– Coa renovación das lámpadas nas instalacións deportivas o Concello aforrará unha media de 15.000 euros ao ano na factura eléctrica. Este plan de eficiencia enerxética supón tamén unha importante redución da contaminación, xa que rebaixa a emisión a atmosfera de 11,5 toneladas de CO2 anualmente.

– O Concello de Redondela traballa tamén na modernización da iluminación pública. Ata o de agora substituíronse 1.700 farois en camiños de todas as parroquias, e o obxectivo é continuar paulatinamente coa renovación de todas as instalacións do alumeado público.

O Concello de Redondela renovou o sistema de iluminación nas instalacións deportivas. O cambio de lámpadas convencionais por tecnoloxía led realizouse xa nos cinco pavillóns municipais: o de Redondela (Bomboneira), a Marisma, Manuel González Soto de Chapela, Reboreda e Porto Cabeiro. O concelleiro de Deportes, Iván Valles, explica que esta renovación supón un importante aforro enerxético, ao redor dun 40%, o que supón unha rebaixa na factura eléctrica de preto dun 50%, “xa que ademais de reducirse o consumo de enerxía tamén baixa a potencia contratada e o IVE correspondente en cada factura”. Este plan para a mellora da eficiencia enerxética nos pavillóns fíxose gradualmente nos últimos dous anos. No caso do pavillón municipal da Bomboneira o aforro total no ano 2023 foi de 2.959 euros. No González Soto de Chapela o cambio a tecnoloxía led fíxose en febreiro deste ano, “ e o aforro total en tan só seis meses foi de 2.185 euros”. O servizo municipal de electricistas estima que, no conxunto dos cinco pavillóns, o Concello aforrará unha media de 15.000 euros ao ano na factura. Valles agradeceu a colaboración da concellería de Infraestruturas e Sostibilidade, que dirixe Roberto Villar, xa que foron os operarios deste departamento os que fixeron a substitución das lámpadas. “Deste xeito o aforro para o Concello é aínda maior, ao non ter que contratar a unha empresa para facer as instalacións.”

Roberto Villar explica que, “ademais do aforro económico, este plan de eficiencia enerxética supón tamén unha importante redución do nivel de contaminación”. Co cambio de lámpadas convencionais a led “deixamos de emitir á atmosfera uns 2.300 quilos de CO2 ao ano en cada un dos pavillóns, en total 11,5 toneladas menos de CO2, o que tamén é fundamental para un desenvolvemento máis sostible”. Neste sentido incide tamén a alcaldesa, Digna Rivas, quen sinala que “as administracións públicas temos que dar exemplo no camiño cara á transición ecolóxica, ao tempo que facemos un uso máis eficiente dos recursos”.

Renovación da iluminación pública

O Concello de Redondela traballa tamén na modernización da iluminación pública. Ata o de agora substituíronse 1.700 farois en camiños de todas as parroquias, “e o obxectivo é continuar paulatinamente coa renovación de todas as instalacións do alumeado público”, explica Villar. O traballo foi realizado tamén polos operarios municipais da concellería de Infraestruturas e Sostibilidade. O aforro de enerxía co cambio da lámpada convencional de vapor de sodio a unha led é aproximadamente dun 40%, “o que supón pasar dun consumo de 85.000 quilowatts cos farois antigos a 51.000 quilowatts actualmente”, sinala o edil.

La entrada O Concello de Redondela consegue un aforro enerxético dun 40% coa iluminación led dos pavillóns deportivos se publicó primero en Concello de Redondela.

As concellerías de Deportes e Igualdade convidan aos clubs a propoñer un lema respondendo á pregunta “E ti, por que loitas?” dentro do contexto da igualdade e a loita contra a violencia machista no deporte.

Os equipos teñen ata o 10 de maio para facer as súas propostas, e será a veciñanza a que elixa o lema cunha votación popular desde a web do Concello www.redondela.gal. A votación realizarase do 13 ao 15 de maio. A proposta gañadora será revelada o 17 de maio e plasmarase nun deseño gráfico que vestirá os pavillóns municipais de Redondela e A Marisma.

Dende as concellerías de Igualdade e Deportes de Redondela convidan aos clubs que adestran nos pavillóns municipais a participar nunha campaña de de igualdade no deporte baixo o lema “E ti, por que loitas?”. Desde o o goberno local pretenden así “dar voz, espazo e proxección ás inquedanzas das persoas deportistas de Redondela” sinala Iván Valles, concelleiro de Deportes. A concelleira de Igualdade, Iria Vilaboa, advirte que o papel da muller no deporte “é unha carreira repleta de obstáculos e inxustizas”. Os tempos están a cambiar, “e queremos crear para a nosa cidadanía un espazo no cal poidan expresarse alto e claro”.

A proposta que fan desde o Concello consiste en que cada club ou equipo achegue un lema respondendo á pregunta “E ti, por que loitas?” dentro do contexto da igualdade e a loita contra a violencia machista no deporte. Deste xeito pretenden “xerar a posta en común dos equipos, espertar pensamentos, reflexionar e reforzar aínda máis a conciencia de equipo e a loita colectiva por un obxectivo común”.

Os clubs teñen de prazo ata o 10 de maio para facer as súas propostas, e será a veciñanza a que elixa o lema a través dunha votación popular desde a web do Concello Redondela.gal. A votación realizarase do 13 ao 15 de maio. A proposta gañadora será revelada o 17 de maio, día das Letras Galegas, e plasmarase nun deseño gráfico que vestirá os pavillóns municipais de Redondela e A Marisma.

O concelleiro Iván Valles avanzou que esta campaña levarase tamén a outras instalacións deportivas do municipio, e animan aos clubs e a todos os deportistas a participar “para poñer o foco nas desigualdades que aínda existen e loitar espazos igualitarios e de corresponsabilidade no deporte”.

A campaña está financiada con fondos do Pacto de Estado contra a violencia de xénero.

La entrada Os clubs deportivos deseñarán a campaña contra a violencia de xénero nos pavillóns se publicó primero en Concello de Redondela.