– A alcaldesa, Digna Rivas, destacou a importancia de rexistrar por escrito o “tesouro inmaterial” que se mantivo vivo grazas á transmisión oral durante séculos.

– A obra, asinada pola veciña e mestra Teresa Monteagudo, forma parte dun proxecto municipal que este ano centrará os seus esforzos en ampliar a recollida en Chapela e Trasmañó.

O Concello de Redondela continúa co seu firme compromiso de recuperación e posta en valor do patrimonio cultural e lingüístico do municipio. A alcaldesa, Digna Rivas, presentou na sede da Sociedade Cultural do Viso o novo libro dedicado á microtoponimia desta parroquia, un acto que contou cunha ampla participación de veciños e veciñas.

Durante a presentación, Rivas agradeceu o acollemento da entidade cultural e subliñou que estes encontros arredor do patrimonio “serven para xuntarnos e falar arredor da cultura das nosas parroquias”. A rexedora fixo fincapé na fraxilidade da toponimia, un legado que sobreviviu ao paso do tempo grazas á transmisión oral. “Non se cortou esa cadea que chega ata nós, e por iso, como Concello e dende o Servizo de Normalización Lingüística, quixemos que todo ese tesouro quede rexistrado nos libros”, explicou.

Recoñecemento á xenerosidade veciñal

O volume presentado é froito do traballo de Teresa Monteagudo, mestra de secundaria en Redondela e veciña do Viso. A alcaldesa tivo palabras de especial gratitude para a autora, felicitándoa polo estudo e agradecendo que “dedicase o seu tempo persoal a recoller e compartir o seu coñecemento”.

Distribución de balde e continuidade do proxecto

O proxecto de recollida de microtoponimia de Redondela, que leva varios anos en marcha, ten como obxectivo publicar un volume por cada parroquia. Estes libros son de reparto gratuíto para a veciñanza, coa finalidade de que cada fogar teña ao seu alcance este coñecemento. “Cremos que, ademais da web de toponimia, é fundamental contar cos libros físicos”, sinalou Rivas. A alcaldesa aproveitou a ocasión para anunciar que o proxecto non se detén. Ao longo deste ano, o Concello levará a cabo un traballo exhaustivo de recollida nas parroquias de Chapela e Trasmañó, aumentando o material previo xa publicado e completando así o mapa da memoria colectiva de Redondela.

La entrada Redondela protexe a súa identidade co novo volume de toponimia da parroquia do Viso se publicó primero en Concello de Redondela.

– Uns 500 escolares dos institutos de Redondela celebraron o éxito do reto “Unha semaniña enteira” co concerto de Wöyza. A artista moañesarepasou os seus éxitos e animou á rapazada e soñar e cambiar as cousas “por unha sociedade máis xusta”.

– A alcaldesa Digna Rivas, responsable do departamento de Normalización Lingüística, valora positivamente esta campaña para a promoción do galego entre a mocidade. A rexedora confía en que retos coma este sirvan “para normalizar o uso da nosa lingua en todos os ámbitos da sociedade” e reafirma o compromiso do seu goberno “para colaborar en todas as iniciativas que se poñan e marcha a prol da lingua”.

O Concello de Redondela pechou onte na Alameda Castelao unha nova edición da campaña de dinamización lingüística “Unha semaniña enteira”. O broche de ouro correu a cargo da artista Wöyza, que fixo vibrar a uns 500 alumnos e alumnas dos catro institutos do municipio: IES Chapela, IES Floriani, IES Mendiño e IES Illa de San Simón. A súa música, feminista e reivindicativa, fusiona diferentes estilos con letras en galego cos que animou á rapazada a” soñar e cambiar as cousas para construir unha sociedade máis xusta”.

Esta iniciativa, impulsada polos equipos de Normalización Lingüística dos centros educativos co apoio do Concello, desafiou á mocidade a manter o uso do galego as 24 horas do día durante sete xornadas consecutivas. Como recompensa polo seu compromiso, os participantes gozaron do directo de Wöyza, referente da música urbana en galego, quen achegou os seus ritmos soul e hip-hop á alameda redondelá.

A alcaldesa, Digna Rivas, felicitou á rapazada por demostrar que o galego é unha lingua “viva e necesaria en todos os espazos”, animándoos a que este hábito non quede só nunha semana, senón que se estenda a todo o ano. O Servizo de Normalización Lingüística do Concello, do que Rivas é a responsable, valorou moi positivamente a xornada, que serviu non só como festa de clausura “senón como un espazo de convivencia para o alumnado dos institutos arredor da lingua propia”.

La entrada A música feminista e reivindicativa de Wöyza pecha a campaña “Unha semaniña enteira” se publicó primero en Concello de Redondela.

La entrada Ciclos temáticos de literatura en lingua galega. Colaboración do Servizo de Normalización Lingüística e as Bibliotecas Municipais de Redondela se publicó primero en Concello de Redondela.

A alcaldesa, Digna Rivas, e o concelleiro de Ensino, Alverto Álvarez, na presentación da campaña “Unha semaniña enteira” no IES Chapela

– Centros de ensino, Anpas, clubs deportivos, asociacións, comercio e bibliotecas, entre outros colectivos, súmanse ao reto “Unha semaniña enteira” para promover o uso do galego entre a mocidade na semana que celebramos o Día de Rosalía.

– A alcaldesa, Digna Rivas, presentou a campaña no IES Chapela xunto con membros de centros de ensino participantes, a Asociación de Empresas, clubs e Escola de Música de Chapela. A programación contará con teatro, concertos, conferencias e charlas para a promoción da lingua galega.

O IES Chapela acolleu onte a presentación dos actos vencellados á celebración do Día de Rosalía. Un ano máis ponse en marcha o reto “Unha semaniña enteira”, unha iniciativa impulsada polos institutos de Redondela á que se suma o Concello de Redondela e cada vez máis sectores da sociedade. Este reto promove o uso do galego oral durante as 24 horas do día, os sete días da semana, do 20 ao 27 de febreiro. Participa toda a comunidade educativa do municipio, tanto centros de Infantil como de Primaria e Secundaria. Para arroupar esta campaña o Concello distribuirá 3.500 chapas feitas pola Asociación Lenda de Saúde Mental, colectivo ao que Rivas agradeceu “a súa implicación dende o inicio e o seu compromiso co idioma”. Como en edicións anteriores é tamén moi significativa a participación dos clubs deportivos, que promoverán o uso do galego oral para darlle continuidade á campaña “xa que moitos alumnos e alumnas practican algún deporte nos equipos locais”. As Bibliotecas Municipais e a Escola de Música de Chapela súmanse tamén ao reto.

Participación do comercio e a hostalaría

A alcaldesa, Digna Rivas, explicou que desde o Concello o obxectivo foi sempre implicar nesta campaña a distintos sectores da sociedade. Nesta ocasión deuse un impulso ao galego no comercio, coa colaboración da Asociación de Empresas. Repartiranse 1.000 bolsas de papel co logo de Rosalía destinadas aos establecementos de Chapela, e tamén marcapáxinas e unha camelia. Durante toda a semana, a hostalaría participante ofrecerá pratos relacionados con Rosalía, a súa obra ou inspirados na súa literatura. Os comensais que acudan a estes establecementos poderán optar a un sorteo do libro “Rosalía e a cociña”. Rivas agradeceu a implicación de todos os colectivos neste reto “par fomentar entre todos e todas o uso do galego entre a infancia e a mocidade”.

La entrada Ensino, deporte e comercio promoven o galego entre a rapazada “Unha semaniña enteira” se publicó primero en Concello de Redondela.

– A alcaldesa, Digna Rivas, explica que é un xeito divertido de explicar as Matemáticas en galego cunha sesión de maxia “para romper os prexuízos que existen ao respecto do ensino das ciencias en galego”. Esta actividades, que hoxe comezaron nos CEIP de Reboreda e Quintela co Mago Paco, percorrerán este mes todos os colexios públicos de Primaria do municipio.

O Concello de Redondela, a través do Servizo de Normalización Lingüística, celebra este mes o Día da Ciencia en Galego coa actividade “Matemaxia”. A alcaldesa, Digna Rivas, explica que é un xeito divertido de explicar as Matemáticas en galego cunha sesión de maxia “para romper os prexuízos que existen ao respecto do ensino das ciencias en galego”. Esta actividades, co Mago Paco, comezaron onte nos CEIP de Reboreda e Quintela, e percorrerán este mes todos os colexios públicos de Primaria do municipio.

Rivas lembra que o 4 de novembro conmemórase o Día da Ciencia en Galego, unha idea que nace despois de que a Consellaría de Educación obrigase por decreto en 2010 a impartir en castelán as clases de Matemáticas, Tecnoloxía, Física e Química no ensino non universitario “como se o noso idioma só servise para facer poesía”. Con esta data preténdese pór en valor o uso do galego, que coma calquera idioma “vale tanto para falar de letras como de números”.

Cada ano, como pasa co Día das Letras, escóllese a un relevante científico a quen homenaxear, e neste 2025 o escollido foi o bioquímico Fernando Calvet (1903-1988), “un absoluto transformador da Universidade”. O profesor foi o introdutor da bioquímica moderna en España, modernizador da química orgánica en Galicia e iniciador da investigación química na USC nos anos 30 do pasado século e pioneiro na aplicación da química á industria. O seu compromiso coa ciencia e con Galicia levouno ao exilio e ao cárcere en 1938. Ao saír da prisión, desde a dirección dos laboratorios Zeltia no Porriño, patentou especialidades farmacéuticas e elaboráronse fármacos hepáticos, insulinas, ou vitaminas, entre outros.

La entrada Redondela celebra o Día da Ciencia en Galego con “Matemaxia” nos coles se publicó primero en Concello de Redondela.

O Concello inclúe na nova sinalización das rúas un código QR con acceso á páxina web Toponimia de Redondela “para que veciñanza e visitantes poidan coñecer a orixe e significado dos nomes das rúas e lugares”, explica Rivas. Esta iniciativa conta co apoio da RAG, institución que recoñeceu e eloxiou a labor do Concello redondelán por ser o primeiro en incluír a toponimia como ben patrimonial no PXOM.

O Concello de Redondela traballa na promoción e posta en valor do seu patrimonio inmaterial, e o nome das rúas, barrios e lugares é un ben a conservar. De feito Redondela é o primeiro Concello en incluír a toponimia como ben patrimonial no seu Plan Xeral de Ordenación Municipal. Este feito foi recoñecido e eloxiado pola Real Academia Galega na visita que este ano fixo á vila o presidente da entidade, Víctor Freixanes. Desde o Servizo de Normalización Lingüística, que dirixe a alcaldesa Digna Rivas, Creouse a páxina web Toponimia de Redondela, na que se recolle a orixe e significado de máis de 2.000 microtopónimos.

En liña con este proxecto, o Concello xa anunciara que as novas placas que se vaian colocando nas rúas incluirían un código QR para acceder a ese directorio dixital. Para Rivas “este é un xeito de dar visibilidade ao traballo de recuperación da toponimia e achegarnos a esta riqueza patrimonial que debemos conservar”. Deste xeito, visitantes e curiosos poden consultar o que significa o nome de cada lugar.

As primeiras rúas en contar coa nova sinalización son Camiño dos Eidos, Catepeixe, en Cesantes, Estrobo, en Chapela, Carambola, en Reboreda, rúa Alta, en Asnelle de Arriba, Estrada Morta, Camiño da Lameira ou Camiño Real de Angorén, entre outras. O departamento de Infraestruturas e Sostibilidade, que se encarga da colocación das placas, conta xa cunha trintena de novas sinalizacións que se irán instalando nas vindeiras semanas. O concelleiro, Roberto Villar, explica que o obxectivo e ir incorporando paulatinamente as novas placas no rueiro municipal de todas as parroquias.

A páxina da Toponimia de Redondela permite tamén a descarga dos libros de microtoponimia realizados polo Concello de Redondela. Desde o Servizo de Normalización Lingüística promovéronse traballos de campo, estudos filolóxicos e a edición de libros da microtoponimia das parroquias de Redondela «todos eles cunha moi boa acollida por parte da cidadanía», lembra Rivas.

La entrada Redondela, pioneira en incluír nas placas das rúas ligazóns á toponimia cun QR se publicó primero en Concello de Redondela.

-Nenos e nenas dos campamentos de conciliación foron os encargados de poñer de manifesto a importancia desta data e da figura de Castelao. No acto participaron as pandeireteiras Ledicia de Trasmañó e ao son da gaita interpretouse a Marcha do Antigo Reino de Galicia e o Himno Galego.

-A alcaldesa, Digna Rivas, sinalou que nesta data debemos lembrar que Galicia foi terra de emigrantes, e que agora debe ser terra “acolledora para os que veñen de fóra”. Rivas avogou por unha sociedade galega “sen racismo, machismo, xenofobia ou calquera outra forma de odio ou violencia contra a diversidade”.

O Concello de Redondela celebrou no Día Nacional de Galicia un acto institucional na alameda Castelao para conmemorar esta data. O técnico municipal do Servizo de Normalización Lingüística, Xurxo Martínez, foi o encargado de presentar un acto no que puxo en valor esta celebración e, especialmente, a figura de Castelao neste ano no que se lle rende homenaxe en toda Galicia.

Manuel, Sara, Roi, Daniela, Manuel, Lucas e Noa, nenos e nenas que participan nos campamentos de conciliación, foron os encargados de falar desta data e da vida e obra de Castelao.

A alcaldesa Digna Rivas sinalou tamén que nesta data, o día central do noso país, lembramos que Galicia foi terra de emigrantes, e que agora é “terra acolledora para os que veñen de fóra buscando un futuro mellor”. Rivas avogou por unha sociedade galega “sen racismo, machismo, xenofobia ou calquera outra forma de odio ou violencia contra a diversidade”.

A parte musical do acto correu a cargo do grupo de pandeireteiras Ledicia de Trasmañó, que interpretou varias pezas musicais para rematar co Himno Galego ao son da gaita. A xornada péchase co concerto de Tanto Nos Ten na Praza da Torre ás 22.00 horas.

La entrada Redondela celebra o Día Nacional de Galicia como terra acolledora se publicó primero en Concello de Redondela.

Erica Iglesias, Valentín García, Digna Rivas, Ángel Barros, Amalia Bóveda e Noemí Moreira

– O CEIP Alexandre Bóveda celebrou o 122 aniversario do ilustre galeguista nunha emotiva xornada. O centro inaugurou un retrato de Bóveda realizado e doado polo artista redondelán Ángel Barros. A filla de Alexandre Bóveda, Amalia, inaugurou a obra xunto ao pintor, quen explicou que se trata dun retrato “inacabado intencionadamente, porque tamén a vida de Bóveda quedou inacabada”.

O CEIP Alexandre Bóveda, en Chapela, celebrou onte o 122 aniversario do ilustre galeguista que dá nome ao centro. O colexio viviu unha xornada moi emotiva na que participaron Amalia Bóveda e Valentín García, filla e o neto de Alexandre Bóveda. Co Alalá das Mariñas, interpretado por Erica Iglesias, deuse inicio aos actos. O artista redondelán Ángel Barros doou ao centro un retrato de Bóveda, que se presentou esta mañá coa participación do pintor. O propio Barros explicou que o retrato é unha obra “inacabada intencionadamente, como un símbolo, porque tamén a vida de Bóveda quedou inacabada”.

A alcaldesa, Digna Rivas, felicitou ao centro pola iniciativa e lembrou o papel de Alexandre Bóveda “na defensa dos dereitos do pobo galego e da democracia”. Rivas animou a nenos e nenas a seguir o exemplo de Bóveda “e aprender, coñecer o mundo e ler moito, porque o saber é un dos tesouros máis importantes da vida”. A rexedora agradeceu á familia de Bóveda a súa presenza e dixo sentir neles “a dignidade da memoria histórica e a lembranza das persoas que deron a súa vida pola democracia”. No acto participaron tamén Manuel Puga, neto de Ernestina Otero, Rosalía Polo, inspectora de Educación, e Xurxo Martínez, técnico de Normalización Lingüística. Alumnado do centro protagonizou unha emotiva peza teatral e non faltou a música, co alumnado cantando o “parabéns para ti” a Bóveda e o himno galego interpretado polo Carunchos. A directora do centro, Noemí Moreira, agradeceu aos convidados e a toda a comunidade educativa a súa implicación nesta celebración.

Os actos continuarán no CEIP Alexandre Bóveda o venres, 6 de xuño, cun serán aberto a toda a comunidade educativa. Será a partir das 18.30 horas coa participación do grupo folclórico Anaquiños de Chapela.

La entrada O colexio de Angorén celebra o aniversario de Alexandre Bóveda se publicó primero en Concello de Redondela.

Anunciouse a adxudicación das subvencións en materia de lingua da Deputación de Pontevedra. Na liña de reforzo do SNL o departamento redondelán recibe do ente provincial 18.000 euros, e na liña de actividades recibe 8.801 euros para o proxecto “Unha semaniña enteira”, co que se promove o uso oral da lingua galega entre a mocidade.

La entrada O Servizo de Normalización Lingüística de Redondela recibe subvencións da Deputación por valor de 26.800 euros se publicó primero en Concello de Redondela.

– Este venres día 30 o Concello de Redondela celebra a última das conferencias do Ano Castelao baixo o título “A arte de abrir os ollos nos carteis do Estatuto de Galicia de Castelao”. Iria-Friné Rivera, Historiadora da Arte e escritora, centrarase no traballo de Castelao como debuxante e autor de carteis da campaña para o Estatuto. Será ás 19.40 na Oficina de Turismo, rúa Isidoro Queimaliños.

Galicia celebra este 2025 o Ano Castelao, co gallo do 75º aniversario do seu pasamento. O Concello de Redondela súmase a esta conmemoración e está a organizar desde o mes de xaneiro actividades desde o Servizo de Normalización Lingüistica, que dirixe a alcaldesa Digna Rivas. Trátase de actos para poñer en valor “o relevante papel de Castelao como político, intelectual, escritor e debuxante”, explica a rexedora.

Nas conferencias teñen participado desde comezos de ano o catedrático de Historia, Ramón Villares, o escritor e profesor Emilio Ínsua e a investigadora Diana Vilas sobre “O álbum dos nenos de Castelao”. Este venres, día 30 de maio, teremos a última das conferencias deste ciclo da man de Iria-Friné Rivera, Historiadora da Arte e escritora que nos falará sobre a cartelaría do Estatuto do 36 de Castelao baixo o título “A arte de abrir os ollos nos carteis do Estatuto de Galicia de Castelao”. Será ás 19.30 horas na Oficina de Turismo, rúa Isidoro Queimaliños, con entrada libre ata completar o aforo.

Por outra banda, o 4 de xuño o Concello colaborará co CEIP Alexandre Bóveda (Angorén-Chapela), na celebración do aniversario de Alexandre Bóveda, coa participación das fundacións Castelao e Bóveda. O xoves, 5 de xuño, inaugúrase no Multiúsos da Xunqueira a exposición itinerante “Castelao Grafista” en colaboración con Afundación, a Fundación Gonzalo Torrente Ballester, a Real Academia Galega de Belas Artes e Turismo de Galicia.

La entrada Redondela pecha o ciclo de conferencias sobre Castelao con Iria-Friné Rivera se publicó primero en Concello de Redondela.

Neste mes das Letras Galegas o Concello de Redondela ofrece un concerto moi especial de Ugía Pedreira que contará coa participación das asociacións Lenda e Andaina. Será na Alameda Castelao este venres, día 23, ás 19.00 horas con entrada de balde.

A Pedreira, referente da música galega desde os 90, presentará o seu último traballo. “Basal” é un crisol de todos os ingredientes da música popular galega, unha fusión de estilos que mistura as composicións con temas filosóficos, persoais, sociais… Este espectáculo é unha viaxe continental entre o “rave” e a foliada, o jazz club e a música disco dos 80, a danza tribal e os rituais espirituais. Cuba, Brasil e Galicia abrázanse neste concerto que combina rock, jazz, MPB e música clásica, levando todas as cancións a novos horizontes. Basal está nominado ao Premio da Academia de Música de España como mellor disco folk.

Nesta proposta mestiza a Pedreira estará acompañada por Lorena Cachito (batería e coros), Alejandro Vargas (sintetizadores e teclados) e Mauricio Caruso (guitarra eléctrica).

La entrada A Pedreira achega a Redondela “Basal” cun concerto gratuíto na Alameda se publicó primero en Concello de Redondela.

A alameda Castelao acolleu onte o acto institucional co gallo do Día das Letras Galegas. A alborada de Rosalía interpretada polo gaiteiro Olimpio Xiráldez abriu a celebración. Nenos e nenas foron os encargados de poñer en valor ás mulleres cantareiras, a quen a Real Academia Galega dedica este ano a celebración. Xandre, Ada, Daniel e Naia puxeron nome ás cantareiras de Mens, labregas de Malpica que, como outras moitas mulleres na historia de Galicia, foron as encargadas de transmitir xeración tras xeración as coplas populares. Lembraron tamén ao redondelán Casto Sampedro, que recolleu moitas desas cantigas e músicas.

O técnico de Normalización Lingüística, Xurxo Martínez, presentou o acto e puxo en valor o traballo feito desde Redondela a prol da cultura, a tradición popular e a lingua galegas.

A alcaldesa, Digna Rivas, amosou a súa ledicia porque este ano a Real Academia escollese para homenaxear o Día das Letras “a todas as mulleres galegas que cantaron e canta para manter viva a nosa cultura e a nosa lingua”. Rivas animou a asociacións, clubs deportivos e colectivos a incorporar o galego como a súa lingua habitual “na escrita e na fala” para promover o seu uso, especialmente entre os máis novos. A alcaldesa dixo sentir “orgullo” de que o Concello de Redondela sexa “un referente en Galicia” en materia de normalización lingüística e na promoción da lingua e a cultura, e fixo un chamamento a toda a cidadanía “para seguir séndoo”.

O acto contou coa actuación do grupo de cantareiras O Carballo das Cen Pólas, e nenos e nenas bailaron para o numeroso público que ateigou a carpa. O himno galego e a ofrenda floral a Castelao pecharon a celebración, que contou con numeroso público.

La entrada Redondela homenaxea ás mulleres cantareiras no Día das Letras Galegas se publicó primero en Concello de Redondela.