– A IV Xornada Cantábrica contou con varias mesas redondas nas que participaron expertos do sector, investigadores e empresarios. Entre os asuntos a tratar estiveronas interaccións da pesca con especies protexidas, a trazabilidade dos produtos do mar e a comercialización dos produtos pesqueiros.

– A alcaldesa, Digna Rivas, puxo en valor o traballo das mulleres e homes de Redondela que pescan e mariscan na enseada de San Simón, e a preocupación que existe no sector e no Concello porque as capturas descenden ano tras ano polo cambio climático.

A illa de San Simón acolle ao longo de toda a xornada de hoxe a IV Xornada Cantábrica organizada pola Asociación de Organizacións de Produtores de Pesca do Cantábrico (OPPs Cantábrico). A alcaldesa, Digna Rivas, inaugurou esta mañá a xornada xunto ao Director Xeral de Pesca Sostible do Ministerio, Ramón de la Figuera, e o presidente de OPPs Cantábrico, Norberto Emazabel.

Rivas puxo en valor o gran traballo dos profesionais do mar en Redondela, “homes e mulleres que pescan nestas augas, que mariscan, e tamén os que traballan na lonxa e nos mercados”. A alcaldesa advertiu tamén que existe “unha gran preocupación no sector e tamén no Concello porque as capturas descenden ano tras ano”. A pesca e o marisqueo tradicional da enseada de San Simón vense ameazadas polo cambio climático. O quecemento global, os episodios de seca e as choivas torrenciais provocan cambios na temperatura e salinidade da auga. “Isto é unha grave ameaza para o delicado ecosistema da nosa enseada, e tamén para o medio de vida de centos de familias que dependen dela”, afirma a alcaldesa. Rivas fixo un chamamento “ao compromiso de toda a sociedade, do propio sector e das administracións para frear o cambio climático”.

A IV Xornada Cantábrica, que rematará esta tarde, contará con varias mesas redondas nas que participarán expertos do sector, investigadores e empresarios. Entre os asuntos a tratar están as interaccións da pesca con especies protexidas, a trazabilidade dos produtos do mar ou a comercialización dos produtos pesqueiros, entre outros temas.

La entrada A illa de San Simón acolle a IV Xornada Cantábrica se publicó primero en Concello de Redondela.

– Entre os residuos que atoparon no areal había moitos envases de plástico de todos os tamaños, vasos, tapóns, botellas, material de pesca, vidro, toalliñas e outros produtos de hixiene, ademais dunha lámpada de gran tamaño.

– O concelleiro de Infraestruturas e Sostibilidade, Roberto Villar, e o de Ensino, Iván Valles, acompañaron nesta xornada aos rapaces e rapazas. Villar explicoulles a orixe de moitos destes residuos, “que acaban nas praias porque alguén non fixo unha xestión correcta dese obxecto”.

Redondela participou na XIII Limpeza Simultánea de Praias promovida por Adega. Foi na xornada de onte co alumnado do IES Mendiño e a colaboración do Concello de Redondela, que achegou material para a limpeza e xestionou a recollida dos residuos. Máis de 80 alumnos de 3º e 4º da ESO xunto co seu profesorado percorreron esta mañá a praia da Punta, en Cesantes, para recoller lixo. Entre os residuos que atoparon no areal había moitos envases de plástico de todos os tamaños, vasos, tapóns, botellas, material de pesca, vidro, toalliñas e outros produtos de hixiene como compresas e aplicadores de tampóns, e ata uha lámpada de gran tamaño. O concelleiro de Infraestruturas e Sostibilidade, Roberto Villar, e o de Ensino, Iván Valles, acompañaron nesta xornada aos rapaces e rapazas. Villar explicoulles a orixe de moitos destes residuos, “que acaban nas praias porque alguén non fixo unha xestión correcta dese obxecto”. Nalgúns casos os restos proceden da actividade pesqueira, restos de aparellos ou elementos que se desprenden das bateas. En moitas ocasións son residuos domésticos que acaban nos ríos e no mar “porque en lugar de botalos no colector do lixo, a xente tíraos polo inodoro”. O edil advertiu tamén que o lixo que botamos no chan pode acabar no mar “ao caer polos sumidoiros de augas pluviais, ou ben porque vai parar aos ríos”. Despois son as correntes mariñas as que se encargar de arrastrar todo ese lixo ata as praias. O responsable de Sostibilidade lembroulle á rapazada “a importancia de depositar todo o refugallo nos colectores correspondentes, e non deixalo nunca no medio natural”.

Tanto Roberto Villar como Iván Valles agradeceron ao alumnado e aos docentes a súa participación nesta actividade. Desde o Concello aplauden tamén que a xornada de educación ambiental fora totalmente sostible, xa que todo o grupo se desprazou desde o IES Mendiño ata a praia a pé.

La entrada Redondela participa nunha limpeza de praias co alumnado do IES Mendiño se publicó primero en Concello de Redondela.