– O municipio acollerá os actos centrais de San Honorato, patrón das panaderías e pastelerías. Será o 27 de maio na Casona da Torre. O evento contará con actos abertos ao público: unha exhibición do alumnado do CIFP Manuel Antonio, enfocada en potenciar a formación, e unha conferencia do xornalista e divulgador Ibán Yarza.

– A alcaldesa, Digna Rivas, destacou os actos de recoñecemento a persoas do sector, especialmente a homenaxe póstuma a JesúsTroiteiro, da Panadería Nosa Señora da Peneda, así como o recoñecemento ás mulleres do sector: “Foron o motor invisible que sostiña os fornos e sen o seu traballo non se entendería a excelencia da nosa terra”.

O Concello de Redondela foi elixido como a sede provincial para acoller a celebración de San Honorato 2026, o patrón dos panadeiros e panadeiras e das pastelerías. A alcaldesa de Redondela, Digna Rivas, xunto co presidente da Asociación Provincial de Industriais Panadeiros e Pasteleiros de Pontevedra (APROINPPA), Francisco Sánchez, o secretario, Antonio del Río, e a concelleira de Cultura, Rita Pérez, presentaron hoxe os detalles desta xornada que porá en valor a tradición e o futuro do sector.

A alcaldesa amosou a súa gratitude á asociación por elixir Redondela como sede dunha xornada tan importante e destacou o arraigo que o oficio do pan ten no municipio. Todos os actos concentraranse o vindeiro mércores 27 de maio na Casona da Torre, no que se reunirán máis dun cento de panadeiros e panadeiras. O evento contará cunha axenda completa que conxuga a aprendizaxe técnica co recoñecemento profesional.

A xornada comezará con dúas actividades abertas ao público en xeral. Ás 12.15 horas comezará unha exhibición a cargo do alumnado do CIFP Manuel Antonio de Vigo, enfocada en potenciar a formación e o relevo das novas xeracións de panadeiros e pasteleiros. Ás 13.00 horas o recoñecido autor, xornalista e divulgador da cultura do pan, Ibán Yarza, ofrecerá unha conferencia.

As actividades da tarde están reservadas aos socios, e centrarase nos tradicionais recoñecementos a persoas vinculadas ao sector. Entre os homenaxeados deste ano estará, a título póstumo, Jesús Troiteiro, da Panadería Nosa Señora da Peneda. Rivas salientou que se trata dun negocio familiar que chega á cuarta xeración “como referente de traballo e bo facer na parroquia do Viso”. Tamén se fará un recoñecemento público ás mulleres panadeiras e pasteleiras. A alcaldesa salienta esta posta en valor do traballo feminino por parte da asociación, xa que as mulleres “foron o motor invisible que sostiña os fornos e sen o seu traballo non se entendería a excelencia da nosa terra”.

A xornada rematará cun peche festivo cos cómicos Pedro Galocha e Jonathan Seoane.

La entrada Redondela reúne ás panaderías da provincia nunha xornada de formación e homenaxes se publicó primero en Concello de Redondela.

Operarios realizando unha inspección técnica nunha festa anterior.

– O Goberno local confirma que só se autorizará a instalación das que conten con toda a documentación en regra e superen as inspeccións técnicas pertinentes. A alcaldesa, Digna Rivas, advirte: “A seguridade é o máis importante para nós e non imos correr ningún risco. Non se permitirá a instalación de ningunha atracción que non teña pasado as inspeccións técnicas ou que careza dos certificados de seguridade que esixe a normativa vixente”.

O Concello de Redondela informa de que, de cara á celebración da Festa do Choco que terá lugar esta fin de semana, aplicarase unha política de “tolerancia cero” coas atraccións que non cumpran escrupulosamente coa legalidade. Así, o Goberno local confirma que só se autorizará a instalación das que conten con toda a documentación en regra e superen as inspeccións técnicas pertinentes. Dende o Concello subliñase que a prioridade absoluta da organización é o benestar e a integridade de todas as persoas que se acheguen a gozar do recinto festivo, especialmente da infancia. Por este motivo, os servizos técnicos e de seguridade supervisarán cada instalación antes da súa posta en marcha. A alcaldesa de Redondela, Digna Rivas, foi tallante ao respecto: “A seguridade é o máis importante para nós e non imos correr ningún risco. Non se permitirá a instalación de ningunha atracción que non teña pasado as inspeccións técnicas preceptivas ou que careza dos certificados de seguridade que esixe a normativa vixente”.

Con esta medida, o Concello quere trasladar unha mensaxe de tranquilidade ás familias, asegurando que a Festa do Choco será, un ano máis, un espazo de lecer seguro onde a calidade e a protección dos asistentes estean por riba de calquera outra consideración.

Punto violeta

O Concello de Redondela aposta tamén por unhas festas inclusivas e libres de violencias machistas. Para iso, instalarase un Punto Violeta informativo e de atención na carpa principal da festa, situada no Campo da Feira. Este espazo, atendido por persoal técnico en Igualdade, estará o venres e sábado en horario de 20:00 a 03:00 horas e o domingo de 17:00 a 21:00 horas.

O Punto Violeta ofrecerá tamén un servizo de atención inclusiva. Co obxectivo de que as persoas con hipersensibilidade auditiva poidan gozar da programación musical, farase entrega de tapóns auditivos de balde. Con esta iniciativa, o Goberno local reafirma o seu compromiso de facer da Festa do Choco un evento accesible e seguro para toda a veciñanza e visitantes.

La entrada O Concello garante a seguridade na Festa do Choco cun estrito control das atraccións se publicó primero en Concello de Redondela.

– O colectivo de taxistas garante a cobertura os 365 días do ano. A medida reforza a mobilidade nos centros urbanos de Redondela e Chapela así como nas diferentes parroquias. en todas as parroquias cunha frota total de 56 vehículos. O servizo estará dispoñible as 24 horas no teléfono de Radio Taxi 986 68 68 68. Dende o Concello valorouse moi positivamente a “vontade de diálogo e o esforzo profesional” dos taxistas.

– A alcaldesa, Digna Rivas, salientou que esta colaboración público-privada é “fundamental para garantir un transporte de calidade nun municipio tan disperso como o noso”, lembrando que iniciativas previas como o transporte escolar en taxi xa demostraron o éxito deste modelo de traballo.

O Concello de Redondela e os representantes do sector do taxi veñen de pechar un acordo estratéxico para garantir a plena dispoñibilidade do servizo público de transporte en todo o termo municipal. Grazas a este compromiso o colectivo comprométese a ofrecer servizo as 24 horas do día, os 365 días do ano, atendendo de xeito efectivo tanto os centros urbanos de Redondela e Chapela como as diferentes parroquias. O servizo estará dispoñible no teléfono de Radio Taxi 986 68 68 68.

Este acordo busca dar resposta ás demandas históricas de mobilidade da veciñanza, asegurando que calquera persoa poida dispoñer dun taxi en calquera momento, independentemente do punto do municipio onde se atope. Para acadar este obxectivo, os 56 taxistas que operan no Concello coordinarán as súas quendas para cubrir as franxas nocturnas e os festivos, reforzando así a seguridade e a conectividade local.

Pola súa banda, o Goberno local asumiu o compromiso de levar a pleno a actualización das taxas do servizo. Esta revisión tarifaria é unha das reivindicacións do sector para facer fronte ao incremento do IPC e garantir a viabilidade económica da frota, que non viu actualizados os seus prezos nos últimos anos.

Dende o Concello de Redondela valorouse moi positivamente a “vontade de diálogo e o esforzo profesional” dos 56 taxistas que compoñen o servizo. A alcaldesa, Digna Rivas, salientou que esta colaboración público-privada é “fundamental para garantir un transporte de calidade nun municipio tan disperso como o noso”, lembrando que iniciativas previas como o transporte escolar en taxi para os institutos xa demostraron o éxito deste modelo de traballo. Con esta medida, Redondela sitúase á vangarda na xestión do transporte público local.

La entrada O Concello de Redondela e o sector do taxi acordan un servizo 24 horas para todo o municipio se publicó primero en Concello de Redondela.

– As actuacións céntranse no tramo da Portela e no treito de Rande, entre a explanada de Duchess e o areal de Cabanas. As dúas rutas, que suman case tres quilómetros, poñen en valor un importante patrimonio redondelán como a propia enseada de San Simón, o peirao dos Carabineiros, o cargadoiro Coto Wagner ou a fortaleza de Rande

– O goberno local presenta dous proxectos estratéxicos aos Fondos Europeos que xetiona o GALP, destacando a sinalización dos dous tramos. A alcaldesa, Digna Rivas, explica que estas actuacións serven para “mellorar a conectividade peonil, recuperar o acceso á costa para a veciñanza e fomentar un turismo respectuoso coa enseada de San Simón”.

O Concello de Redondela deu un novo paso na súa estratexia de recuperación e posta en valor do litoral coa presentación de dous proxectos aos Fondos Europeos xestionados polo GALP Ría de Vigo-A Guarda. O obxectivo central é consolidar a denominada Ruta da Costa, un itinerario peonil que pretende conectar todo o percorrido costeiro municipal, dende Soutoxuste ata Chapela. Trátase de dúas rutas litorais na parroquia de Cedeira, unha no tramo da Portela, e a outra no estreito de Rande.

Sinalización e posta en valor do tramo A Portela

Unha das actuacións máis destacadas é o “Proxecto de Sinalización da Ruta da Costa e Recursos Turísticos no tramo A Portela”, na parroquia de Cedeira. Esta intervención actuará sobre un treito de case un quilómetro entre o coñecido Porto das Marés e o camiño da Porta Cedeira. O proxecto non só busca facilitar o tránsito peonil a través de paneis informativos modernos e unificados, senón tamén converter o paseo nunha “experiencia interpretativa”. Para iso instalaranse sinais que permitirán á veciñanza e visitantes coñecer a fondo a riqueza histórica e ambiental da zona. A ruta, de dificultade fácil e trazado lineal, discorre por un entorno de alto valor natural, ecolóxico e patrimonial. Entre os recursos que se porán en valor destacan a propia enseada de San Simón, incluída na Rede Natura 2000, o peirao dos Carabineiros e patrimonio industrial como a fábrica IME. Con esta solicitude ao GALP o Concello reafirma “o seu compromiso coa economía azul e o turismo sostible”, explica Rivas. Segundo sinala o goberno local, “trátase de devolverlle o mar á xente, garantindo que o crecemento turístico sexa compatible coa preservación dun ecosistema tan fráxil e valioso como o da nosa enseada”.

Proxecto de sinalización en Rande

Trátase dun tramo de 1.900 metros comprendido entre as parroquias de Cedeira e Trasmañó. O itinerario parte da explanada do cargadoiro Coto Wagner cara ao Museo Meirande, atravesando Rande ata a N-552. Dende alí, a ruta continúa polo camiño da Igrexa Vella e o antigo viario de servizo da ponte de Rande, pasando pola fortaleza e regresando por unha senda costeira que desemboca no areal de Cabanas. Este proxecto tamén contempla un trazado alternativo que conecta o camiño da praia de Rande directamente coa fortaleza, pasando polas inmediacións do cargadoiro. A intervención consistirá na instalación de sinais direccionais e paneis interpretativos para divulgar a riqueza histórica da zona. Con estas actuacións, o Concello de Redondela reafirma a súa aposta “por un modelo de turismo de natureza e proximidade, respectuoso co medio mariño e que pon en valor a paisaxe única da Ría de Vigo”.

La entrada Redondela opta a Fondos Europeos para avanzar nas rutas da costa se publicó primero en Concello de Redondela.

Un total de 70 nenos e nenas de entre 3 e 12 anos de idade participan durante as vacacións escolares nas actividades organizadas pola Concellería de Servizos Sociais. Os obradoiros, que se realizan no Conservatorio de Redondela (50 participantes) e no multiúsos de Chapela (20 participantes), comezaron onte luns e prolongaranse ata o día 21, Luns de Pascua.

A rapazada, por grupos de idade, pode gozar estes días con obradoiros de teatro, plástica, xincanas, xogos con música e baile, e outras sorpresas. Ademais de divertirse, nenos e nenas están a aprender sobre o patrimonio cultural e natural, a diversidade, a igualdade e o traballo en equipo.

A alcaldesa, Digna Rivas, e a concelleira de Servizos Sociais e Igualdade, Iria Vilaboa, achegáronse esta mañá ao obradoiro que se está a realizar no multiúsos do Piñeiral, en Chapela. Vilaboa explica que con esta iniciativa ofrece ás familias durante as vacacións escolares “un tempo de lecer para nenos e nenas divertido, que lles permite compartir xogos con toda a rapazada e aprender de xeito lúdico”. A rexedora local sinala que estas actividades responden ao compromiso do goberno local coas familias “poñendo en marcha iniciativas durante todo o ano cunha oferta didáctica e lúdica coa que cubrir as vacacións escolares da rapazada”.

La entrada Nenos e nenas aprenden mentres se divirten nos obradoiros de Semana Santa en Redondela e Chapela se publicó primero en Concello de Redondela.

Unha das limpezas realizadas o ano pasado

– O 1 de abril comezan os traballos de roza e limpeza en Cesantes, logo as brigadas desprazaranse ao Viso e Ventosela. Os traballos continuarán ata finais de xuño para deixar a punto os camiños municipais de todas as parroquias.

– As tarefas de roza e limpeza faranse dúas veces ao ano. Agora comeza a primeira, no trimestre de abril a xuño, e a segunda roza será entre setembro e novembro. Os traballos permitirán tamén cumprir coa normativa de prevención e defensa contra os incendios forestais.

-“O obxectivo deste contrato histórico que comezou o ano pasado é que todos os camiños das parroquias e as súas marxes estean en perfectas condicións todo o ano”, explica a alcaldesa Diga Rivas.

Todos os camiños municipais lucirán en perfecto estado antes de que comece o verán. O contrato “histórico” adxudicado polo Concello de Redondela en 2024 permite realizar traballos de roza e limpeza nas 13 parroquias dúas veces ao ano. A empresa Naturgalia, responsable do servizo, comezará o 1 de abril coa primeira das limpezas en Cesantes, e continuarán despois no Viso e Ventosela. Logo continuarán polo resto das parroquias do municipio “para manter as estradas e camiños libres de maleza e en perfecto estado para o seu uso”, explica a alcaldesa Digna Rivas. Os traballos permitirán tamén cumprir coa normativa de prevención e defensa contra os incendios forestais.

Tal como aconteceu por primeira vez en 2024, as tarefas de roza e limpeza faranse dúas veces ao ano en todos os camiños públicos de Redondela, cunha primeira fase entre os meses de abril e xuño e unha segunda roza no trimestre de setembro a novembro. “O obxectivo deste contrato histórico é que todos os camiños das parroquias e as súas marxes estean en perfectas condicións todo o ano”, explica Rivas. Trátase dunha “aposta decidida” da rexedora local “pola mellora da calidade de vida nas parroquias” cun servizo de limpeza que se foi ampliando e mellorando nos últimos anos.

Os traballos deixarán os camiños e as súas marxes despexados, rozados e limpos, o que inclúe a maleza, herbas e arbustos tanto nos camiños como nas beiravías e noiros. Os operarios retiran todo o lixo e restos vexetais e fan unha a limpeza a fondo das cunetas con maquinaria especializada. As brigadas limpan os caños e sistemas de drenaxe obstruídos por vexetación ou outros residuos e retiran todo o lixo acumulado permitir unha boa evacuación da auga.

Desperdicios como bolsas plásticas, papeis, latas ou botellas que se atopen durante os labores de limpeza tamén son retirados e Naturgalia encárgase do transporte de todo os residuos, así como da súa clasificación, xestión e tratamento segundo a normativa medioambiental.

O contrato, por dous anos, licitouse por un importe de 989.268 euros e podería prorrogarse dous anos máis, de xeito anual.

La entrada Comezan os traballos de roza nos camiños municipais de Cesantes se publicó primero en Concello de Redondela.

O Concello de Redondela acolleu a recepción á futbolista Zaira Martínez, convocada coa Selección Española de Fútbol. A xogadora, que actualmente milita no ED Val Miñor, comezou a xogar ao fútbol nos equipos base de Redondela. Esta temporada forma parte por cuarto ano da Selección Galega. Esta temporada o combinado galego está clasificado para xogar o Campionato de España Fase Ouro. A futbolista, de 14 anos, recibiu o diploma “Orgullo redondelán” e a insignia do Concello de mans da alcaldesa, Digna Rivas, e o concelleiro de Deportes, Iván Valles, como recoñecemento polo seu traballo e méritos deportivos. No acto a xogadora estivo arroupada pola súa familia, entre eles a súa irmá Naiara, tamén futbolista e que milita en As Celtas.

Para a alcaldesa é “un luxo” que este municipio conte con deportistas “tan novas e ao máis alto nivel do fútbol nacional”. Tanto a rexedora como o concelleiro felicitaron a Zaira polos seus logros “que son un exemplo para todas as nenas”. Desde o Concello de Redondela desexámoslle “moita sorte” para o Campionato de España Fase Ouro que xogará esta fin de semana en Zaragoza, no que tamén participa a redondelá Lucía Salceda.

La entrada O Concello outorga a Zaira Martínez o recoñecemento “Orgullo redondelán” se publicó primero en Concello de Redondela.

– O obxectivo é que os veciños e veciñas das parroquias, especialmente os maiores, poidan gozar dunha sesión de baile, diversión e convivencia. A alcaldesa Digna Rivas siala que os maiores “son unha das nosas prioridades e así vimos demostrándoo facendo políticas que melloren a súa vida, a súa saúde e benestar para conseguir un envellecemento activo e saudable”.

– A primeira sesión será o sábado 22 de febreiro no Centro Cultural da Miñoteira coa actuación da artista local Marcela. O 15 de marzo, será a quenda da sesión de baile no Centro Cultural de Quintela co grupo Tic-Tac. No Centro Cultural de Cidadelle será o 22 de marzo coa actuación de Marcela, e o 5 de abril a sesión de baile será no Centro Cultural de Santo Estevo de Negros co Trío Pentágono.

A alcaldesa de Redondela, Digna Rivas, e a concelleira de Servizos Sociais e Maiores, Iria Vilaboa, presentaron o novo programa “Redondela con Ritmo”. Xunto con representantes dos centros culturais de diferentes parroquias Rivas e Vilaboa falaron desta nova actividade que ofrece sesións de baile e música en directo con entrada gratuíta. Como sinala a alcaldesa “os maiores son unha das nosas prioridades e así vimos demostrándoo facendo políticas que melloren a súa vida, a súa saúde, o seu benestar, en definitiva traballando para conseguir un envellecemento activo e saudable”.

Polo de agora están programadas catro sesións. A concelleira Iria Vilaboa explicou que a primeira será o sábado 22 de febreiro no Centro Cultural da Miñoteira, Ventosela. Será ás 21.30 horas coa actuación da artista local Marcela. Despois do Entroido, o 15 de marzo, será a quenda da sesión de baile no Centro Cultural de Quintela co grupo Tic-Tac. O programa “Redondela con ritmo” chegará ao Centro Cultural de Cidadelle o 22 de marzo coa actuación de Marcela, e o 5 de abril a sesión de baile será no Centro Cultural de Santo Estevo de Negros co Trío Pentágono. “O obxectivo é que os veciños e veciñas das parroquias, especialmente os maiores, poidan gozar dunha sesión de baile, diversión e convivencia”, explica Vilaboa. Os bailes contarán con música en directo, amenizados por grupos locais que ofrecerán distintos estilos musicais, desde bachata até pasodobres. A concelleira engade que os beneficios do baile nas persoas maiores son múltiples “e van desde o físico ao emocional e sociocognitivo, é unha actividade sinxela que xera emocións e sensacións beneficiosas para o corpo e para a mente e, ademais, como adoita practicarse en grupo, permite descubrir outras formas enriquecedoras de relacionarse cos demais”.

La entrada “Redondela con ritmo” ofrece sesións de baile con música en directo nas parroquias se publicó primero en Concello de Redondela.

A alcaldesa recibiu no Concello aos novos mandos da Policía Nacional

– O servizo comezará a funcionar no mes de marzo con dúas novidades: a unidade móbil poderá expedir non só o DNI, senón tamén o pasaporte, e ademais emitirá o documento en 10 minutos, polo que os cidadáns poden obtelo ao momento e nunha única cita.

– A alcaldesa, Digna Rivas, explica que poderán tramitarse 80 documentos ao mes sen necesidade de desprazarse. Rivas agradece a posta en funcionamento deste novo servizo co que se asegura que servizos públicos tan esenciais como a expedición de documentos de identidade estean dispoñibles “para todos os veciños e veciñas, vivan onde vivan”.

Unha das novas unidades móbiles de documentación da Policía Nacional operará en Redondela a partires do próximo mes de marzo. Así llo confirmou á alcaldesa, Digna Rivas, a Secretaria Xeral da Comisaría Vigo-Redondela, a inspectora xefa Esther Arén. A alcaldesa explica que estas novas furgonetas achegan dúas melloras importantes. A primeira é a capacidade para emitir un documento en apenas 10 minutos, polo que os cidadáns poder obtelo ao momento, nunha única cita. A segunda novidade é a posibilidade de expedir pasaportes. Este documento ata agora só podía realizarse nas Unidades de Documentación. O obxectivo é asegurar que servizos públicos tan esenciais como a expedición de documentos de identidade estean dispoñibles “para todos os veciños e veciñas, vivan onde vivan”.

Digna Rivas agradece a posta en funcionamento deste novo servizo, moi demandado desde o Concello de Redondela, e que facilitará moito os trámites á cidadanía tanto do núcleo urbano como das parroquias. A unidade móbil estará en Redondela dous días ao mes, con capacidade para realizar 40 documentos cada xornada. O servizo prestarase con cita previa, como se viña facendo ata o de agora. Nunhas semanas, cando estean pechadas as datas, facilitaranse os días concretos e toda a información necesaria para solicitar as citas.

La entrada Redondela contará cunha unidade móbil para facer o DNI e o pasaporte ao momento se publicó primero en Concello de Redondela.

O Centro Cultural Recreativo da parroquia de Quintela estreou na entrada das súas instalacións un soportal cuberto. Deste xeito as instalacións do centro gañan un novo espazo cuberto na entrada, que protexe aos usuarios e usuarias das inclemencias climatolóxicas, tanto do sol como das precipitacións. Trátase dunha instalación realizada en panel sándwich con soportes de aceiro que cubre unha superficie total de 56 metros cadrados. Esta actuación, realizada a conta dos Orzamentos Participativos destinados ás actuacións nas parroquias, foi a elixida polo Consello Parroquial de Quintela. O orzamento ascendeu a 14.852 euros.

A alcaldesa de Redondela, Digna Rivas, xunto cos concelleiros Pedro Villaverde e Alberto Álvarez, visitaron as instalacións acompañados da directiva do Centro Cultural de Quitela para coñecer o resultado dos traballos. Tanto os representantes veciñais como o goberno local manifestaron a súa satisfacción co resultado da obra, coa que o centro gaña “un novo espazo, protexido do sol e da chuvia, o que supón máis comodidade para a veciñanza e permite tamén realizar actividades baixo o soportal”.

O Centro Cultural de Quintela, inaugurado en 2023, é o centro neurálxico da parroquia e funciona como punto de encontro para a vida cultural e social da veciñanza. O parque infantil renovouse e inclúe un espazo biosaudable. A actuación realizada permitiu transformar unha zona infrautilizada nun lugar máis amable, gañando un novo espazo público para facer todas as actividades que precise a veciñanza.

La entrada O Centro Cultural de Quintela estrea un novo soportal cuberto se publicó primero en Concello de Redondela.

Esta semana remataron os traballos de renovación de seis marquesiñas de autobús na avenida de Redondela. Substituíronse as cabinas antigas por outras novas desde o Alto da Encarnación ata o Centro de Saúde de Chapela.

A alcaldesa de Redondela, Digna Rivas, explicou que as novas marquesiñas están realizadas en vidro de seguridade e aceiro, con cuberta de policarbonato con tratamento anti-UV. Estas novas marquesiñas protexerán así do sol e das inclemencias do tempo aos veciños e veciñas, ao tempo que permiten o paso da luz. Tamén contan con bancada para a comodidade dos usuarios e usuarias mentres agardan polo autobús. As medidas das marquesiñas son de 3 metros de longo, 2,45 metros de alto e 1,55 metros de fondo.

A renovación desas marquesiñas, tendo en conta tamén a instalación e a retirada das antigas cabinas, supuxo un investimento de máis de 71.000 euros. O investimento foi sufragado con fondos dunha subvención da Deputación de Pontevedra.

La entrada Chapela estrea novas marquesiñas de autobús na avenida de Redondela se publicó primero en Concello de Redondela.

Preto dun cento de nenos e nenas de entre 3 e 12 anos de idade están a participar nos campamentos de conciliación de Nadal do Concello de Redondela. A actividade, organizada pola concellería de Igualdade e Muller que dirixe Iria Vilaboa, ofrece actividades lúdicas e didácticas durante as vacacións escolares de Nadal. Trátase dunha actividade é gratuíta cuxo obxectivo é “proporcionar ás familias un servizo que lles permita conciliar o coidado dos nenos e nenas cos seus deberes laborais durante as vacacións escolares de Nadal”. A concelleira e a alcaldesa, Digna Rivas, visitaron onte o campamento de Redondela, no Conservatorio Municipal. A actividade ofertouse nas parroquias, e cubríronse prazas en Chapela e Cesantes. Rivas sinala que deste xeito “o Concello ofrece unha alternativa de conciliación familiar á veciñanza non só no centro da vila, senón tamén nas diferentes parroquias”.

Os campamentos, que comezaron o 23 de decembro, rematarán o 3 de xaneiro de 2025.

La entrada A rapazada divírtese en vacacións co programa municipal Concilia Nadal se publicó primero en Concello de Redondela.