– O Concello amosa a súa preocupación polo estado de deterioración do cargadoiro mineral Coto Wagner, en Cedeira. Esta estrutura, patrimonio histórico-industrial de Galicia, corre risco de desaparecer se non se actúa con urxencia. A Autoridade Portuaria informou á alcaldesa hai sete meses que existe un “proxecto” para actuar na zona, pero a día de hoxe esa proposta non chegou ao Concello.

– Digna Rivas reitera o compromiso do Goberno local “coa posta en valor do cargadoiro e a súa total disposición a colaborar en calquera iniciativa que garanta a protección e integración deste emblema do patrimonio industrial no contorno de Rande”.

O Concello de Redondela solicitou á Autoridade Portuaria de Vigo aclaracións sobre dous asuntos de gran impacto para o litoral e o patrimonio do municipio: o estado de abandono do cargadoiro mineral de Coto Wagner a presenza dunha embarcación fondeada en Rande. Esta demanda remitiuse hai un mes á presidencia do Porto, e polo de agora non se recibiu resposta.

En primeiro lugar, e de especial preocupación para o Concello, é o estado de deterioración do cargadoiro mineral Coto Wagner, en Cedeira. Esta estrutura, un elemento fundamental do patrimonio histórico-industrial de Galicia e catalogada polo seu valor singular, corre risco de desaparecer se non se actúa con urxencia. A alcaldesa recorda que, tras unha reunión co presidente da APV o pasado mes de agosto, informouse da existencia dun proxecto para actuar na zona. Porén, sete meses despois, o Concello denuncia que non recibiu ningunha nova información nin avances ao respecto. “Solicitamos o estado actual de calquera proxecto ou estudo técnico previsto para a súa conservación e rehabilitación”, sinala a alcaldesa, e insta á Autoridade Portuaria a remitir toda a documentación dispoñible “para o seu estudo técnico por parte do Concello”. O goberno de Digna Rivas reitera o seu compromiso “coa posta en valor do cargadoiro e a súa total disposición a colaborar en calquera iniciativa que garanta a protección e integración deste emblema do patrimonio industrial no contorno de Rande”.

Por outra banda o Goberno local reclama información detallada sobre unha embarcación que permanece fondeada dende hai tempo na zona do Muelle de Pedra, en Rande. O Concello quere coñecer que actividade desenvolve este buque, cal é a finalidade da súa estancia nese punto concreto e, sobre todo, se existe unha previsión sobre a súa retirada ou continuidade no emprazamento.

La entrada O Concello solicita información á Autoridade Portuaria sobre o futuro do cargadoiro Coto Wagner se publicó primero en Concello de Redondela.

– A empresa Transformaciones Globales S.L. dispón dunha autorización da Autoridade Portuaria de Vigo para o almacenamento de colectores en Rande, pero tamén debe contar coas licenzas e permisos correspondentes do Concello de Redondela.

– Os servizos técnicos municipais de Urbanismo detectaron deficiencias na solicitude da empresa, polo que se lle realizou un requirimento para a súa subsanación. Este requirimento impide o exercicio da actividade e a execución de obras ata que se corrixan as deficiencias e se axuste plenamente á normativa aplicable.

A empresa Transformaciones Globales S.L. presentou no Concello a pasada semana unha comunicación previa para o inicio dunha actividade de almacén de colectores na zona do Peirao de Pedra, en Rande. Aínda que a empresa dispón dunha autorización da Autoridade Portuaria de Vigo, dita autorización non exime á empresa da obtención das licenzas e permisos municipais correspondentes. Tras o exame da documentación presentada, os servizos técnicos municipais de Urbanismo detectaron deficiencias na mesma, polo que se realizou un requirimento á empresa para a súa subsanación. Este requirimento, conforme á lexislación vixente, impide o exercicio da actividade e a execución de obras ata que se corrixan as deficiencias e se axuste plenamente á normativa aplicable.

A alcaldesa, Digna Rivas, subliña que o Concello “velará en todo momento polo cumprimento da legalidade urbanística e das normas que regulan o exercicio da actividade”. A rexedora advirte que, se fose necesario, adoptaranse “todas as medidas oportunas para garantir que a actividade se axusta á legalidade e respecto á normativa vixente, incluída a súa suspensión en caso de incumprimento”. O departamento de Urbanismo lembra que a empresa “ten a obriga de axustarse ás normas e contar coas autorizacións municipais pertinentes antes de iniciar calquera actividade, mesmo cando existan permisos doutros organismos”. “Garantir o respecto ao ordenamento urbanístico e ao interese xeral dos veciños e veciñas de Redondela é unha prioridade para este goberno local”, conclúe a alcaldesa.

La entrada A empresa Transformaciones Globales non poderá depositar colectores en Rande ata que se axuste á normativa se publicó primero en Concello de Redondela.

                    Rivas e Cabaleiro con Botana e Colunga nunha visita ao Concello

– A alcaldesa, Digna Rivas, advirte que tanto o goberno local como a veciñanza manifestaron sempre a súa oposición ao almacén de colectores polo impacto negativo que tería para o territorio e a cidadanía”. A rexedora lembra que toda a zona está incluída nun espazo de especial protección da UE dentro da Rede Natura.

– Rivas advirte que, malia que Carlos Botana anunciou que se trata dunha autorización temporal pola saturación do porto vigués, “todo fai pensar que esta situación se prolongará en Rande e que mesmo empeorará nos vindeiros meses, xa que a previsión é que no segundo semestre do ano a saturación en Guixar vaia aínda a máis”.

O Concello de Redondela oponse rotundamente ao traslado de colectores ao cargadoiro de Rande que acaba de anunciar o Porto de Vigo. A alcaldesa de Redondela, Digna Rivas, manifestou o seu total rexeitamento a esta decisión da Autoridade Portuaria, e lembra que toda esa zona do litoral conta cun réxime especial de protección ambiental da UE ao estar incluída na Rede 2000. A rexedora advirte que, malia que o presidente do Porto, Carlos Botana, anunciou que se trata dunha autorización “temporal” nun momento de “saturación” do porto vigués, “todo fai pensar que esta situación se prolongará en Rande e que mesmo empeorará nos vindeiros meses, xa que a previsión é que no segundo semestre do ano a saturación en Guixar vaia aínda a máis”.

Na primeira xuntanza que a alcaldesa mantivo con Botana, hai un ano, Rivas xa deixou clara esta posición do Concello de Redondela e trasladoulle ao presidente que tanto o goberno local como a veciñanza “opoñémonos frontalmente á intención do Porto de manter o antigo cargadoiro como depósito de contedores”. O futuro da explanada de Duchess foi un dos asuntos que a alcaldesa abordou co presidente, e advertiulle xa que o Goberno redondelán “amosou sempre a súa oposición ao proxecto de reordenación do acceso á zona portuaria de Rande dende a N-552 polo impacto negativo que tería para o territorio e a veciñanza”. A rexedora explicou que neste terreo de dominio público portuario “atópase o cargadeiro de mineral de Coto Wagner que está incluído no catálogo patrimonial nunha contorna protexida”. No PXOM de Redondela, que está en tramitación, “amplíase esa contorna incluíndo a parcela de Duchess para poñer en valor a zona incluída no espazo protexido Rede Natura”, puntualizou Rivas.

La entrada O Concello oponse á decisión do Porto de almacenar colectores no cargadoiro de Rande se publicó primero en Concello de Redondela.