– O Concello de Redondela xa conta co proxecto de execución para o novo paseo do litoral de Cesantes que unirá o peirao coa praia da Punta. O municipio gaña un novo espazo para a cidadanía “ao tempo que protexemos un área natural de gran valor ecolóxico”, sinala a alcaldesa Digna Rivas.

-A alcaldesa presentou o proxecto na Dirección Xeral de Costas do Ministerio de Transición Ecolóxica na súa visita a Madrid. “A resposta do Ministerio foi moi positiva, xa que o proxecto está na liña da súa estratexia para o futuro do litoral, cunha proposta sostible a nivel ambiental”.

O Concello de Redondela xa ten no seu poder o proxecto de execución do futuro paseo polo litoral de Cesantes elaborado polo estudo Naos Arquitectura. A actuación supón unir cun paseo o porto de Cesantes coa praia da Punta, co que se creará un novo espazo de lecer para a veciñanza de case 4.000 metros cadrados.

A alcaldesa, Digna Rivas, co gallo da súa visita a Madrid para a feira de Turismo, mantivo unha xuntanza de traballo no Ministerio para a Transición Ecolóxica. A resposta da Directora Xeral de Costas, Ana María Oñoro, foi moi positiva xa que este proxecto do paseo de Cesantes “está na liña da estratexia do Ministerio para o futuro do litoral, cunha proposta sostible a nivel ambiental”, afirma Rivas.

Con esta actuación Redondela gañará un novo espazo para a cidadanía, “ao tempo que protexemos a paisaxe e melloramos este entorno natural que ten un gran valor ecolóxico”. O paseo polo litoral permitirá á veciñanza desprazarse camiñando ou en bicicleta desde o centro da vila até a praia da Punta. A rexedora lembra que se trata dunha das súas “apostas persoais” para este mandato, e avanza que nos vindeiros días manterá reunións de traballo coa dirección de Costas do Estado en Pontevedra “para seguir avanzando neste proxecto” que, segundo avanza Rivas, está cada vez “máis cerca de facerse realidade”.

Unha senda que mellora a mobilidade e protexe o litoral ante o cambio climático

O obxecto da actuación é acondicionar o tramo que discorre xunto á praia de Cesantes para habilitar “un espazo dinámico” e fomentar unha vida “saudable” a través dunha senda. O paseo que terá o seu percorrido paralelo ao mar. Os veciños poderán gozar dun paseo por un medio natural afastado do tráfico con espazos para o deporte.

Coa creación do paseo tamén se resolverá o problema que presentan aqueles noiros que, coas mareas, sofren pequenas caídas de terreo que supoñen un perigo no transfondo da praia. Tamén se preparará este tramo do litoral ante futuros episodios de subidas do nivel do mar.

A senda será de xabre cemento, con tramos de madeira, pedra e formigón pulido. O paseo contará con zonas de descanso ao longo do percorrido. Ao longo do percorrido plantaranse diferentes especies vexetais autóctonas axeitadas para a climatoloxía marítima (moreiras, figueiras, bidueiros, etc.). Nos noiros faranse xardíns que estabilicen o terreo.

La entrada O novo paseo do litoral de Cesantes mellorará a mobilidade ata a praia e protexerá a costa se publicó primero en Concello de Redondela.

– O Concello de Redondela acaba de contratar o proxecto de execución no novo paseo do litoral de Cesantes, desde o porto ata o á praia, que suporá un novo espazo de case 4.000 metros cadrados.

-A alcaldesa, Digna Rivas, lembra que a creación deste paseo era un das súas apostas persoais para este mandato, e que permitirá á veciñanza desprazarse camiñando ou en bicicleta desde o centro da vila até a praia”.

– Con este proxecto Redondela gañará un novo espazo para a cidadanía “ao tempo que nos permitirá protexer a paisaxe, conservar e mellorar un área natural de gran valor ecolóxico”, engade a alcaldesa

O Concello de Redondela acaba de contratar a redacción do Proxecto Básico e de Execución dun novo paseo no litoral de cesantes. O ámbito de actuación esténdese desde o porto de Cesantes até o acceso á praia polo Camiño da Mariña. A superficie na que se vai intervir supón un espazo de 3.900 m2 aproximadamente. Trátase dun proxecto no que se reflectirá o deseño do paseo e as solucións construtivas. O prazo de execución é de tres meses, polo que estará rematado este verán.

A alcaldesa, Digna Rivas, sinala que a creación dun paseo polo litoral de Cesantes era un das súas apostas persoais para este mandato “e agora damos xa o primeiro paso para facelo unha realidade”. Trátase dun importante proxecto “que vai transformar o espazo litoral da parroquia de Cesantes, que levaba anos esquecido”, afirma Rivas. Este novo paseo marítimo partirá desde a lonxa de Cesantes até a praia da Punta “e permitirá á veciñanza e aos nosos visitantes desprazarse camiñando ou en bicicleta desde o centro da vila até a praia”. O obxectivo desde proxecto “é gañar un novo espazo para a cidadanía, con zonas de lecer e esparexemento cunha mobilidade máis amable, dando prioridade aos peóns”. Neste caso de Cesantes ademais, ponse en valor un espazo natural de gran valor ecolóxico, dentro da Rede Natura 2000, e o novo paseo “permitirá conservar e mellorar o patrimonio natural e cultural, e protexer a paisaxe”, engade a alcaldesa.

A praia de Cesantes, o seu paseo marítimo e os espazos agroforestais da zona actúan xa como áreas verdes e dotan de zonas de lecer á cidadanía. O areal e a súa contorna fomentan o ocio ao aire libre e contan cunha zona de arboredo e equipamento de bancos e mesas que supoñen un refuxio climático para a cidadanía. O novo paseo permitirá ampliar os espazos de lecer ao aire libre, ao tempo que preparará este tramo do litoral ante futuros episodios de subidas do nivel do mar.

La entrada Redondela proxecta un novo paseo polo litoral de Cesantes se publicó primero en Concello de Redondela.