Abril, no Calendario do Libro e a Lectura de Galicia, é o mes por excelencia para festexar esta cousa que tanto nos gusta nas bibliotecas e que tan ben nos fai a todos… Ler!

Este mes de abril fixemos moitas cousas nas bibliotecas, como entregar os Premios aos Mellores Lectores, participar no gran festival da lectura que coorganiza o noso concello, e moitas cousas máis.

A Biblioteca Xela Arias festexa o seu 20 aniversario cos nenos e nenas, coas familias e coas persoas maiores… ata fixemos unha mini-festa de aniversario na Semana Santa! 20 anos facendo moitas cousas, e adicando o noso tempo e o noso corazón a mellorar a vida da nosa comunidade.

Pero non queriamos que rematara este mes sen adicarlle un espazo a un grupo de usuarios que hoxe visitaron por primeira vez a biblioteca, e que tomaron parte desta celebración. Son un pequeno grupo de usuarios e usuarias do C.A.P.D. de Redondela, situado aquí, moi preto, na nosa parroquia.

Con eles gozamos dunha mañá fenomenal, con lecturas, contos e actividades manuais.
Ademáis, levaron un bonito agasallo en forma de semente que agardamos prenda no seu xardín. Unha semente de maceira, que parte da historia dun libro que limos esta mañá sobre esta árbore, e que tamén decoramos na biblioteca.
Porque as mazás literarias, tamén alimentan. E se as sementas… sen dúbida prenderán! 🍎

Quedamos cun bo recordo deste centro e agardamos volver xuntarnos noutras ocasións.
Luis, un dos usuarios, agasallounos cun debuxo precioso, que desde agora decora tamén o mostrador da biblioteca 😊

La entrada O CAPD de Chapela pecha o mes do libro na Biblioteca Xela Arias se publicó primero en Concello de Redondela.

Hoxe é 21 de marzo. Un día que dá comezo á estación a primavera e no que se celebra o Día Mundial da Poesía, e tamén o Día Internacional dos Bosques.

Na Biblioteca Xela Arias de Chapela xuntamos todas estas efemérides tan ditosas e convidamos a un grupo de usuarias do Centro de Día Maiores Activos para que gozaran con nós da poesía e do achegamento ficcional á natureza e mais os bosques.

As nosas convidadas demostraron ser extraordinarias lectoras e entusiastas escoitadoras de emocións e palabras.

Foi un pracer contar con elas e compartir con elas a ledicia de escoitar os ritmos, a música e as sensacións dos poemas.

La entrada Celebramos o Día da Poesía co Centro de Día Maiores Activos se publicó primero en Concello de Redondela.