– Os operarios comprobaron que houbo unha “manipulación intencionada” do cableado. O concelleiro Roberto Villar advirte que o responsable deste acto “puido causar unha desgracia porque cando cortou os cables había tensión eléctrica e o cable que deixou cortado tamén tiña electricidade sen ningún tipo de protección”.

– Villar sinala que hai desacordos entre a veciñanza en canto á intensidade da iluminación do parque e sospeita que alguén “tomou a xustiza pola man e cortou o cableado”. O concelleiro denuncia esta actitude xa que supón “un prexuízo para a veciñanza e un perigo” e advirte que estas actitudes son “moi frecuentes”. No caso dos sinais das obras “a xente móveos ou quítaos, o que supón un perigo para os transeúntes e vehículos”.

A concellería de Infraestruturas e Sostibilidade denuncia o corte deliberado da liña eléctrica que subministra enerxía para a iluminación do Parque de Santo Estevo de Negros. O parque, que conta con zona de xogos infantil, un área de descanso e pista deportiva, está xunto á N-555 e próximo ás rúas Camiño do Sapal e Camiño Costa Mouriño. Os operarios do servizo eléctrico desprazáronse ao lugar logo de recibir o aviso de que o alumeado público do parque non funcionaba. Os operarios puideron comprobar, con sorpresa, que a liña fora cortada cuns alicates ou tenazas ou algo. “Isto supón unha manipulación clara dunha persoa irresponsable coa intención de deixar o parque sen luz”, denuncia o concelleiro Roberto Villar. O edil advirte que o responsable deste acto “puido causar unha desgracia a calquera que se achegase, ou incluso a el mesmo, porque cando cortou os cables había tensión eléctrica e o cable que deixou cortado tamén tiña tensión eléctrica sen ningún tipo de protección”.

Villar lembra que desde que se inaugurou o parque houbo desacordo entre a veciñanza en canto á intensidade da iluminación nocturna do parque “uns dicían que iluminaba moito e outros dicían que iluminaba pouco”. Actualmente o alumeado conta cun sistema que permite rebaixar a iluminación “pero tampouco hai acordo nos horarios, porque tamén hai cidadáns e clubs que empregan a pista deportiva e precisan iluminación”.

Villar sospeita que algún veciño “tomou a xustiza pola man e, en lugar de trasladar ao Concello as súas queixas, decidiu cortar o cableado”. O concelleiro denuncia esta actitude xa que “supón un prexuízo para a veciñanza, un custe económico para as arcas municipais e, sobre todo, un grave risco”. Este tipo de actitudes por parte da cidadanía son máis frecuentes do que deberían, segundo denuncia Villar. “Pásanos moitísimo cos sinais de obra, a xente móveos ou quítaos, e iso xera un perigo para os transeúntes e vehículos”. Desde a concellería de Infraestruturas e Sostibilidade fan un chamamento “ao civismo e o respecto” para frear este tipo de condutas.

La entrada O Concello denuncia o corte do cableado eléctrico no Parque de Negros se publicó primero en Concello de Redondela.

Esta semana remata as súas prácticas no Servizo de Electricidade do Concello de Redondela Naira Cabaleiro, unha moza de 16 anos que completa os seus estudos de FP Básica. A alcaldesa, Digna Rivas, e o concelleiro de Infraestruturas e Sostibilidade, Roberto Villar, felicitárona hoxe por ter completado as prácticas nun encontro no que participou tamén o se titor no servizo, Aurelio Krook.

Villar destacou que foi “un verdadeiro pracer” ter a Naira no seu servizo e salientou que se trata dunha rapaza “cunha capacidade de traballo e unhas gañas de aprender admirables”. O edil sinala que se integrou moi ben no servizo “desde o primeiro día” e que calquera empresa que a contrate fará “unha gran inversión”.

A propia Naira dixo terse sentido “moi a gusto” ao realizar as prácticas no Concello, e cualifica a experiencia como “moi boa”, cun ambiente de traballo positivo con todos os compañeiros e compañeiras, dos que aprendeu moito. Este curso remata a FP Básica de Electricidade e Electrónica no IES Pedro Floriani, e a súa intención é seguir formándose nun Ciclo Medio da mesma rama.

A alcaldesa animou a que máis mozas tomen o exemplo de Naira e se formen “en calquera rama profesional que lles guste”. Desde o Concello “apostamos por rachar as barreiras de xénero e animamos a rapazas e mulleres a formarse e traballar en sectores que lles brinden un bo futuro laboral, aínda que estean tradicionalmente masculinizados”. De feito Naira Cabaleiro, veciña de Quintela, é a única alumna na súa clase do Floriani, onde o resto de compañeiros son rapaces. Con todo, ela conseguiu destacar e demostrou unha gran profesionalidade no período de prácticas.

La entrada O Concello anima ás rapazas a formarse en sectores profesionais como a electricidade se publicó primero en Concello de Redondela.