– A actuación, que contou cun investimento de máis de 21.500 euros, foi financiada a través dos Orzamentos Participativos tras a solicitude do Consello Parroquial. A intervención resolve o deterioro dunha vía que era de terra e mellora a seguridade de peóns e vehículos.

O Concello de Redondela deu por finalizadas as obras de acondicionamento e pavimentación do camiño de Zabarís, na parroquia de Ventosela. Esta intervención, que supuxo un investimento superior aos 21.500 euros, permite transformar o que ata agora era un camiño de terra nunha vía asfaltada e segura para o uso veciñal.

O concelleiro de Infraestruturas e Sostibilidade, Roberto Villar, visitou a zona para comprobar o resultado dos traballos. A alcaldesa, Digna Rivas, amosou a súa satisfacción polo cumprimento dun compromiso adquirido coa parroquia, lembrando que esta obra “é o resultado directo dos Orzamentos Participativos, atendendo a unha demanda prioritaria do Consello Parroquial de Ventosela para facilitar as comunicacións e a mobilidade na zona”.

Os traballos actuaron sobre unha superficie total de 540 metros cadrados. Debido ao estado de deterioro e aos desniveis que presentaba o firme orixinal, procederase primeiro ao nivelado e regulación do terreo para, posteriormente, aplicar unha capa de plataforma con material granular compactado. A obra culminou cun recrecido asfáltico en quente e a instalación dunha beiravía de formigón de 30 centímetros en toda a lonxitude do camiño para garantir a durabilidade da actuación e a seguridade dos peóns.

Pola súa banda, Roberto Villar subliñou que con este remate “seguimos avanzando na folla de ruta do Goberno local para dignificar os camiños e estradas das parroquias”. O concelleiro destacou que a mellora de Zabarís non só favorece a circulación de vehículos, senón que elimina problemas de asolagamentos e fochancas que dificultaban o tránsito diario. Esta actuación súmase a outras intervencións de mellora de infraestruturas que o Concello de Redondela está a executar en todo o municipio, combinando o uso de fondos propios e doutras administracións cos mecanismos de participación cidadá para priorizar as necesidades reais de cada barrio.

La entrada Rematadas as obras de mellora no camiño de Zabarís, en Ventosela se publicó primero en Concello de Redondela.

O concelleiro de Infraestruturas e Sostibilidade, Roberto Villar, no camiño do Lameiro, recentemente asfaltado.

– A Concellería de Infraestruturas e Sostibilidade rematou as obras do Camiño do Lameiro, en Santo Estevo de Negros, e o Camiño de Zabarís, en Ventosela, ambas financiadas a través dos Orzamentos Participativos.

– O concelleiro, Roberto Villar, sinala que tamén se están a executar melloras con fondos propios do Concello en Vilar e anuncia novas intervencións en Chapela.

O Concello de Redondela, a través da Concellería de Infraestruturas e Sostibilidade, continúa co seu plan de mellora da rede viaria nas parroquias do rural co obxectivo de garantir a seguridade e a calidade de vida dos veciños e veciñas. Entre as actuacións recentemente rematadas destaca a reforma do Camiño do Lameiro, na parroquia de Santo Estevo de Negros. Cunha inversión de preto de 22.000 euros, os traballos centráronse na reposición total do firme e, moi especialmente, na mellora e localización da rede de pluviais, “solucionando así os problemas de canalización que afectaban á zona”, explica o concelleiro Roberto Villar. Esta obra foi executada grazas aos Orzamentos Participativos do Consello Parroquial de Negros. Nesta mesma liña de colaboración veciñal, atópanse practicamente rematadas as obras do Camiño de Sabarís, en San Martiño de Ventosela. Cun orzamento tamén próximo aos 22.000 euros procedentes dos Orzamentos Participativos da parroquia, a intervención consistiu na pavimentación e posta a punto desta vía.

O concelleiro salientou a importancia destas actuacións: “A prioridade deste goberno é manter o noso rural vivo e con servizos dignos. No caso de Negros, non se trataba só de botar asfalto, senón de solucionar un problema grave coas pluviais que afectaba á durabilidade do firme e á seguridade dos veciños”, explica Villar. Desde o Concello de Redondela ponse en valor a ferramenta dos orzamentos participativos: “É a propia veciñanza, a través dos seus consellos parroquiais, a que decide onde é máis necesario actuar, o que nos permite ser moito máis eficaces na xestión”. Xunto a estas obras o Concello tamén mobilizou recursos propios para a mellora do Camiño das Laxes e o Carreiro da Auga, en Vilar, cunha inversión que rolda os 20.000 euros.

Dende a Concellería avanzan que as previsións a curto prazo inclúen o asfaltado do camiño do Convento, en Reboreda, así como o camiño do Carrascal, que comunica Redondela con Ventosela. De xeito paralelo, as brigadas municipais continúan cos labores de mantemento e reparacións en todo o termo municipal xa hai multitude de camiños afectados polos numerosos temporais. Actualmente realízanse arranxos nos camiños da Coutada Grande, da Traída e do Valeiro (Chapela). “Seguimos traballando de xeito constante, tanto en grandes proxectos de pavimentación como nas pequenas reparacións diarias que son fundamentais para o día a día do municipio Redondela”, concluíu Roberto Villar.

La entrada Mellora a seguridade e os servizos no rural con novos asfaltados en Negros, Ventosela e Vilar se publicó primero en Concello de Redondela.

– O Goberno local presenta un proxecto de reforma integral para os barrios de Porto Cabeiro e A Millarada que recupera case 3.000 m² para as persoas. As obras están valoradas en 401.700 euros e serán financiadas con fondos propios do Concello, previa aprobación no pleno da Corporación.

– A alcaldesa, Digna Rivas, explica que a actuación eliminará o perigo do tráfico pesado e creará un “camiño escolar seguro con plataforma única, zonas verdes e mobiliario urbano”. O obxectivo é “transformar un espazo actualmente dominado polos vehículos nun entorno saudable, inclusivo e, sobre todo, seguro para a infancia”.

O Concello de Redondela avanza na súa estratexia de recuperación de espazos públicos para a cidadanía. O proxecto de creación dunha área de convivencia no entorno do CEIP de Porto Cabeiro gaña un espazo de case 3.000 m² para os peóns. A intervención, que conta cun orzamento base de licitación de 401.700 euros, transformará radicalmente a Estrada de Porto Cabeiro e o Camiño do Campiño para priorizar a seguridade dos escolares e o benestar da veciñanza. Digna Rivas explica que o obxectivo prioritario é “transformar un espazo actualmente dominado polos vehículos nun hábitat saudable, inclusivo e, sobre todo, seguro para a infancia”. A alcaldesa destacou que a situación actual é “insostible” para a comunidade educativa. Con beirarrúas de apenas un metro de ancho e un tráfico constante de vehículos pesados que acceden ás naves lindeiras, o acceso ao colexio supón un risco diario. “Queremos que Porto Cabeiro e A Millarada teñan por fin un espazo de referencia, unha zona amable onde a veciñanza poida pasear e os nenos e nenas gañen autonomía”.

Un deseño para as persoas

O proxecto, que abrangue unha superficie de 2.835 m², contempla a transformación radical do viario mediante dúas solucións técnicas: por unha banda unha plataforma única na Estrada de Porto Cabeiro cun espazo amplo e seguro arredor do CEIP, o Parque Infantil Luis Seoane e a parcela dotacional municipal, con novo mobiliario urbano e arborado; por outro lado o calmado de tráfico no Camiño do Campiño, cunha plataforma elevada onde a velocidade se limitará a 10 km/h, garantindo unha senda peonil de 2,5 metros de ancho.

Sostibilidade e Seguridade Viaria

Esta actuación aliñase cos obxectivos do Plan de Mobilidade Urbana Sostible (PMUS) de Redondela e os principios da Rede Ágora da Deputación de Pontevedra. Ademais de mellorar a seguridade, o proxecto loita contra o cambio climático ao reducir as emisións e o ruído, mellora o drenaxe de augas e aposta por unha iluminación eficiente. Con esta obra, Redondela non só mellora as infraestruturas de Cabeiro e Vilar de Infesta, senón que pon os cimentos para implementar os Camiños Escolares Seguros, fomentando hábitos de vida saudables dende a escola. Desde o goberno local explican que esta actuación será financiada con fondos propios do Concello, a través do remanente, para o que se levará ao pleno ordinario deste mes de febreiro o próximo xoves día 26.

Mellora da seguridade viaria desde a N-555 ata o camiño do Campiño

Este proxecto da contorna do CEIP Porto Cabeiro completa a mellora da seguridade viaria que xa está aprobada desde a N-555 ata o camiño do Campiño. Esta renovación integral da estrada permitirá incluír un paso peonil seguro para facilitar o acceso ao colexio con beirarrúas nunha das marxes da vía. Tamén se incluirán elementos vexetais ao longo do trazado. Os traballos licitaranse por un importe superior aos 530.000 euros dentro do plan +Provincia financiado pola Deputación de Pontevedra.

La entrada O Concello proxecta transformar a contorna do CEIP Porto Cabeiro nun espazo peonil e seguro se publicó primero en Concello de Redondela.

– O obxectivo desta proposta é renovar e pavimentar un total de 68 camiños municipais de todas as parroquias. Trátase dun programa de investimentos que recolle as actuacións “priorizadas e consensuadas nos Consellos Parroquiais polos propios representantes veciñais”. A partida ascende a 2.759.339 euros que se financiarían con fondos propios do Concello.

– A alcaldesa, Digna Rivas, explica que hai moitos camiños deteriorados “o que supón un problema de seguridade para vehículos e peóns”. O plan de actuación realizado polos técnicos municipais “garante un reparto equilibrado do investimento” e levarase ao pleno ordinario deste mes para a súa aprobación por parte dos grupos da corporación municipal.

O goberno local de Redondela levará ao pleno ordinario deste mes de febreiro un ambicioso plan de investimento nos camiños municipais por importe de 2,7 millóns de euros. A alcaldes, Digna Rivas, lembra que todos os Consellos Parroquiais, onde está representada a cidadanía, aprobaron por unanimidade o programa proposto polo goberno local para este exercicio. O plan, realizado polos servizos técnicos municipais, inclúe a renovación, mellora e acondicionamento de 68 camiños municipais nas 13 parroquias. As obras serán financiadas con fondos propios do Concello do remanente de Tesourería de 2025, que ascende a 5,6 millóns.

Rivas sinala que se trata dunha inversión “extraordinaria” e que as obras responden a melloras necesarias nos camiños en cada unha das parroquias “especialmente en materia de accesibilidade, seguridade viaria e cohesión territorial”. A alcaldesa incide en que son os propios representantes veciñais “os que valoran as necesidades reais do seu territorio” e os proxectos foron consensuados “segundo as súas demandas e prioridades, co que damos resposta ás necesidades que reclaman os Consellos Parroquiais”. O plan de actuación responde a un proceso “real” de participación cidadá, afirma a alcaldesa, o que reforza “a lexitimidade democrática deste programa de investimentos”.

O concelleiro de Infraestruturas e Sostibilidade, Roberto Villar, sinala que este programa de actuacións “está baseado nas demandas recollidas ao longo dos últimos anos nas sesións de todos os Consellos Parroquiais”. O programa inclúe actuacións en todas as parroquias, “polo que se garante un reparto equilibrado do investimento”.

Ante a unanimidade dos Consellos Parroquiais para apoiar estas inversións, o goberno local confía en que o Pleno da Corporación “ratifique esta proposta”.

O plan de investimentos recolle obras nun total de 68 camiños municipais. Algunhas das actuacións máis destacadas serán na rúa Estación e a Subida ao Picoto, (Chapela); os camiños da Milixosa e dos Lagos (Cabeiro); os camiño das Telleiras, o Fixón e Chousa ( Vilar); os camiños do Casal, Tereixos e estrada do Abeal (Reboreda); a Subida a Trasmañó, o camiño da Cabadesa, estrada da Lamosa máis camiño Minada (Trasmañó); os camiños Costeira, Verdeal e Fonte da Lama (Quintela); os camiños do Quintán, Moscalleira e Outide de Abaixo (Cedeira); camiños das Patelas e Miñoteira-Estrada Fontecova (Ventosela); camiños da Furna, Eido de Andrea, Panquente, Fonte do Rial e rúa Outeiro das Penas (Cesantes); camiños do Sapal, Fixón e Caiosa ( Negros); estrada da Nogueira, camiños da Gándara e Carreira da Lagüiña (Viso); camiños das Pedreiriñas, Casal do Monte, Souto e Albarroz (Saxamonde) e o Paseo Pexegueiro, Esfarrapada, Pai Crespo e José Regojo (Redondela).

O plan de actuación recolle melloras na accesibilidade, seguridade viaria, a drenaxe e evacuación de augas pluviais, estabilización de noiros e muros e unha maior cohesión territorial.

La entrada O goberno de Rivas propón destinar 2,7 millóns á mellora dos camiños parroquiais se publicó primero en Concello de Redondela.

– O sendeiro circular, de 7,5 km, percorre a nacente do Monte Penide, destacando pola súa biodiversidade e os petróglifos do Coto do Corno. Coa sinalización do roteiro Redondela pon en valor a riqueza natural e arqueolóxica da zona e a historia da traída de auga en Cedeira “feita grazas ao esforzo e compromiso dos homes e mulleres que traballaron e traballan por este servizo básico”, explica a alcaldesa.

– A sinalización deste roteiro, cun orzamento de 8.600 euros, correu a cargo dos fondos participativos do Concello de Redondela transferidos ao Consello Parroquial. Esta iniciativa, en colaboración coa Comunidade de Augas de Cedeira, reafirma o compromiso do goberno local e do movemento asociativo co turismo sostible, o medio ambiente e a preservación da memoria histórica local.

O Concello de Redondela segue a apostar pola posta en valor do patrimonio natural e cultural do municipio. Esta mañá presentouse oficialmente a sinalización do Roteiro da Auga en Cedeira, un proxecto que busca dar a coñecer a riqueza paisaxística, histórica e ecolóxica da parroquia. Ao acto de presentación asistiu a alcaldesa, Digna Rivas, co concelleiro de Medio Ambiente e Ensino, Alberto Álvarez, os representantes da Comunidade de Augas coa presidenta Guadalupe Maestú, Leoncio Vidal, José Ramón Alonso e Nicanor Nieto, así como o director do CEIP Cedeira, José Luis Ojea. O colexio, nas inmediacións deste sendeiro, poderá beneficiarse desta nova ruta sinalizada que ten un marcado carácter comunitario, divulgativo e educativo. Rivas destacou que, con esta sinalización, “poñemos en valor a riqueza natural e arqueolóxica de Cedeira, e tamén o traballo e compromiso dos homes e mulleres desta parroquia coa súa terra”. A historia da traída de auga en Cedeira é protagonista do sendeiro “ un servizo básico que se conseguiu grazas á organización veciñal”.

Un roteiro entre a historia e a natureza. O Roteiro da Auga é un sendeiro circular de arredor de 7,5 km que percorre a ladeira de nacente do Monte Penide (coñecido tamén como Monte Mirallo). Esta vertente é rica en mananciais que abastecen á parroquia, polo que o camiño permite coñecer as estruturas tradicionais de captación e distribución da auga, integradas nunha paisaxe forestal diversa. Ao longo do percorrido, os sendeiristas poderán observar masas de piñeiro e eucalipto mesturadas con zonas de matogueira (toxos, xestas, uces) e tramos autóctonos con carballos, sobreiras, castiñeiros e loureiros.

Biodiversidade e Anfibios como sentinelas. O roteiro é un espazo ideal para a observación de aves forestais diúrnas, como o picapau grande, o peto verdeal ibérico, o subidor común ou diversos ferreiriños. Ademais, a ruta destaca pola súa biodiversidade ao solpor, cando é posible observar unha sorprendente diversidade de anfibios, indicadores do bo estado ecolóxico dos mananciais e regatos da zona.

O conxunto arqueolóxicos do Coto do Corno. Un dos puntos fortes do roteiro é o conxunto de petróglifos do Coto do Corno, datados de hai arredor de 4.000 anos. A pesar das alteracións sufridas no pasado por canteiros e infraestruturas, consérvanse círculos concéntricos, liñas, coviñas, muíños naviculares e a singular representación dun cervo. O Concello fai un chamamento á “responsabilidade” para a preservación deste patrimonio tan fráxil, lembrando a necesidade de “non camiñar sobre os gravados, non tocalos nin empregar auga sobre eles”.

Historia da traída de auga. O roteiro tamén pon en valor a organización veciñal. A través de códigos QR, os visitantes poden acceder a vídeos onde os propios comuneiros explican o funcionamento do sistema de traída de auga, dende os primeiros pasos veciñais ata a moderna tecnoloxía de control telemático, convertendo a ruta nunha viaxe pola historia e a xestión sostible do recurso na parroquia.

A sinalización deste roteiro, cun orzamento de 8.600 euros, correu a cargo dos fondos participativos do Concello de Redondela transferidos ao Consello Parroquial de Cedeira. Foron os propios representantes veciñais os que escolleron este proxecto. A iniciativa, realizada en colaboración coa Comunidade de Augas de Cedeira, reafirma o compromiso do goberno local e do movemento asociativo co turismo sostible, o medio ambiente e a preservación da memoria histórica local.

La entrada Cedeira estrea o “Roteiro da Auga” e pon en valor a súa riqueza natural e arqueolóxica se publicó primero en Concello de Redondela.

Sociedade de Agricultores “La Progresiva” de Chapela en 1925

– A alcaldesa, Digna Rivas, responsable da concellería de Memoria Democrática, sinala que este colectivo de Chapela tivo “un gran protagonismo” no movemento agrario da provincia de Pontevedra. A súa sede atopábase no edificio que ocupa agora o Mercado Municipal de Chapela. O obxectivo do Concello é recuperar documentación, arquivos ou fotografías que poidan aínda existir de “La Progresiva”, polo que se fai un chamamento á veciñanza que poida ter algunha información.

O Concello de Redondela traballa na recuperación da memoria dunha entidade que foi clave na vida de parroquia de Chapela hai un século: a Sociedad Agraria “La Progresiva”. A súa sede atopábase no edificio que ocupa actualmente o Mercado Municipal de Chapela. A sociedade de agricultores fundouse a finais do século XIX e mantivo a súa actividade ata o primeiro terzo do século XX. Con todo, é moi pouca a información que se conserva da época de “La Progresiva”. Desde a concellería de Memoria Democrática estase a traballar para recuperar “esa parte tan importante da parroquia de Chapela e dos seus veciños e veciñas”.

En 1909, sendo presidente Ángel Santorio, na Progresiva abriuse unha escola, e na súa sede celebráronse tamén mitins antiforais e conferencias. En 1925 os emigrantes de Chapela en Montevideo regalaron a esta sociedade un estandarte de cor vermella con cintas coas cores nacionais de España e Uruguai, acontecemento do que se conserva unha fotografía no Arquivo Pacheco. En novembro do 1933 acolleu un mitin de Izquierda Republicana no que interviron, entre outros, Alfonso Daniel R. Castelao e Telmo Bernárdez.

A alcaldesa, Digna Rivas, responsable da concellería de Memoria Democrática, sinala que este colectivo de Chapela tivo “un gran protagonismo” no movemento agrario da provincia de Pontevedra xunto a outras sociedades redondelás como as das parroquias de Trasmañó, Cesantes, Reboreda, Cabeiro, Saxamonde, Quintela e Vilar.

A raíz do golpe de Estado de 1936 e a posterior Guerra Civil, a sede e as pertenzas de “La Progresiva” de Chapela foron incautadas polo réxime franquista, ao igual que as das parroquias de Cedeira, Cesantes, Reboreda, Vilar e o Viso.

O obxectivo do Concello é recuperar todo a documentación, arquivos ou fotografías que poidan aínda existir de “La Progresiva”, polo que se fai un chamamento á veciñanza que poida ter algunha información. Nas vindeiras semanas farase unha convocatoria no Multiusos do Piñeiral aberta a toda a veciñanza para que as persoas que o desexen poida colaborar na recuperación da memoria da sociedade de agricultores de Chapela.

La entrada Redondela recupera a memoria da sociedade de agricultores “La Progresiva” de Chapela se publicó primero en Concello de Redondela.

– Os Consellos Parroquiais aprobaron por unanimidade o programa de investimentos para o ano 2026 proposto polo goberno local. O plan destina máis de 2 millóns de euros para a mellora e acondicionamento de 65 camiños municipais nas 13 parroquias. As obras serán financiadas con fondos do remanente de Tesourería de 2025.

– A alcaldesa explica que estas obras responden ás necesidades nos camiños de cada parroquia “para mellora da accesibilidade, seguridade viaria e cohesión territorial”. Digna Rivas sinala que os colectivos das parroquias “son os que valoran as necesidades reais do seu territorio” e os proxectos foron consensuados “segundo as súas demandas e prioridades, co que damos resposta a esas demandas dos Consellos Parroquiais”.

Todos os Consellos Parroquiais do municipio aprobaron por unanimidade un plan de investimentos para o ano 2026 a proposta do goberno local. Ante as necesidades de mellora nalgúns camiños municipais, o plan inclúe unha relación de actuacións a realizar en cada unha das trece parroquias. Os proxectos foron consensuados cos colectivos veciñais e superan os 2 millóns de euros.

A alcaldesa, Digna Rivas, explica que estas obras responden ás necesidades de cada unha das parroquias no que respecta aos camiños municipais “especialmente en materia de accesibilidade, seguridade viaria e cohesión territorial”. Rivas sinala que os colectivos das parroquias “son os que valoran as necesidades reais do seu territorio” e os proxectos foron consensuados “segundo as súas demandas e prioridades, co que damos resposta a esas demandas dos Consellos Parroquiais”. O concelleiro de Infraestruturas e Sostibilidade, Roberto Villar, sinala tamén que este programa de actuacións “está baseado nas demandas recollidas ao longo dos últimos anos nas sesións de todos os Consellos Parroquiais”.

O plan de mellora, mantemento e acondicionamento dos camiños será financiado con fondos das arcas municipais co remanente de Tesourería de 2025. A proposta será trasladada ao Pleno da Corporación para a súa aprobación.

O programa de investimentos inclúe obras en todas as parroquias, con melloras nun total de 65 camiños municipais. Algunhas das actuacións máis destacadas serán na rúa Estación e a Subida ao Picoto, en Chapela; os camiños da Milixosa e dos Lagos en Cabeiro; os camiño das Telleiras e o Fixón en Vilar; os camiños do Casal e dos Tereixos en Reboreda; a Subida a Trasmañó e o camiño da Cabadesa en Trasmañó; os camiños da Costeira e Verdeal en Quintela; os camiños do Quintán e da Moscalleira en Cedeira; os camiños das Patelas e Miñoteira-Estrada Fontecova en Ventosela; camiños da Furna, Eido de Andrea, Panquente e Fonte do Rial en Cesantes; camiños do Fixón e Caiosa en Negros; camiños da Gándara e Carreira da Lagüiña no Viso; camiños das Pedreiriñas e Casal do Monte en Saxamonde, e Paseo do Pexegueiro (zona Bomboneira) e Esfarrapada en Redondela.

La entrada O Concello acorda coas parroquias un investimento de 2 millóns de euros en camiños municipais se publicó primero en Concello de Redondela.

– Realízanse obras de mellor nos camiños dos Barrás, Fonte da Agra e das Coviñas con ampliacións es puntos estreitos próximos a cruzamentos para favorecer a circulación tanto de vehículos como de peóns. Os traballos, que ascenden a más de 30.000 euros, serán financiadas na maior parte cos Orzamentos Participativos (21.666 euros), xa que foron as melloras solicitadas polo Consello Parroquial de Cabeiro.

A concellería de Infraestruturas e Sostibilidade, que dirixe Roberto Villar, está a realizar obras de mellora en tres camiños da parroquia de Cabeiro: o camiño dos Barrás e os de Fonte da Agra e das Coviñas. O obxectivo destas tres actuacións é a de “ampliar estas vías de comunicación da parroquia nos puntos de cruzamentos para favorecer a circulación tanto de vehículos como de peóns”.

A alcaldesa, Digna Rivas, visitou as zonas onde se están a realizar as obras con Roberto Villar e o concelleiro de Participación Cidadá, Alberto Álvarez. Estas obras, que ascenden a más de 30.000 euros, serán financiadas na maior parte cos Orzamentos Participativos (21.666 euros), xa que foron as melloras solicitadas polo Consello Parroquial de Cabeiro. Villar explica que foron os representantes veciñais da parroquia os que decidiron facer as obras nestes tres camiños “para mellorar a circulación nestes tres puntos que eran estreitos e que coa reforma permitirán que o paso dos coches sexa máis fluída”. En todo caso, o responsable de Infraestruturas advirte que, en moitas ocasións, este tipo de ampliacións son empregadas polos condutores para estacionar os seus vehículo “o que empeora aínda máis a situación”. “Agardo que a veciñanza faga un uso responsable destes tramos de vía pública que se amplían e que non os empregue como aparcadoiros”, conclúe Villar.

O concelleiro de Infraestruturas e Sostibilidade sinala que desde o seu departamento “estase a avanzar na reparación e mellora das estradas e camiños do municipio, e o obxectivo é seguir nesta liña tanto con fondos propios do Concello como doutras administracións”.

La entrada O Concello amplía tres camiños en Cabeiro coa construción de muros de contención se publicó primero en Concello de Redondela.

– “Mariscando conCiencias para o futuro” é unha iniciativa da cooperativa Cidadanía con Amarturmar, Future Oceans Lab (da Universidade de Vigo), Artelixo e o Concello de Redondela. O proxecto conta co financiamento da Fundación Daniel e Nina Carasso logo de ser seleccionado entre máis de 150 propostas de toda España.

– A alcaldesa, Digna Rivas, explica que se trata dun traballo colaborativo entre mariscadoras a pé, persoal investigador, artistas locais e Concello, liderado pola cooperativa galega Cidadanía. O obxectivo é extraer aprendizaxes do pasado de cara a un futuro sostible do traballo no mar.

– Desafíos como o cambio climático estarán moi presentes no proxecto que se desenvolverá na enseada de San Simón entre 2025 e 2026. A primeira cita aberta á veciñanza son os obradoiros “O pasado da pesca artesanal” os días 26 de novembro, 3 e 10 de decembro en horario de 18.00 a 20.30 horas na Oficina de Turismo.

Oxe presentouse na Oficina de Turismo de Redondela “Mariscando conCiencias para o futuro”, unha iniciativa da cooperativa Cidadanía con Amarturmar, Future Oceans Lab (da Universidade de Vigo), Artelixo e o Concello de Redondela. O proxecto conta co financiamento da Fundación Daniel e Nina Carasso logo de ser seleccionado entre máis de 150 propostas de toda España.

A alcaldesa, Digna Rivas, explica que se trata dun traballo colaborativo entre mariscadoras a pé, persoal investigador, artistas locais e Concello, liderado pola cooperativa galega Cidadanía. O obxectivo é poñer en común “narrativas e accións que extraian aprendizaxes do pasado de cara a un futuro sostible dos traballos do mar artesanais”. Desafíos como o cambio climático estarán moi presentes neste proxecto que se desenvolverá na enseada de San Simón entre 2025 e 2026. Ana González, de Cidadanía,explica que se abordará o desafío de imaxinar “como adaptar un sector produtivo aos cambios ambientais”. Rivas puxo o foco precisamente no marisqueo, un sector eminentemente feminino e artesanal no que traballan ducias de mulleres en Redondela. Grazas a esta iniciativa científicas, mariscadoras e artistas intercambiarán saberes técnicos e populares dun sector tradicional de moito arraigo no litoral galego.

O reto do cambio climático

O sector pesqueiro artesanal galego e especialmente o marisqueo enfróntase ao gran retos dos efectos do cambio climático. Ana Sotelino, da asociación Amarturmar, advirte que os problemas están a manifestarse “cunha mortalidade masiva dos bivalvos pola ausencia de chuvias, o aumento da temperatura da auga ou as chuvias torrenciais”. A contaminación é outros dos problemas que afecta ao sector do mar, así como a presenza de especies invasoras, entre outras. “Mariscando conCiencias para o futuro” busca, desde diferentes ámbitos, analizar a situación actual e proxectar futuros sostibles e realistas xunto co colectivo da pesca artesanal na enseada de San Simón.

Obradoiros “O pasado da pesca artesanal”

Ao longo dos vindeiros meses levaranse a cabo obradoiros abertos á veciñanza nos que recoller coñecementos populares, fitos do colectivo do mar, persoas referentes do sector e prácticas sostibles no mar. A primeira convocatoria é cos obradoiros “O pasado da pesca artesanal” con tres xornadas que serán os días 26 de novembro, 3 e 10 de decembro. Trátase dun espazo participativo e de conversa entre os asistentes, nos tres casos en horario de 18.00 a 20.30 horas na Oficina de Turismo de Redondela. As persoas que desexen participar están convidadas a achegar obxectos, documentos, fotos, etc. do traballo do mar en Redondela. Por motivos de organización recoméndase confirmar asistencia no teléfono 627 096 062.

Toda a información recompilada será interpretada de maneira artística nunha liña do tempo elaborada polo colectivo Artelixo.

De cara ao 2026 desvelaranse novas actividades de Mariscando conCiencias para o futuro, onde haberá un percorrido polos areais colaborando cos colexios do municipio.

La entrada Redondela percorre pasado e presente da pesca artesanal coa iniciativa “Mariscando conCiencias para o futuro” se publicó primero en Concello de Redondela.

A concellería de Infraestruturas e Sostibilidade rematou as obras de reforma e reorganización do aparcadoiro superior do Multiúsos do Piñeiral do Crego. Os traballos consistiron na mellora do firme, a instalación de barreiras para evitar colisións e a reforma da rampla de acceso ao edificio Multiúsos. Tamén se delimitou unha zona de acceso con paso de cebra para facilitar o tránsito de peóns de xeito seguro. O concelleiro responsable dos traballos, Roberto Villar, visitou esta mañá a zona acondicionada coa tenente de alcaldesa Rita Pérez.

Villar explicou a obra de reforma permitiu unha ordenación das prazas de aparcadoiro máis eficiente ao tempo que mellora a mobilidade e a seguridade dos peóns “nun entorno moi transitado tanto por nenos e nenas, como maiores e persoas con mobilidade reducida”. Mantéñense o mesmo número de prazas de aparcadoiro, con dúas de uso exclusivo para persoas con mobilidade reducida.

O edil salienta que os traballos realizáronse con materiais sostibles, xa que o firme dos aparcadoiros é de xabre compactado, en lugar de formigón, “o que o fai máis ecolóxico e ademais facilita a drenaxe da auga”.

A obra, moi demandada pola veciñanza, colectivos e usuarios destas instalacións municipais, realizouse a conta dos orzamentos participativos da parroquia de Chapela, logo de ser solicitado polo Consello Parroquial. O Multiusos do Piñeiral do Crego é unha instalación con moito tránsito de veciños e veciños, xa que alberga a Biblioteca Xela Arias, locais de asociacións e colectivos, cursos e obradoiros ao longo de todo o ano, ademais das actividades que se realizan no auditorio.

La entrada A reforma do aparcadoiro superior do Piñeiral mellora a mobilidade e a seguridade dos peóns se publicó primero en Concello de Redondela.

Alfombristas, mocidade e voluntarios de todas as idades están a participar na elaboración dun gran mural na superficie da rúa peonil Padre Sarmiento. O Concello de Redondela puxo en marcha esta iniciativa para dar unha nova vida a esta rúa e render homenaxe ás tradicións do municipio. Os viadutos, as alfombras florais, a Coca e os xigantes son algúns dos protagonistas desta creación, que foi encargada á artista local Paula Amoedo.
A alcaldesa Digna Rivas e a concelleira Iria Vilaboa comprobaron esta tarde a evolución dos traballos desta alfombra-mural “de gran a creatividade e beleza”. Tanto Rivas como Vilaboa destacaron que se trata dun traballo no que participan moitas persoas, “son voluntarios e voluntarias de todas as idades que se sumaron a esta iniciativa para crear unha obra colectiva e interxeracional”.
A intervención artística está a realizarse nesta céntrica rúa peonil que conta cunha lonxitude duns 50 metros. Esta actuación vai na liña doutras políticas postas en marcha desde o goberno local para unha mobilidade sostible. O obxectivo é recuperar espazos públicos para a cidadanía e crear unha vila máis amable para os peóns dándolles prioridade nos lugares onde é posible.

La entrada Redondela inmortaliza os seus símbolos na alfombra-mural colectiva de Padre Sarmiento se publicó primero en Concello de Redondela.

– O Obradoiro de Interpretación Comunitaria comezará en outubro e, ademais de formar ao alumnado nas artes escénicas e a comunicación, servirá tamén para fomentar a cohesión social, a creatividade e a participación activa da veciñanza, ofrecendo un espazo de encontro interxeracional no que compartir experiencias.

– A concellería de Participación Cidadá organiza esta actividade na que, a través da expresión artística, “fortalécese a convivencia e os vínculos comunitarios”. O curso, cun grupo para a mocidade e outro para adultos “crea espazos de encontro entre persoas de diferentes idades, orixes e realidades e favorece a creatividade”.

O Concello de Redondela pon en marcha un Obradoiro de Interpretación Comunitaria. As clases comezarán en outubro cun grupo dirixido á xuventude (de 12 a 16 anos) e outro para adultos (a partir de 17 anos). A interpretación comunitaria é unha actividade “de grande valor educativo, social e cultural”. As aulas, impartidas polo actor e mestre Roberto Casal, “favorecen a inclusión e a integración, a creatividade, a comunicación e a autoestima das persoas participantes”. O obxectivo é promover a participación cidadá nun espazo artístico que promova non só o teatro, senón a cohesión social e o sentimento de pertenza á comunidade

O prazo de inscrición estará aberto desde o 15 ata o 30 de setembro no rexistro do Concello ou na sede electrónica. A participación nesta actividade ten un custo de 79,50 euros para todo o curso, desde outubro de 2025 ata maio de 2026.

La entrada Redondela pon en marcha un Obradoiro de Interpretación para favorecer a participación e a integración social se publicó primero en Concello de Redondela.