Reunión informativa realizada cos veciños antes de comezar as obras de reposición da AP-9

– O Concello de Redondela rexeitou recepcionar as obras de reposición que Audasa realiou en Chapela “ata que cumpran con todos os compromisos”. Un dos incumprimentos é a reposición da fonte de Cornido, que foi retirada polas obras de ampliación da AP-9 e que malia constar no proxecto “non se recuperou”.

– A alcaldesa, Digna Rivas, Rivas esixe á concesionaria “que execute as obras acordadas” e advirte que fará valer “os dereitos da veciñanza que leva décadas padecendo os prexuízos da AP-9”. O Concello non recepcionará as obras ata que os técnicos municipais realicen “todas as comprobacións pertinentes e se cumpran todos os compromisos adquiridos”.

O Concello de Redondela rexeitou a recepción das obras de reposición da AP-9 en Chapela. A alcaldesa explica que non o farán “ata que os técnicos municipais poidan comprobar o estado das obras e se resolvan as posibles deficiencias”. Audasa, empresa concesionaria da autoestrada, citou ao Concello “sen tempo suficiente para realizar as comprobacións técnicas necesarias”. O goberno local advirte que é necesario verificar que o resultado das obras “se corresponde co proxecto e que cumpre cos compromisos acadados”.

A alcaldesa, Digna Rivas, sinala que un deses compromisos, a reposición da fonte do Cornido, non se cumpriu por parte de Audasa. Trátase dunha das fontes máis antigas do barrio de Igrexa e que foi retirada a causa da ampliación da autoestrada. “No documento de reposicións consta a recuperación da fonte de pedra cunha parede ornamental e bancos, e Audasa non o fixo” denuncia Rivas. A rexedora advirte que non vai consentir que a concesionaria incumpra os acordos adquiridos e que vai facer valer “os dereitos da veciñanza que leva décadas padecendo os prexuízos da AP-9”. O concelleiro de Infraestruturas e Sostibilidade, Roberto Villar, sinala tamén que a reposición da fonte é unha demanda “histórica” da parroquia que Audasa ten a obriga de repoñer.

O Concello ten tamén coñecemento doutras incidencias nos servizos e instalacións a causa das obras de reposición das vías afectadas. O goberno local afirma que “ata que os técnicos municipais realicen todas as comprobacións pertinentes, non se procederá á recepción das obras”. O Concello reitera tamén a súa boa disposición para continuar “coa coordinación técnica e administrativa necesaria para a correcta finalización do procedemento”.

La entrada O Concello esixe a Audasa que cumpra co proxecto de reposicións en Chapela se publicó primero en Concello de Redondela.

– O subdelegado do Goberno en Pontevedra, Abel Losada, comprobou xunto coa alcaldesa de Redondela, Digna Rivas, os avances na reforma da ponte de Trasmañó, que afronta a súa recta final para mellorar a seguridade viaria, non só dos peóns, senón tamén do tráfico rodado. Na visita estiveron acompañados por un grupo de veciños da zona e tamén da empresa construtora.

– Os traballos enmárcanse dentro das obras de adecuación que se están a realizar en Chapela e Trasmañó, nas marxes da AP-9, adxudicadas á empresa Civis Global por un importe de 2,65 millóns. A actuación está na recta final e finalizará nas próximas semanas.

Losada felicitou a Digna Rivas por ter reivindicado e feito posible a execución destas obras. O subdelegado foi informado de que coa ampliación da ponte gáñase a anchura necesaria para que poidan cruzarse dous vehículos sen ter que agardar. Ademais as antigas beirarrúas estreitas, que incumprían a normativa, están a ser substituídas por unha funcional senda peonil de metro e medio de anchura que arranca na rampla dende o alto da Encarnación e continúa ata a finalización da ponte no camiño das Laxes. Finalmente, instalaranse varandas que tamén suporán unha mellora sobre as antigas biondas.

Digna Rivas explicou que esta obra era “unha prioridade”, pois responde a unha demanda de hai moitos anos da Asociación de Veciños de Trasmañó e da Asociación de Afectados pola AP-9. “Estase a cumprir, por parte do Goberno de España, co que se lle debía á parroquia de San Vicente de Trasmañó e tamén a Chapela polas obras da autoestrada”. A alcaldesa destacou que deste xeito garántese o dereito da veciñanza a transitar dun xeito seguro.

La entrada A transformación da ponte de Trasmañó mellora a seguridade dos peóns e do tráfico se publicó primero en Concello de Redondela.

– A alcaldesa de Redondela, Digna Rivas, puxo en valor o cumprimento dos compromisos do Goberno central con Redondela “porque era unha débeda con este municipio e un dereito dos veciños de Chapela que veñen padecendo esta autoestrada desde hai moitos anos”.

– Rivas puxo de relevo que o traballos de humanización na estrada do Torreiro “permitiran mellorar a mobilidade da veciñanza nunha zona moi transitada, xa que dá acceso ao instituto, o multiusos do Piñeiral e a igrexa de San Fausto”.

– O delegado do Goberno Pedro Blanco sinalou que “o Goberno cumpre cunha débeda histórica con Redondela e dá resposta ás demandas da veciñanza de Chapela, poñendo punto e final a un problema que afectaba de maneira importante á calidade de vida da cidadanía da contorna da AP-9”.

Os traballos de ampliación e mellora na estrada do Torreiro en Chapela están a realizarse a bo ritmo e entran na recta final. As obras de humanización da contorna da Igrexa de San Fausto están incluídas no proxecto que executa a sociedade concesionaria da autoestrada (Audasa) cun investimento de 3,21 millóns de euros. A alcaldesa de Redondela, Digna Rivas, puxo en valor o cumprimento dos compromisos do Goberno central con Redondela “porque era unha débeda con este municipio e un dereito dos veciños de Chapela que veñen padecendo esta autoestrada desde hai moitos anos”. A alcaldesa fixo estas declaracións onte, durante a visita do delegado do Goberno, Pedro Blanco, e o subdelegado do Goberno en Pontevedra, Abel Losada, que supervisaron as obras, e na que tamén participaron o concelleiro de Urbanismo, Antonio Cabaleiro, e o de Infraestruturas e Sostibilidade, Roberto Villar. Rivas puxo de relevo que os traballos que visitaron onte, na estrada do Torreiro, “permitiran mellorar a mobilidade da veciñanza nunha zona moi transitada, xa que dá acceso ao instituto, o multiusos do Piñeiral e a igrexa de San Fausto”. As obras inclúen tamén a ampliación da pasarela peonil elevada que cruza a autoestrada.

O delegado Pedro Blanco sinalou que o Goberno avanza “con paso firme” para completar os compromisos ligados á ampliación de capacidade desta vía e que suman 15 millóns de investimentos en Redondela. As tres actuacións son a construción do novo centro educativo de Chapela, que xa está funcionando; a reposición de viarios, que está en execución, e a instalación de pantallas antirruído. Durante a visita sinalou que con estes traballos “o Goberno cumpre cunha débeda histórica con Redondela e dá resposta ás demandas da veciñanza de Chapela, poñendo punto e final a un problema que afectaba de maneira importante á calidade de vida da cidadanía da contorna da AP-9”.

O proxecto de reposición de viarios e humanización que se está a executar en Chapela comprende as seguintes actuacións:

– Adecuación e mellora dos camiños Penisal, Torreiro, Camiño da Igrexa e Pasán, mediante a reposición do firme, disposición de beirarrúas, creación de zonas axardinadas e sendas peonís. Dótase de continuidade ao Camiño da Igrexa ata a rúa Pasán.

– Ampliación da pasarela peonil de Chapela, que cruza sobre a autoestrada AP-9.

– Reordenación da sección transversal do paso superior sobre a autoestrada da rúa Pasán para permitir a disposición dun itinerario peonil sobre o mesmo.

– Tamén se adecúa a contorna do IES Chapela, mediante a disposición dunha dársena para subida e baixada de estudantes que viaxan en vehículo privado, e que actualmente non dispoñen de espazo habilitado na avenida de Redondela para realizar esta operación.

– Ampliación do paso superior de Trasmañó, mellorando deste xeito o itinerario peonil que discorre sobre o mesmo.

– Reposición e mellora de Camiño Mouriño, repoñendo o firme e construíndo beirarrúas.

As obras inclúen ademais as debidas actuacións de integración ambiental, estética e paisaxística, e son compatibles coa actuación de disposición de pantallas antirruido neste tramo.

La entrada Avanzan as obras de reposición en Chapela coa humanización da estrada do Torreiro se publicó primero en Concello de Redondela.