– A actuación presentouse aos fondos provinciais do programa Vía Depo e amplía as melloras planificadas inicialmente. O novo deseño técnico inclúe a construción de muros de contención en ambas as dúas marxes e o rebaixe do talude, o que amplía a calzada e garante unha seguridade total. O orzamento ascende a 146.372 euros.

– A alcaldesa, Digna Rivas, destacou o esforzo do Goberno local por perfeccionar o deseño antes de remitilo á administración provincial. “Non nos limitamos a poñer un parche onde caeu a terra, dende o Concello traballamos para mellorar o plan inicial co obxectivo de ofrecer unha solución definitiva e integral á veciñanza”, sinala Rivas.

O Concello de Redondela pon en marcha do proxecto de reparación urxente e mellora estrutural do camiño da Milixosa, na parroquia de Cabeiro. O Goberno municipal presentou formalmente esta actuación ante a Deputación de Pontevedra para o seu financiamento a través do programa Vía Depo, cun orzamento total de contrata que ascende a 146.372,49 euros. A novidade do proxecto definitivo radica na mellora técnica respecto ao plan inicial previsto. A proposta final non só contempla o levantamento do muro de contención na marxe dereita en sentido ascendente —zona que sufriu o colapso e desprendemento de terras por mor dos fortes temporais de choiva—, senón que estende as garantías de seguridade á marxe esquerda. Nesta outra banda da vía, os traballos incluirán o rebaixe do talude existente e a execución dunha nova barreira cun petril de pedra de granito de 50 centímetros de alto.

A alcaldesa de Redondela, Digna Rivas, destacou o esforzo do Goberno local por perfeccionar o deseño antes de remitilo á administración provincial. “Non nos limitamos a poñer un parche onde caeu a terra; dende o Concello traballamos para mellorar o plan inicial co obxectivo de ofrecer unha solución definitiva e integral. Con esta ampliación que abarca ambas as dúas marxes do camiño Milixosa, os veciños de Cabeiro contarán cunha vía moito máis segura, robusta e adaptada ás necesidades da parroquia”, sinala a rexedora.

Unha actuación ambiciosa en ambas marxes

O Concello optimiza a axuda provincial cunha reforma integral nun tramo de 80 metros de lonxitude que quedara moi danado. Na marxe dereita, o muro de contención na base do talude acadará alturas variables de entre 1,50 e 5 metros, asentado sobre unha cimentación robusta de ata 4,50 metros de profundidade para evitar novos movementos de terra.

O concelleiro de Infraestruturas e Sostibilidade, Roberto Villar, incidiu nos detalles técnicos que xustifican a intervención na marxe esquerda: “As intensas choivas amosaron a vulnerabilidade de todo o contorno da vía. Coo rebaixe do talude esquerdo e o novo petril de pedra, estabilizamos o terreo fronte a futuros temporais e tamén ampliamos a calzada ata un ancho medio de 7,50 metros, optimizando a drenaxe e mellorando a seguridade na circulación de vehículos e peóns”.

La entrada O Concello mellora o proxecto do camiño Milixosa para facer unha reforma integral se publicó primero en Concello de Redondela.

– O Concello de Redondela presentou as súas alegacións á proposta de Delimitación de Espazos e Usos Portuarios do Porto de Vigo. A alcaldesa reitera o seu rexeitamento á ampliación de usos comerciais e industriais no litoral de Chapela e Rande. O Goberno local demanda ao Porto que compatibilice actividade económica coa protección ambiental e o uso público do litoral.

– Rivas reitera a necesidade de garantir a protección do patrimonio cultural, da paisaxe e da contorna natural da enseada de San Simón. O Concello reclama que neste tramo do litoral a Autoridade Portuaria avance “cara a un modelo máis equilibrado priorizando a recuperación ambiental fronte aos usos de almacenaxe e apoio loxístico”.

O Concello de Redondela presentou formalmente as súas alegacións á proposta final recollida no Estudo Ambiental Estratéxico (Alternativa 4) de Delimitación de Espazos e Usos Portuarios (DEUP) da Autoridade Portuaria de Vigo. O Goberno local reitera o seu rexeitamento ao mantemento e ampliación de usos comerciais e industriais no litoral de Chapela e Rande. A alcaldesa, Digna Rivas, trasladou á Autoridade Portuaria a necesidade de revisar a proposta para garantir a protección do patrimonio cultural, da paisaxe e da contorna natural da enseada de San Simón. Desde o Concello considérase que o documento mantén un modelo centrado na actividade loxística e industrial que resulta incompatible coa recuperación ambiental do litoral para que a cidadanía poida gozar destes espazos. En especial, o Goberno local insiste na necesidade de actuar sobre a contorna do Peirao de Pedra e do cargadoiro de mineral de Coto-Wagner. Rivas insiste no elevado valor patrimonial, histórico e paisaxístico destes espazos. O Concello reclama que neste tramo do litoral a Autoridade Portuaria avance “cara a un modelo máis equilibrado de relación porto-cidade, priorizando a recuperación ambiental, a integración paisaxística e a posta en valor do patrimonio fronte aos usos de almacenaxe e apoio loxístico”. Así mesmo, o Concello solicita reducir a superficie destinada a usos complementarios industriais na zona, revisar a delimitación prevista e incorporar medidas efectivas de rexeneración ambiental que melloren a calidade de vida da veciñanza de Chapela e Rande. Con este escrito, o goberno municipal reafirma o seu compromiso coa defensa do litoral de Redondela, a conservación do seu patrimonio e a procura dun modelo sustentable “que compatibilice actividade económica, protección ambiental e uso público do bordo marítimo.

La entrada O Concello defende a protección de Rande e San Simón fronte ao plan de usos do Porto de Vigo se publicó primero en Concello de Redondela.

– O xestor ferroviario acepta a petición da alcaldesa e substituirá os pretiles de formigón por uns metálicos máis estreitos. Digna Rivas amosa a súa satisfacción por este cambio que permite ampliar a calzada de 4 a 6 metros e dar resposta ás demandas veciñais.

– A modificación na estrutura supón “un acto de xustiza para o barrio” e garante que a veciñanza vai ter un paso “que realmente cumpre coas súas necesidades do día a día”, afirma a alcaldesa. O ancho da calzada amplíase desde os 4 ata os 6 metros, permitindo un tránsito fluído de vehículos e peóns.

O Administrador de Infraestruturas Ferroviarias (Adif) aceptou os cambios propostos polo Concello para mellorar a circulación de vehículos e peóns no paso elevado da Portela. O xestor ferroviario confirmou oficialmente á alcaldesa a viabilidade técnica para ampliar o paso superior do camiño A Portela ata os 6 metros de ancho. Esta decisión responde ao escrito remitido desde o Concello a Adif no que se solicitaba unha mellora sobre o proxecto aprobado en decembro de 2023.

A alcaldesa amosou a súa satisfacción por este logro. “Conseguimos que Adif atendese as demandas dos veciños e veciñas”, declarou a rexedora. Rivas fixo fincapé en que este cambio estrutural supón “un acto de xustiza para o barrio”. A modificación do proxecto garante que a veciñanza da Portela teña un paso “que realmente cumpre coas súas necesidades do día a día e que os veciños merecen, logo de soportar durante meses unhas obras que lles causaron moitas molestias”, recalcou. A alcaldesa informou á veciñanza da Portela dos cambios no proxecto tan pronto chegou ao Concello a documentación oficial”. Rivas agradeceu tamén a Adif a súa disposición técnica para escoitar as demandas do Concello e dos veciños. “Demostrase que, cando se fan peticións con argumentos e pensando no ben común, as cousas saen adiante”.

Detalles técnicos do novo proxecto

O proxecto inicial de Adif contemplaba un ancho de calzada de 4 metros protexido por pretiles de formigón. Tras estudar a petición municipal o equipo técnico de Adif determinou que é viable reubicar os elementos na calzada, malia estar xa a obra avanzada. Para logralo, substituirán os bloques de formigón por pretiles metálicos máis estreitos, o que permite gañar 2 metros. Con este cambio, o paso superior amplíase a sección ata os 6 metros, cunha calzada compartida para tráfico rodado e peonil, sen beirarrúas elevadas. O resultado adáptase ao deseño do camiño antes e despois da ponte. Adif informou tamén que a instalación da valla antivandálica manterase de forma obrigatoria por estrita normativa de seguridade ferroviaria.

As obras atópanse actualmente en execución dentro do proxecto de renovación integral da liña Monforte de Lemos – Bifurcación Chapela.

La entrada Adif acepta o cambio proposto polo Concello e ampliará o paso superior da Portela se publicó primero en Concello de Redondela.

– A alcaldesa, Digna Rivas, destaca que o proxecto busca converter este edificio histórico nun espazo senlleiro para a Biblioteca Municipal que combine rehabilitación e modernidade. “Confiamos en que a singularidade deste proxecto atraerá propostas de excelencia que poñan en valor o patrimonio de Redondela”, afirma Rivas.

– O certame, que contará cun xurado profesional, contempla premios por valor de 20.000 euros e un investimento previsto en obra de máis de 2,5 millóns de euros. O Colexio de Arquitectos agarda unha alta participación no concurso con proxectos de gran calidade para este emblemático edificio.

O Concello de Redondela avanza na creación dunha nova Biblioteca Municipal en Villa Elisa. A alcaldesa, Digna Rivas, xunto co decano do Colexio Oficial de Arquitectos de Galicia (COAG), Luciano González, e o presidente da delegación de Vigo do COAG, Manuel Martínez, formalizaron hoxe o convenio de colaboración que regulará un concurso de proxectos para a rehabilitación e ampliación deste inmoble histórico. O obxectivo deste acordo é garantir “a máxima calidade arquitectónica” nunha intervención que o Goberno local cualifica de “emblemática”. Rivas subliñou que “Villa Elisa non só será unha biblioteca, senón un símbolo da Redondela do futuro, onde o respecto polo noso patrimonio conviva coas necesidades culturais e sociais do século XXI”. Dende o COAG agardan unha alta participación no concurso “con propostas de gran nivel arquitectónico para un espazo tan emblemático como Villa Elisa”.

Concurso en dúas fases e con premios profesionais. Grazas ao asesoramento técnico do COAG, o concurso realizarase en dúas etapas: unha primeira fase de ideas e unha segunda de anteproxectos. O Concello establece unha contía total de 20.000 euros en premios, distribuídos en catro recoñecementos de 5.000 euros cada un. O gañador, ademais, será o adxudicatario do contrato para a redacción do proxecto básico e de execución, así como da dirección da obra. O orzamento estimado para realizar a rehabilitación de Villa Elisa supera os 2,5 millóns de euros. A intervención dividirase en dúas partes: a rehabilitación da edificación existente e a construción dunha nova zona de ampliación que se integrará na parcela, situada estratexicamente no centro urbano.

Xurado especializado e prazos. O xurado estará presidido pola alcaldesa e composto maioritariamente por expertos independentes, incluíndo arquitectos municipais, do COAG e de Patrimonio da Xunta de Galicia, garantindo así a imparcialidade e a excelencia técnica. Unha vez asinado este convenio, o Concello publicará os pregos para que os profesionais poidan presentar as súas propostas.

A alcaldesa sinala que este proxecto “reafirma o compromiso do Concello de Redondela coa recuperación do seu patrimonio inmobiliario para o uso e desfrute de toda a veciñanza”.

La entrada Concello e Colexio de Arquitectos celebran un concurso de ideas para rehabilitar Villa Elisa se publicó primero en Concello de Redondela.

– A nova ponte conectará o aparcadoiro disuasorio de Vilavella co paseo fluvial, fomentando a mobilidade sustentable e reducindo o tráfico no centro urbano. O proxecto prioriza a accesibilidade universal e o respecto ambiental, e non afectará ao leito do río.

– A alcaldesa Digna Rivas destaca que a obra “humaniza a contorna e ofrece unha alternativa segura e amable para que a veciñanza acceda ao centro sen depender do coche”. A pasarela salvará o río sen apoios no leito, protexendo así o ecosistema fluvial. A estrutura terá unha estética integrada na paisaxe con varandas de madeira.

O Concello de Redondela anuncia o proxecto de execución dunha nova pasarela peonil sobre o río Maceiras que permitirá unir o aparcadoiro disuasorio de Vilavella co paseo fluvial. O obxectivo é crear un itinerario peonil “directo, seguro e accesible” que conecte ambas as marxes do río. A alcaldesa de Redondela, Digna Rivas, sinalou que esta actuación “é un paso máis na nosa aposta por unha vila máis humana e habitable”. Segundo explicou a rexedora, “con esta pasarela non só facilitamos o estacionamento, senón que transformamos un traxecto que antes era incómodo nun paseo agradable pola beira do río”. O obxectivo é que Redondela sexa “un espazo onde o peón sexa o protagonista, garantindo que calquera persoa, teña ou non problemas de mobilidade, poida desprazarse con total seguridade e confort”.

Un deseño accesible, integrado e respectuoso coa contorna. A actuación afectará a unha superficie total de aproximadamente 100 m², dos cales 16,20 m² corresponden á propia estrutura da pasarela. O deseño minimiza o impacto ambiental e a pasarela salvará o río sen necesidade de instalar apoios no leito, protexendo o ecosistema fluvial. A estrutura contará con cimentacións de formigón armado e unha estética integrada na paisaxe, con varandas de madeira. As proteccións terán unha altura de 1,10 metros. A nova pasarela permitirá unha accesibilidade “universal”, con pendentes suaves que facilitan o tránsito de persoas con mobilidade reducida.

O proxecto financiarase a través do Plan +Provincia da Deputación de Pontevedra. O orzamento para a licitación ascende a 24.254 euros.

La entrada Mellora a mobilidade peonil cunha nova pasarela sobre o río Maceiras en Vilavella se publicó primero en Concello de Redondela.

– A resolución do Concello dita o cese da actividade de almacenamento de bobinas de aceiro tras constatar que a empresa non dispón do título habilitante obrigatorio.

– O Goberno local reafirma o seu compromiso coa legalidade urbanística e a defensa do interese público e ambiental tras un exhaustivo proceso de inspección por parte do servizo técnico de Urbanismo.

O Concello de Redondela, a través dunha resolución baseada nos informes dos servizos técnicos de Urbanismo, ordenou a suspensión inmediata da actividade industrial que a empresa ArcelorMittal España, S.A. vén desenvolvendo nunha nave situada na parroquia de Chapela. Esta medida cautelar inclúe, paralelamente, o inicio do expediente de reposición da legalidade urbanística.

O concelleiro de Urbanismo, Antonio Cabaleiro, explica que a actuación municipal prodúcese “tras un rigoroso seguimento administrativo no que se constatou que a firma utiliza as instalacións para o almacenamento de bobinas de chapa de aceiro sen contar co preceptivo título habilitante”. A pesar dos requirimentos e controis previos realizados polo Concello para que a empresa regularizase a súa situación, ArcelorMittal non completou en prazo a solicitude de legalización.

O Concello advirte á empresa de que o incumprimento desta orde de suspensión dará lugar á adopción de medidas coercitivas severas. Estas poden incluír a imposición de sancións económicas reiteradas, a execución subsidiaria por parte da administración e, de ser necesario, o precinto físico da actividade.

Inspección e transparencia administrativa

As inspeccións urbanísticas levadas a cabo sobre o terreo confirmaron o exercicio da actividade sen autorización. Así mesmo, o Concello de Redondela mantivo unha comunicación fluída e transparente con outras institucións, remitindo toda a información pertinente tanto á Consellería de Medio Ambiente e Cambio Climático como á Valedora do Pobo, tras recibir requirimentos de información por parte de ambos organismos.

Con esta decisión, o Concello de Redondela reafirma o seu compromiso irrenunciable co cumprimento da normativa vixente. O Goberno local subliña que o obxectivo final é garantir que calquera actividade industrial no municipio se desenvolva coas máximas garantías urbanísticas e ambientais, protexendo sempre o interese xeral da veciñanza.

La entrada O Concello ordena a suspensión da actividade industrial de ArcelorMittal por carecer de licenza se publicó primero en Concello de Redondela.

– A alcaldesa, Digna Rivas, insistiu en que o Goberno local estará vixiante para que ADIF cumpra coas súas obrigas e a veciñanza da Portela recupere canto antes a normalidade cun acceso “que cumpra coas súas necesidades de mobilidade”.

– O Goberno local quere determinar mediante un informe técnico se as obras executadas se corresponden coas dimensións e calidades recollidas no proxecto inicial. Rivas comprometeuse coa veciñanza a instar á entidade ferroviaria a mellorar a ponte para facilitar o tránsito de vehículos.

A alcaldesa de Redondela, Digna Rivas, e o concelleiro de Urbanismo, Antonio Cabaleiro, reuníronse onte con veciños e veciñas da Portela, en Cedeira, afectados polas obras do paso superior de Renfe. Rivas insistiu en que o Goberno local está vixiante para que ADIF cumpra coas súas obrigas e a veciñanza da Portela recupere canto antes a normalidade cun acceso “que cumpra coas súas necesidades de mobilidade”.

A alcaldesa anunciou que o Concello solicitará un estudo topográfico detallado da infraestrutura “para verificar que os traballos realizados por ADIF se axusten estritamente ao proxecto técnico”. Esta decisión xorde tras o compromiso adquirido pola rexedora cos residentes da zona, quen trasladaron a súa preocupación pola funcionalidade da nova ponte. Rivas sinalou que debe ser un informe técnico o que determine se as obras de ADIF se corresponden ou non co proxecto que prevía unha ampliación ata os 8,5 metros de ancho, con dous carrís de circulación e beiravías para peóns. “Se o informe detecta deficiencias, instaremos a ADIF de xeito inmediato a que mellore a ponte para facilitar o tránsito de vehículos e garantir a seguridade”, afirmou a alcaldesa. O proxecto orixinal contemplaba substituír o vello paso de 5 metros por unha plataforma moderna co obxectivo de gañar en mobilidade e seguridade. Rivas advirte que Concello non permitirá “que o resultado final quede por debaixo das melloras proxectadas”.

Atrasos e prexuízos para a veciñanza

Dende que comezaron as obras de renovación da ponte, en setembro do ano pasado, a veciñanza da Portela está a sufrir as consecuencias do peche do paso superior sobre a vía do tren. Os traballos estanse a demorar moito máis do previsto. O peche do acceso obriga aos residentes a realizar un rodeos de varios quilómetros para chegar aos seus domicilios, unha situación que a alcaldesa cualificou como un “grave prexuízo”.

La entrada O Concello solicita un estudo topográfico do paso da Portela para garantir que ADIF cumpra co proxecto se publicó primero en Concello de Redondela.

– O proxecto inclúe a pavimentación e mellora na segunda fase da Subida a Trasmañó e Estrada da Autopista. Será unha intervención integral para renovar o firme e mellorar a seguridade viaria nuns camiños con moita densidade de tráfico. A primeira fase da Subida a Trasmañó xa se aprobara no Plan de Investimento do Concello nos Camiños Municipais con case 139.000 euros.

– A actaución confirma o compromiso do Goberno local coas parroquias, atendendo ás demandas de mellora de accesos. A alcaldesa, Digna Rivas, subliña a importancia destas obras para a cohesión territorial no municipio: “Estas inversións dan resposta ás necesidades de seguridade e mobilidade nunha zona fundamental de Trasmañó”.

O Concello de Redondela continúa co seu plan de modernización e mantemento das infraestruturas rurais e urbanas do municipio. A alcaldesa, Digna Rivas, anunciou hoxe o proxecto de pavimentación e mellora dos camiños Subida a Trasmañó e a Estrada da Autopista, na parroquia de Trasmañó, que contará cun investimento superior aos 264.000 euros.

Esta actuación levarase a cabo ao abeiro do Plan de obras e servizos de competencia municipal (Plan Máis Provincia) 2026-2027 da Deputación de Pontevedra. O Concello xa solicitou formalmente a subvención para a anualidade 2026, incluíndo o traspaso de fondos para garantir o financiamento íntegro desta obra necesaria para a veciñanza. O proxecto técnico contempla unha intervención integral para renovar o firme e mellorar a seguridade viaria nuns camiños que soportan unha carga constante de tráfico.

Esta obra confirma o compromiso do Goberno local coas parroquias, atendendo ás demandas de mellora de accesos. A alcaldesa de Redondela, Digna Rivas, subliña a importancia deste investimento para a cohesión territorial do municipio: “A nosa prioridade é que todos os veciños e veciñas de Redondela, vivan onde vivan, conten con servizos e infraestruturas axeitados. Con esta obra en Trasmañó, damos resposta a unha necesidade de seguridade e mobilidade nunha zona fundamental da parroquia”.

Rivas destacou a axilidade administrativa para presentar un proxecto optimizado: “Traballamos para aproveitar ao máximo cada euro dos plans provinciais. Neste caso, mobilizamos todos os recursos posibles do Plan Máis Provincia para que o proxecto de Trasmañó sexa unha realidade canto antes”.

O orzamento de licitación ascende a 264.221,59 euros e o proxecto cumpre cos todos os estándares técnicos municipais e provinciais, asegurando que a execución cumpra cos prazos previstos para a anualidade de 2026.

Máis de 450.00 euros para melloras en camiños de Trasmañó

As obras que se inclúen no Plan Máis Provincia corresponden á segunda fase da Subida a Trasmañó, xa . A primeira fase desta vía está recollida no Plan de Investimento en Camiños Municipais do ano 2026. No programa de actuacións do Concello, que conta cun orzamento de 2,7 millóns de euros, inclúense a primeira fase da Subida a Trasmañó (137.898 euros), o camiño da Cabadesa (22.990 euros) e a estrada da Lamosa e camiño Minada (33.886 euros). O investimento co plan municipal na parroquia é de 194.774 euros, aos que hai que sumar os máis de 264.000 da segunda fase da Subida a Trasmañó do Plan Máis Provincia. Rivas sinala que en total, o investimento nos camiños da parroquia suman 458.995 euros “o que demostra con feitos o compromiso firme deste goberno local coas necesidades das parroquias”.

La entrada O Concello investirá máis de 264.000 euros na segunda fase da Subida a Trasmañó se publicó primero en Concello de Redondela.

– O Concello de Redondela e Adif asinan o convenio para a pavimentación e cesión da Avenida da Estación. O organismo ferroviario investirá máis de 582.000 euros na mellora integral antes de transferir a titularidade ao municipio. A pavimentación abrangue unha superficie de case 6.000 m².

– Digna Rivas salienta que a obra resolve unha demanda veciñal de hai 20 anos polo mal estado do vial. A actuación súmase a outros investimentos millonarias nas infraestruturas ferroviarias de Redondela, coa renovación integral da estación e o novo apeadeiro de Chapela, entre outras melloras.

O Concello de Redondela e Adif pecharon o acordo definitivo para a remodelación integral da Avenida da Estación. A través dun convenio de concesión administrativa, o ente ferroviario asumirá o custe total das obras de pavimentación e adecuación estrutural antes de que o vial pase a ser de titularidade municipal.
A alcaldesa de Redondela, Digna Rivas, visitou a estrada xunto ao concelleiro de Urbanismo, Antonio Cabaleiro, e o Subdelegado do Goberno en Pontevedra, Abel Losada. Rivas destacou a importancia histórica deste convenio: “Damos resposta a unha demanda da veciñanza que levaba máis de 20 anos agardando. A estrada atópase nun estado moi deficiente e era unha prioridade absoluta que Adif asumise a súa reparación antes de entregala ao Concello en perfectas condicións”.
As obras de mellora, que serán executadas pola empresa TRAGSA, contan cun orzamento de 582.268,04 € e un prazo de execución de 3 meses. O proxecto actúa sobre unha superficie de 5.962 m² . O acordo estipula que o Concello asumirá a xestión do vial mediante unha concesión por 75 anos. A entrega oficial non se fará ata que as obras estean rematadas.
Rivas sinala que este compromiso de Adif coa Avenida da Estación non é unha actuación illada, senón que se suma a unha estratexia de modernización integral en Redondela con investimentos que superan os 55 millóns de euros. Entre as principais intervencións destacan a modernización de 7,8 km no tramo Redondela-Bifurcación Arcade para mellorar a fiabilidade da vía. Esta renovación supera os 22,6 millóns. Tamén se renova a conexión con Vigo-Guixar para reforzar o tráfico de viaxeiros e mercadorías cun investimento de 32,7 millóns. Adif mellora os servizos e a accesibilidade na Estación de Redondela. Actualmente están a realizarse as obras cun investimento de 3,3 millóns de euros que inclúe un novo andén central, paso inferior, ascensor e renovación da praza e melloras totais de accesibilidade. A alcaldesa destaca tamén a creación do novo apeadeiro de Chapela cun andén de 220 metro. Deste xeito “recuperamos o transporte ferroviario na parroquia e melloramos a mobilidade da veciñanza tato nas conexións de Chapela con Redondela e Pontevedra como coa cidade de Vigo”.
“Estamos ante o maior esforzo inversor ferroviario da historia de Redondela”, concluíu Digna Rivas, destacando que estas obras non só melloran a seguridade e a capacidade do servizo, senón que garanten unha integración moito máis amable e moderna do tren no noso municipio.

La entrada ADIF pavimentará a avenida da Estación cun investimento próximo aos 600.000 euros se publicó primero en Concello de Redondela.

• A actuación transformará 2.300 m² nun espazo de lecer que incluirá un auditorio ao aire libre e un ascensor urbano para mellorar a accesibilidade.

• A alcaldesa, Digna Rivas, destaca que o proxecto “revitalizará unha zona que hoxe é só de paso para convertela nun punto de encontro moderno e accesible”

O Concello de Redondela inicia as obras de remodelación integral da praza da Ponte de Lima. Cun orzamento de 870.000 euros, o proxecto converterá esta área de 2.300 metros cadrados nun espazo público de referencia, integrando o futuro Viveiro de Empresas da Zona Franca. A alcaldesa de Redondela, Digna Rivas, sinalou que esta actuación vai “revitalizar e renovar un gran espazo para uso da cidadanía que agora se utiliza só como zona de paso”. O deseño aposta pola humanización e a naturalización, conservando elementos senlleiros como a árbore existente e a pérgola coa parra, que se combinarán co novo pavimentos e zonas verdes.

Esta semana reuníronse os responsables da dirección das obras co departamento de Urbanismo do Concello e a Policía Local para coordinar os traballos. Conscientes de que se trata dunha zona de paso “clave” no centro da vila “deseñouse un plan de actuación para minimizar o impacto no día a día da cidadanía”, explica a alcaldesa. O obxectivo prioritario é compatibilizar o avance dos traballos co mantemento dunha contorna “segura e accesible”. Rivas​ agradece de antemán a comprensión e paciencia da veciñanza, reiterando que esta actuación é “fundamental” para a mellora e o futuro do noso centro urbano. O venres comezaron os traballos de acondicionamento do terreo e o traslado da maquinaria.

Mellora da mobilidade cun ascensor urbano

Unha das pezas clave do proxecto é o ascensor urbano que conectará Ernestina Otero coa rúa Subida á Estación, salvando o forte desnivel que dificulta o acceso peonil. “Agora é moi complicado acceder a pé desde o centro da vila pola elevada pendente, especialmente para persoas con mobilidade reducida”, explica Rivas. O ascensor facilitará o traxecto a pé ás vivendas e servizos da zona (centro de día, escola infantil, centro de fisioterapia).

Novo auditorio ao aire libre

Na parte posterior da parcela, aproveitando a pendente natural do terreo, construirase un auditorio ao aire libre cunha bancada de formigón forrada en madeira. Este espazo terá capacidade para máis de 200 espectadores e servirá de escenario para concertos, teatro e eventos como o Festival Internacional de Títeres.

Espazo sustentable e equipado

A nova praza contará con iluminación LED de alta eficiencia, mobiliario urbano renovado e unha coidada selección de vexetación. Con esta intervención, o Goberno local busca crear unha “antesala moderna” para o Viveiro de Empresas, resolvendo ao tempo os problemas históricos de accesibilidade e dotando á vila dun novo pulmón cultural e social.

La entrada Comezan as obras da nova praza da Ponte de Lima cun investimento de 870.000 euros se publicó primero en Concello de Redondela.

– A alcaldesa explica que o proxecto vai máis aló dunha pavimentación, xa que suporá “unha reforma integral da vía que mellora o tránsito de peóns, pon en valor o entorno e a crea sete miradoiros con zonas de lecer e descanso para a cidadanía”. O goberno local cumpre así cunha demanda “histórica” dos veciños da zona.

– A reforma mellorará un tramo de 1.000 metros de lonxitude actualmente deteriorado e cunha pronunciada pendente. O proxecto presentado polo Concello de Redondela, valorado en máis de 1 millón de euros, acadou os fondos do Plan Extra da Deputación. A subvención cubrirá o 70% da obra, e o Concello financiará o 30% restante.

A reurbanización do Camiño de Cidadelle incluirá a renovación do firme, a mellora da seguridade viaria e a creación de sete miradoiros con áreas de descanso. A alcaldesa, Digna Rivas, explica que o proxecto non se limita a unha nova pavimentación, senón que será “unha reforma integral da vía cun novo deseño que favorecerá o tránsito de peóns, porá en valor as vistas panorámicas da zona e creará espazos de encontro para a cidadanía”. Esta zona residencial presenta actualmente unha estrutura urbana deteriorada. O proxecto é un investimento estratéxico “que suporá unha clara mellora na calidade de vida da veciñanza coa mellora das comunicacións no barrio, unha vía máis moderna e segura para os peóns e novos espazos públicos. O goberno local cumpre así cunha demanda histórica dos veciños da zona, que levaban dúas décadas reclamando unha vía en condicións. Logo de facer a primeira fase da Subida a Cidadelle en 2024, este ano será a quenda da segunda parte do camiño. A alcaldesa lembra que era “unha das prioridades” do goberno local: transformar esta zona de Cidadelle con espazos públicos que inclúen a contorna do Centro Sociocultural”. Trátase dun proxecto ambicioso no que traballaron as concellerías de Urbanismo, que dirixe Antonio Cabaleiro, e Infraestruturas e Sostibilidade, a cargo de Roberto Villar.

O proxecto inclúe sete miradoiros que serán tamén zonas de descanso para a veciñanza. Estes espazos porán en valor as vistas panorámicas sobre a ría, ademais de crear lugares de encontro para a cidadanía con mobiliario urbano, bancos, arborado e pérgolas. Situaranse en lugares estratéxicos ao longo da vía “para que os peóns poidan parase e descansar”, explica Rivas. O primeiro deles será no cruce coa Senda da Auga, coincidente co trazado do Camiño de Santiago, onde se dará prioridade aos peóns. O segundo dos miradoiros estará uns 80 metros máis arriba, na zona máis horizontal do camiño de Cidadelle. A terceira das áreas de descanso localízase ao carón dunha fonte e un cruce de camiños. A cuarta das plataformas situarase na curva de enlace co camiño do Avispeiro. O quinto miradoiro será un dos puntos máis singulares, fronte ao edifico municipal do centro Sociocultural de Cidadelle. A sexta área será no entronque dos camiños do Cuco e da Quinta e, por último, na cota máis alta do camiño de Cidadelle instalarase o sétimo dos miradoiros cunha pequena praza no entronque co camiño da Bruxa e a Estrada da Lamosa.

O proxecto da reforma integral do camiño de Cidadelle, cunha lonxitude aproximada de 1.000 metros, supón un gran investimento valorado en 1.050.440 euros. A actuación supón renovar uns 8.000 m2 de superficie nunha zona cunha pronunciada pendente. Os traballos incluirán a renovación da rede de abastecemento de auga e a de saneamento, coa incorporación dunha nova rede para as augas pluviais.

O proxecto presentado polo Concello de Redondela ao Plan Extra da Deputación está valorado en 1.088.065,42. A proposta acadou os fondos provincias, que cubrirán o 70% do custe das obras (761.645,79 €), e o Concello financiará o 30% restante (326.419,63 €).

La entrada O Concello acada os fondos para transformar o camiño de Cidadelle con miradoiros e áreas de descanso se publicó primero en Concello de Redondela.

– A alcaldesa, Digna Rivas, explica que o Goberno local non ten novas do proxecto de mellora da N-552 desde que o Ministerio confirmara a redacción do mesmo en outubro de 2021.

– A actuación, valorada en 1 millón de euros, inclúe a reordenación de accesos, a mellora de beirarrúas e a reparación da pasarela peonil do instituto.

A alcaldesa de Redondela, Digna Rivas, solicitou formalmente ao Ministerio de Transportes e Mobilidade Sostible (Mitma) información detallada sobre o estado actual do proxecto de reparación e humanización da Avenida de Redondela (N-552) en Chapela. Malia os compromisos adquiridos polo Goberno central, o Concello non conta con información oficial sobre o avance duns traballos que Rivas considera “fundamentais” para a seguridade viaria do municipio.

Os antecedentes do proxecto remóntanse a 2021, nunha reunión telemática entre a alcaldesa e o entón secretario xeral de Infraestruturas, Sergio Vázquez Torrón. Nese encontro, confirmouse o inicio da redacción do proxecto de reordenación de accesos e adecuación das marxes. En outubro dese mesmo ano, o Ministerio ratificou que a actuación contaría cun investimento estimado de un millón de euros.

O proxecto previsto polo Mitma abrangue o acondicionamento das distintas interseccións do viario, o tratamento das marxes para completar e mellorar a rede de beirarrúas e, de xeito prioritario, a reparación da pasarela peonil situada fronte ao instituto, un punto clave para a mobilidade escolar.

“A día de hoxe, o Concello non ten ningunha información de como se atopa o proxecto”, sinala Rivas. Por este motivo, o Concello solicitou unha resposta inmediata por escrito ou a convocatoria dunha nova reunión cos responsables actuais de infraestruturas para desbloquear esta actuación de titularidade estatal. O Goberno local de Redondela reitera que a reforma da N-552 “é unha necesidade histórica para os veciños e veciñas” e que non cesará de reclamar “que se cumpran os prazos e investimentos comprometidos”.

La entrada O Concello solicita ao Ministerio de Transportes o proxecto para a reforma da avenida de Redondela se publicó primero en Concello de Redondela.