– O novo servizo atende a nenos e nenas de Redondela, Soutomaior, Pazos de Borbén e Fornelos. Está dirixido a menores de 0 a 6 anos que presentan trastornos no desenvolvemento ou risco de padecelos. O equipo de especialistas está formado por unha logopeda, unha psicóloga e unha fisioterapeuta pediátrica.

– Os menores accederán a este recurso público e gratuíto mediante derivación do seu pediatra de referencia. A alcaldesa de Redondela, Digna Rivas, explicou que se trata dun servizo público e gratuíto “imprescindible” para moitas crianzas e as súas familias, que agora poderán acceder “de xeito precoz e no seu entorno máis próximo”.

A alcaldesa de Redondela, Digna Rivas, xunto aos alcaldes de Soutomaior, Manuel Lourenzo, e Pazos de Borbén, Xosé Luciano Otero, visitaron onte o novo Servizo de Atención Temperá (SAT), situado na rúa Isidoro Queimaliños, 2, en pleno centro histórico da vila.

Este recurso nace como froito da colaboración entre os concellos de Redondela, Soutomaior, Pazos de Borbén e Fornelos de Montes para ofrecer unha atención especializada a nenas e nenos de entre 0 e 6 anos. O servizo está dirixido a menores que presenten trastornos no desenvolvemento ou risco de padecelos. Segundo os datos do IGE, a área de influencia dos catro municipios suma 1.647 menores nesa franxa de idade, estimándose que arredor do 10 % poderá precisar este apoio nalgún momento.

Un modelo integral centrado na contorna familiar

O servizo, integrado na Rede Galega de Atención Temperá e cofinanciado pola Unión Europea (Programa FSE+ Galicia 2021-2027), está xestionado pola Confederación Galega de Persoas con Discapacidade (COGAMI). A diferenza dos modelos tradicionais, este SAT aposta por unha intervención centrada na familia. O obxectivo é que os profesionais acompañen aos pais e nais nas rutinas diarias (comidas, xogo, hixiene) para converter cada momento nunha oportunidade de aprendizaxe e autonomía, sen engadir cargas extras ás familias.

O equipo multidisciplinar está formado por Andrea Álvarez (psicóloga), Paula Piñeiro (logopeda) e Paula Hernando (fisioterapeuta pediátrica). Este grupo de expertas traballará de xeito coordinado cos recursos de sanidade, servizos sociais e educación da comarca.

Compromiso coa infancia e acceso gratuíto

A alcaldesa Digna Rivas destacou que este servizo é “imprescindible” e responde ao obxectivo prioritario da Concellería de Infancia, un departamento impulsado ao inicio do mandato pola exconcelleira e pediatra Pilar Martínez. “Pili traballou arreo para poñer este recurso a disposición das familias de xeito precoz e na súa contorna máis próxima” e agora por fin é unha realidade, sinala Rivas. Deste xeito “optimizamos os resultados e garantimos unha inclusión plena dos menores”, conclúe a alcaldesa.

Pola súa banda, os alcaldes da agrupación valoraron moi positivamente o SAT, subliñando que o servizo é “público e gratuíto”. Para acceder a el, os nenos e nenas deberán ser derivados polo seu pediatra de referencia tras detectar ou sospeitar de calquera desafío no desenvolvemento.

Na visita institucional tamén estiveron o coordinador do SAT, Álvaro García e Celso Álvarez en representación da Directiva de COGAMI, entidade que achega a súa ampla experiencia na xestión de servizos especializados e a defensa dos dereitos das persoas con discapacidade.

La entrada O Servizo de Atención Temperá de Redondela dá cobertura á poboación infantil da comarca se publicó primero en Concello de Redondela.

– As clases de baile “Ritmo vital”, novidade deste curso, son todo un éxito con 120 participantes en Redondela e Chapela. As aulas de Tai Chi “Equilibrio vital” e “Memoria Viva”, con talleres cognitivos, repiten como en anos anteriores con preto de 400 e 320 alumnos e alumnas respectivamente. Todas as actividades son de balde e realízanse nas diferentes parroquias por parte da concellería de Maiores.

– A alcaldesa, Digna Rivas, e a concelleira Iria Vilaboa, visitaron hoxe ao alumnado no primeiro día de clases e comprobaron “o gran éxito destas actividades con máis participantes cada ano”. Rivas lembra que o obxectivo destes programas é “mellorar o estado físico e cognitivo das persoas maiores e favorecer as súas relacións sociais, xa que todo redunda nunha maior calidade de vida”.

Esta semana comezaron os programas para maiores de 55 anos “Ritmo Vital”, con clases de baile, “Equilibrio Vital”, coa práctica de Tai Chi, e “Memoria Viva” con talleres cognitivos. Todas as actividades acadaron un gran éxito de participación. As clases de baile son a novidade deste curso, e súmanse ás clases de Tai Chi e Memoria que se imparten desde hai anos. A modalidade de baile estreouse o pasado verán con clases ao aire libre e tivo unha gran acollida entre o público. “En resposta á demanda dos veciños e veciñas incorporamos o baile tamén ás actividades anuais”, explica a alcaldesa Digna Rivas. O Concello fai así un esforzo “para mellorar a calidade de vida dos nosos maiores”. A rexedora achegouse esta mañá ao pavillón da Marisma onde comezaron as clases de baile para comprobar “o gran éxito que supón esta actividade, cunha excelente resposta por parte das persoas maiores”. Son un total de 120 as veciñas e veciños que participan nesta actividade que se estrea este curso en Redondela e Chapela. No caso do Tai Chi, que comezou esta mañá en Chapela, repite a boa acollida de anos anteriores con 390 participantes entre os pavillóns municipais González Soto e a Marisma, ademais das clases en Saxamonde, Quintela, Cedeira, CCR Chapela, Reboreda, Ventosela-Miñoteira, Saramagoso, Cabeiro, Negros, Cesantes e CC Vilar.

As clases de “Memoria Viva” realízanse en 17 emprazamentos diferentes, con clases en todas as parroquias. Trátase de cursos de estimulación cognitiva para exercitar diferentes áreas cerebrais. O seu obxectivo principal é manter a mente activa, ralentizar o deterioro cognitivo, mellorar a atención e a concentración e fomentar a socialización. Como en anos anteriores conta tamén con moita demanda, con 320 participantes.

Actividades de balde en todas as parroquias

Estas actividades, organizadas pola concellería de Maiores que dirixe Iria Vilaboa, impártense en 16 emprazamentos diferentes por todas as parroquias de Redondela. A alcaldesa sinala a importancia de que estas clases se oferten non só nos núcleos urbanos de Redondela e Chapela, senón tamén nas demais parroquias do municipios “para que todos os veciños e veciñas poidan acceder a estes servizos sen ter que desprazarse”. Todas as actividades son de balde, “para que todas as persoas o que o desexen poida asistir, independentemente da súa situación económica”. A rexedora salientou “a boa acollida destes cursos ano tras ano entre a veciñanza, que son un éxito rotundo”.

A concelleira, Iria Vilaboa, explica que os obradoiros que teñen como obxectivo “previr o deterioro físico e cognitivo das persoas maiores e mellorar a súa calidade de vida”. O número de participantes increméntase cada ano, con máis grupos en todas as parroquias. A valoración que fan os participantes é “moi boa”, xa que estas actividades permítenlles mellorar a nivel físico e mental, e ademais “fomentan as súas relacións sociais e melloran a calidade de vida”.

La entrada Máis de 800 persoas comezan os cursos de baile, ximnasia e memoria para maiores se publicó primero en Concello de Redondela.

– A alcaldesa, Digna Rivas, amósase especialmente satisfeita de programas innovadores e pioneiros para apoiar ás persoas máis vulnerables. É o caso do Servizo de “Atención e coidado inmediato” de apoio ás vítimas de violencia machista, o protocolo para protexer ás traballadoras do SAF e o novo servizo de Atención Temperá que será referente comarcal para nenos e nenas con necesidades especiais.

– En canto a proxectos urbanísticos, Rivas destaca a compra de Villa Elisa, un edificio emblemático que acollerá a nova biblioteca municipal. Tamén se realizou o segundo tramo da Vía Verde en Chapela, a reforma no campo de Santa Mariña, o proxecto de reforma integral do camiño Cidadelle e a licitación do proxecto de redacción da avenida Mendiño. Rivas afirma que 2025 foi un ano “moi produtivo, no que o goberno local traballou arreo e os feitos así o demostran”.

O Concello de Redondela pechou o exercicio 2025 cun balance moi positivo con grandes proxectos urbanísticos postos en marcha e novos servizos para a cidadanía, especialmente para a persoas máis vulnerables. A alcaldesa, Digna Rivas, afirma que 2025 foi un ano “moi produtivo” no que o goberno local traballou “arreo” e os feitos así o demostran.

A rexedora amósase especialmente satisfeita de varias actuacións postas en marcha desde o departamento de Servizos Sociais que son “pioneiras”. É o caso do Servizo de “Atención e coidado inmediato” de apoio ás vítimas de violencia machista. Este servizo está dispoñible os 365 días do ano para atender aos fillos e fillas, así como a maiores dependentes que estean a cargo das mulleres. O Concello está a ultimar tamén un acordo para proporcionar un recurso habitacional ás vítimas que se vexan obrigadas a abandonar o seu domicilio.

No Servizo de Atención no Fogar para persoas dependentes, Redondela foi dos primeiros Concellos en asinar cos sindicatos e coa empresa que presta o servizo un protocolo para protexer ás traballadoras. Con este acordo o Concello adiántase á Xunta de Galicia e establecen medidas de prevención e actuación ante situacións de risco para as traballadoras do SAF. Rivas defende a importancia deste protocolo porque as coidadoras que atenden aos usuarios nos domicilios “non poden traballar con medo e teñen dereito a interromper o servizo cando perciban unha situación de risco”.

Na atención á infancia, desde Redondela acadouse a posta en marcha dun novo servizo de Atención Temperá que comezará a funcionar no primeiro trimestre deste ano. O servizo préstase en colaboración cos municipios de Soutomaior, Pazos de Borbén e Fornelos. A asistencia de Atención Temperá farase en Redondela para a poboación infantil de 0 a 6 anos dos catro municipios. Os nenos e nenas accederán a este recurso mediante derivación do seu pediatra. Rivas explica que o obxectivo principal é ofrecer este recurso “imprescindible” para moitas crianzas e as súas familias, e facelo “de xeito precoz e no seu entorno máis próximo”.

En canto a proxectos urbanísticos, Rivas destaca a compra de Villa Elisa, un edificio emblemático da vila de Redondela que xa é patrimonio público. O inmoble acollerá a nova biblioteca municipal, servizos culturais e un xardín público. No centro da vila transformouse tamén a zona do Salgueiral, onde se mellorou a seguridade para os peóns. Tamén se fixo realidade o segundo tramo da Vía Verde en Chapela, que mellora a mobilidade na parroquia e ofrece novas zonas de descanso e lecer. Nas instalacións deportivas puxéronse en marcha as obras de reforma no campo municipal de Santa Mariña, que estaban obsoletas.

Tamén se remataron importantes proxectos técnicos que se transformarán en grandes obras neste 2026, como o proxecto para a reforma integral do camiño Cidadelle, en Chapela, onde se crearán sete miradoiros con espazos de descanso e de lecer, e a licitación para redactar o proxecto da avenida Mendiño.

A alcaldesa amósase tamén moi satisfeita da creación dunha nova concellería, a de Memoria Democrática, da que ela é responsable. Nesta área trabállase na difusión da historia de San Simón “para frear o discurso da ultradereita que branquea o réxime franquista”. Esta concellería traballa tamén co Ministerio da área ao ser declarada a illa Lugar de Memoria Democrática polo goberno central.

La entrada Redondela pechou 2025 con actuacións pioneiras en servizos sociais e grandes proxectos urbanísticos se publicó primero en Concello de Redondela.

– O Concello de Redondela asinou un protocolo no que  se establecen “medidas de prevención e actuación ante posibles situación de risco para as traballadoras”. O documento realizouse en colaboración coas representantes sindicais, as técnicas municipais de Servizos Sociais e a empresa que presta o Servizo de Atención no Fogar.

– As medidas inclúen a valoración previa en cada domicilio para detectar se existe perigo, a formación do persoal e protocolos de actuación. O principio básico deste protocolo é que as persoas que atenden aos usuarios nos domicilios “non pode traballar con medo e teñen dereito a interromper o servizo cando perciban unha situación de risco”.

– A alcaldesa, Digna Rivas, lembra que a Xunta comprometeuse a establecer un protocolo despois da morte dunha profesional nun domicilio do Porriño o pasado mes de xullo, “pero aínda non hai nada”. No goberno local de Redondela “adiantámonos á Xunta e asinamos coas partes implicadas este acordo”. Rivas afirma que “o obxectivo é garantir non só a atención das persoas usuarias, senón tamén a seguridade das traballadoras”.

O Concello de Redondela establece un protocolo pioneiro con medidas de prevención e actuación ante posibles situación de risco para as traballadoras do SAF. O documento, que se asinou onte no Concello, realizouse en colaboración coas representantes sindicais, as técnicas municipais de Servizos Sociais e a empresa que presta o Servizo de Atención no Fogar.

A alcaldesa, Digna Rivas, sinala que estas medidas teñen como obxectivo “garantir a seguridade das traballadoras do SAF respectando os dereitos das persoas usuarias”. Rivas explica que, ante unha situación de risco no domicilio, “primará a protección á traballadora” . O principio básico deste protocolo é que o persoal que acode aos domicilios “non pode traballar con medo e ten dereito a interromper o servizo cando perciba risco”, afirma Rivas. O goberno local adopta así medidas “efectivas” para protexer ás empregadas do Servizo de Axuda non Fogar (SAF) ante situacións de risco, e advirte que velará porque o protocolo “se cumpra de maneira efectiva”. A alcaldesa sinala que, malia ser unha competencia da Xunta de Galicia, o Concello asume esta responsabilidade para garantir, “non só a atención das persoas usuarias, senón tamén a seguridade das traballadoras”. A alcaldesa lembra que a Xunta comprometeuse a establecer un protocolo para protexer ás traballadoras do SAF despois da morte dunha profesional nun domicilio do Porriño o pasado mes de xullo, “pero aínda non hai nada”. No goberno local de Redondela “adiantámonos á Xunta e asinamos coas partes implicadas este acordo, porque nos preocupa a situación que viven cada día estas traballadoras”.

O protocolo conta con varias liñas de actuación que se estableceron logo de varias xuntanzas, tanto con representantes das traballadoras como da empresa, e tendo en conta as súas achegas. Esas liñas de actuación inclúen: formación e información ao persoal; coordinación efectiva e comunicación inmediata; medidas preventivas con persoal a disposición do servizo; valoración de riscos e valoración social previa; actuación ante posibles situación de risco ou entorno hostil.

A concelleira de Servizos Sociais, Iria Vilaboa, explica que a formación ao persoal será obrigatoria, e estará dirixida a “identificar escenarios hostís con formación sobre riscos, casos de acoso ou violencia”. O Concello colaborará “para concienciar ás persoas usuarias do servizo e ás súas familias”.

A comunicación entre as traballadoras, a coordinadora do servizo e o Concello será continua “para a detección precoz de riscos” e realizarase unha notificación “inmediata” de posibles perigos á técnica municipal. As medidas preventivas inclúen que a empresa que presta o servizo teña psicólogo/a e terapeuta ocupacional a disposición das persoas usuarias, das familias e do persoal do SAF.

Antes de comezar o servizo nun domicilio realizarase unha valoración de riscos para detectar se existe perigo de agresión e, no caso de que exista risco grave e inminente, suspenderíase o servizo. A propia traballadora debe facer tamén unha avaliación diaria e, se detecta perigo “abandonará o domicilio e informará á coordinadora”.

O protocolo establece como actuar ante situacións de risco ou entorno hostil, coa suspensión temporal do servizo se procede. Vilaboa explica que primará “a protección, asistencia e asesoramento á traballadora”. Cando se produzan estas situacións porase en marcha un proceso de investigación e seguimento cun rexistro de incidencias onde quede constancia da comunicación ao Comité de Prevención.

La entrada Redondela aproba un protocolo para protexer ás traballadoras do Servizo de Atención no Fogar se publicó primero en Concello de Redondela.

Infografía do futuro centro sociocultural de Chapela

– Os proxectos presentados polo Concello de Redondela e que acadaron financiamento dos fondos FEDER inclúen un centro Cívico Sociocultural en Chapela, o Museo Etnográfico Ángel Barros, a reforma do Mercado de Redondela, humanizacións nas rúas Prata, Telmo Bernárdez, Padre Sarmiento e rúa do Muro, ademais da transformación da rúa Manuel Rodríguez Casal nun camiño seguro para escolares na contorna do CEIP Laredo.

– O investimento total ascende a 8.288.738 euros, dos que a UE achega o 60%, 4.973.243 euros. A alcaldesa sinala que este é o resultado do traballo “serio e rigoroso” por parte do Concello. “Con estes fondos seguiremos transformando Redondela con proxectos clave para o futuro do municipio que comezaremos a executar en 2026”, afirma Digna Rivas.

O Concello optaba este ano a fondos europeos cun ambicioso proxecto incluído no Plan de Actuación Integrado. A alcaldesa, Digna Rivas, anunciou con gran satisfacción que esta proposta con accións “estratéxicas” para Redondela e Chapela recibiu luz verde e recibirá financiamento dos fondos FEDER. Redondela recibe unha dotación de 4.973.243 de euros, o que supón un 60% do que investirá nas distintas obras, que ascenden a un total de 8.288.738. O 40% restante, 3.315.495 euros serán financiados polo propio Concello. Rivas explicou que o prazo de execución é de entre 2 e 4 anos, “polo que Redondela vivirá unha extraordinaria transformación a curto prazo”.

Entre as actuacións que recibirán fondos europeos está o novo Centro Cívico Sociocultural de Chapela. O edificio crearase no antigo colexio Igrexa e revitalizará este espazo emblemático da parroquia. “Será un novo lugar de encontro e actividades para a veciñanza, con biblioteca e espazos para actividades culturais, sociais e recreativas”, sinala Rivas. Trátase dunha infraestrutura “moi necesaria e demandada en Chapela” aclara a alcaldesa. A obra está orzamentada en 1,6 millóns.

O Plan de Acción Integrado inclúe a creación do Museo Etnográfico Ángel Barros con espazos de exposición, salas e aulas, que acollerá a obra do artista local do que recibe o seu nome. O museo ocupará o lugar da edificación das antigas vivendas dos mestres na avenida Mendiño, e contará cun investimento de 1.167.000 euros.

O acondicionamento do Mercado de Redondela é outros dos proxectos que recibe financiamento, cunha renovación integral do espazo e conservando as súas fachadas orixinais. Entre as accións contempladas inclúese a mellora no confort do edificio con sistemas de climatización, illamento e iluminación eficiente. Todo iso reforzado cun proceso de transformación dixital. O orzamento é de 2,6 millóns de euros.

Humanizacións e eliminación de barreiras arquitectónicas

O plan que recibirá os fondos europeos tamén inclúe obras como a humanización das rúas Prata, Telmo Bernárdez, Padre Sarmiento e rúa do Muro, entre outras. Eliminaranse barreiras arquitectónicas con novas áreas de lecer. Estas transformacións urbanísticas terán un deseño “inclusivo e funcional, que mellora a habitabilidade da contorna urbana tanto para os residentes como para os visitantes”, explica a rexedora. Esta mellora da mobilidade conta cun orzamento de 2,1 millóns.

A actuación contempla tamén transformación da rúa Manuel Rodríguez Casal, en Chapela, para crear “camiños escolares seguros” na contorna do CEIP Laredo. As obras inclúen a mellora ambiental da zona con vexetación autóctona, novo mobiliario urbano e iluminación eficiente. O proxecto conta cun orzamento superior aos 770.000 euros

Traballo “serio e rigoroso” do Concello

A alcaldesa afirma que a aprobación destes fondos é resultado do traballo “serio e rigoroso por parte do Concello, e grazas a este financiamento seguiremos transformando Redondela con proxectos clave que comezaremos a executar en 2026”. Rivas sinala que “unha vez máis” o goberno local saca adiante inversións “fundamentais” para o futuro do municipio.

La entrada O Concello acada preto de 5 millóns de Fondos Europeos para a gran transformación de Redondela se publicó primero en Concello de Redondela.

– Estudantes, familiares e veciñanza en xeral encheu onte o auditorio do Piñeiral do Crego para participar nunha mesa redonda sobre a enfermidade do alzhéimer. Profesionais sanitarios, de servizos xeriátricos e servizos sociais compartiron experiencias e contestaron ás preguntas do numeroso público.

-A xornada puxo de relevo a necesidade de “igualar os dereitos dos enfermos de alzhéimer cos de calquera outro cidadán” e reclamáronse á Xunta de Galicia máis recursos para Dependencia e Sanidade. Os participantes pediron máis investigación “para un diagnóstico e un tratamento precoz” e unha atención de calidade “tanto nas cidades como nas zonas rurais”.

O Concello de Redondela conmemorou hoxe o Día Mundial do Alzhéimer cunha mesa redonda titulada “Voces polo alzhéimer”. Celebrouse no auditorio do Piñeiral do Crego, en Chapela, contou coa presenza de profesionais da xeriatría, medicina, servizos sociais e familias de afectados. A alcaldesa, Digna Rivas, e a concelleira de Servizos Sociais, Iria Vilaboa, presentaron esta xornada facendo referencia ao lema do Día Mundial do Alzhéimer: “Igualando dereitos”. Rivas esixiu o dereito dos enfermos e das súas familias “a ser escoitados, a tomar as súas propias decisións, a contar cunha atención sanitaria específica, dereito á protección social e á dignidade”.

O doutor Miguel Ángel Vázquez, especialista en xeriatría e experto internacional en xerontoloxía social, puxo en valor “a gran participación no acto” e agradeceu as “interesantes preguntas” do público, en gran parte alumnado do colexio Alexandre Bóveda, o IES Chapela e o centro San José da Guía, pero tamén familiares de enfermos e veciñanza en xeral. Foi un acto moi dinámico e participativo, no que moitas das dúbidas do público versaron ao redor das diferentes fases do alzhéimer. Vázquez explicou que “non se pode normalizar a perda de memoria nas persoas maiores”, polo que é necesario unha mellor atención sanitaria. Sinalou tamén que o alzhéimer borra a memoria, pero “non os sentimentos e as lembranzas emocionais”. Familiares de enfermos compartiron tamén as súas experiencias, e manifestaron a súa “frustración” ante o avance da enfermidade e a falta de apoio por parte da administración. Todos coincidiron en demandar á Xunta de Galicia “máis recursos para Dependencia e Sanidade, e máis investigación para un diagnóstico e un tratamento precoz”. Esixiron tamén unha atención de calidade “tanto nas cidades como nas zonas rurais” e advertiron que “os dereitos dos cidadáns non poden depender do código postal no que vivas”.

Tamén participaron Pedro López Cadilla, director de Servizos Xeriátricos, Carmen Fernández Dopazo, traballadora dos Servizos Sociais Comunitarios do Concello de Redondela, Juan Carlos Rodríguez Bernárdez, presidente da Asociación AFAGA Alzhéimer, e María Delia Lina Dacosta, familiar dunha persoa diagnosticada de demencia. A alcaldesa agradeceu a todos os participantes a súa asistencia, e cualificou a xornada como un “éxito rotundo” no que quedou demostrado que a sociedade, incluída a xuventude, implícase por unha sociedade “máis xusta e igualitaria para todos e todas”.

La entrada Redondela dálle voz ao Alzhéimer se publicó primero en Concello de Redondela.

O Concello de Redondela conmemora o Día Mundial do Alzhéimer cunha mesa redonda titulada “Voces polo alzhéimer”. Será o luns, 22 de setembro, ás 10.30 horas no auditorio do Piñeiral do Crego, Chapela. Contará coa presenza de profesionais da xeriatría, medicina, servizos sociais e familias de afectados. A alcaldesa, Digna Rivas, e a concelleira de Servizos Sociais, Iria Vilaboa, presentaron esta xornada “que pretende ser unha conmemoración especial para as persoas que sofren esta enfermidade, é dicir, a quen a padece, para as súas familias, e tamén para os profesionais que axudan a sobrelevala”.

Participará Miguel Ángel Vázquez Vázquez, médico especialista en xeriatría, experto en xerontoloxía social, profesor universitario e asesor científico de organismos nacionais e internacionais. Estarán tamén Pedro López Cadilla, director de Servizos Xeriátricos, Carmen Fernández Dopazo, traballadora dos Servizos Sociais Comunitarios do Concello de Redondela, Juan Carlos Rodríguez Bernárdez, presidente da Asociación AFAGA Alzhéimer, e María Delia Lina Dacosta, familiar dunha persoa diagnosticada de demencia.

A esta xornada asistirá alumnado de ciclos de atención á dependencia e familiares, e a asistencia está aberta a todo o público interesado ata completar o aforo. O obxectivo desta “mesa de voces” é dar resposta ás dúbidas das persoas enfermas, das súas familias e profesionais dos coidados. “Por iso organizamos unha mesa redonda aberta, onde o público será protagonista e terá oportunidade de trasladarlle aos expertos todas as súas consultas”, conclúe Vilaboa.

La entrada Redondela conmemora o Día Mundial do Alzhéimer cunha mesa redondela de expertos e familias se publicó primero en Concello de Redondela.

– A alcaldesa, Digna Rivas, sinala que con estas bolsas “garántese a escolarización, ao compensar posibles carencias de tipo familiar ou económico e evitamos situacións de risco social, ao tempo que aseguramos unha nutrición axeitada para nenos e nenas”. O prazo de solicitude está aberto ata o 4 de agosto.

– A partida destinada a estas axudas ascende a 40.000 euros para o próximo curso “co obxectivo de atender ao maior número de familias posible”. Rivas destaca “o compromiso real” do goberno local coas políticas sociais, polo que desde a súa chegada á alcaldía o orzamento desta partida duplicouse, pasando de 20.000 euros de 2019 aos 40.000 actuais.

O departamento de Servizos Sociais do Concello de Redondela ten aberto o prazo de solicitude para as axudas de comedor escolar do curso 2025/26. Trátase dunha prestación económica destinada ás familias con menores que utilizan o servizo de comedor do colexio. A alcaldesa, Digna Rivas, explica que con estas bolsas preténdese “garantir a escolarización, compensar posibles carencias de tipo familiar ou económico, evitar situacións de risco social e asegurar unha nutrición axeitada”. A partida municipal destinada a estas axudas ascende a 40.000 euros par o próximo curso “co obxectivo de atender ao maior número de familias posible”. Rivas destaca “o compromiso real” do goberno local coas políticas sociais, polo que desde a súa chegada á alcaldía o orzamento desta partida duplicouse, pasando de 20.000 euros de 2019 aos 40.000 actuais.

A concelleira Iria Vilaboa explica que esta bolsa está dirixida ao alumnado con praza no comedor escolar dalgún dos centros de ensino público que contan con este servizo, e que faga uso do comedor de maneira continuada un mínimo de 3 veces por semana. Nas bases desta axuda establécense criterios económicos (máximo 10 puntos) e de situación socio-familiar cos informes do departamento de Servizos Sociais do Concello (máximo 20 puntos).

No pasado curso foron 41 os nenos e nenas que contaron coa bolsa, e todo o alumnado usuario do departamento de Servizos Sociais tivo axuda de comedor.

As bases da convocatoria poden consultarse na páxina web do Concello de Redondela (www.redondela.gal) e no Boletín Oficial da Provincia de Pontevedra. As solicitudes deberán realizarse no impreso municipal específico para esta convocatoria, acompañadas da documentación requirida, e poden presentarse no Rexistro xeral de entrada do Concello de Redondela, tanto na oficina municipal de Chapela como na Casa do Concello, en horario de atención ao publico. Tamén pode facerse a través da sede electrónica do Concello https://redondela.sedelectronica.es. Ou en calquera dos rexistros oficiais establecidos pola lexislación vixente. O prazo de solicitudes está aberto ata o 4 de agosto.

La entrada O Concello de Redondela destina 40.000 euros para as bolsas de comedor escolar se publicó primero en Concello de Redondela.

A alcaldesa Digna Rivas (d) co concelleiro Antonio Cabaleiro e o director do centro Antonio Bas nunha visita recente ao instituto.

– A xefa de estudos do centro, Fátima Ferreiro, explica que rematado o ciclo o alumnado acada o título de Técnico Superior en Mediación Comunicativa, “o que lles permite traballar en servizos ás persoas xordas, xordocegas, con discapacidade auditiva ou dificultades de comunicación, linguaxe e fala”. O prazo de matrícula está aberto ata o 2 de xullo.

– A alcaldesa, Digna Rivas, salienta que se trata dunha moi boa nova “que supón dar pasos cara unha sociedade máis igualitaria e inclusiva”. A integración plena de persoas con dificultades de comunicación, linguaxe e fala fai necesarios profesionais “que posibiliten a súa integración en todos os ámbitos da vida”.

O IES Chapela impartirá o próximo curso 25-26 o Ciclo Superior de Mediación Comunicativa. O de Redondela será o único centro público do sur de Galicia en impartir este ciclo incluído na rama de Servizos á Comunidade. Ata o de agora o alumnado que quería cursar esta especialidade nun centro público tiña que desprazarse á Coruña. A xefa de estudos do centro, Fátima Ferreiro, explica que rematado o ciclo o alumnado acada o título de Técnico Superior en Mediación Comunicativa, “o que lles permite traballar en servizos ás persoas xordas, xordocegas, con discapacidade auditiva ou dificultades de comunicación, linguaxe e fala”. A lingua de signos é un dos eixos desta formación, que tamén facilita outros recursos e ferramentas para establecer procesos de comunicación fluída, accesible e clara entre persoas con diversidade funcional.

A alcaldesa de Redondela, Digna Rivas, salienta que se trata dunha moi boa nova para Redondela e toda a bisbarra, xa que permitirá ao alumnado interesado nesta rama dos servizos sociais poder cursar esta especialidade nun centro público. A rexedora entende que se trata dunha formación “moi necesaria e beneficiosa para o conxunto da cidadanía, xa que supón dar pasos cara unha sociedade máis igualitaria e inclusiva”. Rivas apunta que formar profesionais no ámbito da Mediación Comunicativa é fundamental “para o desenvolvemento e aplicación dos dereitos das persoas con discapacidade auditiva, visual e comunicativa”. Segundo a alcaldesa “é unha obriga para as administracións e para a sociedade en xeral garantir a accesibilidade das persoas con dificultades de comunicación a unha vida normalizada e participativa en plenitude”. A maior participación social de persoas con dificultades de comunicación, linguaxe e fala fai necesario unha figura profesional “que posibilite a súa integración en todos os ámbitos da vida”. Por iso poden contar con esta formación nun centro público como o IES de Chapela “é un verdadeiro luxo”, conclúe a alcaldesa.

Os servizos que prestan os técnicos e técnicas superiores en Mediación Comunicativa inclúen os ámbitos asistenciais, educativos, sociolaborais, psicosociais e de apoio nas xestións básicas. Tamén exercen a súa actividade no sector dos servizos á comunidade, nos ámbitos da dinamización comunitaria e na promoción de igualdade de oportunidades con estes colectivos de persoas.

O prazo de presentación de solicitudes de admisión está aberto e remata o 2 de xullo ás 13:00 horas a través da aplicación Ciclos Admisión (www.edu.xunta.gal/ciclosadmision/).

La entrada O IES Chapela, primeiro centro público do sur de Galicia en impartir o Ciclo Superior de Mediación Comunicativa se publicó primero en Concello de Redondela.

– O Concello de Redondela acolleu onte a sinatura dos convenios anuais coa asociación Lenda, á que corresponden 20.000 euros, e coa Asociación Española contra o Cancro, por un importe de 6.000 euros.

– A alcaldesa, Digna Rivas, puxo de manifesto a importancia de apoiar desde o Concello a estes colectivos “que desenvolven unha gran labor social e asistencial da que se benefician moitas familias do noso municipio”.

O Concello de Redondela acolleu onte o acto de sinatura de dous convenios con colectivos que realizan labores sociais e asistenciais no municipio. No caso de Lenda trátase dunha asociación de Saúde Mental que presta atención, asesoramento e información aos enfermos e familiares. Realizan labores de sensibilización e actividades de ocio, obradoiros, viaxes e deportes. A alcaldesa, Digna Rivas, sinala que ademais participan activamente en todas as actividades e eventos que se realizan no municipio. O convenio do Concello con esta asociación incrementouse este ano máis dun 33%, e pasa dos 15.000 euros ata os 20.000 euros. Por outra banda, a Asociación Española contra o Cancro é unha organización sen ánimo de lucro que ofrece atención psicolóxica, sanitaria e social para os enfermos de cancro e as súas familias, ademais de facer unha gran labor de divulgación. A achega do Concello de Redondela con esta asociación increméntase un 50%, ao pasar dos 4.000 do ano pasado aos 6.000 euros do presente exercicio.

A alcaldesa, Digna Rivas, asinou os convenios con Olga Rodríguez Puga, por parte de Lenda, e Amparo Alonso Monteagudo, por parte da Asociación Española contra o Cancro.

Son en total 21 os colectivos e asociacións que reciben este ano do Concello de Redondela 319.500 euros en concepto de subvencións nominativas, un importe que se incrementa en 71.500 euros con respecto ao ano pasado. Entre as entidades beneficiarias hai tres novas: a Asociación Cultural e Deportiva de Rande pola celebración da Batalla de Rande (22.000 euros), a Fundación Érguete (10.500 euros) e o CCD Cesantes pola Bandeira Feminina Cesantes (9.000 euros) .

Outros colectivos que incrementan a subvención con respecto ao ao pasado, ademais de Lenda e a Asociación Española contra o Cancro, con Andaina, Afaga, a Confraría de Redondela, Millo Verde, ACS Chapela Escola de Música, Xente Titiriteira e a Asociación de Empresarios. Outros colectivos e asociacións que reciben subvencións por parte do Concello a través de convenios son Cáritas, Fundación Santa Cruz, Solidariedade Galega co Pobo Saharauí, ONG Da Man, Fundación Amigos de Galicia, CCD Cesantes Bandeira Redondela, CCD Cesantes Bandeira de Bateis, CR Chapela Bandeira Feminina Chapela e CR Chapela Bandeira Masculina Chapela.

A alcaldesa, Digna Rivas, sinala que é un compromiso do seu goberno “apoiar a labor que están a realizar as diferentes asociacións e entidades en beneficio da veciñanza redondelá no ámbitos social, económico, cultural ou deportivo”.

La entrada O Concello de Redondela incrementa o importe dos convenios con Lenda e a Asociación Contra o Cancro se publicó primero en Concello de Redondela.

O Concello de Redondela acolleu este mediodía a sintura dos convenios coa Fundación Amigos de Galicia, cunha subvención por un importe de 6.000 euros, e a Fundación Santa Cruz, cunha subvención de 3.000 euros. 

Son en total 21 os colectivos e asociacións que reciben este ano do Concello de Redondela 319.500 euros en concepto de subvencións nominativas, un importe que se incrementa en 71.500 euros con respecto ao ano pasado. A alcaldesa, Digna Rivas, sinala que é un compromiso do seu goberno “apoiar a labor que están a realizar as diferentes asociacións e entidades en beneficio da veciñanza redondelá no ámbitos social, económico, cultural ou deportivo”.

La entrada Redondela asina convenios con entidades sociais se publicó primero en Concello de Redondela.

– O Concello de Redondela acolleu o acto de sinatura dos convenios coa asociación Andaina, á que corresponden 20.000 euros, con Afaga, por un importe de 18.000 euros, e Cáritas, cun total de 20.000 euros.

– A alcaldesa, Digna Rivas, puxo de manifesto a importancia de apoiar desde o Concello a estes colectivos “que desenvolven unha gran labor social e asistencial da que se benefician moitas familias do noso municipio”.

O Concello de Redondela acolleu o acto de sinatura de tres convenios con colectivos que realizan labores sociais e asistenciais no municipio. No caso de Andaina trátase dunha asociación sen ánimo de lucro creada por familias de nenos e nenas con diversidade funcional, e atenden a persoas tanto na etapa adulta como na infancia. O convenio do Concello con esta asociación incrementouse este ano, e pasa de 18.000 a 20.000 euros. Afaga Alzhéimer é una entidade sen ánimo de lucro que realiza diferentes actividades para mellorar a calidade de vida dos enfermos de Alzhéimer e outras demencias. En Redondela ofrecen talleres de estimulación funcional e cognitiva e tamén de prevención do deterioro cognitivo. O convenio con Afaga tamén se incrementou este ano e Concello achega 3.000 euros máis que no exercicio anterior, cun total de 18.000 euros. Por último, o convenio asinado con Cáritas mantén o importe do ano pasado, cunha subvención de 20.000 euros. Os convenios foron rubricados pola alcaldesa, Digna Rivas, e por Lara Naya, Juan Carlos Rodríguez e Gabriel Gómez como representantes de Andaina, Afaga e Cáritas respectivamente.

Son en total 21 os colectivos e asociacións que reciben este ano do Concello de Redondela 319.500 euros en concepto de subvencións nominativas, un importe que se incrementa en 71.500 euros con respecto ao ano pasado. Entre as entidades beneficiarias hai tres novas: a Asociación Cultural e Deportiva de Rande pola celebración da Batalla de Rande (22.000 euros), a Fundación Érguete (10.500 euros) e o CCD Cesantes pola Bandeira Feminina Cesantes (9.000 euros) .

Outros colectivos que incrementan a subvención con respecto ao ao pasado, ademais de Andaina e Afaga, son a Confraría de Redondela (que aumenta de 5.000 a 10.000 euros9, Asociación Española Contra o Cancro (que pasa de 4.000 a 6.000 euros), Lenda (de 15.000 a 20.000 euros), Millo Verde (de 18.000 a 20.000 euros), ACS Chapela Escola de Música (de 36.000 a 39.000 euros), Xente Titiriteira (de 56.000 a 59.000 euros) e a Asociación de Empresarios (pasa dos 10.000 aos 15.000 euros).

Ao igual que Cáritas outras oito asociacións manteñen a mesma cantidade que no exercicio anterior: Fundación Santa Cruz (3.000 euros), Solidariedade Galega co Pobo Saharauí (4.000 euros), ONG Da Man (2.500 euros), Fundación Amigos de Galicia (6.000 euros), CCD Cesantes Bandeira Redondela (12.000 euros), CCD Cesantes Bandeira de Bateis (2.500 euros), CR Chapela Bandeira Feminina Chapela (9.000 euros) e CR Chapela Bandeira Masculina Chapela (12.000 euros).

A alcaldesa, Digna Rivas, sinala que é un compromiso do seu goberno “apoiar a labor que están a realizar as diferentes asociacións e entidades en beneficio da veciñanza redondelá no ámbitos social, económico, cultural ou deportivo”.

La entrada O Concello asina convenios con Andaina, Cáritas e Afaga por valor de 58.000 euros se publicó primero en Concello de Redondela.