A exposición “Mafada e os dereitos da Infancia”, inaugurada en Redondela co gallo do Día Mundial da Infancia, poderá visitarse desde este luns na sala de exposicións do Multiúsos de Chapela.

Resultado da colaboración entre as Bibliotecas Municipais e mais a Concellería de Infancia, coa inestimable participación dos centros de ensino de Primaria e mais de Secundaria do noso Concello, constitúe un xeito de homenaxear ao inesquecible personaxe de Mafalda polo seu 60 aniversario.

Un personaxe que, aínda que sesentona, segue a ser unha nena, e que podería convivir coa rapazada destes tempos, xa que Mafalda, reivindicativa, comprometida, feminista, defensora do medio ambiente…, sempre foi unha adiantada ao seu tempo.

Aínda que o seu aniversario foi en setembro, en Redondela fixémolo coincidir co Día Mundial da Infancia, e mais coa celebración do Pleno Infantil que celebrou o noso Concello para ese día.

Un xeito de lembrar o valor que Mafalda tiña para reivindicar os dereitos dos nenos e das nenas; e así, dándolle voz aos dereitos da Infancia, foi como o alumnado dos centros de ensino nos representou a Mafalda.

Para nós foi moi gratificante comprobar que moitos nenos e nenas desta xeración descubriron a este personaxe grazas a actividade. A eles e mais a todos e todas vós, convidámosvos a coñecela máis a través dos libros coas súas viñetas que temos nas nosas bibliotecas.

Poderedes ver estas orixinais propostas realizadas pola rapazada redondelá na sala de exposicións do Multiúsos de Chapela. Desde o 16 de decembro ata o 16 de xaneiro. Eso sí, tede en conta que durante as semanas de Nadal o Multiúsos (excepto o 27 de decembro) estará pechado.

La entrada A exposición “Mafalda e os dereitos da Infancia”, agora no Multiúsos de Chapela se publicó primero en Concello de Redondela.

O auditorio do Xunqueira acolleu onte a celebración dun pleno infantil no que participaron alumnos e alumnas dos centros de primaria e secundaria do municipio xunto coa alcaldesa Digna Rivas, a concelleira de Infancia, Iria Vilaboa, e a representante de Unicef, Marta Andrade.

Acompañados dous seus mestres e mestras, no pleno participou rapazada dos CEIP Alexandre Bóveda (Dafne e Lía), Cedeira (Abel e Raquel), Quintela (Enzo e Vera), Igrexa, Porto Cabeiro (Teo e Enzo), Reboreda (Eva e Enzo), CEP Santa Mariña (Carmela, Valentina e Mateo), Colexio Vigo (Marco e Sofía) e os IES Illa de San Simón (Mara e Antón), Pedro Floriani (Abel e Julia) e Mendiño (Carla, Antía, Leire e Bruno). A sesión plenaria deste Consello Municipal de Infancia e Adolescencia coincide coa celebración onte, 20 de novembro, do Día Internacional da Infancia. O Consello Municipal de Infancia e Adolescencia é un órgano participativo e de carácter consultivo que serve de representación do conxunto da Infancia e a Adolescencia dentro do municipio, e que se artella favorecendo a colaboración dos máis novos cos adultos na elaboración das políticas municipais, tendo en conta o punto de vista da rapazada.

A alcaldesa, Digna Rivas, que presidiu o pleno, salientou a importancia desta sesión plenaria “xa que os propios nenos e nenas, de primeira man, poden expoñer as súas necesidades, reivindicacións e inquedanzas”.

“Coñecemos os nosos dereitos, actuamos para protexelos” era o lema deste ano, e a mocidade expresou as súas demandas e inquedanzas neste sentido. Falaron da necesidade de apostar por un ensino e unha sanidade públicos e de calidade, “onde non se recorte persoal para que a atención á infancia sexa a axeitada”. Tamén demandaron “máis parques adaptados para persoas con diversidade funcional” e tamén melloras nos patios dos colexios. Mellorar a seguridade viaria nas entradas e saídas dos centros de ensino foi outra das súas reivindicacións. A concellería de Infancia trasladará todas estas peticións ás administracións competentes. A alcaldesa, Digna Rivas, comprometeuse a estudar as peticións que son competencia do Concello e darlle resposta. Tamén aclarou que se invisten moitos cartos públicos cada ano en melloras de parques e outros espazos públicos “que por culpa do vandalismo estráganse ao pouco tempo”.

La entrada A rapazada de Redondela plasma as súas reivindicacións no Pleno Infantil se publicó primero en Concello de Redondela.

As BIBLIOTECAS MUNICIPAIS e mais a CONCELLERÍA DE INFANCIA DE REDONDELA presentámosvos unha exposición na que vos animamos a festexar o 60 aniversario de Mafalda e mais o Día Mundial da Infancia.

Mafalda, un dos personaxes máis queridos das bibliotecas, ven de facer 60 anos, e desde as bibliotecas quixemos facerlle un homenaxe.

Esta nena de sona universal, creada polo ilustrador arxentino Quino, trascendeu máis aló da viñeta, da ilustración e mais dos libros de cómic do momento para converterse nun símbolo universal.

Mafalda representa a voz da conciencia social, da denuncia contra as desigualdades e inxustizas, a defensora dos dereitos das persoas e a adaíl da defensa da paz e do ben común.

É por iso que quixemos que para a celebración do 20 de novembro como o Día Mundial da Infancia, que as bibliotecas, en colaboración coa Concellería da Infancia, propuxemos a todos os centros de ensino de Redondela:

– Que representasen a súa versión de Mafalda, clásica ou actualizada cos tempos.
– Que esa representación de Mafalda usara a súa voz para defender os dereitos da Infancia.

O certo é que nos atopamos con que moitos nenos, nenas e adolescentes non coñecían a Mafalda, así que esta proposta serviu para que descubrisen a este personaxe tan importante na historia da viñeta.

O resultado deste traballo podedes velo ata a primeira semana de decembro no recibidor do Multiúsos de Redondela, e xa en decembro, no Multiúsos de Chapela.  En xaneiro, tras a volta ao cole, a exposición percorrerá as instalacións dos centros de ensino participantes.

Desde as bibliotecas queremos dar as grazas aos herdeiros do legado de Joaquín Salvador Lavado (Quino), non só por permitirnos o uso das imaxes de Mafalda, senón polo seu ánimo e entusiasmo para apoiar este proxecto.

La entrada Exposición “Mafalda e os dereitos da Infancia”: unha homenaxe ao 60 aniversario de Mafalda se publicó primero en Concello de Redondela.