– A alcaldesa, Digna Rivas, insistiu en que o Goberno local estará vixiante para que ADIF cumpra coas súas obrigas e a veciñanza da Portela recupere canto antes a normalidade cun acceso “que cumpra coas súas necesidades de mobilidade”.

– O Goberno local quere determinar mediante un informe técnico se as obras executadas se corresponden coas dimensións e calidades recollidas no proxecto inicial. Rivas comprometeuse coa veciñanza a instar á entidade ferroviaria a mellorar a ponte para facilitar o tránsito de vehículos.

A alcaldesa de Redondela, Digna Rivas, e o concelleiro de Urbanismo, Antonio Cabaleiro, reuníronse onte con veciños e veciñas da Portela, en Cedeira, afectados polas obras do paso superior de Renfe. Rivas insistiu en que o Goberno local está vixiante para que ADIF cumpra coas súas obrigas e a veciñanza da Portela recupere canto antes a normalidade cun acceso “que cumpra coas súas necesidades de mobilidade”.

A alcaldesa anunciou que o Concello solicitará un estudo topográfico detallado da infraestrutura “para verificar que os traballos realizados por ADIF se axusten estritamente ao proxecto técnico”. Esta decisión xorde tras o compromiso adquirido pola rexedora cos residentes da zona, quen trasladaron a súa preocupación pola funcionalidade da nova ponte. Rivas sinalou que debe ser un informe técnico o que determine se as obras de ADIF se corresponden ou non co proxecto que prevía unha ampliación ata os 8,5 metros de ancho, con dous carrís de circulación e beiravías para peóns. “Se o informe detecta deficiencias, instaremos a ADIF de xeito inmediato a que mellore a ponte para facilitar o tránsito de vehículos e garantir a seguridade”, afirmou a alcaldesa. O proxecto orixinal contemplaba substituír o vello paso de 5 metros por unha plataforma moderna co obxectivo de gañar en mobilidade e seguridade. Rivas advirte que Concello non permitirá “que o resultado final quede por debaixo das melloras proxectadas”.

Atrasos e prexuízos para a veciñanza

Dende que comezaron as obras de renovación da ponte, en setembro do ano pasado, a veciñanza da Portela está a sufrir as consecuencias do peche do paso superior sobre a vía do tren. Os traballos estanse a demorar moito máis do previsto. O peche do acceso obriga aos residentes a realizar un rodeos de varios quilómetros para chegar aos seus domicilios, unha situación que a alcaldesa cualificou como un “grave prexuízo”.

La entrada O Concello solicita un estudo topográfico do paso da Portela para garantir que ADIF cumpra co proxecto se publicó primero en Concello de Redondela.

– O Concello de Redondela e Adif asinan o convenio para a pavimentación e cesión da Avenida da Estación. O organismo ferroviario investirá máis de 582.000 euros na mellora integral antes de transferir a titularidade ao municipio. A pavimentación abrangue unha superficie de case 6.000 m².

– Digna Rivas salienta que a obra resolve unha demanda veciñal de hai 20 anos polo mal estado do vial. A actuación súmase a outros investimentos millonarias nas infraestruturas ferroviarias de Redondela, coa renovación integral da estación e o novo apeadeiro de Chapela, entre outras melloras.

O Concello de Redondela e Adif pecharon o acordo definitivo para a remodelación integral da Avenida da Estación. A través dun convenio de concesión administrativa, o ente ferroviario asumirá o custe total das obras de pavimentación e adecuación estrutural antes de que o vial pase a ser de titularidade municipal.
A alcaldesa de Redondela, Digna Rivas, visitou a estrada xunto ao concelleiro de Urbanismo, Antonio Cabaleiro, e o Subdelegado do Goberno en Pontevedra, Abel Losada. Rivas destacou a importancia histórica deste convenio: “Damos resposta a unha demanda da veciñanza que levaba máis de 20 anos agardando. A estrada atópase nun estado moi deficiente e era unha prioridade absoluta que Adif asumise a súa reparación antes de entregala ao Concello en perfectas condicións”.
As obras de mellora, que serán executadas pola empresa TRAGSA, contan cun orzamento de 582.268,04 € e un prazo de execución de 3 meses. O proxecto actúa sobre unha superficie de 5.962 m² . O acordo estipula que o Concello asumirá a xestión do vial mediante unha concesión por 75 anos. A entrega oficial non se fará ata que as obras estean rematadas.
Rivas sinala que este compromiso de Adif coa Avenida da Estación non é unha actuación illada, senón que se suma a unha estratexia de modernización integral en Redondela con investimentos que superan os 55 millóns de euros. Entre as principais intervencións destacan a modernización de 7,8 km no tramo Redondela-Bifurcación Arcade para mellorar a fiabilidade da vía. Esta renovación supera os 22,6 millóns. Tamén se renova a conexión con Vigo-Guixar para reforzar o tráfico de viaxeiros e mercadorías cun investimento de 32,7 millóns. Adif mellora os servizos e a accesibilidade na Estación de Redondela. Actualmente están a realizarse as obras cun investimento de 3,3 millóns de euros que inclúe un novo andén central, paso inferior, ascensor e renovación da praza e melloras totais de accesibilidade. A alcaldesa destaca tamén a creación do novo apeadeiro de Chapela cun andén de 220 metro. Deste xeito “recuperamos o transporte ferroviario na parroquia e melloramos a mobilidade da veciñanza tato nas conexións de Chapela con Redondela e Pontevedra como coa cidade de Vigo”.
“Estamos ante o maior esforzo inversor ferroviario da historia de Redondela”, concluíu Digna Rivas, destacando que estas obras non só melloran a seguridade e a capacidade do servizo, senón que garanten unha integración moito máis amable e moderna do tren no noso municipio.

La entrada ADIF pavimentará a avenida da Estación cun investimento próximo aos 600.000 euros se publicó primero en Concello de Redondela.

Estado das obras de renovación da estación de tren de Redondela

– A actuación, que se desenvolverá ao longo de 7,8 km, comprende a supresión do paso a nivel de Cesantes, de uso peonil, que se substituirá por un paso baixo a vía de 2,5 m de ancho e 3 m de altura. A alcaldesa, Digna Rivas, amósase moi satisfeita con este anuncio do Goberno central xa que os traballos “permitirán mellorar a seguridade dos peóns nesta zona de Cesantes”

– As obras consistirán en melloras nas infraestrutura e na vía, o que inclúe a ampliación de túneles. Rivas destaca que no conxunto do tramo entre Redondela e Arcade “aumentarase a capacidade e fiabilidade da rede ferroviaria, cunha mellora da calidade do servizo para a cidadanía”.

O concello de Redondela acolleu con gran satisfacción do anuncio do Consello de Ministros, que autorizou hoxe ao Ministerio de Transportes e Mobilidade Sustentable a licitar, a través de Adif AV, as obras de renovación integral do tramo Redondela-Bifurcación Arcade por un valor estimado de 20,7 millóns de euros. A actuación, dentro da liña convencional Redondela-Santiago, busca “modernizar e aumentar a capacidade e fiabilidade da rede ferroviaria”. Esta renovación integral fará posible o incremento dos tráficos, tanto de pasaxeiros como de mercadorías, á vez que se mellora a calidade do servizo. As obras inclúen a mellora de infraestrutura e vía no tramo de 7,8 km de lonxitude, dos cales 2,7 km atópanse electrificados. Entre os traballos destacan a renovación do material de vía (carrís, travesas, balasto e desvíos), consolidación e reforzo de desmontes, e a adecuación das súas 16 pontes, ademais de obras de drenaxe. Tamén se ampliará o gálibo dos 5 túneles do traxecto para permitir servizos de autoestrada ferroviaria e a futura electrificación do tramo a 25 kV para a súa conexión co Eixo Atlántico.

Eliminación do paso a nivel de Cesantes

A reforma suprimirá o único paso a nivel existente, situado en Cesantes, ao norte do apeadeiro da parroquia. O paso a nivel, de uso peonil, será substituído por un paso baixo a vía de 2,5 m de ancho e 3 m de altura. A alcaldesa, Digna Rivas, amósase moi satisfeita con este anuncio do Goberno central xa que os traballos “permitirán mellorar a seguridade dos peóns no paso a nivel de Cesantes”. Ademais, no conxunto do tramo que se vai renovar “aumentarase a fiabilidade da rede ferroviaria cunha mellora da calidade do servizo para a cidadanía”.

Reforma da estación de Redondela e novo apeadeiro en Chapela

Na estación de Redondela xa están en marcha, cun investimento de 3,3 millóns de euros, os traballos que completan a súa remodelación e reforzan a súa accesibilidade: instalación de ascensores, equipamento do paso inferior, renovación de aseos e outras instalacións, e obras na praza de acceso. Estas actuacións contribúen aos ODS 9 (fomento de infraestruturas fiables, sustentables e de calidade), 7 (sostibilidade) e 8 (desenvolvemento económico e xeración de emprego).

Adif xa executa a modernización do tramo comprendido entre Vigo-Guixar e Guillarei, onde está en marcha, cun investimento de 32,7 millóns de euros, a renovación de vía do trazado Redondela-Vigo Guixar. Este proxecto inclúe a construción do novo apeadeiro de Chapela, na contorna da Alameda Rosalía de Castro e a zona coñecida como “campito”. Ademais, adxudicou recentemente as obras de renovación de vía entre Redondela e Guillarei por 49 millóns de euros. Estas inclúen a ampliación das dimensións (gálibo) de distintas estruturas, a instalación de novos sistemas de protección civil e seguridade nos seus catro túneles, a construción dun novo viaduto (82 m) sobre a estrada N-550, a renovación dunha vintena de pasos inferiores, e a remodelación de plataformas da estación de Louredo-Valos.

Transportes está a avanzar na modernización de toda a liña Ourense-Vigo. Cun investimento global de 265 millóns de euros, que inclúe a conexión Guillarei-fronteira portuguesa, a liña adecuarase ao Corredor Atlántico, reforzará a conexión con Portugal e aumentará a súa capacidade para tráfico de viaxeiros e mercadorías.

La entrada Licitada a renovación integral do tramo ferroviario Redondela-Arcade por 20,7 millóns se publicó primero en Concello de Redondela.

A reforma da estación de tren de Redondela xa están en marcha cun investimento de 3,3 millóns de euros. Os traballos completan a súa remodelación e reforzan a accesibilidade: despregamento de ascensores, equipamento do paso inferior, renovación de aseos e outras instalacións, e tamén da praza de acceso. Estas actuacións súmanse ás xa completadas na liña ferroviaria, coa renovación da plataforma e a electrificación do tramo. A alcaldesa, Digna Rivas, agradece o compromiso de Adif, que deste xeito avanza na modernización da liña. O investimento global de 265 millóns de euros adecuarase ao Corredor Atlántico, reforzará a conexión con Portugal e aumentará a capacidade para tráfico de viaxeiros e mercadorías. Esta actuación poderá ser cofinanciada polo Mecanismo “Conectar Europa” da Unión Europea (CEF).

O novo apeadeiro de Chapela, contratado

Xa está contratada, por 32,7 millóns, a renovación de vía do trazado Redondela-Vigo Guixar, que inclúe a construción do novo apeadeiro de Chapela, ademais de actuacións en vías e plataformas das estacións de Redondela e Vigo-Guixar, e o reforzo do túnel de Vigo. Ademais, Adif xa adxudicou, por outros 12,3 millóns, a adecuación da sinalización deste mesmo tramo, Redondela-Vigo Guixar, e a súa integración no sistema de xestión de tráfico en remoto e tempo real, co sistema de sinalización Asfa dixital, sinais LED e novos dispositivos que xestionan a distancia sinales dun tramo ferroviario, circuítos de vía (sistemas que detectan a presenza dun tren nun tramo) e outros equipos

Recentemente contratáronse tamén as obras de renovación de vía do trazado entre Redondela e Guillarei que, cun investimento de 49 millóns, tamén comprenden a ampliación das dimensións (gálibo) e a instalación de novos sistemas de protección civil e seguridade nos catro túneles. Tamén se constrúe un novo viaduto (82 m) sobre a estrada N-550 e renovaranse unha vintena de pasos inferiores.

La entrada En marcha a remodelación da estación de tren de Redondela cun investimento de 3,3 millóns se publicó primero en Concello de Redondela.