Digna Rivas e Rita Pérez con membros de “Bico de Toupa”, Grupo América e orquestra Lá Fórmula

-As celebracións comezarán o sábado 14 de febreiro co Entroido Infantil e Xuvenil, xogos e obradoiros na Alameda Castelao e pasarrúas con The Turre´s Band. O campo da feira acollerá o gran concerto da orquestra La Fórmula, que estreará en Redondela o seu novo espectáculo. O domingo 15 será o desfile de comparsas.

– O Martes de Entroido será o concurso de disfraces, Queima do Meco e o espectáculo “Hexagonum” con monecos xigantes, proxeccións e lume. A xornada rematará co concerto da Mekánika Rolling Band. En Chapela o Entroido celebrarase o día 21 co desfile de comparsas, o Enterro do Berete e o concerto do Grupo América de Vigo.

– A alcaldesa, Digna Rivas, animou a toda a cidadanía a participar nesta tradicional festa que se vive “con gran intensidade” en Redondela. O Entroido “reúne a grupos de amigos e familias completas que viven esta festa nas rúas da vila” e desde o Concello ofrécese unha ampla programación para todos os públicos.

O sábado 14 de febreiro comezan as celebracións do Entroido en Redondela. A rapazada será a protagonista desta xornada co Entroido Infantil e Xuvenil. As actividades comezan ás 16.00 horas con “Un Mar de Xogos” de Bico de Toupa e obradoiros na Alameda de Castelao ata e as 19.30 horas. A música correrá a cargo do grupo The Turre´s Band cun animado pasarrúas polo centro da vila desde as 18.00 horas. A partir das 21.30 horas o Entroido deste 2026 vibrará co concerto da orquestra “La Fórmula”, que estreará en Redondela o seu novo espectáculo para esta temporada. “Será un gran comezo do Entroido para animar á veciñanza a gozar e bailar nestas datas tan especiais”, sinala a concelleira de Cultura Rita Pérez, que contará tamén con sesión DJ.

O 15 de febreiro, domingo de Entroido, comezará ás 17.00 horas a concentración das comparsas no Campo da Feira. Ás 18.00 fará o seu pasarrúas Tío Emilio, a tradicional comparsa representativa do Entroido redondelán. A continuación será o desfile de comparsas que percorrerá as principais rúas da vila e ás 20.30 horas será a entrega de premios.

Martes de Entroido

O día 17, Martes de Entroido, é un día grande en Redondela, coa participación de veciños e veciñas de todas as idades. A alcaldesa, Digna Rivas, sinala a importancia desta xornada tan tradicional nas festividades de Redondela “que reúne a grupos de amigos e familias completas con participantes de todas as idades que viven o Entroido na rúa, por iso desde o Concello poñemos todo da nosa parte para que sexa un día moi especial cheo de actividades”. Ás 17.00 horas comezará o Desfile-Concurso de Disfraces individual e colectivo. As inscricións para participar poderán facerse nos soportais do Concello desde as 16.00 e a entrega de premios será ás 18.45 horas.

Os máis pequenos terán o seu espazo na Alameda Castelao con diferentes obradoiros desde as 17.00 e ata as 19.30 horas. As rúas contarán con moita animación e ritmo grazas á percusión e os tamboriles do grupo Aperta.

Ás 19.00 horas, fiel á súa cita, celebrarase a tradicional Queima do Meco “unha das citas con máis expectación do entroido redondelán”. “Hexagonum”, de Troula Animación, será o espectáculo que dea paso á queima con marionetas xigantes, proxeccións audiovisuais, pirotecnia e lume. A festa continuará pola noite co concerto da Mekánica Rolling Band, unha das agrupacións máis festivas de Galicia e coñecida pola súa explosiva mestura de ritmos populares, punk brass e interacción co público. Ás 20.30 horas na praza da Constitución.

Entroido en Chapela

O sábado 21 de febreiro celebrarase o Entroido en Chapela. As comparsas reuniranse ás 17.00 horas do alto da Encarnación. Ás 18.00 horas sairá o desfile acompañado polos percusionistas e tamborileiros de Aperta. Pecharán a comitiva os participantes do Enterro do Berete que fará o seu percorrido ata a praia de Arealonga. A queima do Berete será ás 20.15 comezará. A xornada pecharase co concerto do grupo América de Vigo que ofrecerá un gran espectáculo co seu tributo a toda a historia do rock and roll, facendo un repaso dos grandes éxitos de todos os tempos. Será a partir das 21.00 horas no paseo marítimo de Chapela e con sesión do Dj Mesu.

O Concello prepara unha ampla programación “con festa rachada” durante catro días para darlle “máis pulo aínda” a esta tradicional festa “que con tanto entusiasmo viven no municipio veciños e veciñas de todas as idades”, conclúe Digna Rivas.

La entrada Redondela celebra o Entroido con catro días de “festa rachada” se publicó primero en Concello de Redondela.

– “Mariscando conCiencias para o futuro” é unha iniciativa da cooperativa Cidadanía con Amarturmar, Future Oceans Lab (da Universidade de Vigo), Artelixo e o Concello de Redondela. O proxecto conta co financiamento da Fundación Daniel e Nina Carasso logo de ser seleccionado entre máis de 150 propostas de toda España.

– A alcaldesa, Digna Rivas, explica que se trata dun traballo colaborativo entre mariscadoras a pé, persoal investigador, artistas locais e Concello, liderado pola cooperativa galega Cidadanía. O obxectivo é extraer aprendizaxes do pasado de cara a un futuro sostible do traballo no mar.

– Desafíos como o cambio climático estarán moi presentes no proxecto que se desenvolverá na enseada de San Simón entre 2025 e 2026. A primeira cita aberta á veciñanza son os obradoiros “O pasado da pesca artesanal” os días 26 de novembro, 3 e 10 de decembro en horario de 18.00 a 20.30 horas na Oficina de Turismo.

Oxe presentouse na Oficina de Turismo de Redondela “Mariscando conCiencias para o futuro”, unha iniciativa da cooperativa Cidadanía con Amarturmar, Future Oceans Lab (da Universidade de Vigo), Artelixo e o Concello de Redondela. O proxecto conta co financiamento da Fundación Daniel e Nina Carasso logo de ser seleccionado entre máis de 150 propostas de toda España.

A alcaldesa, Digna Rivas, explica que se trata dun traballo colaborativo entre mariscadoras a pé, persoal investigador, artistas locais e Concello, liderado pola cooperativa galega Cidadanía. O obxectivo é poñer en común “narrativas e accións que extraian aprendizaxes do pasado de cara a un futuro sostible dos traballos do mar artesanais”. Desafíos como o cambio climático estarán moi presentes neste proxecto que se desenvolverá na enseada de San Simón entre 2025 e 2026. Ana González, de Cidadanía,explica que se abordará o desafío de imaxinar “como adaptar un sector produtivo aos cambios ambientais”. Rivas puxo o foco precisamente no marisqueo, un sector eminentemente feminino e artesanal no que traballan ducias de mulleres en Redondela. Grazas a esta iniciativa científicas, mariscadoras e artistas intercambiarán saberes técnicos e populares dun sector tradicional de moito arraigo no litoral galego.

O reto do cambio climático

O sector pesqueiro artesanal galego e especialmente o marisqueo enfróntase ao gran retos dos efectos do cambio climático. Ana Sotelino, da asociación Amarturmar, advirte que os problemas están a manifestarse “cunha mortalidade masiva dos bivalvos pola ausencia de chuvias, o aumento da temperatura da auga ou as chuvias torrenciais”. A contaminación é outros dos problemas que afecta ao sector do mar, así como a presenza de especies invasoras, entre outras. “Mariscando conCiencias para o futuro” busca, desde diferentes ámbitos, analizar a situación actual e proxectar futuros sostibles e realistas xunto co colectivo da pesca artesanal na enseada de San Simón.

Obradoiros “O pasado da pesca artesanal”

Ao longo dos vindeiros meses levaranse a cabo obradoiros abertos á veciñanza nos que recoller coñecementos populares, fitos do colectivo do mar, persoas referentes do sector e prácticas sostibles no mar. A primeira convocatoria é cos obradoiros “O pasado da pesca artesanal” con tres xornadas que serán os días 26 de novembro, 3 e 10 de decembro. Trátase dun espazo participativo e de conversa entre os asistentes, nos tres casos en horario de 18.00 a 20.30 horas na Oficina de Turismo de Redondela. As persoas que desexen participar están convidadas a achegar obxectos, documentos, fotos, etc. do traballo do mar en Redondela. Por motivos de organización recoméndase confirmar asistencia no teléfono 627 096 062.

Toda a información recompilada será interpretada de maneira artística nunha liña do tempo elaborada polo colectivo Artelixo.

De cara ao 2026 desvelaranse novas actividades de Mariscando conCiencias para o futuro, onde haberá un percorrido polos areais colaborando cos colexios do municipio.

La entrada Redondela percorre pasado e presente da pesca artesanal coa iniciativa “Mariscando conCiencias para o futuro” se publicó primero en Concello de Redondela.

– As concellerías de Xuventude e Cultura celebran este verán un campus dirixido á rapazada de 12 a 16 anos que está a ser todo un éxito entre a mocidade. Ofrece actividades de fotografía e vídeo, Intelixencia Artificial e pintura mural. Os participantes na actividade de pintura decoran o lateral do campo de fútbol de Santa Mariña cun mural que recolle imaxes deportivas.

O Concello de Redondela puxo en marcha este verán o novo programa “Campus Xuventude” dirixido á mocidade. A rapazada de entre 12 e 16 anos conta con actividades como edición de fotografía e vídeo, intelixencia artificial e pintura mural que están a ter moito éxito. O campus, organizado polas concellerías de Xuventude e Cultura, é totalmente gratuíto e está a deixar “pegada” nas instalacións municipais. A alcaldesa, Digna Rivas, e a concelleira Iria Vilaboa visitaron aos participantes no campus de pintura mural que están a decorar o lateral do campo de fútbol de Santa Mariña. Coas indicacións e a axuda da súa mestra, a artista local Paula Amoedo, a rapazada decorou o muro con imaxes deportivas “cun resultado espléndido”, destacou Rivas. Para moitos participantes esta é a súa primeira experiencia no mundo do graffiti, e amosáronse “moi contentos e motivados coa actividade”. A alcaldesa animounos a seguir formándose nesta especialidade artística e propúxolles decorar outros espazos públicos en vindeiras edicións do campus.

La entrada Diversión e aprendizaxe nos Campus Xuventude se publicó primero en Concello de Redondela.

Este 23 de abril foi un día de gran celebración nas Bibliotecas Municipais de Redondela.

Pola mañá participamos en Lectura na Rúa, un festival da lectura que se celebrou na Alameda de Redondela, e onde escolares dos centros de ensino e persoas dos centros de maiores celebran xuntos e comparten o gozo de ler.

Pola tarde, a Biblioteca Xela Arias tivo o seu particular momento de celebración co obradoiro creativo “Contos en construción”. Unha proposta que parte do conto dos Tres Porquiños e coa que nenos e nenas participantes proxectaron orixinalísimas construcións para resolverlle a vida a estes personaxes xa emancipados.

Unha actividade que pudo celebrarse grazas ao programa Ler Conta Moito da Rede de Bibliotecas de Galicia.

La entrada Un Día do Libro redondo nas bibliotecas municipais se publicó primero en Concello de Redondela.

Un total de 70 nenos e nenas de entre 3 e 12 anos de idade participan durante as vacacións escolares nas actividades organizadas pola Concellería de Servizos Sociais. Os obradoiros, que se realizan no Conservatorio de Redondela (50 participantes) e no multiúsos de Chapela (20 participantes), comezaron onte luns e prolongaranse ata o día 21, Luns de Pascua.

A rapazada, por grupos de idade, pode gozar estes días con obradoiros de teatro, plástica, xincanas, xogos con música e baile, e outras sorpresas. Ademais de divertirse, nenos e nenas están a aprender sobre o patrimonio cultural e natural, a diversidade, a igualdade e o traballo en equipo.

A alcaldesa, Digna Rivas, e a concelleira de Servizos Sociais e Igualdade, Iria Vilaboa, achegáronse esta mañá ao obradoiro que se está a realizar no multiúsos do Piñeiral, en Chapela. Vilaboa explica que con esta iniciativa ofrece ás familias durante as vacacións escolares “un tempo de lecer para nenos e nenas divertido, que lles permite compartir xogos con toda a rapazada e aprender de xeito lúdico”. A rexedora local sinala que estas actividades responden ao compromiso do goberno local coas familias “poñendo en marcha iniciativas durante todo o ano cunha oferta didáctica e lúdica coa que cubrir as vacacións escolares da rapazada”.

La entrada Nenos e nenas aprenden mentres se divirten nos obradoiros de Semana Santa en Redondela e Chapela se publicó primero en Concello de Redondela.

As Bibliotecas Municipais de Redondela acollen unha actividade de divulgación científica coa redondelá Paula Rivas.

En relación co ciclo “Aquí sí hai quen escriba” co que as bibliotecas estamos a facer eco da creación literaria da nosa veciñanza, petamos na porta desta bióloga e divulgadora veciña, que se brindou a achegar a nenos e nenas da nosa contorna unha “masterclass” sobre o funcionamento do cerebro.

Paula Rivas, cun doutorado en neurociencia e cun extenso currículo neste eido, está a facer unha labor divulgativa sobre o funcionamento do sistema nervioso, e ten xa publicado con Xerais un libro para público infantil sobre esta temática.

O 23 de xaneiro terémola na Biblioteca Xela Arias para unha estimulante charla onde rapaces e rapazas coñecerán como traballa o “ordenador” que fai funcionar aos seres humanos, e onde explorarán moitas curiosidades sobre neuronas, nervios, sentidos e hemisferios cerebrais.

• Unha proposta para nenos e nenas de entre 8 e 12 anos.
• É de balde, pero precisa que vos inscribades na biblioteca para participar.
• A cita será o xoves 23 de xaneiro, ás 18:30 h. na Biblioteca Xela Arias de Chapela.

La entrada Neurociencia para a rapazada na Biblioteca Xela Arias se publicó primero en Concello de Redondela.

– Está dirixido á rapazada de 3 a 12 anos de idade. Ofrécense un total de 180 prazas en Redondela, Chapela, Porto Cabeiro, Cedeira, Cesantes, Quintela e Reboreda. O prazo para a presentación de solicitudes remata o 12 de novembro. A actividade é de balde.

A concellería de Igualdade e Muller, que dirixe Iria Vilaboa, organiza un ano máis o programa municipal de conciliación para as vacacións escolares de Nadal. A actividade é gratuíta. A edil explica que “o obxectivo destes campamentos é o de proporcionar ás familias unha programación educativa e lúdica que lles permita conciliar o coidado dos nenos e nenas cos seus deberes laborais durante as vacacións escolares de Nadal”. O horario dos campamentos será de 09:00 a 14:00 horas durante os días 23, 24, 26, 27, 30 e 31 de decembro de 2024 e 2 e 3 de xaneiro de 2025. A actividade está dirixida á cativada de entre 3 e 12 anos. O número de prazas ofertadas son 180, repartidas entre as diferentes parroquias do municipio: CEIP Porto Cabeiro 15 prazas, CEIP de Cedeira, 15 prazas, CEIP Outeiro das Penas 30 prazas, CEIP Alexandre Bóveda 45 prazas, CEIP Quintela 15 prazas, Sociedade Labrego Cultural de Reboreda 15 prazas e Conservatorio Municipal Víctor Ureña 45 prazas. A alcaldes, Digna Rivas, sinala que deste xeito “o Concello ofrece unha alternativa de conciliación familiar á veciñanza non só no centro da vila, senón tamén nas diferentes parroquias”.

A documentación desta convocatoria está publicada na páxina web municipal e pode solicitar tamén en papel no propio Concello ou nas oficinas do Centro de Información á Muller (CIM). As solicitudes deberán presentarse no Rexistro xeral do Concello. O prazo para a presentación de solicitudes será do 30 de outubro ao 12 de novembro, ambos incluídos.

La entrada Aberto o prazo de inscrición para o campamento municipal Concilia Nadal se publicó primero en Concello de Redondela.

– O programa conta con 100 participantes e ten unha duración dun ano, de xaneiro a decembro. “A día de hoxe xa son 60 os participantes que teñen traballo, polo que todo apunta a que o resultado de cara a final de ano será un éxito”, sinala a alcaldesa Digna Rivas.

– Outros programas cos que o Concello promove a integración laboral son os Obradoiros de Emprego. Na especialidade de “Carpintería de ribeira” o alumnado está a restaurar o emblemático bote Manuel. “Unha vez rematado o bote quedará exposto no museo Meirande para poñer en valor este patrimonio redondelán”, anunciou o alcaldesa.

O programa integrado de Emprego do Concello de Redondela comezou a súa andadura o pasado mes de xaneiro e rematará en decembro, pero cinco meses antes da súa finalización xa arroxa unhas cifras de ocupación moi positivas. “O programa conta con 100 participantes e a día de hoxe xa son 60 os que teñen traballo, polo que todo apunta a que o resultado de aquí a final será todo un éxito”, sinala a alcaldesa Digna Rivas. Estes programas céntranse en promover a inserción laboral e a mellora da empregabilidade de 100 demandantes de emprego de Redondela. Desde xaneiro realizáronse multitude de actividades formando aos participantes en competencias dixitais, preparación de entrevistas, atención ao cliente, manipulación de alimentos e xestión de almacén, entre outras actividades. “Todos os demandantes de emprego recibiron orientación laboral personalizada, 22 deles realizaron prácticas en empresas, tramitáronse máis de 130 ofertas, e a día de hoxe xa hai 60 persoas traballando”. O Programa Integrado de Emprego está financiado pola Consellería de Promoción do Emprego e Igualdade e o Servizo Público de Emprego Estatal co cofinanciamento do Concello de Redondela.

O Obradoiro de emprego restaura o bote Manuel e creará unha réplica

Outros programas cos que o Concello de Redondela promove a formación e a integración laboral son os Obradoiros de Emprego. A alcaldesa, Digna Rivas, e o concelleiro de Emprego, Antonio Cabaleiro, visitaron onte os obradoiros que se realizan no Pazo de Pousadouro nas especialidades de “Carpintería de ribeira” e de “Xardinería forestal e agricultura ecolóxica”. A modalidade de carpintería de ribeira é unha aposta “innovadora” na que se forman 10 alumnos e alumnas “encargados da recuperación do emblemático bote Manuel, unha embarcación tradicional da enseada de San Simón dos anos 30 do século pasado”, explica Rivas. Este bote, ademais de ser utilizada para pesca, tamén abastecía de víveres e roupa á illa de San Simón cando foi prisión. “Con esta restauración poñemos en valor este importante elemento do noso patrimonio, que quedará exposto no museo Meirande”, anunciou Rivas. Ademais o alumnado do obradoiro construirá unha réplica do bote que se poderá botarse ao mar e empregarse para cruzar a enseada de San Simón.

Os 10 alumnos e alumnas de xardinería forestal e agricultura ecolóxica realizan traballos nas fincas da Coutada e do camiño da Vía Vella, entre outros, e cultivan unha horta ecolóxica cuxos produtos son doados a Cáritas. O concelleiro de Emprego sinala que tamén están a ter un gran éxito os dous Programas de Emprego de garantía xuvenil, nas modalidade de “Hostalaría e Cociña” e de “Deseño Gráfico para a Comunicación”, con 8 alumnos e alumnas en cada especialidade.

La entrada O Programa Integrado de Emprego de Redondela acada un 60% de insercións laborais 5 meses antes do seu remate se publicó primero en Concello de Redondela.

–O novo programa RedondelArte contará con obradoiros de artes plásticas, danza, música, construción de instrumentos e deportes urbanos, entre outras actividades.

-As actividades celebraranse do 20 ao 21 de xullo, con pensión completa e pernocta, e están dirixidas á rapazada desde os 6 ata os 18 anos.

Os días 20 e 21 de xullo a rapazada de Redondela poderá participar nunha fin de semana repleta de actividades e obradoiros, con pernocta incluída, co programa RedondelArte. Actividades plásticas, talleres de música, construción de instrumentos, deportes urbanos ou danza son algunhas das propostas para unha completa fin de semana. A concelleira de Infancia, Pilar Martínez, explica que se trata dunha nova iniciativa “na que xuntamos todas as disciplinas artísticas que se imparten en Redondela para que nenos, nenas e mocidade poidan coñecelas e probar distintas actividades durante toda a fin de semana”. A actividade está dirixidas para rapazada desde os 6 ata os 18 anos.

As xornadas artísticas RedondelArte comezarán o sábado día 20 ás 9.30 da mañá no pavillón da Marisma, con actividades ao longo de todo o día en diferentes emprazamentos. Na velada do sábado haberá unha exhibición de deportes urbanos no skate park e participarán na elaboración dun mural. Os participantes pasarán a noite no pavillón e o domingo realizarán diferentes obradoiros, para rematar ás 9.30 co fin de festa na Praza da Casa da Torre.

As actividades serán impartidas polas escolas Ao Teu Ritmo, Mimarte Taller Creativo e a escola de danza CDPI.

A proposta de RedondelArte, subvencionada polo Concello, ten un copago de 45 euros por participante, 40 no caso do segundo irmán. O prezo inclúe todas as actividades da fin de semana, materiais, monitores cualificados, pernocta e pensión completa.

O prazo de inscrición estará aberto desde o 24 de xuño ata o 10 xullo. As prazas son limitadas e cubriranse por orde de solicitude. Máis información no enderezo redondelarte2024@gmail.com. Reservas no propio Concello de Redondela, no teléfono 986 400 300 ou no enderezo electrónico concello@redondela.gal.

La entrada O programa RedondelArte ofrece unha fin de semana de inmersión artística para a rapazada se publicó primero en Concello de Redondela.

Se vos gusta debuxar e crear historias, desde a Biblioteca Xela Arias de Chapela convidámosvos a participar nun divertido obradoiro para explorar a vosa creatividade.

Obradoiro de debuxos kawaii, que se desenvolverá en dúas xornadas: Mércores 17 e mais mércores 24 de abril, de 18:00 a 19:30 h.

Kawaii é unha palabra xaponesa que se pode traducir por “tenro” ou “lindo”.
O estilo kawaii de ilustración inventouse tamén en xapón. Está relacionado cunha estética de personaxes que xera tenrura e simpatía, seguindo un estilo formal moi próximo ao manga. Ten relación co uso estendido de personaxes animadas no eido da comunicación comercial e institucional da cultura nipona.

A actividade será impartida pola ilustradora e artista gráfica chapeleira Nusy Lo.

Para nenas e nenos de 7 a 12 anos.

Prazas limitadas. Para participar precísase inscrición na biblioteca:
986-454-226
bibliotecachapela@redondela.gal

La entrada Obradoiro de debuxos kawaii na Biblioteca Xela Arias de Chapela se publicó primero en Concello de Redondela.

Neste fermoso mes do libro a Fundación Filomena Rivero Alonso organiza, o  xoves 18 de abril, un obradoiro para nen@s de 2 a 4 anos , que consistirá nunha serie de actividades plásticas adaptadas ás diferentes idades dos nenos e nenas participantes, contando co apoio dun adulto que lles acompañe.

O obxectivo deste taller baixo o lema “Arte e xogo en familia”  é estimular o potencial creativo e fortalecer a autoconfianza, ofrecendo ferramentas para que a imaxinación xogue un papel fundamental.

A cativada aprende facendo. Para que a aprendizaxe sexa significativa, @ nen@ constrúe o seu propio coñecemento, por iso é básico ter en conta o que xa coñece. Isto chámase aprendizaxe por descubrimento, que neste taller abordarase desde o xogo, de forma que cada actividade sexa divertida e diferente.
Non imos desvelar  nada máis da actividade  xa que as monitoras non queren que  perdamos o factor sorpresa!

O xoves, 18 de abril, ás 17:00 h.

Para nen@s de 2 a 4 anos acompañados dun familiar

Na Sala Infantil da Biblioteca Municipal de Redondela

De balde. Inscricións no Whatsapp 617340323

ORGANIZA: Fundación Filomena Rivero Alonso

Colaboran: Bibliotecas Públicas Municipais de Redondela

La entrada Arte e xogo en familia: obradoiro para @s máis pequen@s da casa se publicó primero en Concello de Redondela.

Este ano 2023 está a celebrarse en todo o mundo o 50 aniversario do pasamento de Pablo Picasso.

As Bibliotecas Municipais de Redondela tamén queremos sumarnos á celebración, e farémolo precisamente no mes de novembro, por ser o Mes das Ciencia en Galego nas Bibliotecas, e porque a nosa proposta é un obradoiro que mestura ARTE e CIENCIA (para que logo non digan que son campos distantes!).

Nenas e nenos de entre 5 e 10 anos están convidados a participar nun taller organizado pola artista e docente Macarena González, para coñecer a este importantísimo artista do século XX, tan relevante na evolución da arte ata os nosos días.

Coñeceremos ao pintor Pablo Picasso, as súas aportacións e tamén as súas obras máis importantes.

Pero tamén aprenderemos sobre mesturas e combinacións de cor, como se elaboran as pinturas, e como o uso da cor é fundamental para transmitir emocións e para compoñer nas pinturas.

No obradoiro faremos experimentos científicos, pintaremos un cadro e incluso tomaremos unha pequena merenda ao estilo parisino, para recargar as pillas.

A actividade terá lugar o luns 20 de novembro, desde as 17:00 ata as 19:00 h., na Biblioteca Xela Arias de Chapela.

Para participar é preciso inscribirse na Biblioteca Xela Arias:
tlf: 986-454-226, correo: bibliotecachapela@redondela.gal

La entrada Picasso e as cores: novo obradoiro infantil na Biblioteca de Chapela se publicó primero en Concello de Redondela.