A alcaldesa, Digna Rivas, e o concelleiro de Ensino, Alverto Álvarez, na presentación da campaña “Unha semaniña enteira” no IES Chapela

– Centros de ensino, Anpas, clubs deportivos, asociacións, comercio e bibliotecas, entre outros colectivos, súmanse ao reto “Unha semaniña enteira” para promover o uso do galego entre a mocidade na semana que celebramos o Día de Rosalía.

– A alcaldesa, Digna Rivas, presentou a campaña no IES Chapela xunto con membros de centros de ensino participantes, a Asociación de Empresas, clubs e Escola de Música de Chapela. A programación contará con teatro, concertos, conferencias e charlas para a promoción da lingua galega.

O IES Chapela acolleu onte a presentación dos actos vencellados á celebración do Día de Rosalía. Un ano máis ponse en marcha o reto “Unha semaniña enteira”, unha iniciativa impulsada polos institutos de Redondela á que se suma o Concello de Redondela e cada vez máis sectores da sociedade. Este reto promove o uso do galego oral durante as 24 horas do día, os sete días da semana, do 20 ao 27 de febreiro. Participa toda a comunidade educativa do municipio, tanto centros de Infantil como de Primaria e Secundaria. Para arroupar esta campaña o Concello distribuirá 3.500 chapas feitas pola Asociación Lenda de Saúde Mental, colectivo ao que Rivas agradeceu “a súa implicación dende o inicio e o seu compromiso co idioma”. Como en edicións anteriores é tamén moi significativa a participación dos clubs deportivos, que promoverán o uso do galego oral para darlle continuidade á campaña “xa que moitos alumnos e alumnas practican algún deporte nos equipos locais”. As Bibliotecas Municipais e a Escola de Música de Chapela súmanse tamén ao reto.

Participación do comercio e a hostalaría

A alcaldesa, Digna Rivas, explicou que desde o Concello o obxectivo foi sempre implicar nesta campaña a distintos sectores da sociedade. Nesta ocasión deuse un impulso ao galego no comercio, coa colaboración da Asociación de Empresas. Repartiranse 1.000 bolsas de papel co logo de Rosalía destinadas aos establecementos de Chapela, e tamén marcapáxinas e unha camelia. Durante toda a semana, a hostalaría participante ofrecerá pratos relacionados con Rosalía, a súa obra ou inspirados na súa literatura. Os comensais que acudan a estes establecementos poderán optar a un sorteo do libro “Rosalía e a cociña”. Rivas agradeceu a implicación de todos os colectivos neste reto “par fomentar entre todos e todas o uso do galego entre a infancia e a mocidade”.

La entrada Ensino, deporte e comercio promoven o galego entre a rapazada “Unha semaniña enteira” se publicó primero en Concello de Redondela.

– O espectáculo de Trécola Teatro está creado a partir dos textos e vida de Rosalía de Castro e combina o teatro coa música e a poesía. A actividade enmárcase na campaña “Unha semaniña enteira” para promover o uso do galego  entre a rapazada e percorrerá dez centros de ensino do municipio.

– A alcaldesa, Digna Rivas, e o concelleiro de Ensino, Iván Valles, achegáronse onte ao CEIP Outeiro das Penas de Cesantes, onde se celebrou a representación. A rexedora animou aos nenos e nenas a falar galego “na escola, na casa, coas amizades e en todas as actividades que fagan no seu día a día”.

Dentro da programación da campaña “Unha semaniña enteira” o Concello de Redondela está a levar ás escolas de Infantil e Primaria o contacontos “Historias Soñadas”. O espectáculo de Trécola Teatro está creado a partir dos textos e vida de Rosalía de Castro, e combina teatro, música e poesía. A través do xogo, a maxia e as cancións, nenos e nenas poden coñecer a obra da insigne escritora na semana na que celebramos o Día de Rosalía, que se conmemora o 23 de febreiro. Máis dun milleiro de nenos de nenas dos centros de ensino público de Redondela están a disfrutar esta semana destas actuacións que promove o Servizo de Normalización Lingüística do Concello.

A alcaldesa, Digna Rivas, e o concelleiro de Ensino, Iván Valles, achegáronse onte ao CEIP Outeiro das Penas, en Cesantes, onde se celebrou a representación. A rexedora lembroulle á rapazada que esta actividade enmárcase dentro da programa “Unha semaniña enteira”, cuxo obxectivo é fomentar o uso do galego entre a mocidade e a infancia. Rivas animou aos nenos e nenas a falar galego “na escola, na casa, coas amizades e en todas as actividades que fagan no seu día a día”.

A campaña “Unha semaniña enteira”, é unha iniciativa impulsada polos institutos de Redondela á cal se suman máis sectores sociais e o Concello de Redondela. Este reto promove o uso do galego oral durante as 24 horas dos sete días da semana, do 17 ao 23 de febreiro. Desde o Concello implicouse a distintos sectores e asociacións, centros de ensino, bibliotecas, clubs deportivos, comercio, etc.

O día 28 de febreiro, no auditorio do Piñeiral do Crego, a Escola de Música de Chapela e a coral Piñeiral do Crego ofrecerán un concerto co repertorio galego.

La entrada Un milleiro de escolares coñecen a Rosalía de Castro co contacontos “Historias soñadas” se publicó primero en Concello de Redondela.

– Centros de ensino, Anpas, clubs deportivos, Lenda, Andaina, comercio e bibliotecas, entre outros colectivos, súmanse ao reto “Unha semaniña enteira” para promover o uso do galego entre a mocidade na semana que celebramos o Día de Rosalía.

– A alcaldesa, Digna Rivas, presentou na Alameda Rosalía de Castro de Chapela esta campaña que contará con teatro, concertos, contacontos e charlas, entre outras actividades para a promoción da lingua.

A Alameda Rosalía de Castro de Chapela acolleu a presentación dos actos vencellados á celebración do Día de Rosalía. Un ano máis ponse en marcha o reto “Unha semaniña enteira”, unha iniciativa impulsada polos institutos de Redondela á cal se suman máis sectores sociais e o Concello de Redondela. Este reto promove o uso do galego oral durante as 24 horas dos sete días esta semana, do 17 ao 23 de febreiro. A alcaldesa, Digna Rivas, explicou que desde o Concello quixeron implicar a distintos sectores e asociacións, clubs deportivos, comercio, etc. Olga Nogueira, profesora de galego no IES Mendiño e responsable da iniciativa, explicou que o reto naceu nos institutos “pola necesidade de fomentar o uso do galego entre os mozos e mozas”, xa que nos centros constatan que uso da lingua do país cada ano é menor.

A alcaldesa sinalou que nesta ocasión deuse un impulso ao galego no deporte, comezando por unha mobilización completa dos clubs deportivos de Chapela “porque é en Chapela onde se atopa a Alameda Rosalía de Castro” e pediulles que sexan “o exemplo e o modelo a seguir en canto á normalización da lingua galega”. Para arroupar esta campaña o Concello distribuirá 3.000 chapas feitas pola Asociación Lenda de Saúde Mental, colectivo ao que Rivas agradeceu “a súa implicación dende o inicio e o seu compromiso co idioma”.

O Conservatorio Municipal Víctor Ureña organiza para o martes 18, ás 19h, un concerto con repertorio galego para celebrar esta Semaniña Enteira. E o día 28 de febreiro, no auditorio do Piñeiral do Crego, será a Escola de Música de Chapela e a coral Piñeiral do Crego quen ofrecerán tamén un concerto de repertorio galego. As bibliotecas municipais tamén se unen. En Chapela cun proxecto pensado como encontro entre os avós e avoas con nenos e nenas para falar en galego e coñecerse mutuamente. As lecturas de textos de Rosalía e os debuxos das camelias, símbolo da Casa Rosalía, completarán esta actividade. Nas escolas de infantil e primaria terán ao longo da semana un contacontos teatralizado dedicado a Rosalía de Castro: “Historias soñadas” que combina teatro, música e poesía. Por último, o Concello comprometeuse cos institutos a realizar unha actividade para “recompensar” o esforzo do alumnado e profesorado cun concerto na Alameda Castelao, como xa se fixo o ano pasado. Rivas adiantou tamén que se realizará outro concerto aberto a todo o público “que será moi especial” e no que haberá sorpresas.

Rivas agradeceu a implicación de todos os colectivos neste reto: colexios, institutos, Anpas, clubs deportivos, Lenda, Andaina, Conservatorio Municipal, Escola de Música de Chapela, Bibliotecas Municipais, Asociación de Empresarios e ao Comité de Empresa e Xunta de Persoal do Concello de Redondela, entre outros.

La entrada Redondela fala galego as 24 horas “Unha semaniña enteira” se publicó primero en Concello de Redondela.