– O III Ciclo Infantil Interparroquial de Nadal contará con trece espectáculos desde o 19 de decembro ata o 4 de xaneiro. Tanxarina, Os Bolechas, Pakolas, As Tareixas, Peter Punk ou Ce Orquestra Pantasma son algúns dos protagonistas da programación para o público infantil e familiar.

– A programación de Nadal do Concello de Redondela complétase cos Festivais de Panxoliñas, a visita de Papá Noel e a Festa pre Fin de Ano no campo da feira, ademais das tradicionais Cabalgatas e as Rondallas e Ranchos de Reis.

– O acendido das luces de Nadal será este sábado, 29 de novembro, cun gran espectáculo na praza do Concello e un pasarrúas polo centro da vila. A música e a maxia do Nadal estarán presentes nesta xornada, na que non faltarán as sorpresas.

Co acendido das luces de Nadal este sábado ás ás 20.00 horas na praza do Concello dará comezo a programación cultural de Nadal. A iluminación, como en anos anteriores, non se limitará aos núcleos urbanos senón que “se estende por todas as parroquias do municipio con figuras decorativas nas rúas, prazas, alamedas, xardíns e elementos singulares”, sinala Digna Rivas. As trece parroquias do municipio tamén serán protagonistas da programación de Nadal.

O III Ciclo Infantil de Nadal Interparroquial contará con primeira vez con espectáculos en todas as parroquias. A alcaldesa, Digna Rivas, sinala que para este goberno é moi importante “achegar a programación cultural e a maxia do Nadal a todos os veciños e veciñas”. A concelleira de Cultura, Rita Pérez Táboas, explica que se trata de actividades musicais e teatrais en galego para o público infantil e familiar. Desde o Concello o obxectivo é “achegar ás parroquias actividades culturais de calidade e en galego ao longo das vacacións escolares de Nadal”. Todas as actuacións serán ás 18.00 horas. A primeira será co grupo de música redondelán “As Tareixas”, que actuarán no Centro Cultural de Ventosela o 19 de decembro. Seguirá Brais das Hortas, o 20 de decembro no Centro Cultural de Quintela co espectáculo “Zona de Obras”. En Cesantes a cita será coa música de Paco Nogueiras e o espectáculo “Son animal”, no Centro Cultural o día 21 de decembro. Na Sociedade Labrego Cultural do Viso estarán o 22 de decembro Fantoches Baj coa obra “O castiñeiro do Apalpador”. O 23 de decembro o protagonista será Peter Punk, que estará no Centro Cultural de Saxamonde cun espectáculo cómico e musical. A maxia e diversión do circo chegará o 26 de decembro ao Centro Cultural de Negros co “Show de Fifo”. No Centro Cultural de Cedeira estará o 27 de decembro a compañía Títeres Alakrán co teatro de monicreques “Barriga Verde”. O 28 de decembro será a quenda do ilusionista internacional Cayetano Lledó, que estará no Auditorio da Xunqueira cun espectáculo de maxia para público familiar. Lledó combina técnicas innovadoras con xogos cómicos onde a sorpresa e o humor se fusionan co ilusionismo. Un día despois toda a marcha e a diversión do espectáculo musical “A Bailar no Nadal” de Animar-T chegará ao Centro Cultural de Trasmañó, o 29 de decembro. A última actuación do ano será o 30 de decembro co polifacético Ce Orquestra Pantasma no Centro Cultural de Reboreda. O mes de xaneiro comezará coa gran compañía redondelá Tanxarina, que actuará no Centro Cultural de Cabeiro o 2 de xaneiro coa súa premiada obra Titiricircus. O ritmo rockeiro chegará da man de Pakolas cun espectáculo musical no Centro Cultural de Vilar de Infesta o 3 de xaneiro. A programación deste ciclo rematará o 4 de xaneiro cunha das familias máis coñecidas de Galicia, “Os Bolechas”, que estarán o auditorio do Piñeiral do Crego en Chapela.

A programación de Nadal complétase co concerto benéfico a benéfico a favor de Cáritas o 27 de decembro no auditorio da Xunqueira e o Festivais de Panxoliñas e Canto Tradicional os días 3 e 4 de xaneiro.

Visita de Papá Noel a Redondela e Chapela

Do 17 ao 24 de decembro nenas e nenos poderán visitar a Casa de Papá Noel que, como en anos anteriores, quedará instalada na Alameda Castelao. Os horarios de visita serán de 17 h a 19:30 todos os días, agás o día 24 que será en horario será de mañá, de 11 h a 14 horas. Papá Noel tamén se instalará en Chapela, na alameda Rosalía de Castro, do 20 ao 23 de decembro en horario de 17.00 a 20.00 horas.

Os nenos e nenas que o desexen poderán contactar tamén con Papá Noel a través das novas tecnoloxías. Poderán facelo a partir do 12 de decembro na páxina web www.nadalenredondela.com.

Festa Pre Fin de ano e Cabalgatas

Redondela despide o ano por anticipado cunha festa Pre Fin de ano o 30 de decembro. Será a partir das 21 horas no campo da feira con concerto e discoteca móbil.

As cabalgatas de Reis celebraranse como é habitual en Redondela e Chapela o día 5 de xaneiro a partir das 18.00 horas, e o día 6 a vila vivirá un dos días máis grandes do ano coas tradicionais Rondallas e os Ranchos de Reis desde as 10.00 horas polas rúas do centro da vila.

La entrada A programación de Nadal chega a todas as parroquias con espectáculos para público infantil e familiar se publicó primero en Concello de Redondela.

– A cita será no paseo marítimo de Chapela o 24 de xullo coa participación de Treixadura, Froles Mareliñas e Cantatorrella. Digna Rivas destacou “o compromiso vital de Antón Cabaleiro coa música galega, coa cultura do país e, sobre todo, a súa bondade e o carácter afable que o definían como un dos bos e xenerosos”.

O vindeiro 24 de xullo, véspera do Día de Galicia, o paseo marítimo de Chapela será escenario dunha emotiva xornada. Redondela renderá homenaxe a Antón Cabaleiro, veciño de Chapela, músico e unha das voces de formacións como Treixadura, A Roda ou Froles Mareliñas, entre outras. Cabaleiro, falecido en outubro de 2022, foi tamén concelleiro no Concello de Redondela.

A alcaldesa, Digna Rivas, presentou a homenaxe xunto á concelleira de Cultura, Rita Pérez Táboas, Gustavo Cuntín, membro de Treixadura, e Antonio Cabaleiro, concelleiro e fillo do homenaxeado.

Rivas destacou “o compromiso vital de Antón Cabaleiro coa música galega, coa cultura do país e, sobre todo, a súa bondade e o carácter afable que o definían como un dos bos e xenerosos”. A alcaldesa sinalou que “aqueles que tivemos a fortuna de coñecelo persoalmente lembramos a Antón como un entrañable veciño e un gran compañeiro, ademais de ser unha recoñecida figura da música galega”.

A xornada comezará co concerto do grupo redondelán Cantatorrella ás 21.00 horas. O acto institucional de homenaxe será ás 22.00 horas, para dar paso despois á recoñecida formación Treixadura. Tamén participará na homenaxe a agrupación Froles Mareliñas, de Chapela, de que Antón Cabaleiro foi membro e director.

La entrada Redondela rende homenaxe a Antón Cabaleiro se publicó primero en Concello de Redondela.

O Servizo de Normalización Limgüística, que dirixe a alcaldesa Digna Rivas, está a realizar obradoiros sobre baile e música galegas nos colexios. Co gallo do Día das Letras Galegas, dedicado este ano á poesía popular oral, personificado en Adolfina e Rosa Casás, de Cerceda, Eva Castiñeira, de Muxía, e Manuela Lema, Teresa García e Prudencia e Asunción Garrido, integrantes estas catro das Pandeireteiras de Mens (Malpica). Con esta elección a Real Academia Galega quere recoñecer a importancia da poesía popular oral, que acompaña a nosa sociedade desde sempre.

Para dar a coñecer entre a rapazada este patrimonio e o papel das mulleres na música, o Concello organizou obradoiros nos colexios de Cedeira, Igrexa Chapela, Reboreda e no IES Pedro Floriani.

A alcaldesa e o concelleiro de Ensino, Iván Valles, visitaron o CEIP Cedeira para compartir esta esperiencia cos nenos e nenas.

La entrada Obradoiros de música e baile galegos para escolares polo Día das Letras se publicó primero en Concello de Redondela.

– Será este sábado, 26 de outubro, no auditorio da Xunqueira, con entrada de balde. Na representación, xunto ao barítono Luís Santana e o pianista Víctor Carbajo, a actriz fai un percorrido polos grandes autores da literatura con poemas de Lorca, Machado ou Miguel Hernández, entre outros.

– A alcaldesa, Digna Rivas, convida á veciñanza a asistir a esta cita, “unha excelente oportunidade para disfrutar desta gran actriz e da poesía nun espectáculo lírico de gran calidade”.

O Concello de Redondela programou para este sábado, día 26, “Verso a Verso”, un espectáculo que reivindica a importancia da poesía da man da recoñecida actriz Charo López. A representación, prevista ás 20.00 no auditorio da Xunqueira, “convida a facer unha pausa nestes tempos de vertixe e deixar un pequeno lapso para a música e a poesía”, explica a propia intérprete. No recital Charo López comparte escenario co barítono Luís Santana e o pianista Víctor Carbajo, con cancións seleccionadas en función do autor e a época. Así, o recital fai un percorrido polos grandes autores da literatura española desde o século XVI até hoxe, con poemas de Lorca, Machado, Miguel Hernández ou Santa Teresa de Jesús, entre outros. Entre as cancións que interpretará Santana poderemos atopar temas populares da música española, arxentina ou francesa. Os artistas explican que “a poesía funciona como unha fotografía que é capaz de recoller en palabras, nun instante, nun golpe de luz, as imaxes que enfoca, e axúdanos a reconstruír o noso pasado, presente e futuro na medida na que os retrata coas súas palabras”.

A alcaldesa, Digna Rivas, convida á veciñanza a asistir a esta cita, “unha excelente oportunidade para disfrutar desta gran actriz e da poesía nun espectáculo lírico de gran calidade”.

Luís Santana estudou con grandes mestres da lírica e está especializado no repertorio vocal, desenvolvendo unha incesante actividade concertística.

O pianista Víctor Carbajo, músico e compositor, acompaña habitualmente a figuras moi coñecidas da lírica española e a canción.

A actriz é dabondo coñecida pola súa longa traxectoria tanto no teatro como no cinema e a televisión. O recoñecemento ao seu gran traballo chégalle en 1980 con Fortunata e Jacinta e Os gozos e as sombras, dúas series de gran éxito. Posteriormente encadea traballos relevantes en cinema con algúns dos mellores directores do país, e consegue o Goya á mellor actriz de reparto polo seu papel en Secretos del corazón, película de Montxo Armendáriz que foi candidata ao Óscar. A pesar do seu percorrido polas pantallas de cinema e televisión, ela considérase, sobre todo, unha actriz de teatro “que leva o escenario dentro”.

La entrada A actriz Charo López chega a Redondela co espectáculo “Verso a verso” se publicó primero en Concello de Redondela.