– A área de autocaravanas da Marisma celebra o seu primeiro aniversario cunha concentración de 144 vehículos organizada pola Asociación Galega de Autocaravanas (AGA), que destaca “a calidade deste espazo”.

– Os participantes realizan esta fin de semana un completo programa turístico que inclúe visitas ao casco histórico e á illa de San Simón, un xantar de confraternidade e outras actividades cun impacto económico directo de miles de euros no comercio e na hostalería local.

Redondela, 18 de abril de 2026. A área de autocaravanas da Marisma, inaugurada na primavera do pasado ano, celebra esta fin de semana o seu primeiro aniversario cunha concentración organizada pola Asociación Galega de Autocaravanas (AGA). A cita reúne 144 vehículos e máis de 300 persoas que, ao longo de tres días, percorren os principais recursos turísticos do municipio, confirmando o éxito desta aposta pola sostibilidade e o turismo itinerante. A alcaldesa, Digna Rivas, a concelleira de Turismo, Rita Pérez acompañaron aos participantes nun acto no que AGA agradeceu ao Concello de Redondela “a súa sensibilidade e colaboración na mellora das áreas para autocaravanas”. A presidenta da AGA, María del Mar García, trasladou ao Goberno local a “excelente valoración” que os usuarios fan do estacionamento da Marisma, destacando “a súa integración na contorna e a súa proximidade ao centro urbano”. García salientou que estas actuacións facilitan a chegada dun perfil de visitante que busca “calidade e contacto coa natureza”.

A área da Marisma conta con 7 prazas —unha adaptada— e foi creada baixo estritos criterios de sostibilidade. O concelleiro de Infraestruturas e Sostibilidade, Roberto Villar, explica que se utilizaron materiais como a madeira respectouse a contorna do río. Tras doce meses de funcionamento, a infraestrutura demostrou ser un motor de atracción turística que convive en harmonía co espazo público, grazas á normativa municipal que limita a estancia a 72 horas e garante a orde no estacionamento.

Impacto económico no sector local. Esta actividade supón un importante pulo económico para Redondela. Estímase que os visitantes realizarán un gasto medio de 60 euros por persoa e día. Como mostra deste impacto, só o xantar de confraternidade que o colectivo celebra hoxe nun restaurante redondelán ascende a 6.500 euros, aos que se suma o gasto diario en comercio local, alimentación e outros servizos. O programa de actividades está deseñado para dar a coñecer a riqueza turística de Redondela aos socios e socias da AGA, que chegan de toda Galicia. Onte o grupo realizou unha visita guiada polo casco histórico e hoxe fixeron unha excursión á illa de San Simón, un dos enclaves máis emblemáticos da ría de Vigo.

La entrada A área de autocaravanas da Marisma: referente de sostibilidade en Galicia se publicó primero en Concello de Redondela.

– A alcaldesa Digna Rivas e a concelleira de Turismo, Rita Pérez, destacaron que esta ferramenta é un gran escaparate para Redondela, que pon en valor o patrimonio do municipio. “O obxectivo é ofrecer aos visitantes unha experiencia máis accesible, moderna e completa para descubrir os tesouros de Redondela”, sinala Rivas.

– A aplicación web turismoredondela.com conta cun deseño intuitivo e adaptado a dispositivos móbiles. Para facilitar o acceso o Concello instalou códigos QR en lugares estratéxicos de paso de visitantes e peregrinos como a praza da Constitucións, praza de Ponteareas, Paseo da Xunqueira ou praza da Alfóndiga.

O Concello de Redondela presenta a súa nova aplicación web: turismoredondela.com. Con esta nova ferramenta o municipio dá un paso estratéxico na dixitalización do seu sector turístico, co obxectivo de ofrecer aos visitantes unha experiencia “máis accesible, moderna e completa para descubrir os tesouros do municipio”, explica a alcaldesa, Digna Rivas. A principal novidade desta plataforma é a integración dun sistema de xeolocalización. Cun deseño intuitivo e adaptado a dispositivos móbiles, a web ofrece contidos para cada recurso turístico. Con esta funcionalidade, “os visitantes poden situarse en tempo real no mapa e acceder de xeito rápido co seu móbil aos puntos de interese máis próximos, optimizando así os seus desprazamentos e facilitando o descubrimento de recunchos menos coñecidos”. Entre os puntos de interese o visitante pode atopar información sobre o Convento de Vilavella, os emblemáticos viadutos, o Cemiterio dos Eidos, a Illa de San Simón, Museo Meirande e miradoiros como o Peneda.

O desenvolvemento técnico e creativo da aplicación web foi realizado por unha empresa redondelá. Rivas subliña a importancia desta colaboración, xa que con este proxecto “non só modernizamos a nosa imaxe exterior, senón que poñemos en valor o talento local que garante unha sensibilidade especial cara ao noso patrimonio e demostra a calidade profesional que temos na nosa vila”.

Para facilitar o acceso á nova plataforma instaláronse paneis con códigos QR en lugares estratéxicos de paso de visitantes e peregrinos (praza da Constitución, na entrada á vila por rúa Muro, Paseo da Xunqueira, praza da Alfóndiga e estrada N-550 na entrada á vila polo Camiño Portugués da Costa). A alcaldesa e a concelleira de Turismo, Rita Pérez, visitaron un dos puntos informativos con Tito Pardo, creador da plataforma. Rivas explicou que coa implementación da xeolocalización e as audioguías “poñemos ao alcance de quen nos visita todo o patrimonios cultural e natural”. Os turistas e peregrinos poden situarse en tempo real e acceder aos puntos de interese co móbil “de xeito rápido e sinxelo”. Todos os recursos contan con información en formato escrito e audio, e os usuarios poden escoller entre tres idiomas: galego, castelán e inglés, reforzando a proxección internacional de Redondela.

Con este lanzamento, o Concello reafirma o seu compromiso co turismo sostible e de calidade. “Poñemos as novas tecnoloxías e o talento local ao servizo da promoción turística e a posta en valor do patrimonio redondelán”, conclúe a alcaldesa.

La entrada Redondela moderniza a súa oferta turística cunha nova aplicación web con xeolocalización e audioguías se publicó primero en Concello de Redondela.

Redondela presentouse en Fitur un ano máis para participar nun dos grandes escaparates mundiais no sector turístico. Redondela participa da man de Galicia Suroeste para promover unha oferta baseada no seu patrimonio natural e paisaxístico, cultural e histórico. A alcaldesa de Redondela, Digna Rivas, e a concelleira de Cultura e Turismo, Rita Pérez Táboas estiveron onte na feira en Madrid para dar a coñecer unha oferta “baseada nun turismo de calidade e sostible”. A oferta turística do Concello pon en valor xoias como a illa de San Simón, declarada “Lugar de Memoria Democrática”. Esta paraxe, que suma patrimonio natural e patrimonio histórico, atesoura un pasado digno de ser coñecido, xa que foi empregada como mosteiro, lazareto, campo de concentración e fogar para orfos. A intención é “poñer en valor o patrimonio natural, paisaxístico e histórico do municipio a través do turismo”, sinala a alcaldesa Digna Rivas.

Redondela forma parte da nova campaña turística “Única”, unha proposta que reivindica a singularidade, diversidade e autenticidade deste territorio de Galicia Sur situado entre o Suído, o Miño e o Atlántico. Este territorio ten identidade propia cun patrimonio natural e cultural excepcional, e cunha oferta turística que aposta pola calidade, a sustentabilidade e a experiencia auténtica. A campaña ‘Única’ é unha chamada a descubrir un destino que non se parece a ningún outro, onde cada visitante pode atopar unha experiencia persoal, próxima e inesquecible: natureza, patrimonio, gastronomía, cultura e tradicións.

Rivas destacou experiencias “únicas” que poden vivirse no municipio redondelán como kaiak pola enseada de San Simón, visitasr o cemiterio dos Eidos ou xoias admirar arquitectónicas do século XIX como son os viadutos de Madrid e de Pontevedra. Redondela cota tamén con grandes celebracións ao longo do ano como a Festa da Coca e as ancestrais danzas das Penlas e as Espadas, a Festa do Choco ou o Festival Internacional de Títeres, ademais dunha ampla e variada programación cultural.

O acto contou coa intervención de Sandra González, presidenta de Galicia Suroeste e alcaldesa de Tomiño, e Ánxela Fernández, representante institucional do Xeodestino, e Pedro Blanco, Delegado do Goberno en Galicia.

Redondela comparte este xeodestino de Galicia Sur cos concellos de Gondomar, Nigrán, Mos, Tui, Soutomaior, Tomiño, Pazos de Borbén, Fornelos de Montes, O Porriño, O Rosal, A Guarda. Baiona e Oia.

La entrada Redondela presenta en Fitur a campaña “Única” da man de Galicia Suroeste se publicó primero en Concello de Redondela.

– A alcaldesa de Redondela, Digna Rivas, salienta que “o feito de que en Redondela conflúan o Camiños Portugués Central e o da Costa, que é o que máis medra de todos os itinerarios, fan desta vila o punto de encontro de centos de peregrinos cada día”. A Oficina Municipal de Turismo rexistra peregrinos de máis de 40 nacionalidades diferentes. Desde o 1 de xaneiro pasaron pola vila unha media diaria de 550 peregrinos.

– A Oficina Municipal de ofrece aos visitantes información turística e cultural de Redondela e actividades de balde, como visitas guiadas polo casco histórico e rutas ambientais e culturais para coñecer o patrimonio do municipio. Son actividades “con moito éxito de público tanto entre os visitantes como entre a propia veciñanza de Redondela”, sinala a concelleira de Cultura e Turismo, Rita Pérez Táboas.

A estadística oficial da Oficina do Peregrino de Santiago de Compostela recolle que por Redondela pasaron ata o día de hoxe 133.000 peregrinos, 72.000 deles polo Camiño Portugués tradicional (un 4% máis que o ano pasado) e outros 61.000 polo camiño Portugués da Costa (un 18% máis que en 2024). Moitos fixeron a súa parada na Oficina de Turismo de Redondela. O perfil dos peregrinos que se achega á oficina varía en función da época do ano. Se ben nos meses de abril, maio e xuño son maioría os estranxeiros, en xullo e agosto os peregrinos de orixe española son maioría. O tirón do Camiño a nivel internacional déixase notar nas cifras que se rexistran na oficina municipal, onte atenderon a peregrinos de máis de 40 nacionalidades diferentes. A maioría proceden de Portugal e Alemaña, pero chegan camiñantes de todos os puntos do planeta: desde Xapón ata os EEUU, pasando por Sudáfrica, Taiwan, Rusia, Australia ou México. No caso dos españois as Comunidades Autónomas que achega máis peregrinos son Madrid, Andalucía e Valencia, aínda que tamén e numerosa a cifra de peregrinos que chegan desde Cataluña e Euskadi. A alcaldesa de Redondela, Digna Rivas, salienta que “o feito de que en Redondela conflúan o Camiño Portugués Central e o da Costa, que é o que máis medra de todos os itinerarios, fan desta vila o punto de encontro de centos de peregrinos cada día”.

A Oficina Municipal de Turismo de Redondela atende a unha media de 2.871 visitantes ao mes, son case 200 máis que no ano 2024 . Desde que abriu as súas portas no mes de abril e ata o final de agosto pasaron polas instalacións da rúa Isidoro Queimaliños un total de 14.358 persoas, das que máis de 13.000 eran peregrinos.

Actividades gratuítas con visitas guiadas na vila e Rutas Ambientais e Culturais

Na Oficina de Información ofrécese a todo aquel que se achega información turística e cultural de Redondela, datos dos aloxamentos e servizos de restauración. Tamén se entregan de xeito gratuíto mapas e folletos turísticos, a axenda de eventos e información sobre as visitas guiadas que son de balde. O programa de Roteiros Ambientais e Culturais ofrece tamén visitas guiadas de balde polas diferentes parroquias para coñecer o patrimonio do municipio. Son actividades que están a ter unha excelente acollida con moita participación nas saídas que se realizaron nos meses de xullo e agosto, e que continuarán en setembro e outubro.

La entrada Redondela acolleu máis de 133.000 peregrinos no que vai de ano se publicó primero en Concello de Redondela.

 As información e as imaxes da web non se corresponden coa realidade

– O departamento de Novas Tecnoloxías revisou a páxina e os seus contidos e en máis dun 80% dos casos son erróneos ou falsos. Faise referencia a lugares que non se atopan no municipio de Redondela e noutros casos as fotografías non se corresponden coa información á que fan referencia.

– A web utiliza un logo e unha imaxe moi semellante á da páxina oficial de Turismo do Concello “o que provoca un prexuízo a Redondela e á súa veciñanza, e sobre todo aos turistas e peregrinos que veñen a visitar a nosa vila”, advirte Digna Rivas. A web, que podería estar creada cun programa de IA, xa foi denunciada ante os organismos públicos competentes para que sexa retirada.

O Concello de Redondela denunciou ante os organismo oficiais a existencia dunha páxina web fraudulenta cuxa dirección é www.turismoredondela.es e que contén moita información errónea sobre o municipio de Redondela. O Concello tivo coñecemento da existencia desta web o pasado mes de xullo e o departamento de Novas Tecnoloxías revisou o seu contido de xeito exhaustivo. Comprobouse que nunha porcentaxe superior ao 80% os contidos da web son erróneos ou falsos. Faise referencia a lugares que non se atopan no municipio de Redondela, como o templo de San Benito, o Sendeiro das Greas ou a praia de Loureiro. A web contén tamén fotografías cuxas imaxes non se corresponden coa información á que fan referencia. A páxina ofrece tamén información de establecementos de hostalaría que non existen neste municipio “e así a gran maioría dos recursos turísticos que ofrece a páxina, que non se axusta para nada á realidade”, sinala a alcaldesa Digna Rivas.

O Concello xa comunicou este feito aos organismos públicos para que retiren a páxina de internet, tanto ao CCN (Centro Criptográfico Nacional), como ao INCIBE (Instituto Nacional de Ciberseguridade) , a AEPD (Axencia de Protección de Datos) e aos Servizo Ciberseguridade Acordo Marco ( Amtega – Xunta de Galicia)

Tamén se comunicou a Google esta situación dende o Concello de Redondela para dar conta desta situación, xa que esta páxina aparece como segunda opción neste buscador, por detrás da web oficial de turismo do Concello de Redondela. O departamento de Novas tecnoloxías tentou poñerse en contacto cos responsables da web a través do correo electrónico que se indica na páxina para solicitar a súa retirada, pero non obtivo resposta.

Esta páxina web utiliza un logo e unha imaxe moi semellante á da web oficial de Turismo do Concello de Redondela. “Esta situación está provocando un prexuízo ao Concello de Redondela e á súa veciñanza, e sobre todo aos turistas e peregrinos que veñen a visitar a nosa vila, xa que moita información que ofrece esta páxina é falsa, o que xera malestar entre os visitantes e unha mala imaxe do noso municipio cara ao turismo”, denuncia Rivas.

O informe do departamento de Novas Tecnoloxías advirte que é moi probable que esta web estea “con algún programa de IA, ou unha web que se fixo para monetizar as visitas mediante a publicidade que salta ao visitala, sen importar o contido”.

La entrada O Concello denuncia unha páxina web fraudulenta de turismo de Redondela se publicó primero en Concello de Redondela.

– O mes de agosto arranca en Redondela con trece propostas de turismo ambiental e cultural para todas as idades: visitas guiadas polo casco histórico sobre lendas e supersticións da vila, rutas polo litoral de Cesantes a pé ou en kaiak e actividades para “exploradores” en busca de animais no Chan das Pipas.

– Desde o Concello de Redondela destacan a “transversalidade” destas actividades “que apostan polo turismo ambiental, sostible e cultural con saídas para coñecer o espectacular patrimonio natural e histórico de Redondela”. Para participar é preciso inscribirse na oficina de turismo, no correo electrónico turismo@redondela.gal ou no teléfono 986.401.713.

O mes de agosto chega a Redondela cargado de actividades para público de todas as idades. Á ampla e variada oferta cultural do Concello súmanse as propostas de turismo ambiental que organizan os departamentos de Turismo, Sostibilidade e Medio Ambiente. A primeira saída deste mes será mañá sábado día 2 coa ambiental “As pedras de Ventosela” ás 10.00 horas.

Unha das novidades deste verán é a ruta “Redondela oculta: entre a lenda e a superstición” a cargo da guía turística Soledad Chayán. No percorrido dáse conta das supersticións e tradicións arredor dos oficios, sobre todo dos mariñeiros, onde se destacan personaxes como a bruxa Benita, o mago Marcolfo ou Xan Carallás, mítico fundador da vila de Redondela. Haberá dúas citas con esta ruta, os martes 12 e 26 de agosto ás 21.00 horas. Tamén os martes serán as visitas guiadas ao Cemiterio dos Eidos, declarado como o cemiterio “máis bonito de España”. Serán os días 5 e 19 de agosto ás 21.00 horas.

O sábado día 9 realizarase a ruta ambiental “O litoral de Soutoxuste” , ás 10.00 horas e o domingo día 10 a denominada “A intermareal de Cesantes” con saída desde o Porto de Cesantes ás 10.00 horas.

O luns día 11 a proposta é unha ruta en kaiak pola enseada de San Simón, unha actividade familiar para dar a coñecer o patrimonio natural tanto sobre as augas como por baixo da superficie. A saída está prevista para as 10.30 horas. O mércores 20 celébrase outra saída en kaiak, neste caso pola zona da Portela para dar a coñecer o patrimonio da Portela e da enseada de San Simón. A saída será ás 11.00.

Para o sábado 16 a proposta é unha observación xeográfica, histórica e natural da ría de Vigo. Será ao serán, a partir das 20 horas. O domingo 17 realízase a ruta ambiental “O río Pexegueiro” con saída ás 10.00 horas.

Os máis pequenos terán unha actividade pensada especialmente para eles o día 27 de agosto con “Exploradores: Animais do luscofusco”. Está dirixida a rapazada de 8 a 12 anos. Nesta saída os participantes explorarán a natureza da man dun guía especializado no Chan das Pipas. O horario será de 19.15 a 21.15 horas. A última saída será o domingo 31 cunha ruta ambiental no Monte Penide ás 10.00 horas.

Para participar nestas actividades é preciso facer a inscrición previa na oficina de turismo, no teléfono 986 40 17 13 ou no enderezo electrónico turismo@redondela.gal.

La entrada Roteiros ambientais e culturais: Redondela oculta, Kaiak pola enseada, Animais do luscofusco e moito máis se publicó primero en Concello de Redondela.

O Concello de Redondela incorpora este mes once novos traballadores e traballadoras para os servizos de Vías e Obras, Limpeza, Parques e Xardíns, Medio Ambiente e Turismo. Son sete peóns, tres técnicos de Turismo e un electricista. A alcaldesa, Digna Rivas, e a concelleira de Persoal, Rita Pérez Táboas, recibiu esta mañá no Concello aos novos empregados e empregadas. Rivas deulles a benvida agardando que esta nova etapa profesional sexa unha experiencia enriquecedora tanto para os traballadores e traballadoras como para o municipio, que verá reforzados o seus servizos á cidadanía.

A contratación foi realizada desde Concello a través do plan +Provincia da Deputación para a activación do emprego xa que está dirixido a persoas desempregadas.

La entrada Redondela incorpora once novos traballadores e traballadoras se publicó primero en Concello de Redondela.

– O Concello de Redondela e Galicia Suroeste acaban de asinar un convenio de colaboración para levar a cabo o proxecto de rexeneración e mellora dos ecosistemas dunares, intermareais e do esteiro da enseada. Cun investimento de máis de 18.000 euros do PSTD ‘A Despensa de Galicia’ realizaranse melloras na contorna para protexer e adaptar este espazo ao escenario de cambio climático.

– O proxecto inclúe a eliminación de especies invasoras e a retirada de residuos sólidos, así como a elaboración dunha guía sobre coas especies de fauna e flora da contorna. A alcaldesa, Digna Rivas, advirte que “a enseada de San Simón é un patrimonio natural de incalculable valor e o noso compromiso é protexela para as xeracións futuras, garantindo un uso sostible deste espazo”.

A enseada de San Simón, un dos tesouros naturais de Galicia incluído na Rede Natura 2000, será obxecto dunha transformación estratéxica para previr posibles danos no futuro a consecuencia das inundacións provocadas polo cambio climático. O Concello de Redondela e Galicia Suroeste acaban de asinar un convenio de colaboración para levar a cabo o proxecto de rexeneración e mellora dos ecosistemas dunares, intermareais e do esteiro desta contorna, “con accións cruciais para protexer este enclave único”. A alcaldesa de Redondela, Digna Riva, advirte que “a enseada de San Simón é un patrimonio natural de incalculable valor e o noso compromiso é protexela para as xeracións futuras, garantindo un uso sostible deste espazo”. A presidenta de Galicia Suroeste, Sandra González, destacou a importancia de proxectos como este, co que “non só reforzamos a nosa aposta pola preservación ambiental, senón que poñemos en valor esa riqueza impulsando un turismo respectuoso co medio ambiente.

O proxecto inclúe a retirada manual de especies invasoras e de residuos sólidos urbanos nunha área de 15.000 metros cadrados na zona supralitoral da praia de Cesantes. Por unha banda eliminaranse da zona dunar e circundantes os exemplares de Artotheca Calendula para restaurar o equilibrio natural e recuperar a biodiversidade local, xa que que está xerando unha perda de espazo para as especies autóctonas e rompendo a conectividade ecolóxica básica. Por outro lado, limparase a zona dunar do areal de residuos sólidos urbanos que frean a chegada de algas e outras materias naturais necesarias para nutrir a fauna da zona. Para iso peitearase a zona supramareal para a súa limpeza, contribuíndo así a restaurar a súa funcionalidade ecolóxica e favorecer o uso recreativo, educativo e turístico da contorna. Estes dous labores remataranse en marzo de 2025.

Ao abeiro do proxecto tamén se levará a cabo ata abril de 2025 un inventariado xeral de especies de flora e fauna autóctonas en 80.000 metros cadrados da propia enseada de San Simón, zonas adxacentes á praia de Cesantes, o Paseo da Portela e Punta Socorro. O inventario recollerá moitas especies de aves migratorias que fan a súa parada na enseada, e tamén anfibios, réptiles e mamíferos que poden ser observables por persoas usuarias e turistas de forma fácil.

A iniciativa inclúe a creación dunha guía didáctica en formato dixital para divulgar o proxecto entre os visitantes e turistas “que servirá para poñer en valor este espazo natural con vistas á promoción de novos produtos turísticos sostibles”.

A iniciativa contará cun investimento de máis de 18.000 euros financiados por Galicia Suroeste ao abeiro das inversións para a adaptación ao cambio climático e prevención de riscos nos territorios litorais do Xeodestino. As axudas enmárcanse na liña de transición verde e ecolóxica do Plan de Sostibilidade Turística en Destino (PSTD) ‘A Despensa de Galicia’ dentro do Plan de Recuperación, Transformación e Resiliencia financiado pola Unión Europea con fondos Next Generation EU.

La entrada Redondela avanzan cara a un futuro sostible coa rexeneración integral da enseada de San Simón se publicó primero en Concello de Redondela.

– A concelleira de Turismo, Rita Pérez Táboas, reunise con empresarios e empresarias do sector para valorar os recursos de turismo cultural en Redondela. Os axentes turísticos coincidiron no gran potencial da enseada e a illa de San Simón. Para Pérez Táboas a illa e a súa contorna é “a gran xoia de Redondela e de toda a ría de Vigo, polo que cómpre poñela en valor”.

– Desde que a illa pasou a fomar parte da Fundación Museo do Mar de Galicia os trámites para solicitar visitas demóranse durante semanas. Existe un “profundo malestar” entre os axentes turísticos e o Concello demanda a recuperación da Fundación Illa de San Simón “para axilizar os trámites administrativos relativos ás actividades na illa”.

A concelleira de Turismo, Rita Pérez Táboas, reunise con empresarios e empresarias do sector para valorar os recursos de turismo cultural en Redondela. Os axentes turísticos coincidiron no gran potencial da enseada e a illa de San Simón. Para Pérez Táboas a illa e a súa contorna é “a gran xoia de Redondela e de toda a ría de Vigo, polo que cómpre poñela en valor”. Desde o Concello de Redondela o obxectivo é “ir da man do sector para impulsar os recursos naturais, históricos e patrimoniais da enseada de cara a un turismo respectuoso co medio e sustentable”.

Na xuntanza participaron axentes de diferentes áreas, como guías turísticos, axencias de viaxes, empresas de turismo de natureza ou turismo náutico. O maior problema para todos eles é “a complexidade para poder xestionar visitas á illa de San Simón”. No ano 2022 a illa pasou a formar parte da Fundación Museo do Mar de Galicia, dependente da Xunta de Galicia. Desde entón “os trámites complicáronse e demóranse durante semanas”. Existe un “profundo malestar” no sector porque teñen “moitas dificultades” para organizar actividades na illa. A edil de Turismo lamenta que existan tantos problemas “ata para contactar por teléfono ou correo electrónico cos responsables da xestión da illa”.

O Concello demanda a recuperación da Fundación Illa de San Simón “para facilitar e axilizar todos os trámites administrativos relativos ás actividades na illa”. Lembran que o acceso ao recinto xa está limitado ao facerse unicamente en barco “e se os permisos para visitar a illa non se axilizan estamos a perder un gran potencial”. Os axentes turísticos advirten que para organizar as visitas con peregrinos deben poder facelo de áxil e “non se pode agardar semanas para obter un permiso”.

Redondela aposta un turismo cultural e de natureza, que pon en valor o patrimonio histórico, industrial e ambiental do municipio. A illa de San Simón, a enseada e toda a súa contorna teñen un gran potencial para este tipo de turismo respectuoso e sustentable. Pérez Táboas salienta que actividades como as visitas guiadas á illa, as rutas de turismo ambiental pola enseada ou os deportes náuticos “son excelentes exemplos de turismo de calidade que queremos promover, lonxe do turismo de masas”.

Illa da Memoria

No pasado mes de novembro, nunha xuntanza entre a alcaldesa, Digna Rivas, e responsables de Iniciativa Galega pola Memoria, os colectivos memorialísticos tamén se sumaron á demanda do Concello para recuperar a Fundación Illa de San Simón. Tanto o Concello de Redondela como Iniciativa Galega pola Memoria entenden que a illa de San Simón “precisa dunha fundación propia e cunha dotación económica propia que permita desenvolver actividades na illa”.

La entrada Redondela demanda unha xestión directa da illa de San Simón para axilizar as visitas se publicó primero en Concello de Redondela.

– A maioría dos visitantes proceden da bisbarra, do propio municipio de Redondela e Vigo, e tamén das comarcas do Morrazo e Pontevedra.  Ademais de visitas escolares de toda Galicia, tamén reciben no Meirande excursións organizadas por axencias de viaxes de Asturias, Castela e León e outras comunidades autónomas.

– No último mes o bote “Manuel” está a ser a estrela do museo. Logo de case un ano de traballos de restauración, a histórica embarcación preside a entrada do centro de interpretación da Batalla de Rande. O “Manuel” é unha embarcación tradicional da enseada de San Simón con case un século de historia. O que o fai único é que este bote, ademais de ser utilizado para pesca, tamén abastecía de víveres e roupa á illa de San Simón cando foi prisión e logo como orfanato. Tamén tería un papel relevante durante a II Guerra Mundial salvando a refuxiados xudeus.

A falta de dous meses para que remate o ano o Meirande xa superou a barreira dos 10.000 visitantes. A día de hoxe son en total 10.399 as persoas que se achegaron este ano a coñecer as instalacións do Centro de Interpretación da Batalla de Rande, que depende da concellería de Turismo do Concello de Redondela. Soledad Chayán, guía turística encargada das visitas ao museo, sinala que o público que visita o centro “valora moito o entorno e tamén a forma en que está distribuída a exposición”. Quen máis desfruta da visita son as crianzas porque hai moitos elementos interactivos que poden tocar, pero tamén os adultos se sorprenden deste espazo museístico cuxa visita é de balde. Os cadros de Godoy son outro atractivo que acaparan a atención.

Chayán explica que a maioría dos visitantes proceden de Vigo e Redondela, e moitos tamén da comarca do Morrazo e Pontevedra. Nalgúns casos son familias con nenos e nenas que xa visitaron o Meirando co colexio “e queren volver para poder utilizar os elementos interactivos, e son eles mesmos os que lles contan aos adultos a historia da batalla e que son os distintos elementos que hai nas salas”. Noutras ocasións sorpréndennos visitantes de lugares máis afastados, “nas últimas semanas achegouse unha peregrina de Bolivia e unha familia de Alemaña”. Ademais de visitas escolares, tamén reciben no Meirande excursións organizadas por axencias de viaxes de Asturias, Castela e León e outras comunidades autónomas.

O espazo museístico acolle unha exposición permanente e gratuíta sobre os tesouros arqueolóxicos e culturais da Batalla de Rande de 1702, unha monumental contenda naval que enfrontou ás tropas anglo-holandesas e hispano-francesas no contexto da Guerra de Sucesión española. O museo tamén dá conta doutros fitos do patrimonio histórico e industrial da zona. De feito o Meirande sitúase no seo dunha antiga fábrica de salgadura de peixe, coñecida como “a fábrica do alemán”, da que se ten constancia polo menos desde o ano 1836, e as instalacións conservan parte da antiga maquinaria da fábrica.

Bote “Manuel”

Desde que a comezos de outubro se instalase no Meirando, o bote “Manuel” está a ser a estrela do museo. Logo de case un ano de traballos de restauración, a histórica embarcación preside a entrada do centro de interpretación da Batalla de Rande. O bote “Manuel” é unha embarcación tradicional da enseada de San Simón dos anos 30 do século pasado. O que o fai único é que este bote, ademais de ser utilizado para pesca, tamén abastecía de víveres e roupa á illa de San Simón cando foi prisión e logo como orfanato. Tamén tería un papel relevante durante a II Guerra Mundial salvando a refuxiados xudeus que chegaban á ría de Vigo. Este bote participou ademais na recuperación dos galeóns da batalla de Rande e colaborou na busca dos desaparecidos e rescate dos cadáveres en varios afundimentos. Xunto ao “Manuel” instalouse un panel informativo coa súa historia e todo o proceso de recuperación. O bote, propiedade de Faustino Otero, foi doado ao Concello pola Asociación Lagoa dos Bébedos, e a súa restauración correu a cargo do Obradoiro de Carpintería de ribeira do Concello de Redondela.

La entrada O Museo Meirande recibe máis de 10.000 visitantes se publicó primero en Concello de Redondela.

– Desde xaneiro deste ano 2024, e ata comezos do mes de outubro, pasaron por Redondela un total de 153.205 peregrinos. A maioría, 86.363, fixérono a través do Camiño Central e un número cada vez maior, 66.842, a través do Camiño da Costa.

– A concelleira de Turismo, Rita Pérez Táboas, sinala que esta cifra “supón un incremento de 12.000 peregrinos máis que o ano pasado nestas datas, case un 10% de incremento, quedando aínda dous meses e medio para finalizar o ano”.

As rutas xacobeas, que en Redondela conflúen co Camiño Portugués Central e o Camiño Portugués pola Costa, atraen cada ano a milleiros de persoas. Desde xaneiro deste ano 2024, e ata comezos do mes de outubro, pasaron por Redondela un total de 153.205 peregrinos. A maioría, 86.363, fixérono a través do Camiño Central e un número cada vez maior, 66.842, a través do Camiño da Costa. A concelleira de Turismo, Rita Pérez Táboas, sinala que esta cifra “supón un incremento de 12.000 peregrinos máis que o ano pasado nestas datas, case un 10% de incremento, quedando aínda dous meses e medio para finalizar o ano”. O perfil dos peregrinos que pasan por Redondela varía en función da época do ano. Se ben nos meses de abril, maio e xuño son maioría os estranxeiros, coa chegada do verán tanto no mes de xullo como en agosto os peregrinos de orixe española son maioría. O tirón do Camiño de Santiago a nivel internacional déixase notar nas cifras que rexistra a Oficina Municipal de Turismo, onde reciben información peregrinos de máis de 40 nacionalidades diferentes. A maioría proceden de Portugal e Alemaña, pero chegan camiñantes de todos os puntos do planeta: desde Xapón ata os EEUU, pasando por Sudáfrica, Taiwan, Rusia, Australia ou México. No caso dos españois as Comunidades Autónomas que achega máis peregrinos son Madrid, Andalucía e Valencia, aínda que tamén é numerosa a cifra de peregrinos procedentes de Cataluña e Euskadi.

Do total de peregrinos que atravesan o noso municipio, na Oficina de Turismo do Concello de Redondela atendeuse a 16.761, dos que 10.266 chegaron a través do Camiño Central e 6.495 a través do Camiño da Costa. Os turistas e visitantes foron tamén numerosos, en total 793 persoas. Tamén os propios veciños e veciñas de Redondela se achegan á oficina en busca de actividades e información, e este ano sumaron 755 persoas.

Éxito dos roteiros ambientais

Mención especial merecen as actividades de Roteiros Mediombientais, que desde as concellerías de Turismo, Medio Ambiente e Sostibilidade se realizaron ao longo dos meses de xullo, agosto e setembro. Nestas rutas guiadas polas diferentes parroquias do municipio participaron 1.096 persoas que puideron gozar do patrimonio natural de Redondela con actividades a pé, en bicicleta e canoa. Pérez Táboas sinala que as visitas guiadas teñen moito éxito “tanto entre os peregrinos e turistas que nos visitan como entre a propia veciñanza de Redondela, que deste xeito pode coñecer mellor a historia da nosa vila e o seu patrimonio natural”. O concelleiro de Sostibilidade, Roberto Villar, sinalou que o obxectivo destas actividades é “poñer en valor os recursos naturais de Redondela e tamén concienciar á veciñanza e ás persoas que nos visitan da importancia de respectar estes espazos naturais e axudar a conservalos”.

Outra actividade gratuíta organizada pola Oficina Municipal de Turismo son as visitas guiadas “A vila pola tardiña” todos os luns pola tarde, na que os guías dan a coñecer o patrimonio histórico, cultural e arquitectónico da vila de Redondela. Nesta temporada levan participado 145 persoas.

La entrada Redondela rexistra máis de 150.000 peregrinos nos primeiros nove meses do ano se publicó primero en Concello de Redondela.

– A programación dos Roteiros Ambientais inclúe rutas nocturnas, que tiveron moito éxito entre o público nos meses de xullo e agosto. En agosto as visitas nocturnas serán aos ríos Pexegueiro, Fondón e Maceiras. Entre as novidades destaca unha actividade de Orientaventura en bicicleta no Chan das Pipas, en Saxamonde.

O Concello de Redondela ofrece no mes de setembro un total de nove actividades de ecoturismo e educación ambiental. Logo do éxito da programación de xullo e agosto, as concellerías de Turismo, Sostibilidade e Medio Ambiente continúan coas actividades que se realizan sempre con guía e contan cunha ampla proposta de roteiros e actividades a pé, en bicicleta ou en caiac. A programación de setembro inclúe de novo rutas guiadas nocturnas que tiveron moi boa acollida entre o público nos meses de xullo e agosto. Nesta ocasión as visitas nocturnas serán aos ríos Pexegueiro, Fondón e Maceiras. Entre as novidades deste mes destaca unha actividade de Orientaventura en bicicleta no Chan das Pipas, o día 21 de setembro. A concelleira de Cultura e Turismo, Rita Pérez, destacou a “transversalidade” destas actividades “que apostan polo turismo ambiental, sostible e responsable con saídas para coñecer o espectacular patrimonio natural de Redondela”. O concelleiro de Sostibilidade, Roberto Villar, sinalou que o obxectivo destas actividades é “poñer en valor os recursos naturais de Redondela e tamén concienciar á veciñanza e ás persoas que nos visitan da importancia de respectar estes espazos naturais e axudar a conservalos”. As actividades contan coa colaboración do Obradoiro de Estudos Locais Fernando Monroy.

Para participar nestas actividades é preciso facer a inscrición previa na oficina de turismo, no teléfono 986 40 17 13 ou no enderezo electrónico turismo@redondela.gal. A programación completa é a seguinte:

Martes día 3 de setembro: Caiac ambiental pola Enseada de San Simón. 20€/persoa.

Venres día 6: Ruta nocturna polo río Pexegueiro. Natureza, muíños e lendas. De balde.

Sábado día 7: Ruta ambiental Punta de Cesantes – Soutoxuste. De balde.

Venres día 13: Ruta nocturna polo río Fondón. Natureza, muíños e lendas. De balde.

Sábado día 14: Caiac ambiental pola Portela. 20€/persoa.

Sábado día 14: Ruta nocturna polo río Maceiras. Actividade ambiental. De balde.

Venres día 20: Ruta polo río Pexegueiro. Natureza, muíños e lendas. De balde.

Sábado día 21: Orientaventura en bicicleta no Chan das Pipas (Saxamonde). Con bici propia 5€/persoa. Con bici do Concello 8€/persoa.

Domingo día 29: Ruta en bicicleta e observación de aves na Portela. Con bici propia 5€/persoa. Con bici do concello 8€/persoa.

La entrada As actividades de turismo ambiental seguen en setembro con nove rutas guiadas se publicó primero en Concello de Redondela.