– A alcaldesa, Digna Rivas, destacou “o gran papel” das xogadores e xogadores de Redondela neste campionato estatal “froito do excelente traballo que fan ao longo de todo o ano os clubs locais SAR, BM Chapela e Choqueiras”.

-Na xornada do 8M a rexedora puxo en valor “o auxe do deporte feminino en Redondela, e nomeadamente no balonmán, onde as licenzas femininas superan ás masculinas”. Desde o Concello amosan “todo o apoio ao deporte redondelán”.

O Concello celebrou unha recepción para o grupo redondelán que participou no Campionato de España de Seleccións 2025 en Cataluña, con grandes éxitos para os equipos galegos. Da man da alcaldesa, Digna Rivas, e o concelleiro de Deportes, Iván Valles, recibiron o diploma “Orgullo redondelán” e a insignia do Concello como “recoñecemento e homenaxe” polo seu traballo e méritos deportivos. Deste gran grupo forman parte xogadores e xogadoras dos tres clubs redondelán. Participaron pola SAR Daniela Fernández, Daniela Figueroa, Daniela Míguez, Karla Fernández, Noa Portela, Candela Martínez, Alba Pérez e Julia González, xunto coas técnicas Carla Abad e Nerea Bouzón. Do BM Chapela os seleccionados foron Ángela Sánchez, Óscar González e Nicolás e Lois Alonso. Por parte das Choqueiras participou Adriana Bouzón.

A alcaldesa destacou “o gran papel” das xogadores e xogadores de Redondela neste campionato estatal “froito do excelente traballo que fan ao longo de todo o ano os clubs locais SAR, BM Chapela e Choqueiras”. Nesta xornada do 8M a rexedora puxo en valor “o auxe do deporte feminino en Redondela, e nomeadamente no balonmán, onde as licenzas femininas superan ás masculinas” e amosou “todo o apoio” do Concello ao deporte local. De feito, co gallo do 8M, onte celebrouse o encontro “Xuntas no deporte” con mulleres directivas dos clubs redondeláns en diferentes disciplinas coa participación de Paula Fernández (Club Baloncesto Redondela), Déborah Bouzón (CBF As Choqueiras), María González (BM Chapela), Vicky Ricón (CD Choco), Ana Romasanta (Asociación Deportiva CAR) e Carla Abad (Federació Galega de Balonmán).

Éxito do balonmán galego e redondelán no CESA 2025

O Campionato de España de Seleccións Autonómicas (CESA 2025), celebrado en Cataluña, deixou grandes resultados para a Selección Galega, que contou con esta nutrida participación de representantes de Redondela en diversas categorías e no corpo técnico.

A categoría cadete masculina logrou a medalla de prata. Lois e Nicolás Alonso, e Óscar González tiveron un papel clave neste éxito, xunto coas técnicas Carla Abad e Nerea Bouzón. O equipo infantil feminino foi bronce coas xogadoras redondelás Daniela Fernández, Daniela Míguez, Daniela Figueroa, Karla Fernández e Ángela Sánchez. Por outra banda, a Selección Galega infantil masculina acadou o bronce coa participación de Javier, xogador redondelán que milita no Culleredo. O equipo xuvenil feminino rematou no sexto posto coas xogadoras Alba Pérez e Julia González.

O equipo cadete feminino tamén alcanzou a medalla de prata na Copa coas representantes redondelás Adriana Bouzón, Noa Portela e Candela Martínez. O concelleiro de Deportes sinalou que, con estes resultados, o balonmán de Redondela “reafirma a súa posición como un dos grandes referentes desta disciplina en Galicia grazas ao talento e ao esforzo tanto de xogadoras e xogadores como do equipo técnico”.

La entrada Recoñecemento “Orgullo redondelán” ás xogadoras e xogadores da Selección Galega no CESA 2025 se publicó primero en Concello de Redondela.

O Concello de Redondela acolleu a pasada semana a recepción a Carla Abad Alonso. A ex deportista e adestradora de balonmán recibiu o diploma “Orgullo redondelán” e a insignia do Concello de mans da alcaldesa, Digna Rivas, e do concelleiro de Deportes, Iván Valles, como “recoñecemento e homenaxe” polo seu traballo e méritos deportivos. Para a alcaldesa é “un luxo” que este municipio conte con deportistas e adestradores “ao máis alto nivel no balonmán” e auguroulle moitos éxitos no futuro a Carla Abad.

Carla comezou de nena na canteira da SAR, e xa en categoría absoluta militou na elite do balonmán en equipos como o Guardés. Graduada en Ciencias da Actividade Física, traballa como adestradora en varios equipos e forma parte do corpo técnico das Federacións Galega e Española de Balonmán. Como técnica da selección galega en 2019 acadou o bronce no Campionato de España categoría Infantil feminina e os subcampionatos de España Territoriais en 2023 nas categorías Infantil masculina e Cadete feminina. Formou parte do corpos técnicos da Selección Española Xuvenil masculina que foi Campioa de Europa en 2022 e Campioa do Mundo en 2023. Neste 2024 estivo no equipo técnico da selección Española Sub21 que acadou o Campionato de Europa Junior.

La entrada O Concello outorga a Carla Abad Alonso o recoñecemento “Orgullo redondelán” se publicó primero en Concello de Redondela.

O Concello de Redondela acolleu onte a recepción á xogadora de balonmán Carla Rivas Garrido. A deportista, que milita nas filas no Sporting La Rioja, conseguiu esta temporada co seu club o ascenso á máxima categoría do balonmán estatal. Xogadora da SAR nas categorías inferiores, pasou polo BM Porriño, co que tamén acadara o ascenso á División de Honra Feminina. A próxima será a súa oitava temporada en Logroño. Aproveitando os escasos días de vacacións dos que dispón a deportista na súa terra natal, este mediodía celebrouse este acto de homenaxe.

A xogadora, de 32 anos, recibiu o diploma “Orgullo redondelán” e a insignia do Concello de mans da alcaldesa, Digna Rivas, e o concelleiro de Deportes, Iván Valles, como “recoñecemento e homenaxe” polo seu traballo e méritos deportivos. Para a alcaldesa é “un luxo” que este municipio conte con mulleres deportistas “no máis alto nivel do balonmán nacional” e desexoulle a Carla “toda a sorte para a próxima temporada”.

Rivas Garrido amosouse “moi contenta” por este recoñecemento por parte do Concello de Redondela, porque “é moi bonito ver que tamén se acordan dos deportistas que estamos fóra, xa que é duro estar tan lonxe da casa e da familia”. Afirmou tamén estar “moi orgullosa” de levar o nome de Redondela polos pavillóns de toda España e lembrou que o seu alcume deportivo “Choco”, fai referencia precisamente ás súas orixes redondelás. No plano deportivo confía en que, unha vez acadado o obxectivo do ascenso, o Sporting La Rioja poidan consolidarse na categoría da “Liga Guerreras” a próxima temporada. Recoñece que será complicado “polo alto nivel da competición” pero sinala que “con traballo e sacrificio todo é posible”.

La entrada O Concello outorga a Carla Rivas o recoñecemento “Orgullo redondelán” se publicó primero en Concello de Redondela.

Os pavillóns municipais de Redondela e a Marisma acollen esta fin de semana encontros de balonmán ao máis alto nivel. Desde o venres e ata o domingo disputaranse o sector nacional na categoría cadete feminino, a Final 4 Alevín 7 e as finais sénior da Copa Federación.

A alcaldesa de Redondela, Digna Rivas, e o concelleiro de Deportes, Iván Valles, participaron este mediodía na presentación das actividades xunto a Nazario Correa, da empresa patrocinadora Rodavigo, Aurelio Krook, presidente da SAR, e Carla Abad, Vicepresidenta da Federación Galega de Balonmán. Rivas salientou “o orgullo que supón que Redondela sexa a capital galega do balonmán esta fin de semana”, e agradeceu á Federación ter apostado por esta vila para facelo posible. A alcaldesa eloxiou o traballo da SAR, “tanto cos equipos sénior como especialmente coa base” así como o apoio de Rodavigo “comprometido sempre co deporte local”.

A competición comezará mañá venres ás 18:30 horas no pavillón municipal, coñecido como a Bomboneira, co arranque do sector nacional cadete feminino. O Balonmano Sanse (Madrid) enfrontarase ao Caivel Aula Cultural (Valladolid), e ás 20:30 horas as locais da SAR Rodavigo mediranse ao EDM Aceuchal (Extremadura).

O sábado durante toda a mañá e nos dous pavillóns celebrarase a Final 4 Alevín 7, que se dividirá nas categorías Ouro e Prata. Na categoría Ouro, os equipos BM Culleredo Ascor Consulting, Áreas Psicoloxía Luceros, Valinox Novás A e BM Abegondo Súmate competirán polo título. Mentres tanto, na categoría Prata, os equipos Balonmán Porriño “B”, Balonmán Porriño “A”, Cisne Óptica Miramaruxa e Academia EIS Balonmán Tui loitarán por levar o trofeo.

Pola tarde, o Pavillón Municipal da Marisma será o escenario das finais sénior da Copa Federación. Ás 16:00 horas a final de 2ª Autonómica Masculina enfrontará aos equipos BM Línea21 Lignum Plus e Club Balonmán Miño. Ás 18:00 horas, a final de Autonómica Feminina verá competir ao A.D. Carballal contra o Balonmán Reconquista de Vigo.

A xornada de sábado concluirá coa final de 1ª Autonómica Masculina, que se celebrará no pavillón municipal da Bomboneira ás 20:00 horas, unha vez rematada a segunda xornada do sector estatal cadete feminino. Neste enfrontamento, a SAR OP Mobility medirase ao Magope – Seis do Nadal.

O domingo ás 12:00 horas na Bomboneira, a SAR Rodavigo enfrontarase ao equipo vallisoletano Caivel Aula Cultural para poñer fin ao sector estatal no que os catro equipos loitarán por clasificarse para o Top 8 nacional.

La entrada Redondela será a capital galega do balonmán esta fin de semana se publicó primero en Concello de Redondela.