– A actuación, cun investimento de preto de 20.000 euros, supuxo a renovación integral de case 1.000 metros cadrados de firme en dúas vías que levaban décadas sen ser asfaltadas.

– O concelleiro de Infraestruturas, Roberto Villar, destaca que estas melloras “garanten a seguridade e a mobilidade nunha zona cunha alta demanda veciñal”.

A Concellería de Infraestruturas e Sostibilidade de Redondela, que dirixe Roberto Villar, concluíu as obras de pavimentación e mellora nos camiños das Laxes e Carreiro da Auga, na parroquia de Reboreda. Os traballos, que contaron cun orzamento de 19.549 euros, xa están operativos para o uso da veciñanza.

A intervención centrouse na renovación do pavimento con aglomerado asfáltico en quente, cubrindo unha superficie total de 977 metros cadrados. No caso do Camiño das Laxes, a actuación abarcou 115 metros de lonxitude desde o estreitamento ata o encontro coa estrada PO-250, onde tamén se instalou unha nova canaleta de drenaxe para evitar a acumulación de augas pluviais. Pola súa banda, no Carreiro da Auga pavimentáronse 105 metros lineais, desde o cruzamento co Camiño das Laxes ata o fondo do camiño.

O concelleiro de Infraestruturas, Roberto Villar, amosou a súa satisfacción polo resultado final dunha obra que cualificou de “prioritaria”. Segundo explicou o edil, “estamos a falar de camiños que levaban décadas sen unha actuación seria de asfaltado, o que provocaba fochancas e problemas de seguridade constantes. Co novo firme e a mellora da drenaxe, non só gañamos en comodidade para os vehículos, senón que garantimos unha mobilidade moito máis segura para os peóns”. Villar subliñou que esta actuación se enmarca no plan de mellora de viais municipais que está a desenvolver o seu departamento. “O noso compromiso é atender as demandas históricas das parroquias. Mellorar o acceso ás vivendas e a seguridade dos camiños rurais é unha cuestión de calidade de vida básica”, sinalou o concelleiro, quen adiantou que desde a súa concellería “seguiremos traballando para mobilizar investimentos, tanto propios como doutras administracións, para que Redondela conte cunha rede de estradas modernas e ben conservadas”.

La entrada Rematada a pavimentación nos camiños das Laxes e Carreiro da Auga en Reboreda se publicó primero en Concello de Redondela.

– O Concello de Redondela e Adif asinan o convenio para a pavimentación e cesión da Avenida da Estación. O organismo ferroviario investirá máis de 582.000 euros na mellora integral antes de transferir a titularidade ao municipio. A pavimentación abrangue unha superficie de case 6.000 m².

– Digna Rivas salienta que a obra resolve unha demanda veciñal de hai 20 anos polo mal estado do vial. A actuación súmase a outros investimentos millonarias nas infraestruturas ferroviarias de Redondela, coa renovación integral da estación e o novo apeadeiro de Chapela, entre outras melloras.

O Concello de Redondela e Adif pecharon o acordo definitivo para a remodelación integral da Avenida da Estación. A través dun convenio de concesión administrativa, o ente ferroviario asumirá o custe total das obras de pavimentación e adecuación estrutural antes de que o vial pase a ser de titularidade municipal.
A alcaldesa de Redondela, Digna Rivas, visitou a estrada xunto ao concelleiro de Urbanismo, Antonio Cabaleiro, e o Subdelegado do Goberno en Pontevedra, Abel Losada. Rivas destacou a importancia histórica deste convenio: “Damos resposta a unha demanda da veciñanza que levaba máis de 20 anos agardando. A estrada atópase nun estado moi deficiente e era unha prioridade absoluta que Adif asumise a súa reparación antes de entregala ao Concello en perfectas condicións”.
As obras de mellora, que serán executadas pola empresa TRAGSA, contan cun orzamento de 582.268,04 € e un prazo de execución de 3 meses. O proxecto actúa sobre unha superficie de 5.962 m² . O acordo estipula que o Concello asumirá a xestión do vial mediante unha concesión por 75 anos. A entrega oficial non se fará ata que as obras estean rematadas.
Rivas sinala que este compromiso de Adif coa Avenida da Estación non é unha actuación illada, senón que se suma a unha estratexia de modernización integral en Redondela con investimentos que superan os 55 millóns de euros. Entre as principais intervencións destacan a modernización de 7,8 km no tramo Redondela-Bifurcación Arcade para mellorar a fiabilidade da vía. Esta renovación supera os 22,6 millóns. Tamén se renova a conexión con Vigo-Guixar para reforzar o tráfico de viaxeiros e mercadorías cun investimento de 32,7 millóns. Adif mellora os servizos e a accesibilidade na Estación de Redondela. Actualmente están a realizarse as obras cun investimento de 3,3 millóns de euros que inclúe un novo andén central, paso inferior, ascensor e renovación da praza e melloras totais de accesibilidade. A alcaldesa destaca tamén a creación do novo apeadeiro de Chapela cun andén de 220 metro. Deste xeito “recuperamos o transporte ferroviario na parroquia e melloramos a mobilidade da veciñanza tato nas conexións de Chapela con Redondela e Pontevedra como coa cidade de Vigo”.
“Estamos ante o maior esforzo inversor ferroviario da historia de Redondela”, concluíu Digna Rivas, destacando que estas obras non só melloran a seguridade e a capacidade do servizo, senón que garanten unha integración moito máis amable e moderna do tren no noso municipio.

La entrada ADIF pavimentará a avenida da Estación cun investimento próximo aos 600.000 euros se publicó primero en Concello de Redondela.

– A alcaldesa explica que o proxecto vai máis aló dunha pavimentación, xa que suporá “unha reforma integral da vía que mellora o tránsito de peóns, pon en valor o entorno e a crea sete miradoiros con zonas de lecer e descanso para a cidadanía”. O goberno local cumpre así cunha demanda “histórica” dos veciños da zona.

– A reforma mellorará un tramo de 1.000 metros de lonxitude actualmente deteriorado e cunha pronunciada pendente. O proxecto presentado polo Concello de Redondela, valorado en máis de 1 millón de euros, acadou os fondos do Plan Extra da Deputación. A subvención cubrirá o 70% da obra, e o Concello financiará o 30% restante.

A reurbanización do Camiño de Cidadelle incluirá a renovación do firme, a mellora da seguridade viaria e a creación de sete miradoiros con áreas de descanso. A alcaldesa, Digna Rivas, explica que o proxecto non se limita a unha nova pavimentación, senón que será “unha reforma integral da vía cun novo deseño que favorecerá o tránsito de peóns, porá en valor as vistas panorámicas da zona e creará espazos de encontro para a cidadanía”. Esta zona residencial presenta actualmente unha estrutura urbana deteriorada. O proxecto é un investimento estratéxico “que suporá unha clara mellora na calidade de vida da veciñanza coa mellora das comunicacións no barrio, unha vía máis moderna e segura para os peóns e novos espazos públicos. O goberno local cumpre así cunha demanda histórica dos veciños da zona, que levaban dúas décadas reclamando unha vía en condicións. Logo de facer a primeira fase da Subida a Cidadelle en 2024, este ano será a quenda da segunda parte do camiño. A alcaldesa lembra que era “unha das prioridades” do goberno local: transformar esta zona de Cidadelle con espazos públicos que inclúen a contorna do Centro Sociocultural”. Trátase dun proxecto ambicioso no que traballaron as concellerías de Urbanismo, que dirixe Antonio Cabaleiro, e Infraestruturas e Sostibilidade, a cargo de Roberto Villar.

O proxecto inclúe sete miradoiros que serán tamén zonas de descanso para a veciñanza. Estes espazos porán en valor as vistas panorámicas sobre a ría, ademais de crear lugares de encontro para a cidadanía con mobiliario urbano, bancos, arborado e pérgolas. Situaranse en lugares estratéxicos ao longo da vía “para que os peóns poidan parase e descansar”, explica Rivas. O primeiro deles será no cruce coa Senda da Auga, coincidente co trazado do Camiño de Santiago, onde se dará prioridade aos peóns. O segundo dos miradoiros estará uns 80 metros máis arriba, na zona máis horizontal do camiño de Cidadelle. A terceira das áreas de descanso localízase ao carón dunha fonte e un cruce de camiños. A cuarta das plataformas situarase na curva de enlace co camiño do Avispeiro. O quinto miradoiro será un dos puntos máis singulares, fronte ao edifico municipal do centro Sociocultural de Cidadelle. A sexta área será no entronque dos camiños do Cuco e da Quinta e, por último, na cota máis alta do camiño de Cidadelle instalarase o sétimo dos miradoiros cunha pequena praza no entronque co camiño da Bruxa e a Estrada da Lamosa.

O proxecto da reforma integral do camiño de Cidadelle, cunha lonxitude aproximada de 1.000 metros, supón un gran investimento valorado en 1.050.440 euros. A actuación supón renovar uns 8.000 m2 de superficie nunha zona cunha pronunciada pendente. Os traballos incluirán a renovación da rede de abastecemento de auga e a de saneamento, coa incorporación dunha nova rede para as augas pluviais.

O proxecto presentado polo Concello de Redondela ao Plan Extra da Deputación está valorado en 1.088.065,42. A proposta acadou os fondos provincias, que cubrirán o 70% do custe das obras (761.645,79 €), e o Concello financiará o 30% restante (326.419,63 €).

La entrada O Concello acada os fondos para transformar o camiño de Cidadelle con miradoiros e áreas de descanso se publicó primero en Concello de Redondela.

A empresa concesionaria comezou xa as obras de mellora no camiño do Subido, en Chapela, “para mellorar a seguridade e a mobilidade da veciñanza nesta zona”, tal como explican desde a concellería de Infraestruturas e Sostibilidade. As obras inclúen a mellora da drenaxe e a pavimentación con aglomerado asfáltico en quente, cunha lonxitude total de 186 metros, o que supón unha superficie aproximada de 772 metros cadrados. Tamén se realizará a limpeza de beiravías e taludes do camiño. O orzamento ascende a 30.409,55 euros. A alcaldesa, Digna Rivas, e o concelleiro Roberto Villar sinalan que se trata dunhas obras “moi necesarias” para o goberno local, xa que esta zona presenta un gran desnivel “e con esta renovación poderase mellorar a seguridade na circulación tanto de vehículos como de peóns”. O prazo de execución destes traballos é de 2 meses.

Este ó o segundo tramo que se arranxa no camiño do Subido. No primeiro treito habilitouse unha franxa peonil con máis agarre para facilitar o tránsito dos peóns e evitar riscos de caídas.

Por outra banda está xa rematado o arranxo do camiño das Cabritas, en Quintela, con novo pavimento de aglomerado asfáltico en quente. Neste caso a lonxitude total da estrada é de 157 metros, cunha superficie aproximada de 650 metros cadrados. A mellora incluíu a limpeza das cunetas e taludes do camiño. O orzamento destes traballos ascendeu a 11.858,00 euros.

La entrada En marcha as obras de mellora no camiño do Subido, Chapela se publicó primero en Concello de Redondela.

– O camiño ten unha lonxitude total de 290 metros. Renovarase toda a pavimentación, cunha superficie aproximada de 1.000 metros cadrados. A actuación inclúe a rede de recollida de augas pluviais en todo o trazado. As obras adxudicáronse por 55.590 euros e estarán rematadas en decembro, se as condicións meteorolóxicas o permiten.

Os traballos de pavimentación e mellora do camiño da Pedreira, en Saxamonde, avanzan a bo ritmo. A alcaldesa, Digna Rivas, e o concelleiro de Infraestruturas e Sostibilidade, Roberto Villar, visitaron esta semana o camiño para comprobar os avances. As obras consisten na mellora de drenaxe e a pavimentación, con aglomerado asfáltico en quente. Esta vía, que discorre entre o camiño de Vilanova xunto ao camiño Vilavella, ata o camiño do Souto, ten unha lonxitude total dun 290 metros. Renovarase toda a pavimentación, o que supón unha superficie aproximada de 1.000 metros cadrados. A actuación inclúe tamén unha rede de recollida de augas pluviais en todo o longo do camiño, polas marxes. A previsión é que os traballos de mellora estean rematados no mes de decembro, se as condicións meteorolóxicas o permiten.

Segundo explica a alcaldesa trátase dunha obra que mellora “a seguridade e a mobilidade da veciñanza” tanto para os peóns como para o tráfico rodado. Villar sinala que desde a concellería de Infraestruturas e Sostibilidade “estase a avanzar na reparación e mellora das estradas e camiños municipais, e o obxectivo é seguir nesta liña tanto con fondos propios do Concello como doutras administracións”.

Esta obra adxudicouse por un importe de 55.590 euros. O investimento está financiado polo Plan Camiña Rural para o período 2025-2026.

La entrada Avanzan as obras de pavimentación no camiño da Pedreira, en Saxamonde se publicó primero en Concello de Redondela.