– A actuación, cun investimento de preto de 20.000 euros, supuxo a renovación integral de case 1.000 metros cadrados de firme en dúas vías que levaban décadas sen ser asfaltadas.

– O concelleiro de Infraestruturas, Roberto Villar, destaca que estas melloras “garanten a seguridade e a mobilidade nunha zona cunha alta demanda veciñal”.

A Concellería de Infraestruturas e Sostibilidade de Redondela, que dirixe Roberto Villar, concluíu as obras de pavimentación e mellora nos camiños das Laxes e Carreiro da Auga, na parroquia de Reboreda. Os traballos, que contaron cun orzamento de 19.549 euros, xa están operativos para o uso da veciñanza.

A intervención centrouse na renovación do pavimento con aglomerado asfáltico en quente, cubrindo unha superficie total de 977 metros cadrados. No caso do Camiño das Laxes, a actuación abarcou 115 metros de lonxitude desde o estreitamento ata o encontro coa estrada PO-250, onde tamén se instalou unha nova canaleta de drenaxe para evitar a acumulación de augas pluviais. Pola súa banda, no Carreiro da Auga pavimentáronse 105 metros lineais, desde o cruzamento co Camiño das Laxes ata o fondo do camiño.

O concelleiro de Infraestruturas, Roberto Villar, amosou a súa satisfacción polo resultado final dunha obra que cualificou de “prioritaria”. Segundo explicou o edil, “estamos a falar de camiños que levaban décadas sen unha actuación seria de asfaltado, o que provocaba fochancas e problemas de seguridade constantes. Co novo firme e a mellora da drenaxe, non só gañamos en comodidade para os vehículos, senón que garantimos unha mobilidade moito máis segura para os peóns”. Villar subliñou que esta actuación se enmarca no plan de mellora de viais municipais que está a desenvolver o seu departamento. “O noso compromiso é atender as demandas históricas das parroquias. Mellorar o acceso ás vivendas e a seguridade dos camiños rurais é unha cuestión de calidade de vida básica”, sinalou o concelleiro, quen adiantou que desde a súa concellería “seguiremos traballando para mobilizar investimentos, tanto propios como doutras administracións, para que Redondela conte cunha rede de estradas modernas e ben conservadas”.

La entrada Rematada a pavimentación nos camiños das Laxes e Carreiro da Auga en Reboreda se publicó primero en Concello de Redondela.

– O Concello licitou os traballos nestes dous camiños de Reboreda por preto de 20.000 euros. As melloras inclúen o novo asfaltado duns 220 metros de lonxitude en total e unha superficie próxima aos 1.000 metros cadrados.

– A alcaldesa, Digna Rivas, e o concelleiro responsable, Roberto Villar, visitaron a zona onde comezarán uns traballos de mellora “moi necesarios para os veciños e veciñas, xa que estes camiños levaban décadas sen ser asfaltados”. O novo firme vai supoñer unha mellora notable na mobilidade e na seguridade de tráfico e peóns nesta zona.

A concellería de Infraestruturas e Sostibilidade licitou as obras de mellora e pavimentación dos camiños das Laxes e Carreiro da Auga, en Reboreda. A alcaldesa, Digna Rivas, e o concelleiro responsable, Roberto Villar, visitaron a zona onde comezarán o traballos de mellora “moi necesarios e demandados polos veciños e veciñas, xa que estes camiños levaban décadas sen ser asfaltados”. As obras consisten na mellora de drenaxe e a pavimentación, con aglomerado asfáltico en quente “o que suporá unha mellora notable da mobilidade nesta zona cun novo firma máis seguro”. O novo asfaltado no Camiño das Laxes terá unha lonxitude de 115 metros, mentres que no Carreiro da Auga é de 105. Entre ambos camiños o aglomerado suma unha superficie aproximada de 977 metros cadrados.

Previo ao estendido do aglomerado realizarase a limpeza e preparación de toda a superficie e procederase á regulación do pavimento, co recheo das fochancas existentes.

A actuación no Camiño das Laxes comeza na zona do estreitamente existente até o seu encontro coa Estrada a Pazos de Borbén PO-250. Para recoller as augas superficiais do camiño, e evitar que cheguen á Estrada a Pazos de Borbén, proxéctase colocarase unha canaleta de drenaxe.

A actuación no Camiño Carreiro da Auga comeza no cruzamento co Camiño das Laxes até o fondo actual, onde se atopa cortada.

As obras licitáronse por un importe de 19.549 euros e teñen un prazo de execución de 2 meses. O concelleiro, Roberto Villar, confía en que estean rematadas no primeiro trimestre de 2026 se as condicións meteorolóxicas o permiten. O edil sinala que desde o departamento de Infraestruturas e Sostibilidade estase a avanzar na reparación e mellora das estradas e camiños municipais e o obxectivo é “seguir nesta liña tanto con fondos propios do Concello como doutras administracións”.

La entrada Melloras nos camiños das Laxes e Carreiro da Auga cun novo pavimento se publicó primero en Concello de Redondela.