– A alcaldesa, Digna Rivas, e o concelleiro de Ensino, Alberto Álvarez, reuníronse coas ANPAS da EEI A Marisma e o CEIP Santa Mariña para recoller as súas necesidades e demandas. Na xuntanza acordouse demandar á Xunta a instalación dos comedores escolares “dentro dos propios centros de ensino”. Actualmente empregan uns locais cedidos polo Concello nas inmediacións dos colexios.

– O Concello de Redondela reitera tamén á Xunta a necesidade “urxente” de reparar o tellado do CEIP Laredo, en Chapela, que presenta un grave risco de desprendemento. A alcaldesa agarda desde hai un mes unha contestación por parte da Consellería de Ensino para manter unha xuntanza na que trasladarlle estas e outras demandas.

A alcaldesa, Digna Rivas, e o concelleiro de Ensino, Alberto Álvarez, reuníronse con representantes das ANPAS dos centros públicos EEI A Marisma e CEIP Santa Mariña para recoller as súas necesidades e demandas. O maior problema para as familias destes colexios, onde estudan nenos e nenas de 3 a 6 anos e de 6 a 12 respectivamente, é a situación dos seus comedores escolares. Ante a inexistencia deste servizo nos propios centros, as ANPAS empregan como comedores escolares dúas instalacións municipais cedidas polo Concello no Paseo do Pexegueiro, nas proximidades dos colexios. Trátase dunha solución que ofrecera o Concello “para dar resposta á necesidade de moitas familias, malia non ser unha competencia municipal”. Actualmente son máis de cen nenos e nenas os que fan uso do servizo de comedor escolar entre os dous centros, e algúns menores quedaron fóra por falta de prazas. O que reclaman á Xunta de Galicia, tanto as familias como o Concello, é que a Consellería habilite nos propios centros escolares un espazo para os comedores. As ANPAS afirman que hai espazos dispoñibles nos dous colexios para instalar o comedor, e demandan á Consellería que os adapte para utilizalos como comedor. Deste xeito evitaríanse os desprazamentos de nenos e nenas, que agora deben saír do colexio para o servizo de comedor, cos riscos que iso implica.

As familias do EEI A Marisma comezaron tamén unha recollida de sinaturas para esixir á Consellería de Educación da Xunta de Galicia “a execución de medidas urxentes e inmediatas para regular o comedor xestionado pola ANPA”.

Reparación do tellado do CEIP Laredo

O Concello de Redondela reitera tamén á Xunta a necesidade “urxente” de reparar o tellado do CEIP Laredo, en Chapela, que presenta un grave risco de desprendemento. A comezos de ano o Concello instalou un valado perimetral e unha rede “para evitar riscos en caso de desprendementos do tellado”, explica Digna Rivas. O goberno local asumiu estas obras “por responsabilidade” pero segue á espera de que a Xunta de Galicia poña “data e prazos concretos para a reforma integral da cuberta”. Hai máis dun mes a Alcaldía de Redondela solicitou á Xefatura Provincial de Ensino unha xuntanza para abordar estas e outras cuestións “que son urxentes para o bo funcionamento dos centros escolares do municipio”. A alcaldesa denuncia que ata o de agora non se recibiu resposta.

La entrada Concello e ANPAS demandan á Xunta unha solución para os comedores de Santa Mariña e Marisma “dentro dos colexios” se publicó primero en Concello de Redondela.

A Alameda Castelao acolleu onte a IV edición de “Lectura na rúa”, unha actividade que xurdiu desde o CEP Santa Mariña “para fomentar a lectura compartindo a maxia dos libros e da música con toda a comunidade educativa e a veciñanza da vila”.

Esta proposta non deixou de medrar, e foron ao redor dun milleiro de persoas as que participaron na edición celebrada onte, organizada polo CEP Santa Mariña e o Concello de Redondela, coa colaboración das Bibliotecas Municipais e a ANPA Ernestina Otero. Neste acto participaron todos os centros educativos de Educación Infantil, Primaria e IES de Redondela, ademais dos 5 centros de día do municipio.

O evento contou cun intercambio de marcadores de libros, lectura compartida, desfile de contos, cancións, bailes e a actuación de “Barafunda”, que fixo as delicias de todo o público. O concelleiro de Ensino, Iván Valles, valorou a iniciativa como “todo un éxito” e agradeceu ao CEP Santa Mariña e o resto de centros a súa implicación. A alcaldesa, Digna Rivas, afirma que desde o Concello “estaremos sempre apoiando iniciativas como esta, na que a cidadanía, tanto a infancia como os maiores, son protagonistas”.

La entrada Un milleiro de rapaces e maiores ateigan a Alameda Castelao na xornada “Lectura na rúa” se publicó primero en Concello de Redondela.

O vindeiro 8 de maio a Alameda Castelao acollerá a IV edición da actividade “Lectura na rúa”, unha iniciativa que xurdiu en maio de 2017 desde o CEP Plurilingüe Santa Mariña. O obxectivo deste evento é fomentar a lectura “compartindo a maxia dos libros e da música, nunha contorna atractiva e diferente, rodeados de toda a comunidade educativa, así coma da veciñanza da vila”.

Nas primeiras edicións formaron parte desta festa da lectura, ademais do CEP Plurilingüe Santa Mariña, os seus centros de referencia: EEI A Marisma e IES Illa de San Simón. Ao resultar a experiencia tan positiva, tomouse a decisión de estendela a outras bibliotecas escolares de Redondela, co apoio e financiamento do Concello de Redondela e a colaboración da Biblioteca Municipal e a ANPA Ernestina Otero.

Este curso escolar celebrarase a IV edición de “Lectura na rúa” o 8 de maio organizado polo CEP Santa Mariña xunto co Concello de Redondela, e coa colaboración da Biblioteca Municipal e a ANPA Ernestina Otero. Neste acto participarán todos os centros educativos de Educación Infantil, Primaria e IES de Redondela, ademais de 5 centros de día do concello, sumando preto dun millar de persoas, que se xuntarán na Alameda Castelao de Redondela para gozar dunha mañá de lectura e cultura en compañía.

O evento, que se estenderá dende as 10:30 ata as 13:00 horas, contará cun intercambio de marcadores de libros, lectura compartida, desfile de contos, cancións, bailes e a actuación de “Barafunda”. O concelleiro de Ensino, Iván Valles, confía en que a iniciativa sexa “un éxito” como en edicións anteriores, e agradece ao CEP Santa Mariña e o resto de centros a súa implicación. A alcaldesa, Digna Rivas, afirma que desde o Concello “estaremos sempre apoiando iniciativas como esta, na que a cidadanía, tanto a infancia como os maiores, son protagonistas”.

La entrada Un milleiro de persoas celebrarán na Alameda Castelao a actividade “Lectura na rúa” se publicó primero en Concello de Redondela.