O concelleiro de Infraestruturas e Sostibilidade, Roberto Villar, no camiño do Lameiro, recentemente asfaltado.

– A Concellería de Infraestruturas e Sostibilidade rematou as obras do Camiño do Lameiro, en Santo Estevo de Negros, e o Camiño de Zabarís, en Ventosela, ambas financiadas a través dos Orzamentos Participativos.

– O concelleiro, Roberto Villar, sinala que tamén se están a executar melloras con fondos propios do Concello en Vilar e anuncia novas intervencións en Chapela.

O Concello de Redondela, a través da Concellería de Infraestruturas e Sostibilidade, continúa co seu plan de mellora da rede viaria nas parroquias do rural co obxectivo de garantir a seguridade e a calidade de vida dos veciños e veciñas. Entre as actuacións recentemente rematadas destaca a reforma do Camiño do Lameiro, na parroquia de Santo Estevo de Negros. Cunha inversión de preto de 22.000 euros, os traballos centráronse na reposición total do firme e, moi especialmente, na mellora e localización da rede de pluviais, “solucionando así os problemas de canalización que afectaban á zona”, explica o concelleiro Roberto Villar. Esta obra foi executada grazas aos Orzamentos Participativos do Consello Parroquial de Negros. Nesta mesma liña de colaboración veciñal, atópanse practicamente rematadas as obras do Camiño de Sabarís, en San Martiño de Ventosela. Cun orzamento tamén próximo aos 22.000 euros procedentes dos Orzamentos Participativos da parroquia, a intervención consistiu na pavimentación e posta a punto desta vía.

O concelleiro salientou a importancia destas actuacións: “A prioridade deste goberno é manter o noso rural vivo e con servizos dignos. No caso de Negros, non se trataba só de botar asfalto, senón de solucionar un problema grave coas pluviais que afectaba á durabilidade do firme e á seguridade dos veciños”, explica Villar. Desde o Concello de Redondela ponse en valor a ferramenta dos orzamentos participativos: “É a propia veciñanza, a través dos seus consellos parroquiais, a que decide onde é máis necesario actuar, o que nos permite ser moito máis eficaces na xestión”. Xunto a estas obras o Concello tamén mobilizou recursos propios para a mellora do Camiño das Laxes e o Carreiro da Auga, en Vilar, cunha inversión que rolda os 20.000 euros.

Dende a Concellería avanzan que as previsións a curto prazo inclúen o asfaltado do camiño do Convento, en Reboreda, así como o camiño do Carrascal, que comunica Redondela con Ventosela. De xeito paralelo, as brigadas municipais continúan cos labores de mantemento e reparacións en todo o termo municipal xa hai multitude de camiños afectados polos numerosos temporais. Actualmente realízanse arranxos nos camiños da Coutada Grande, da Traída e do Valeiro (Chapela). “Seguimos traballando de xeito constante, tanto en grandes proxectos de pavimentación como nas pequenas reparacións diarias que son fundamentais para o día a día do municipio Redondela”, concluíu Roberto Villar.

La entrada Mellora a seguridade e os servizos no rural con novos asfaltados en Negros, Ventosela e Vilar se publicó primero en Concello de Redondela.

– É a segunda vez que o Concello ordena suspender a actividade nesta parcela de Vilar. A suspensión é debido aos movementos de terra, feitos que poden ser constitutivos de infracción urbanística. Tamén se ordena a retirada de materiais e maquinaria para garantir a total interrupción da actividade construtiva. O imcumprimento da orde pode acarexalle á empresa multas de ata 10.000 euros.

– A alcaldesa , Digna Rivas , explica que “non se vai permitir que se incumpra a normativa urbanística”. Desde o primeiro momento o goberno municipal tomou as medidas oportunas, “e xa é a segunda vez que incumpren a legalidade”. Estas obras no barrio da Millarada xa foron paralizadas en agosto de2025 polos movementos de terra en parte da parcela.

O Concello de Redondela suspende de forma inmediata, por segunda vez,  as obras no Camiño da Lagoa, no barrio da Millarada, como medida cautelar. A finca en cuestión atópase na parroquia de Vilar de Infesta. Esta suspensión é debido aos movementos de terra mediante o recheo de parte da parcela con terra vexetal e xabre nunha superficie total duns 400 m² e os amoreamentos de terras vexetais e xabre na parte alta da parcela. Ocupan unha superficie duns 50 m² mediante tres montículos dunha altura aproximada duns 2,50 m² cada un. Estes feitos poden ser constitutivos de infracción urbanística. Tamén se ordena desde a administración municipal a retirada de materiais e maquinaria empregados na execución das obras coa finalidade de garantir a total interrupción da actividade construtiva.

A concellería de Urbanismo advirte que, de non paralizar as obras no prazo de 24 horas seguintes á notificación, poderase proceder ao precintado das obras, retirada de materiais e maquinaria, suspensión de subministracións ou execución forzosa mediante a imposición de multas. As sancións, por importe de 1.000 a 10.000 euros, serán reiterables ata acadar o cumprimento da orde de paralización e calquera outra medida que sexa conveniente en prol da efectividade da suspensión. O incumprimento da orde poderá dar lugar a que se poña en coñecemento do Ministerio Fiscal para a depuración das responsabilidades penais a que puider dar lugar. A maiores o vixilante de obras do Concello procederá á vixilancia periódica do cumprimento da orde de paralización das obras.

A alcaldesa , Digna Rivas , explica que “non se vai permitir que se incumpra a normativa urbanística. Desde o primeiro momento este goberno municipal tomou as medidas oportunas. É é a segunda vez que incumpren a legalidade”. Estas obras no barrio da Millarada xa foron paralizadas en agosto de 2025 polos movementos de terra na parcela.

La entrada O Concello de Redondela suspende de forma inmediata as obras na Millarada se publicó primero en Concello de Redondela.

– Os Concellos de Redondela e Mos contratarán un topógrafo independente para fixar os límites de ambos municipios. Para a elaboración do informe basearase na Acta de Deslinde de 1940. O documento plasmará de forma obxectiva os lindes entre Redondela e Mos na zona do Miliario, un elemento patrimonial de gran valor histórico, territorial e identificativo.

– A alcaldesa de Redondela, Digna Rivas, amosouse satisfeita de poder avanzar neste sentido. O conflito remóntase ao ano 2017 “e por primeira vez chegamos a un acordo para darlle una solución xusta e definitiva”. A rexedora afirmou que desde o Concello de Redondela vanse defender “os intereses dos veciños e da Comunidade de Montes de Vilar”.

O Concello de Redondela convocou unha xuntanza da comisión de seguimento constituída para resolver a situación do Miliario de Vilar. A reunióncelebrouse onte ao pé do propio miliario, nun encontro que marca “un paso adiante” para a resolución do conflito territorial. Á xuntanza asistiron as alcaldesas de Redondela e Mos, Digna Rivas e Nidia Arévalo, técnicos municipais de ambos os dous Concellos, representantes das comunidades de montes afectadas e das corporacións municipais.

O acordo principal acadado é a contratación, de mutuo acordo por parte dos dous Concellos, dun técnico independente. Este profesional será o encargado de realizar un levantamento topográfico preciso, partindo dos lindes recollidos no documento histórico de 1940 “Acta de Deslinde del Instituto Geográfico y Catastral”. O obxectivo é plasmar de forma obxectiva os lindes entre Redondela e Mos na zona do Miliario de Vilar, un elemento patrimonial de gran valor histórico, territorial e identificativo. Unha vez finalizado o estudo, – para o que se estableceu un prazo de tres meses -, convocarase unha nova xuntanza. Nela, a comisión traballará para unificar as propostas das comunidades de montes de Vilar e Guizán, baseándose nos datos técnicos obtidos.

As alcaldesas destacaron a vontade de diálogo e o traballo conxunto para solucionar este tema, buscando unha solución técnica, xusta e definitiva para todas as partes implicadas. Digna Rivas, amosouse satisfeita de poder avanzar neste sentido. O conflito remóntase ao ano 2017, cando o Concello de Mos plasmou no seu PXOM o Miliario como parte de la parroquia de Guizán. A rexedora sinala que “é unha boa nova que por por primeira vez cheguemos a un acordo para darlle una solución xusta e definitiva” a este conflito. Rivas afirma que desde o Concello de Redondela vanse defender “os intereses da parroquia de Vilar, tal e como levan reclamando os veciños e veciñas desde hai anos”.

La entrada O Concello avanza na delimitación dos lindes con Mos cun estudo técnico independente se publicó primero en Concello de Redondela.

– O 16 de marzo remata o prazo para que as empresas construtoras que o desexen se presenten ao concurso de licitación pública aberto polo Concello de Redondela. A actuación contempla a mellora da seguridade viaria na estrada de Porto Cabeiro cunha nova calzada e beirarrúas. Os traballos licitaranse por un importe superior aos 530.000 euros e as obras comezarán no segundo trimestre deste ano.

– A alcaldesa, Digna Rivas, sinala que esta humanización ten un dobre obxectivo, “por unha banda ordenar os espazos dando prioridade ao peón, cun acceso máis seguro para o colexio, e por outra renovar os servizos urbanos que se atopan en mal estado”. O acceso ao CEIP Porto Cabeiro completarase cunha nova área de convivencia no entorno do colexio con case 3.000 m² para os peóns.

O Concello de Redondela avanza nos trámites administrativos para a transformación da estrada de Porto Cabeiro. As empresas construtoras interesadas teñen ata o vindeiro 16 de marzo para presentar as súas propostas ao concurso de licitación pública. Os traballos, cun orzamento superior aos 530.000 euros, comezarán no segundo trimestre deste ano. O proxecto contempla unha reforma integral no tramo comprendido entre a N-555 e o camiño do Campiño, nas inmediacións do CEIP Porto Cabeiro. Inclúe a creación dunha nova calzada de 5,8 metros de ancho e a construción de beirarrúas nunha das marxes, cun ancho variable que oscilará entre os 1,1 metros nos puntos máis estreitos e os 3 metros nas zonas máis amplas.

A alcaldesa de Redondela, Digna Rivas, explicou que este proxecto enmárcase na mesma liña na que traballa o Concello para crear contornas “máis accesibles e adaptadas ás persoas”. Rivas sinalou que esta humanización persegue un dobre obxectivo estratéxico: “Por unha banda, queremos ordenar os espazos dando prioridade absoluta ao peón, cun acceso moito máis seguro para o colexio; por outra, cómpre renovar os servizos urbanos que actualmente se atopan en mal estado”.

A situación actual da rúa caracterízase por un estado de conservación deficiente debido ao paso do tempo e ás sucesivas reformas parciais. A ausencia case total de beirarrúas, os parches e as intervencións illadas realizadas ao longo dos anos fan recomendable a renovación integral dos acabados. Tamén é necesario renovar a rede de drenaxe.

Tamén se incluirán elementos vexetais ao longo do itinerario. Os traballos licitaranse por un importe superior aos 530.000 euros dentro do plan +Provincia financiado pola Deputación de Pontevedra.

Nova área de convivencia na contorna do CEIP Porto Cabeiro

A humanización da estrada de Porto Cabeiro súmase a outro importante proxecto aprobado polo Concello no mes de febreiro: a transformación da contorna do colexio nunha gran área de convivencia peonil. A veciñanza gañará un espazo de case 3.000 m² para os peóns nos barrios de Porto Cabeiro e A Millarada. A intervención, que conta cun orzamento base de licitación de 401.700 euros e será financiada con fondos propios do Concello. A reforma eliminará o perigo do tráfico pesado e creará un “camiño escolar seguro con plataforma única, zonas verdes e mobiliario urbano”. O obxectivo é “transformar un espazo actualmente dominado polos vehículos nun entorno saudable, inclusivo e, sobre todo, seguro para a infancia”, conclúe Rivas.

La entrada A reforma integral da estrada de Porto Cabeiro comezará antes do verán se publicó primero en Concello de Redondela.

– O Goberno local presenta un proxecto de reforma integral para os barrios de Porto Cabeiro e A Millarada que recupera case 3.000 m² para as persoas. As obras están valoradas en 401.700 euros e serán financiadas con fondos propios do Concello, previa aprobación no pleno da Corporación.

– A alcaldesa, Digna Rivas, explica que a actuación eliminará o perigo do tráfico pesado e creará un “camiño escolar seguro con plataforma única, zonas verdes e mobiliario urbano”. O obxectivo é “transformar un espazo actualmente dominado polos vehículos nun entorno saudable, inclusivo e, sobre todo, seguro para a infancia”.

O Concello de Redondela avanza na súa estratexia de recuperación de espazos públicos para a cidadanía. O proxecto de creación dunha área de convivencia no entorno do CEIP de Porto Cabeiro gaña un espazo de case 3.000 m² para os peóns. A intervención, que conta cun orzamento base de licitación de 401.700 euros, transformará radicalmente a Estrada de Porto Cabeiro e o Camiño do Campiño para priorizar a seguridade dos escolares e o benestar da veciñanza. Digna Rivas explica que o obxectivo prioritario é “transformar un espazo actualmente dominado polos vehículos nun hábitat saudable, inclusivo e, sobre todo, seguro para a infancia”. A alcaldesa destacou que a situación actual é “insostible” para a comunidade educativa. Con beirarrúas de apenas un metro de ancho e un tráfico constante de vehículos pesados que acceden ás naves lindeiras, o acceso ao colexio supón un risco diario. “Queremos que Porto Cabeiro e A Millarada teñan por fin un espazo de referencia, unha zona amable onde a veciñanza poida pasear e os nenos e nenas gañen autonomía”.

Un deseño para as persoas

O proxecto, que abrangue unha superficie de 2.835 m², contempla a transformación radical do viario mediante dúas solucións técnicas: por unha banda unha plataforma única na Estrada de Porto Cabeiro cun espazo amplo e seguro arredor do CEIP, o Parque Infantil Luis Seoane e a parcela dotacional municipal, con novo mobiliario urbano e arborado; por outro lado o calmado de tráfico no Camiño do Campiño, cunha plataforma elevada onde a velocidade se limitará a 10 km/h, garantindo unha senda peonil de 2,5 metros de ancho.

Sostibilidade e Seguridade Viaria

Esta actuación aliñase cos obxectivos do Plan de Mobilidade Urbana Sostible (PMUS) de Redondela e os principios da Rede Ágora da Deputación de Pontevedra. Ademais de mellorar a seguridade, o proxecto loita contra o cambio climático ao reducir as emisións e o ruído, mellora o drenaxe de augas e aposta por unha iluminación eficiente. Con esta obra, Redondela non só mellora as infraestruturas de Cabeiro e Vilar de Infesta, senón que pon os cimentos para implementar os Camiños Escolares Seguros, fomentando hábitos de vida saudables dende a escola. Desde o goberno local explican que esta actuación será financiada con fondos propios do Concello, a través do remanente, para o que se levará ao pleno ordinario deste mes de febreiro o próximo xoves día 26.

Mellora da seguridade viaria desde a N-555 ata o camiño do Campiño

Este proxecto da contorna do CEIP Porto Cabeiro completa a mellora da seguridade viaria que xa está aprobada desde a N-555 ata o camiño do Campiño. Esta renovación integral da estrada permitirá incluír un paso peonil seguro para facilitar o acceso ao colexio con beirarrúas nunha das marxes da vía. Tamén se incluirán elementos vexetais ao longo do trazado. Os traballos licitaranse por un importe superior aos 530.000 euros dentro do plan +Provincia financiado pola Deputación de Pontevedra.

La entrada O Concello proxecta transformar a contorna do CEIP Porto Cabeiro nun espazo peonil e seguro se publicó primero en Concello de Redondela.

O Rego da Preira, nun tramo ao seu paso por Vilar de Infesta, discorre paralelo ao camiño da Igrexa-Vilar. Para salvar o desnivel entre o regato e o camiño executouse un muro de contención cunha canalización de augas pluviais enterrada. Co paso do tempo, e por colapso da tubaxe de desaugadoiro, as augas foron arrastrando partículas terreo, que afundiu na zona da tubaxe. Isto provocou unha focha no camiño e o afundimento do muro nun tramo duns quince metros de lonxitude.

O Concello contratou as obras para a reconstrución cun investimento de 40.000 euros. A actuación incluirá un novo muro de mampostería, tubaxe de desaugadoiro de augas pluviais e o novo pavimento. A alcaldesa, Digna Rivas, e o concelleiro de Infraestruturas e Sostibilidade, Roberto Villar, visitaron a zona onde en breve comezarán os traballos. Villar explicou que mentres duren as obras de reconstrución manterase o muro existente “de tal maneira que sirva como pantalla de protección fronte á vertedura de terras e demais residuos ao regato”. Escavarase o terreo para albergar a cimentación do muro con formigón. Sobre a cimentación executarase o muro de granito cunha altura de máis de 3 metros. Ao mesmo tempo farase o cruzamento da tubaxe e unha arqueta de formigón para recoller as augas pluviais que circulan pola cuneta e que desauguen no regato. O pavimento de acabado será de formigón, a ras co firme de aglomerado existente. Protexerase o desnivel co regato cunha varanda de aceiro. Unha vez rematadas as obras do muro novo retirarase o actual e retiraranse os cascallos.

La entrada O Concello repara o tramo do camiño da Igrexa-Vilar cun novo muro no Rego da Preira se publicó primero en Concello de Redondela.

– Trátase dunha zona residencial de promoción privada na parroquia de Vilar de Infesta. O proxecto de urbanización remóntase aos anos 90, pero a día de hoxe aínda quedan obras de urbanización pendentes, o que supón un prexuízo para os veciños e veciñas do polígono.

– Logo de expirar o prazo dado á promotora, o Concello contratou unha valoración das obras que restan por executar. Este informe permitirá ao Concello proceder, no seu caso, á execución subsidiaria “e dar unha resposta a unha situación que se arrastra desde hai demasiado tempo”, explica a alcaldesa Digna Rivas.

O Concello de Redondela impulsa a execución das obras pendentes na zona residencial do polígono de Cartas. Desde a concellería de Urbanismo deuse un paso firme para poñer fin á situación que desde hai anos afecta aos veciños e veciñas desta zona. Trátase dun polígono residencial de promoción privada na parroquia de Vilar de Infesta. O proxecto de urbanización data dos anos 90, pero a día de hoxe aínda quedan obras de urbanización pendentes de executar, como tramos de beirarrúas e acometidas de abastecemento e saneamento.

Os técnicos municipais e o concelleiro de Urbanismo, Antonio Cabaleiro, mantiveron diversas reunións coa promotora e requiríronlle en reiteradas ocasións “que asumise as súas obrigas e completase as actuacións necesarias”. Neste marco, na última reunión na que tamén participou a alcaldesa, Digna Rivas, concedeuse un último prazo á promotora para acometer as obras “e o prazo expirou a mediados do mes pasado”, explica Cabaleiro. Ao constatar que a promotora non iniciou a execución dos traballos pendentes, o Concello decidiu actuar “por responsabilidade, para dar unha solución aos veciños e veciñas”, afirma Rivas. Co obxectivo de garantir unha solución definitiva contratouse a un enxeñeiro especializado a valoración técnica e económica das obras que restan por executar. Este informe permitirá ao Concello proceder, no seu caso, á execución subsidiaria “e dar unha resposta a unha situación que se arrastra desde hai demasiado tempo”, explica a alcaldesa. A execución subsidiaria é unha ferramenta de “execución forzosa” da que dispoñen as administracións públicas para levar a cabo accións que o particular ou empresa que ten a obriga non cumpre voluntariamente.

Reitérase así a vontade do Concello de dar unha solución definitiva “e de defender o interese dos veciños e veciñas” desbloqueando unha situación que leva enquistada décadas.

La entrada O Concello impulsa a execución das obras de urbanización pendentes no polígono de Cartas se publicó primero en Concello de Redondela.

– A alcaldesa, Digna Rivas, explica que este parque empresarial “está próximo a núcleos de poboación e pode ter un impacto negativo tanto no medio ambiente como na paisaxe e no patrimonio da parroquia”. A rexedora sinala que o goberno local “está do lado dos veciños, e como xa fixemos no ano 2022 volvemos presentar alegacións dentro do prazo de consulta pública”.

– Responsables do goberno local reuníronse na tarde do venres con representantes veciñais da parroquia xunto co equipo técnico para trasladarlles o traballo feito desde o Concello e informalos das alegacións que agora se presentan contra o plan de ordenación do Polígono de Louredo.

O Concello de Redondela presenta varias alegacións ao polígono industrial de Louredo proxectado pola Xunta de Galicia e que afecta a terreos da parroquia de Vilar de Infesta. A alcaldesa, Digna Rivas, explica que este parque empresarial “está próximo a núcleos de poboación e pode ter un impacto negativo tanto no medio ambiente como no patrimonio da parroquia”. A rexedora sinala que o goberno local “está do lado dos veciños, e como xa fixemos no ano 2022 volvemos encargar un informe técnico para presentar novamente alegacións dentro do prazo de consulta pública”. Este parque empresarial impulsado pola Xunta de Galicia non contempla un plan para evitar o impacto negativo que o polígono pode causar ao medio ambiente, á paisaxe e ao patrimonio de Redondela.

O informe técnico sinala que o Documento de análise e Avaliación ambiental do polígono “non tivo en conta os condicionantes en materia de protección de leitos de auga existentes na zona, nin de protección de patrimonio cultural e etnográfico”. Engade o Concello de Redondela nas súas alegacións que o planeamento para o futuro polígono “debe protexer a biodiversidade e incluír accións de mellora do medio rural e natural”. Os prexuízos para o patrimonio de Vilar son motivo tamén de alegacións contra este polígono industrial, pola proximidade do xacemento Mámoa dos Valos e por coincidir co trazado do Camiño de Santiago que pasa pola parroquia.

Os concelleiros Rita Pérez Táboas, Atonio Cabaleiro e Iria Vilaboa reuníronse na tarde do venres con representantes veciñais da parroquia de Vilar nunha xuntanza á que asistiu tamén o equipo técnico que elaborou as alegacións. A reunión serviu para trasladarlle á veciñanza o traballo feito desde o Concello e as alegacións que agora se presentan contra o plan de ordenación do Polígono de Louredo dentro do prazo de consulta pública.

La entrada O Concello presenta alegacións ao polígono de Louredo polo impacto ao medio ambiente e o patrimonio se publicó primero en Concello de Redondela.