Un total de 20 alumnos e alumnas dos Obradoiros de Emprego “Polo Mar de Redondela”, das especialidades de “Carpintería de Ribeira”, e “Forestal-Xardinería e Agricultura Ecolóxica” remataron a súa formación. Logo dun ano de formación teórica e práctica o alumnado obtivo os Certificados de Profesionalidade no pazo de Pousadouro. Na entrega dos diplomas participou a alcaldesa, Digna Rivas, o concelleiro de Emprego, Antonio Cabaleiro, a Delegada da Xunta, Ana Ortiz, o Director Territorial de Emprego, José Antonio Rodríguez, e a Directora do Obradoiro, Imelda Barrio.

A alcaldesa dirixiuse ao alumnado para agradecerlles “o esforzo e compromiso, as gañas de aprender e de superarvos para aproveitar tan ben todo o que as mestras e mestres vos ensinan.”. Rivas tivo tamén palabras de agradecemento para o equipo docente e a directora, “sempre preocupados e ocupados en ofrecerlle ao alumnado a mellor formación posible”. A alcaldesa lembrou que nestes meses de formación e traballo “xa teñen demostrado que son uns grandes profesionais”.

No caso do alumnado de Carpintería de Ribeira, a rexedora salientou que foron os artífices de crear “a réplica exacta do bote Manuel, todo un símbolo da Memoria Democrática de Redondela. Tamén se formaron noutros traballos de carpintería, e encargáronse da colocación de contras nas Casas dos Mestres e nova tarima no Multiúsos de Chapela.

Os alumnos-traballadores da modalidade de Forestal-Xardinería e Agricultura Ecolóxica realizaron traballos como a renovación e conservación de rotondas, os xardíns de Regojo e a Xunqueira e tarefas forestais como a roza da zona arqueolóxica de Monte Penide. Rivas puxo en valor tamén “a súa gran labor social”. Grazas ao convenio entre o Concello e Cáritas toda a produción da súa horta ecolóxica foi doada ao Banco de Alimentos “con máis de 1.500 quilos de produtos frescos ao longo do curso”.

Desde o Concello a alcaldesa e o edil de Emprego desexáronlle “o mellor” no seu futuro laboral, e fixeron un chamamento ás empresas destes sectores para que teñan en conta que se precisan facer contratacións “aquí poden contar con persoal moi cualificado”.

La entrada O alumnado dos Obradoiros de Emprego “Polo Mar de Redondela” remata a súa formación se publicó primero en Concello de Redondela.

O Obradoiro de agricultura ecolóxica do Pazo de Pousadouro fixo entrega ao banco de alimentos de centos de quilos de produtos vexetais ao longo deste ano. En base a un convenio asinado entre o Concello de Redondela e Cáritas-Redondela, os produtos da horta ecolóxica do Obradoiro de Emprego son doados semanalmente a esta entidade. Só esta semana recolleron unha produción de máis de 230 quilos de vexetais que se vai repartir a 50 familias beneficiarias do banco de alimentos de Cáritas-Redondela. Tomates de diferentes variedades, xudías, pementos, cabaciñas, cogombros ou remolachas son algúns dos produtos ecolóxicos dos que se benefician estas familias. Ao longo deste ano tamén se distribuíron 223 quilos de kiwis para o banco de alimentos, máis de 300 leitugas e centos de mañizos doutros vexetais como allo porro, acelgas, rabaniños ou rúcula.

A alcaldesa de Redondela, Digna Rivas, e o concelleiro de Emprego, Antonio Cabaleiro, visitaron o Pazo de Pousadouro e destacaron a labor social que se fai desde este Obradoiro. O alumnado recibe unha completa formación profesional ao tempo que a produción serve para axudar ao banco de alimentos “con vexetais ecolóxicos de excelente calidade”. En total son 10 os alumnos e alumnas que se forman en agricultura ecolóxica e xardinería forestal. Ademais de traballar a horta ecolóxica de Pousadouro pazo realizan traballos nas fincas da Coutada e do camiño da Vía Vella, entre outros. Por outra banda, no Pazo de Pousadouro tamén se está a desenvolver o Obradoiro de Emprego na modalidade de “Carpintería de ribeira”, na que participan tamén 10 alumnas e alumnos que están a rehabilitar o histórico bote “Manuel”.

La entrada O Obradoiro de Emprego de Pousadouro dona produtos ecolóxicos ao banco de alimentos se publicó primero en Concello de Redondela.