedores escolares, nos CEIP Cedeira e CEIP Quintela solicitan o peche das pistas deportivas e no CEIP Alexandre Bóveda urxen a revisión da cuberta e das ventás, entre outras demandas.

La entrada O Concello destina 105.000 euros a oito colexios de Infantil e Primaria se publicó primero en Concello de Redondela.

– Un total de 14 maios competiron nas diferentes modalidades, enchendo as rúas de cor, música e retranca. A alcaldesa, Digna Rivas, destacou “a gran participación das novas xeracións que garanten o futuro desta tradición”.

edondela volveu demostrar hoxe o seu orgullo polas tradicións coa celebración da Festa dos Maios, unha xornada marcada pola alta participación e a espectacularidade dos maios que participaron no concurso. Máis de 300 nenos e nenas foron os grandes protagonistas dun certame que encheu a Alameda Castelao de estruturas florais, a música e coplas. Este ano participaron 14 composicións nas diferentes modalidades: Case non chegamos, Maio Sapiens, O Cruceiro dos Cortizos, O Cono do Chan das Pipas, Maio Somos do Clube, Rapazada da Farola, Vémonos na Cruz, A Tradición de Quintela, Trisquel, Eidiños, Cono de Laredo, Rapazada, Maio Laredo e Xa cheira a fiuncho.

A alcaldesa, Digna Rivas, amosouse moi satisfeita polo éxito da convocatoria e subliñou o papel fundamental da infancia no mantemento desta festividade: “Ver a máis de 300 nenos e nenas implicados nesta festa é a mellor proba de que a nosa tradición segue máis viva ca nunca e garanten que os Maios de Redondela teñan un futuro espléndido”, sinalou.

Con esta celebración, o Concello reafirma o seu compromiso coa cultura popular, poñendo en valor un patrimonio inmaterial que define a identidade do municipio. Desde a concellería de Cultura, ademais de outorgar unha axuda a cada maio participante, premia tamén aos mellores cun total de 12 galardóns, 3 en cada unha das categorías. O primeiro premio está dotado con 300 euros, o segundo con 250 euros e o terceiro recibe 200 euros. O xurado, integrado integrado pola xornalista Alicia Tizón, o filólogo Xosé Couñago e o presidente do Obradoiro de Estudos Redondeláns, José Antonio Martínez, tiveron a difícil labor de escoller aos galardoados nesta edición, que foron os seguintes:

Premios Maio Tradicional

1º Premio: Chan das Pipas; 2º Premio: Case non chegamos; 3º Premio: Trisquel

Premios Maio Artístico

1º Premio: Somos do Clube; 2º Premio: Maio Sapiens; 3º Premio: Rapazada da Farola

Premios Coplas

1º Premio: Somos do Clube; 2º Premio: Case non chegamos; 3º Premio: Vémonos na Cruz

Premios Interpretación

1º Premio: Eidiños; 2º Premio: Rapazada da Farola; 3º Premio: Quintela.

La entrada Máis de 300 nenos e nenas participan na tradicional Festa dos Maios se publicó primero en Concello de Redondela.

– O Concello de Redondela celebra o grande éxito de participación da saída cultural e de lecer ao Grove destinada á maiores de 55 anos. Os participantes puideron gozar dunha viaxe en barco e a visita aos espazos naturais e históricos de Moreiras e Adro Vello, así como un percorrido pola localidade de Combarro.

– A alcaldesa, Digna Rivas, sinala que o obxectivo principal é ofrecer “unha alternativa de ocio saudable, estreitando lazos entre a veciñanza das diferentes parroquias”. Nos vindeiros meses organizaranse viaxes a Betanzos, Noia e O Carballiño.

O Concello de Redondela celebra o grande éxito de participación na saída cultural e de lecer ao Grove organizada pola concellería de Maiores. Nas tres saídas celebradas esta semana, cun día de duración cada unha, participaron un total de 450 persoas maiores de 55 anos. Na xornada puideron coñecer o espazo natural de Punta Moreiras, así como a área arqueolóxica Adro Vello. A excursión incluíu unha travesía en barco pola ría de Arousa, culminando a experiencia cunha comida a bordo. Para pechar a viaxe, a expedición fixo unha parada na localidade de Combarro, percorreron o seu casco histórico cos seus característicos hórreos.

A alcaldesa, Digna Rivas, sinala que o obxectivo principal do programa “Redondela descubre” é ofrecer “unha alternativa de ocio saudable, estreitando lazos entre a veciñanza das diferentes parroquias polo que é unha actividade fundamental parae fomentar o envellecemento activo e social”.

A concelleira de Maiores, Iria Vilaboa, lembra que nos vindeiros meses organizaranse viaxes a Betanzos, Noia e O Carballiño, para que os maiores poidan coñecer o patrimonio natural, cultural e histórico de Galicia. En total son 1.800 prazas as que se ofertan neste programa. Cada viaxe conta con 450 prazas, distribuídas en tres quendas de 150 persoas por día para garantir a comodidade e a calidade das visitas.

La entrada Un total de 450 maiores visitaron a ría de Arousa co programa “Redondela descubre” se publicó primero en Concello de Redondela.

– A Festa do Choco, que se celebra en Redondela do 8 ao 10 de maio, protagoniza o cupón do ONCE do vindeiro mércores, día 6. Os cinco millóns de cupóns que se reparten por todo o territorio español animarán a gozar desta tradicional festa gastronómica.

– A alcaldesa, Digna Rivas, agradeceu á ONCE que escolleran a XXXIX Festa do Choco como protagonista do cupón “que dará visibilidade á nosa festa en todo o territorio estatal”. Rivas lembrou que esta festa, declarada de Interese Turístico de Galicia, é o mellor escenario para degustar este exquisito cefalópodo en todas as súas variedades.

Manuel Martínez Pan, delegado do ONCE en Galicia, Digna Rivas, alcaldesa, Roberto Gaspar Conde, director do ONCE en Vigo, Verónica Millán Cruciel, promotora comercial do ONCE na Zona Sur de Galicia, Rita Pérez, concelleira de Turismo, Alberto Álvarez, concelleiro de Medio Ambiente, Pedro Villaverde, concelleiro de Feiras, presentaron este cupón xunto á Patroa Maior da Confraría de Redondela, Nisi Otero e Fran Pereira, vicepatrón.

Martínez Pan puxo en valor o valor “tradicional, cultural e mesmo emocional” da Festa do Choco de Redondela, coñecida en toda Galicia “e que desde a ONCE levaremos a todo o territorio estatal nos cinco millóns de cupóns que repartirán os nosos vendedores e vendedoras”. A alcaldesa agradeceu á ONCE que escolleran esta festa redondelá como protagonista do cupón do próximo 6 de maio. Rivas lembrou que esta festa, declarada de Interese Turístico de Galicia, é o mellor escenario para degustar este exquisito cefalópodo. Non é a primeira vez que Redondela é protagonista do cupón. Xa o foi en xuño de 2022 na Festa da Coca, co famoso dragón redondelán no deseño do boleto. Nesta ocasión o protagonista do cupón rende homenaxe á Festa do Choco “o produto estrela da Enseade de San Simón, o verdadeiro tesouro que temos na ría”.

Os cupóns do ONCE comercialízanse polos máis de 21.000 vendedores e vendedoras da Organización “que levarán a Festa do Choco de Redondela por todo o Estado”. O Cupón Diario do ONCE pon en xogo un premio de 500.000 euros ao número máis a serie e 49 premios de 35.000 euros ás cinco cifras do número premiado. Ademais, 450 premios de 250 euros ´ás catro primeiras cifras e outros 450 premios ao catro últimas; 9.000 premios de 25 euros no caso de tres últimas ou tres primeiras; e o mesmo para as dúas primeiras e últimas (6 euros) e reintegro de 2 euros á primeira ou a última cifra do número premiado.

La entrada A Festa do Choco, protagonista do cupón diario da ONCE o 6 de maio se publicó primero en Concello de Redondela.

La entrada CONCERTO DE PIANO 2026 se publicó primero en Concello de Redondela.