– O Concello amosa a súa preocupación polo estado de deterioración do cargadoiro mineral Coto Wagner, en Cedeira. Esta estrutura, patrimonio histórico-industrial de Galicia, corre risco de desaparecer se non se actúa con urxencia. A Autoridade Portuaria informou á alcaldesa hai sete meses que existe un “proxecto” para actuar na zona, pero a día de hoxe esa proposta non chegou ao Concello.

– Digna Rivas reitera o compromiso do Goberno local “coa posta en valor do cargadoiro e a súa total disposición a colaborar en calquera iniciativa que garanta a protección e integración deste emblema do patrimonio industrial no contorno de Rande”.

O Concello de Redondela solicitou á Autoridade Portuaria de Vigo aclaracións sobre dous asuntos de gran impacto para o litoral e o patrimonio do municipio: o estado de abandono do cargadoiro mineral de Coto Wagner a presenza dunha embarcación fondeada en Rande. Esta demanda remitiuse hai un mes á presidencia do Porto, e polo de agora non se recibiu resposta.

En primeiro lugar, e de especial preocupación para o Concello, é o estado de deterioración do cargadoiro mineral Coto Wagner, en Cedeira. Esta estrutura, un elemento fundamental do patrimonio histórico-industrial de Galicia e catalogada polo seu valor singular, corre risco de desaparecer se non se actúa con urxencia. A alcaldesa recorda que, tras unha reunión co presidente da APV o pasado mes de agosto, informouse da existencia dun proxecto para actuar na zona. Porén, sete meses despois, o Concello denuncia que non recibiu ningunha nova información nin avances ao respecto. “Solicitamos o estado actual de calquera proxecto ou estudo técnico previsto para a súa conservación e rehabilitación”, sinala a alcaldesa, e insta á Autoridade Portuaria a remitir toda a documentación dispoñible “para o seu estudo técnico por parte do Concello”. O goberno de Digna Rivas reitera o seu compromiso “coa posta en valor do cargadoiro e a súa total disposición a colaborar en calquera iniciativa que garanta a protección e integración deste emblema do patrimonio industrial no contorno de Rande”.

Por outra banda o Goberno local reclama información detallada sobre unha embarcación que permanece fondeada dende hai tempo na zona do Muelle de Pedra, en Rande. O Concello quere coñecer que actividade desenvolve este buque, cal é a finalidade da súa estancia nese punto concreto e, sobre todo, se existe unha previsión sobre a súa retirada ou continuidade no emprazamento.

La entrada O Concello solicita información á Autoridade Portuaria sobre o futuro do cargadoiro Coto Wagner se publicó primero en Concello de Redondela.

– Os Concellos de Redondela e Mos contratarán un topógrafo independente para fixar os límites de ambos municipios. Para a elaboración do informe basearase na Acta de Deslinde de 1940. O documento plasmará de forma obxectiva os lindes entre Redondela e Mos na zona do Miliario, un elemento patrimonial de gran valor histórico, territorial e identificativo.

– A alcaldesa de Redondela, Digna Rivas, amosouse satisfeita de poder avanzar neste sentido. O conflito remóntase ao ano 2017 “e por primeira vez chegamos a un acordo para darlle una solución xusta e definitiva”. A rexedora afirmou que desde o Concello de Redondela vanse defender “os intereses dos veciños e da Comunidade de Montes de Vilar”.

O Concello de Redondela convocou unha xuntanza da comisión de seguimento constituída para resolver a situación do Miliario de Vilar. A reunióncelebrouse onte ao pé do propio miliario, nun encontro que marca “un paso adiante” para a resolución do conflito territorial. Á xuntanza asistiron as alcaldesas de Redondela e Mos, Digna Rivas e Nidia Arévalo, técnicos municipais de ambos os dous Concellos, representantes das comunidades de montes afectadas e das corporacións municipais.

O acordo principal acadado é a contratación, de mutuo acordo por parte dos dous Concellos, dun técnico independente. Este profesional será o encargado de realizar un levantamento topográfico preciso, partindo dos lindes recollidos no documento histórico de 1940 “Acta de Deslinde del Instituto Geográfico y Catastral”. O obxectivo é plasmar de forma obxectiva os lindes entre Redondela e Mos na zona do Miliario de Vilar, un elemento patrimonial de gran valor histórico, territorial e identificativo. Unha vez finalizado o estudo, – para o que se estableceu un prazo de tres meses -, convocarase unha nova xuntanza. Nela, a comisión traballará para unificar as propostas das comunidades de montes de Vilar e Guizán, baseándose nos datos técnicos obtidos.

As alcaldesas destacaron a vontade de diálogo e o traballo conxunto para solucionar este tema, buscando unha solución técnica, xusta e definitiva para todas as partes implicadas. Digna Rivas, amosouse satisfeita de poder avanzar neste sentido. O conflito remóntase ao ano 2017, cando o Concello de Mos plasmou no seu PXOM o Miliario como parte de la parroquia de Guizán. A rexedora sinala que “é unha boa nova que por por primeira vez cheguemos a un acordo para darlle una solución xusta e definitiva” a este conflito. Rivas afirma que desde o Concello de Redondela vanse defender “os intereses da parroquia de Vilar, tal e como levan reclamando os veciños e veciñas desde hai anos”.

La entrada O Concello avanza na delimitación dos lindes con Mos cun estudo técnico independente se publicó primero en Concello de Redondela.

Entrega de premios da primeira edición do concurso “Redondela Investigada”

– A cita é este venres na Casa da Cultura ás 20:30 horas. O proxecto naceu co obxectivo de fomentar “a curiosidade investigadora entre a mocidade, o espírito investigador e crítico”. Na presentación da revista agasallarase cun exemplar a cada asistente.

– A publicación inclúe seis artigos realizados por alumnado dos institutos públicos. Os temas dos artigos son a historia da SAR, o Taekondo redondelán, o Club de Remo de Cesantes, a tradición das Penlas, a historia de La Imprenta e a vida das avoas.

Sinerxías Secundarias, colectivo formado polas seccións de Xeografía e Historia dos institutos públicos de Redondela, presenta o número cero da revista “Redondela Investigada”. A publicación, realizada en colaboración co Concello, darase a coñecer este venres, 13 de marzo, na Casa da Cultura ás 20:30 horas. No acto participarán tanto o alumnado como o profesorado coordinador, xunto coa alcaldesa, Digna Rivas. Esta publicación recolle os traballos premiados e destacados da primeira edición do certame de investigación de Ciencias Sociais para alumnado de secundaria.

O proxecto, que reúne aos centros IES Chapela, Illa de San Simón, Mendiño e Pedro Floriani, nace co obxectivo de “fomentar a curiosidade investigadora entre a mocidade, o espírito investigador e crítico”. Tal como explica o editorial deste primeiro volume “é unha revista en papel que reforza a idea do libro como elemento físico, máis tamén, simbólico”. A coidada edición permite facer xustiza “á calidade dos traballos publicados e á importancia da investigación sobre o noso”.

A revista inclúe seis artigos cun percorrido por diversos temas de interese local. A investigación gañadora repasa a historia da SAR (Sociedade Atlética de Redondela) e tamén hai artigos sobre o Taekondo redondelán e o Club de Remo de Cesantes. Un cuarto texto recolle a tradición das Penlas e outro a historia da librería da Imprenta e un último artigo que ofrece unha ollada interxeracional da vida das avoas dos autores. Na presentación deste venres haberá exemplares da revista para todos os asistentes.

A alcaldesa, Digna Rivas, salienta a importancia de que a mocidade se interese polo noso pasado “mergullándose no Arquivo Municipal, nas lembranzas das súas familias e na historia viva das nosas parroquias”. Con estes premios e a publicación da revista “non só recoñecemos o esforzo académico, senón que estamos a fomentar o arraigo e o respecto polas nosas raíces entre a nosa rapazada”.

O Concello de Redondela e os institutos asinaron un acordo de colaboración para este certame. No texto, a alcaldesa, Digna Rivas, e as direccións dos centros acordan que o Concello impulsa a celebración do Certame “Redondela Investigada” para “promover o estudo e coñecemento sobre o conxunto do municipio e fomentar o espírito investigador e científico da xuventude de Redondela”. O Concello financia os premios do certame e tamén a publicación da revista “Redondela investigada” cos traballos seleccionados.

La entrada Institutos e Concello presentan a revista “Redondela Investigada” se publicó primero en Concello de Redondela.

FOTO: A concelleira de Cultura, Rita Pérez Táboas, e a alcaldesa Digna Rivas con Sinda López.

– Sinda López, veciña de Redondela, cedeu ao Arquivo Municipal Audiovisual 15 fotografías familiares. As imaxes son de seu pai, Castor López, garda municipal do Concello de Redondela entre os anos `50 e ’70 do pasado século, e tamén de oficios, celebracións e da vida cotiá da vila naquelas décadas. Con esta doazón o fondo conta xa con máis de 75.000 fotografías cedidas pola veciñanza.

– A alcaldesa , Digna Rivas, agradeceu o xesto desta veciña e anima á veciñanza “a seguir este exemplo e facilitar ao Arquivo Municipal fotografías que poidan ter nas súas casas do noso pasado, de tradicións ou celebracións coas que seguir ampliado o fondo audiovisual do Concello”.

Sinda López, veciña de Redondela, acaba de ceder 15 fotografías da súa colección particular relativas ao seu pai, Castor López, que foi garda municipal no Concello de Redondela entre as décadas dos ‘50 e `60 do século pasado. Son imaxes icónicas como a policía municipal posando de gala en Vilavella ou a nevada de 1963, ademais de escenas cotiás da vila nesa época: homes traballando nunha zapatería, nenos e nenas posando nunha merenda, a festa dos Maios e outras celebracións.

Todas as fotografías foron dixitalizadas polo Arquivo Municipal e xa poden consultarse tanto nas redes sociais coma en papel nas dependencias municipais do propio Arquivo. Para consultalas na web pode facer a través do Instagram, o Facebook ou o blog do Arquivo Audiovisual Municipal. As fotografías orixinais foron devoltas á propietaria xunto cun dispositivo coa copia tamén dixital das imaxes. Con esta doazón o Arquivo Audiovisual conta xa cun total de 75.016 fotografías cedidas pola veciñanza, incluído o Fondo Fotsca. O fondo municipal conta tamén coas fotografías do propio Concello, que suman aproximadamente 3.400.

A alcaldesa de Redondela, Digna Rivas, agradeceu o xesto de Sinda López e animou á cidadanía a seguir este exemplo e facilitar ao Arquivo municipal imaxes antigas que poidan ter nas súas casas de oficios, tradicións ou celebracións “para seguir ampliado o fondo audiovisual do Concello”. A rexedora fixo un chamamento especialmente á veciñanza das parroquias, “porque notamos unha carencia de fotografías das distintas parroquias de Redondela, por iso lles pedimos aos que teñan imaxes antigas que se poñan en contacto co Arquivo municipal”.

La entrada O Arquivo Municipal recupera imaxes icónicas dos anos `50 aos ’70 cedidas pola familia de Castor López se publicó primero en Concello de Redondela.

Sociedade de Agricultores “La Progresiva” de Chapela en 1925

– A alcaldesa, Digna Rivas, responsable da concellería de Memoria Democrática, sinala que este colectivo de Chapela tivo “un gran protagonismo” no movemento agrario da provincia de Pontevedra. A súa sede atopábase no edificio que ocupa agora o Mercado Municipal de Chapela. O obxectivo do Concello é recuperar documentación, arquivos ou fotografías que poidan aínda existir de “La Progresiva”, polo que se fai un chamamento á veciñanza que poida ter algunha información.

O Concello de Redondela traballa na recuperación da memoria dunha entidade que foi clave na vida de parroquia de Chapela hai un século: a Sociedad Agraria “La Progresiva”. A súa sede atopábase no edificio que ocupa actualmente o Mercado Municipal de Chapela. A sociedade de agricultores fundouse a finais do século XIX e mantivo a súa actividade ata o primeiro terzo do século XX. Con todo, é moi pouca a información que se conserva da época de “La Progresiva”. Desde a concellería de Memoria Democrática estase a traballar para recuperar “esa parte tan importante da parroquia de Chapela e dos seus veciños e veciñas”.

En 1909, sendo presidente Ángel Santorio, na Progresiva abriuse unha escola, e na súa sede celebráronse tamén mitins antiforais e conferencias. En 1925 os emigrantes de Chapela en Montevideo regalaron a esta sociedade un estandarte de cor vermella con cintas coas cores nacionais de España e Uruguai, acontecemento do que se conserva unha fotografía no Arquivo Pacheco. En novembro do 1933 acolleu un mitin de Izquierda Republicana no que interviron, entre outros, Alfonso Daniel R. Castelao e Telmo Bernárdez.

A alcaldesa, Digna Rivas, responsable da concellería de Memoria Democrática, sinala que este colectivo de Chapela tivo “un gran protagonismo” no movemento agrario da provincia de Pontevedra xunto a outras sociedades redondelás como as das parroquias de Trasmañó, Cesantes, Reboreda, Cabeiro, Saxamonde, Quintela e Vilar.

A raíz do golpe de Estado de 1936 e a posterior Guerra Civil, a sede e as pertenzas de “La Progresiva” de Chapela foron incautadas polo réxime franquista, ao igual que as das parroquias de Cedeira, Cesantes, Reboreda, Vilar e o Viso.

O obxectivo do Concello é recuperar todo a documentación, arquivos ou fotografías que poidan aínda existir de “La Progresiva”, polo que se fai un chamamento á veciñanza que poida ter algunha información. Nas vindeiras semanas farase unha convocatoria no Multiusos do Piñeiral aberta a toda a veciñanza para que as persoas que o desexen poida colaborar na recuperación da memoria da sociedade de agricultores de Chapela.

La entrada Redondela recupera a memoria da sociedade de agricultores “La Progresiva” de Chapela se publicó primero en Concello de Redondela.

– A canle dixital “Redondela Aberta” inaugura o fondo audiovisual do Arquivo Municipal con tres películas de comezo da década dos 70. Os filmes foron cedidos pola familia Cayetano Rodríguez, emigrada na Arxentina, que gravou as escenas nas viaxes á súa vila natal. Os departamentos de Arquivo e Novas Tecnoloxías traballaron conxuntamente e as películas poden visionarse libremente na web do Concello.

– Os vídeos recollen festas e celebracións tanto en Redondela como nas parroquias, a feira con gando, mulleres lavando no río ou trens de mercadorías pasando polo viaduto de Madrid, entre outras imaxes de iconas da vila xa desaparecidas. A alcaldesa, Digna Rivas, agradeceu a xenerosidade da familia Cayetano “xa que contar con estas imaxes no arquivo municipal é un verdadeiro luxo para o Concello e para a veciñanza”.

O Arquivo Municipal estrea apartado o seu fondo audiovisual na canle dixital “Redondela Aberta”, dentro da web do Concello de Redondela. As primeiras incorporacións son tres películas de comezos da década dos 70 con imaxes da vila, vistas panorámicas, festas, etc. As películas foron dixitalizadas por unha empresa especializada a partir de bobinas de Super8 cedidas pola familia Cayetano Rodríguez. A familia, emigrada á Arxentina, gravou estes filmes en varias viaxes á súa vila natal.

Entre os vídeos podemos ver a Festa da Coca, a Danza das Espadas na que participaban tanto homes como mulleres, a Coca e a procesión. Hai tamén escenas na Alameda, a praza da Alfóndiga e vistas panorámicas dende o viaduto de Madrid. Unha das escenas é sorprendente, xa que polo viaduto está a pasar un tren de mercadorías antes de que quedara en desuso co peche da liña en 1971. Hai tamén vídeos de escenas tradicionais como mulleres lavando no río Alvedosa, mariscadoras na enseada e a feira cando se facía na Xunqueira con venda de gando. Iconas xa desaparecidas como a fábrica de Regojo ou o Cine Coca tamén se recollen nestas películas, así como celebracións nas parroquias: festa da Peneda, festa de Reboreda e comida no prado do Carballo das Cen Pólas, a festa do Carme de Cesantes e a vendima no Viso. Entre as filmacións tamén hai escenas da ría de Vigo, a Illa de Toralla antes da construción do edificio e a partida en barco dende o porto vigués.

O traballo conxunto dos departamentos de Arquivo e Novas Tecnoloxías permite agora difundir estas tres películas para que calquera persoa poida velas libremente a través da web do Concello. A alcaldesa, Digna Rivas, agradeceu a xenerosidade da familia Cayetano “xa que contar con estas imaxes no arquivo municipal é un verdadeiro luxo para o Concello e para todos os veciños e veciñas, tanto os que viven actualmente en Redondela como os que están fóra”. As irmás Luisa e Natalia Cayetano, que viven agora en Redondela, visitaron o Concello para recoller as películas orixinais. Tamén se lles entregou unha copia dixitalizada dos filmes. Rivas, xunto aos concelleiros de Cultura, Rita Pérez, e de Novas Tecnoloxías, Antonio Cabaleiro, visionaron con elas fragmentos destes vídeos cos que se inaugura o fondo do arquivo audiovisual do Concello. Ata o de agora todos os documentos en custodia do Arquivo Municipal son fotografías. Os vídeos recollidos en “Redondela Aberta” ata o de agora son todos realizados polo propio Concello e de datas recentes.

A alcaldesa animou á veciñanza “a seguir este exemplo e facilitar ao Arquivo municipal imaxes ou vídeos antigos que poidan ter nas súas casas sobre oficios, tradicións ou celebracións para seguir ampliado o fondo audiovisual do Concello”.

Acceso aos vídeos nos seguintes enlaces:

https://www.redondelaberta.gal/videodetail/1619

https://www.redondelaberta.gal/videodetail/1620

https://www.redondelaberta.gal/videodetail/1621

La entrada O Arquivo Municipal estrea fondo audiovisual con gravacións de Redondela dos anos 70 se publicó primero en Concello de Redondela.

Os concelleiros Antonio Cabaleiro e Roberto Villar acompañaron á alcaldesa na visita ao inmoble

– A alcaldesa de Redondela, Digna Rivas, asinou formalmente a compra de Villa Elisa cos herdeiros da propiedade. O inmoble albergará a nova Biblioteca Municipal para poñer fin “a décadas de limitacións na biblioteca actual”. Agora poranse en marcha os traballos técnicos para a rehabilitación “desde o respecto ao valor patrimonial do inmoble e orientado a unha biblioteca moderna, funcional e pensada para o futuro”.

– Rivas amosouse moi satisfeita con esta adquisición que permite aumentar o patrimonio municipal “cun emblemático edificio histórico no centro da vila para uso de todos os veciños e veciñas de Redondela”. A propiedade conta tamén cunha zona axardinada que se transformará nun novo espazo verde anexo de uso público.

A alcaldesa de Redondela, Digna Rivas, asinou formalmente e ante notario a compra de Villa Elisa cos herdeiros do inmoble. O edificio, de estilo indiano, albergará a nova Biblioteca Municipal. Rivas salienta que esta compra é moi beneficiosa para toda a cidadanía, “xa que se trata dun inmoble senlleiro no centro da vila, de gran valor patrimonial e histórico e que será de uso público, cun fin cultural e social”. A alcaldesa amosou unha fonda satisfacción polo alcance deste paso: “Redondela dá hoxe un salto adiante. Por fin adquirimos un edificio á altura da nosa veciñanza, que permitirá ofrecer unha biblioteca moderna, accesible e con espazos reais para estudar, investigar e desfrutar da lectura en condicións dignas.”

A parcela ten uns 3.500 m2, cunha superficie construída de máis de 700 m2. A actual biblioteca Valle Inclán, situada no auditorio da Xunqueira, leva anos con limitacións evidentes: ruídos procedentes das actividades culturais, falta de espazo, imposibilidade de crecer ou de adaptarse ás necesidades de uso que demanda a poboación.

A rexedora anunciou que, a partir de agora, poranse en marcha os traballos técnicos para o proxecto de rehabilitación, que se realizará “desde o respecto ao valor patrimonial do inmoble e orientado a unha biblioteca moderna, funcional e pensada para o futuro”.

A propiedade conta tamén cunha ampla zona axardinada “co que gañaremos un espazo verde anexo, aberto ao público, que será un lugar de convivencia, lecer e tranquilidade no corazón da vila”, explica a alcaldesa.

A compra realizouse integramente con fondos municipais por un importe de 659.000 euros do remanente de tesourería. O pleno da corporación aprobou a adquisición no pasado mes de setembro co apoio dos socios de goberno e o BNG, malia os votos en contra do PP. A alcaldesa reiterou o agradecemento aos nacionalistas polo seu apoio para sacar adiante proposta que cualifica de “investimento estratéxico” para Redondela.

“Esta compra é unha aposta valente por Redondela: unha inversión en cultura, en educación, en cohesión social, na protección do noso patrimonio e, sobre todo, no benestar das persoas”, subliñou a alcaldesa. Rivas sinalou tamén que a adquisición de Villa Elisa contou desde o principio “co respaldo maioritario da veciñanza”.

A transformación do espazo público no corazón da vila

A adquisición de Villa Elisa permitirá transformar un gran espazo no centro da vila, na avenida Ernestina Otero, onde o Concello proxecta tamén a renovación da praza da Ponte da Lima, coñecida tamén como praza “da Petanca”. Este espazo de 2.300 m2 acollerá unha nova área cultural e de lecer cunha praza renovada, auditorio ao aire libre e un ascensor que conectará coa parte alta da rúa Subida á Estación. Estas obras realizaranse a través do Plan Extra da Deputación. O edificio “Granxa da Lima”, adquirido por Zona Franca, será tamén un novo espazo público que acollerá un viveiro de empresas.

La entrada O Concello firma a compra de Villa Elisa, un fito histórico para Redondela se publicó primero en Concello de Redondela.

– O peirao de Cesantes foi o escenario da botadura do “Novo Manuel”, réplica exacta do histórico bote que se atopa no museo de Rande. A alcaldesa Digna Rivas, que exerceu de madriña, sinalou que esta embarcación é “un símbolo” da Memoria Democrática de Redondela. O “Manuel” empregouse para levar víveres á illa de San Simón e salvou a moitos xudeus na II Guerra Mundial.

– A Asociación Lagoa dos Bébedos xestionará o novo bote, e xa trasladou a súa intención de darlle difusión á historia do “Manuel” en diferentes encontros de embarcacións tradicionais que se celebran tanto na costa de Galicia como na de Portugal e o Cantábrico. Amosáronse “moi satisfeitos” porque o proxecto “rematouse con moito éxito”.

A alcaldesa de Redondela, Digna Rivas, exerceu onte de madriña do “Novo Manuel” na botadura do emblemático bote no peirao de Cesantes. Trátase dunha “réplica exacta” do histórico bote “Manuel”, que abastecía de víveres á illa de San Simón e salvou a centos de xudeus que chegaban á ría de Vigo na II Guerra Mundial. Rivas salientou que con este acto “poñemos en valor a Memoria Democrática e devolvemos á ría este bote, todo un símbolo de solidariedade e humanidade na historia de Redondela”. Para a alcaldesa é importante que o “Novo Manuel” sirva para que a mocidade coñeza “os horrores do pasado” e que non se volvan repetir. A embarcación orixinal, o “Manuel”, foi totalmente restaurada e preside a entrada do museo Meirande.

Tanto a restauración do bote orixinal como a construción da réplica realizáronse nos Obradoiros de Emprego de Carpintería de Ribeira do Concello de Redondela entre 2024 e 2025. Alumnas e alumnos destes talleres asistiron á botadura e recibiron os parabéns da alcaldesa e o concelleiro de Emprego, Antonio Cabaleiro, “polo gran traballo realizado”. A directora dos Obradoiros, Imelda Barrio, explicou que o “Novo Manuel” superou todas as inspeccións técnicas de Capitanía Marítima e xa está listo para navegar.

Faustino Otero, herdeiro do bote que mandou construír seu avó hai case un século, amosouse “moi feliz” ao ver o “Novo Manuel” no mar. Aos seus 74 anos, esta tarde volveu coller os remos da embarcación na enseada, xunto aos membros da Asociación Lagoa dos Bébedos, que impulsou o proxecto. O colectivo, que xestionará o novo bote, trasladou a súa intención de darlle difusión á historia do “Manuel”en diferentes encontros de embarcacións tradicionais que se celebran tanto na costa de Galicia como na de Portugal e o Cantábrico. Amosáronse “moi satisfeitos” porque o proxecto “rematouse con moito éxito”.

La entrada O “Novo Manuel”, un símbolo de solidariedade e humanidade na ría se publicó primero en Concello de Redondela.

Infografía do futuro centro sociocultural de Chapela

– Os proxectos presentados polo Concello de Redondela e que acadaron financiamento dos fondos FEDER inclúen un centro Cívico Sociocultural en Chapela, o Museo Etnográfico Ángel Barros, a reforma do Mercado de Redondela, humanizacións nas rúas Prata, Telmo Bernárdez, Padre Sarmiento e rúa do Muro, ademais da transformación da rúa Manuel Rodríguez Casal nun camiño seguro para escolares na contorna do CEIP Laredo.

– O investimento total ascende a 8.288.738 euros, dos que a UE achega o 60%, 4.973.243 euros. A alcaldesa sinala que este é o resultado do traballo “serio e rigoroso” por parte do Concello. “Con estes fondos seguiremos transformando Redondela con proxectos clave para o futuro do municipio que comezaremos a executar en 2026”, afirma Digna Rivas.

O Concello optaba este ano a fondos europeos cun ambicioso proxecto incluído no Plan de Actuación Integrado. A alcaldesa, Digna Rivas, anunciou con gran satisfacción que esta proposta con accións “estratéxicas” para Redondela e Chapela recibiu luz verde e recibirá financiamento dos fondos FEDER. Redondela recibe unha dotación de 4.973.243 de euros, o que supón un 60% do que investirá nas distintas obras, que ascenden a un total de 8.288.738. O 40% restante, 3.315.495 euros serán financiados polo propio Concello. Rivas explicou que o prazo de execución é de entre 2 e 4 anos, “polo que Redondela vivirá unha extraordinaria transformación a curto prazo”.

Entre as actuacións que recibirán fondos europeos está o novo Centro Cívico Sociocultural de Chapela. O edificio crearase no antigo colexio Igrexa e revitalizará este espazo emblemático da parroquia. “Será un novo lugar de encontro e actividades para a veciñanza, con biblioteca e espazos para actividades culturais, sociais e recreativas”, sinala Rivas. Trátase dunha infraestrutura “moi necesaria e demandada en Chapela” aclara a alcaldesa. A obra está orzamentada en 1,6 millóns.

O Plan de Acción Integrado inclúe a creación do Museo Etnográfico Ángel Barros con espazos de exposición, salas e aulas, que acollerá a obra do artista local do que recibe o seu nome. O museo ocupará o lugar da edificación das antigas vivendas dos mestres na avenida Mendiño, e contará cun investimento de 1.167.000 euros.

O acondicionamento do Mercado de Redondela é outros dos proxectos que recibe financiamento, cunha renovación integral do espazo e conservando as súas fachadas orixinais. Entre as accións contempladas inclúese a mellora no confort do edificio con sistemas de climatización, illamento e iluminación eficiente. Todo iso reforzado cun proceso de transformación dixital. O orzamento é de 2,6 millóns de euros.

Humanizacións e eliminación de barreiras arquitectónicas

O plan que recibirá os fondos europeos tamén inclúe obras como a humanización das rúas Prata, Telmo Bernárdez, Padre Sarmiento e rúa do Muro, entre outras. Eliminaranse barreiras arquitectónicas con novas áreas de lecer. Estas transformacións urbanísticas terán un deseño “inclusivo e funcional, que mellora a habitabilidade da contorna urbana tanto para os residentes como para os visitantes”, explica a rexedora. Esta mellora da mobilidade conta cun orzamento de 2,1 millóns.

A actuación contempla tamén transformación da rúa Manuel Rodríguez Casal, en Chapela, para crear “camiños escolares seguros” na contorna do CEIP Laredo. As obras inclúen a mellora ambiental da zona con vexetación autóctona, novo mobiliario urbano e iluminación eficiente. O proxecto conta cun orzamento superior aos 770.000 euros

Traballo “serio e rigoroso” do Concello

A alcaldesa afirma que a aprobación destes fondos é resultado do traballo “serio e rigoroso por parte do Concello, e grazas a este financiamento seguiremos transformando Redondela con proxectos clave que comezaremos a executar en 2026”. Rivas sinala que “unha vez máis” o goberno local saca adiante inversións “fundamentais” para o futuro do municipio.

La entrada O Concello acada preto de 5 millóns de Fondos Europeos para a gran transformación de Redondela se publicó primero en Concello de Redondela.

– O pleno da corporación aprobou a adquisición do céntrico inmoble cos votos favorables do PSdG-PSOE, BNG e AER. O grupo municipal do PP votou en contra. O acordo plenario permitirá destinar 659.000 euros do remanente de tesourería para a compra. A alcaldesa, Digna Rivas, agradeceu o apoio dos nacionalistas par sacar adiante a proposta.

– O obxectivo do goberno local é trasladar a Villa Elisa a Biblioteca Municipal, salas de estudo e outros servizos municipais, ademais de habilitar nos seus xardíns un espazo verde de uso público. Deste xeito transformarase unha ampla zona par uso público na rúa Ernestina Otero, onde tamén se renovará a coñecida como“praza da Petanca”.

O pleno da corporación aprobou na sesión celebrada esta semana a adquisición de Villa Elisa, un inmoble de comezos do século XX situado na céntrica rúa Ernestina Otero. O acordou saíu adiante cos votos do PSdG-PSOE, BNG e AER, malia os votos en contra do PP, e permitirá destinar 659.000 euros do remanente de tesourería para a compra. A alcaldesa, Digna Rivas, agradeceu “a altura de miras do BNG, que pensou no ben común” e recoñeceu que o seu apoio foi “clave” para facer realidade este proxecto. A rexedora salienta que esta compra é algo beneficioso para toda a cidadanía: “trátase da compra dun inmoble de gran valor patrimonial no centro da vila que será de uso público, cun fin cultural e social”. A adquisición de Villa Elisa permite tamén “gañar un espazo verde anexo, aberto ao público, que será un lugar de convivencia, lecer e tranquilidade no corazón da vila”, explica a alcaldesa. A parcela ten uns 3.500 m2, cunha superficie construída de máis de 700 m2. Rivas amosouse moi satisfeita con este “investimento estratéxico” para Redondela, que garante un servizo aos cidadáns e preserva o patrimonio de Redondela. “Non podiamos deixar escapar esta oportunidade, tendo en conta que o Concello ten capacidade económica Concello para adquirir o edificio”, apunta a alcaldesa. Roberto Villar, concelleiro de Infraestruturas e Sostibilidade, fixo fincapé no apoio social da proposta “que conta co respaldo maioritario da veciñanza”.

O goberno local lamentou a negativa do grupo popular a unha proposta que é “moi positiva para o conxunto da cidadanía”.

A adquisición de Villa Elisa vai permitir transformar un gran espazo no centro da vila, na avenida Ernestina Otero, onde o Concello ten en marcha xa a renovación da coñecida como “praza da Petanca”. Este espazo de 2.300 m2 acollerá unha nova área cultural e de lecer cunha praza renovada, auditorio ao aire libre e un ascensor que conectará coa parte alta da rúa Subida á Estación. Estas obras realizaranse a través do Plan Extra da Deputación. O edificio “Granxa da Lima”, adquirido por Zona Franca, acollerá un viveiro de empresas.

La entrada O pleno dá luz verde á compra de Villa Elisa se publicó primero en Concello de Redondela.

O Concello de Redondela colabora co arquivo fotográfico de xigantes «Terra Nostra», de Cataluña. Os xigantes de Redondela, coñecidos cariñosamente como “os avós”, foron fotografados por Adriá Serrat Simó, responsable do arquivo. O Papamoscas e María a Grande xa forman parte da gran familia do arquivo “Terra Nostra”, no que se recollen máis de 10.000 imaxes de xigantes de todo mundo. Serrat destacou “a orixinalidade” dos xigantes, e a súa coidada conservación.

A visita de Adriá Serrat coincidiu coa recente restauración dos xigantes do Meco nos xardíns da Xunqueira. O experto catalán felicitou ao Concello pola réplica “exacta” destas figuras no exterior do multiúsos “para disfrute de toda a cidadanía e os visitantes”. Este Meco é, de feito, un dos elementos de Redondela máis fotografado por peregrinos e visitantes. Trátase da figura realizada polo artista Rubén Casal para o Entroido de 2021, durante a pandemia. O Meco representa os símbolos de Redondela: o viaduto, a coca e os xigantes, e foi o único Meco da historia local indultado das lapas.

A concelleira de Cultura, Rita Pérez Táboas, agradeceu a visita do responsable do arquivo Terra Nostra. A edil explicoulle a historia dos “avoíños” e puxo de relevo “o cariño e o respecto” que toda a veciñanza de Redondela lle ten aos xigantes, que son “todo un orgullo para os redondeláns” e que forman parte “do noso patrimonio, da cultura e da historia deste municipio” concluíu Pérez Táboas.

La entrada Redondela xa forma parte do arquivo de xigantes “Terra Nostra” se publicó primero en Concello de Redondela.

– A concellería de Cultura de Redondela encargou os traballos de restauración dos xigantes do Meco exposto nos xardíns do Multiúsos da Xunqueira. É un dos elementos de Redondela máis fotografado por peregrinos e visitantes. Trátase da figura realizada no Entroido de 2021, durante a pandemia, que foi indultada das lapas e representa os símbolos de Redondela: o viaduto, a Coca e os xigantes.

– A restauración realizouna Rubén Casal, artista redondelán autor do Meco. Os traballos incluíron a limpeza, reparación de desperfectos, impermeabilización e pintado completo dos xigantes. Tamén se reforzou a estrutura “para que sexa máis robusta e duradeira”.

A concellería de Cultura de Redondela rematou os traballos de restauración dos xigantes do Meco exposto nos xardíns do Multiúsos da Xunqueira. É un dos elementos de Redondela máis fotografado por peregrinos e visitantes. Trátase da figura realizada para o Entroido de 2021, durante a pandemia, que representa os símbolos de Redondela: o viaduto, a coca e os xigantes. O seu autor é Rubén Casal, artista redondelán que desde hai anos é o encargado de realizar o Meco. A obra foi indultada das lapas, e realizouse con materiais duradeiros para que resistise ao aire libre. A concelleira de Cultura, Rita Pérez, explica que a idea é que a obra durase uns meses, como símbolo da veciñanza de Redondela na pandemia, pero perdurou moito máis. Os xigantes da escultura son unha réplica exacta realizada por Casal dos orixinais, que saen en desfile nas festas locais.

Neste 2025, logo de catro anos á intemperie, o Concello encargou a súa restauración “para que volva lucir en todo o seu esplendor e dure moitos anos máis”, explica Pérez Táboas. Rubén Casal, xunto con Carmen Filgueira e Olalla Domínguez, foron os encargados da recuperación destas pezas. Comezaron a restauración das pezas a comezos de mes coa limpeza e retirada da pintura en mal estado dos xigantes. A restauración incluíu o arranxo de pequenos desperfectos, a aplicación de impermeabilizantes para maior durabilidade, a restauración de tecidos e o pintado completo dos xigantes. Tamén se reforzou a estrutura “para que sexa máis robusta e duradeira”.

Redondela pon así en valor este Meco que tanto éxito alcanza entre veciños e visitantes. Os xigantes orixinais, que están expostos dentro do Multiúsos, foron creados artesanalmente na década dos anos 70. En 2019 foron restaurados por Casal para a Festa da Coca.

La entrada Redondela restaura os xigantes do simbólico Meco se publicó primero en Concello de Redondela.