– O Concello de Redondela advirte que SEAGA non realizou as limpezas correspondentes aos anos 2024 e 2025. Hai dous anos a Consellería de Medio Rural comprometeuse a acometer a tala da biomasa en diferentes espazos, como a zona de Río Frío en Chapela, pero aínda non fixeron os traballos.

– A alcaldesa, Digna Rivas, esixe que estes traballos se realicen de maneira urxente nas denominadas “faixas secundarias” para previr incendios. Por convenio o SEAGA debe realizar a limpeza de 10 hectáreas cada ano. Desde o Concello ofrecen “toda a colaboración á administración autonómica para resolver esta situación”.

O Concello de Redondela advirte que a Empresa Pública de Servizos Agrarios Galegos que depende da Xunta, SEAGA, aínda non realizou as limpezas correspondentes aos anos 2024 e 2025. Hai xa dous anos que a Consellería de Medio Rural se compromete a acometer a limpeza e tala da biomasa en 17 parcelas, entre elas as da zona de Río Frío en Chapela, pero aínda non a realizou. A alcaldesa, Digna Rivas, esixe que estes traballos se realicen de maneira urxente nas denominadas “faixas secundarias” do municipio para previr incendios. Trátase de franxas de 50 metros ao redor de construcións e vivendas que deben manterse limpas e sen especies pirófitas, propensas a propagar lumes. Conservar estas zonas de monte correctamente “é esencial para evitar a proliferación de lumes en puntos sensibles”, sinala o concelleiro de Medio Ambiente, Alberto Álvarez. O edil explica que teñen conversas telefónicas co SEAGA en numerosas ocasións “onde nos transmiten a súa intención de actuar, pero o tempo pasa e as limpezas non se fan”. NA última comunicación a empresa de Medio Rural anunciou que realizaría a limpeza en marzo, “pero a piques de rematar o mes de maio aínda non actuaron”. Álvarez insiste en que o traballo do SEAGA é “esencial” para previr lumes. Desde o Concello ofrécese “toda a colaboración á administración autonómica para resolver esta situación e que se realicen os traballos”.

O Concello de Redondela, a Consellería do Medio Rural, a FEGAMP e o SEAGA asinaron o convenio para a xestión da biomasa en 2022. A través deste acordo a empresa pública debe acometer a limpeza de 10 hectáreas no municipio cada ano, pero aínda non se realizou. Álvarez, explica que “debe ser Medio Rural quen realice a xestión da biomasa e a retirada de especies arbóreas, na súa maior parte eucaliptos e piñeiros”. O concelleiro confía en que os traballos se realicen “no prazo de tempo máis breve posible”.

La entrada O Concello demanda ao SEAGA unha actuación urxente nas zonas de risco de incendio forestal se publicó primero en Concello de Redondela.

– O xestor ferroviario acepta a petición da alcaldesa e substituirá os pretiles de formigón por uns metálicos máis estreitos. Digna Rivas amosa a súa satisfacción por este cambio que permite ampliar a calzada de 4 a 6 metros e dar resposta ás demandas veciñais.

– A modificación na estrutura supón “un acto de xustiza para o barrio” e garante que a veciñanza vai ter un paso “que realmente cumpre coas súas necesidades do día a día”, afirma a alcaldesa. O ancho da calzada amplíase desde os 4 ata os 6 metros, permitindo un tránsito fluído de vehículos e peóns.

O Administrador de Infraestruturas Ferroviarias (Adif) aceptou os cambios propostos polo Concello para mellorar a circulación de vehículos e peóns no paso elevado da Portela. O xestor ferroviario confirmou oficialmente á alcaldesa a viabilidade técnica para ampliar o paso superior do camiño A Portela ata os 6 metros de ancho. Esta decisión responde ao escrito remitido desde o Concello a Adif no que se solicitaba unha mellora sobre o proxecto aprobado en decembro de 2023.

A alcaldesa amosou a súa satisfacción por este logro. “Conseguimos que Adif atendese as demandas dos veciños e veciñas”, declarou a rexedora. Rivas fixo fincapé en que este cambio estrutural supón “un acto de xustiza para o barrio”. A modificación do proxecto garante que a veciñanza da Portela teña un paso “que realmente cumpre coas súas necesidades do día a día e que os veciños merecen, logo de soportar durante meses unhas obras que lles causaron moitas molestias”, recalcou. A alcaldesa informou á veciñanza da Portela dos cambios no proxecto tan pronto chegou ao Concello a documentación oficial”. Rivas agradeceu tamén a Adif a súa disposición técnica para escoitar as demandas do Concello e dos veciños. “Demostrase que, cando se fan peticións con argumentos e pensando no ben común, as cousas saen adiante”.

Detalles técnicos do novo proxecto

O proxecto inicial de Adif contemplaba un ancho de calzada de 4 metros protexido por pretiles de formigón. Tras estudar a petición municipal o equipo técnico de Adif determinou que é viable reubicar os elementos na calzada, malia estar xa a obra avanzada. Para logralo, substituirán os bloques de formigón por pretiles metálicos máis estreitos, o que permite gañar 2 metros. Con este cambio, o paso superior amplíase a sección ata os 6 metros, cunha calzada compartida para tráfico rodado e peonil, sen beirarrúas elevadas. O resultado adáptase ao deseño do camiño antes e despois da ponte. Adif informou tamén que a instalación da valla antivandálica manterase de forma obrigatoria por estrita normativa de seguridade ferroviaria.

As obras atópanse actualmente en execución dentro do proxecto de renovación integral da liña Monforte de Lemos – Bifurcación Chapela.

La entrada Adif acepta o cambio proposto polo Concello e ampliará o paso superior da Portela se publicó primero en Concello de Redondela.

– A alcaldesa, Digna Rivas, sinalou o “orgullo” que supón ver a tantas persoas, rapazada e maiores, unidas pola cultura e compartindo sorrisos e lecturas nun espazo público tan vivo como a Alameda Castelao”.

– Houbo intercambio de marcadores de libros, lectura compartida e desfiles de contos nunha emotiva xornada na que grandes e pequenos gozaron desta convivencia interxeracional. A actuación de Barafunda e o obradoiro de Víctor Rivas foron o broche de outro á xornada.

A Alameda Castelao viviu unha exitosa xornada coa celebración da VI edición de “Lectura na Rúa”. O evento, celebrado onte, reuniu a máis de 700 persoas. O acto contou coa participación da alcaldesa, Digna Rivas, e do concelleiro de Ensino, Alberto Álvarez, quen compartiron a mañá cos participantes. O evento destaca polo compoñente internacional, con centos de alumnos de infantil, primaria e secundaria que compartiron espazo, lecturas e experiencias cos usuarios de centros da terceira idade. A alcaldesa destacou “o orgullo que supón ver a máis de 700 persoas de distintas xeracións unidas pola cultura nun espazo público tan vivo como a nosa Alameda”. Pola súa banda, o concelleiro de Ensino, Alberto Álvarez, valorou a iniciativa como “todo un éxito” e agradeceu ao CEP Santa Mariña, á ANPA Ernestina Otero e ás Bibliotecas Municipais a súa implicación na organización deste evento xunto co Concello. A alcaldesa, que conversou coa rapazada e os maiores, afirmou que o Concello “estará sempre apoiando iniciativas como esta, na que a cidadanía, tanto a infancia como os maiores, son protagonistas”.

A alameda converteuse nunha gran biblioteca ao aire libre onde se realizaron lecturas compartidas, intercambio de marcapáxinas e desfile de contos. Para pechar a xornada os máis pequenos divertíronse, cantaron e bailaron coa actuación do grupo Barafunda na propia Alameda. Pola súa banda, o alumnado de secundaria trasladouse ao Multiusos da Xunqueira onde participaron nun proveitoso obradoiro de ilustración impartido polo recoñecido artista Víctor Rivas.

Participaron a EEI A Marisma, EEI de San Pedro de Cesantes e Ventosela, os colexios Alexandre Bóveda, Cedeira, Igrexa Chapela, Outeiro das Penas, Quintela, Reboreda, Santa Mariña,Ponte Sampaio e colexio Vigo, así como os institutos Illa de San Simón, Mendiño e Pedro Floriani.

La entrada O encontro interxeracional “Lectura na rúa” reúne a máis de 700 escolares e maiores se publicó primero en Concello de Redondela.

– O Servizo de Normalización Lingüística do Concello organiza nos colexios do municipio un total de 10 sesións de contos musicados e ilustrados baixo o título “As legras de Begoña”, a cargo do “Colectivo Xurelo”.

– A alcaldesa, Digna Rivas, destacou o formato “visual e dinámico” dos contos con ilustracións e música en directo, o que fai que a actividade sexa “moi atractiva para nenos e nenas”. Hoxe comezaron nos CEIP Outeiro das Penas e Porto Cabeiro, e continuarán nos vindeiros días no resto de centros.

As actividades programadas polo Concello de Redondela co gallo do Día das Letras Galegas continúan en marcha co obxectivo de dar a coñecer a vida e a obra de Begoña Caamaño, a autora homenaxeada este ano. Con este propósito, o Servizo de Normalización Lingüística que dirixe a alcaldesa, Digna Rivas, organiza un ciclo de contacontos musicados e ilustrados que percorrerá os centros educativos do municipio.

As sesións corren a cargo de “Colectivo Xurelo”, grupo herdeiro de “Polo Correo do Vento”. O programa arrancou hoxe mesmo coas primeiras citas no CEIP Outeiro das Penas (Cesantes) e no CEP de Porto Cabeiro. A alcaldesa e o concelleiro de Ensino, Alberto Álvarez, compartiron a xornada co alumnado. En total, levaranse a cabo 10 sesións repartidas polas distintas escolas de Educación Infantil e Primaria do municipio e chegarán a máis de 250 nenos e nenas. As sesións están deseñadas cun formato moi visual e dinámico. “A combinación de narración oral, ilustración en vivo e música en directo fai que a actividade sexa moi atractiva para os nenos e nenas”.

Esta campaña serve como un complemento ideal á programación didáctica realizada previamente nas escolas. Nenos e nenas fixeron co profesorado un traballo de investigación sobre Begoña Caamaño antes da celebración das Legras Galegas, “e demostraron ter moitos coñecementos sobre a autora e tamén sobre o que significa a celebración do 17 de maio”, destacou Rivas. Isto permítelles seguir con moita máis facilidade as funcións de “Colectivo Xurelo”, que achega datos biográficos e literarios logrando así un reforzo lúdico dos seus coñecementos sobre Begoña Caamaño.

La entrada O Concello leva a figura de Begoña Caamaño aos colexios con contos ilustrados e musicados se publicó primero en Concello de Redondela.

– Redondela pon en marcha a súa I Semana sen Fume. A iniciativa nace da Mesa Local de Saúde para concienciar sobre os riscos do tabaquismo e promover hábitos saudables. O Concello declarará un espazo público “libre de fume”. A cidadanía poderá escoller entre o Paseo de Arealonga, a Xunqueira e a Alameda de Castelao, que son os lugares propostos polo alumnado dos institutos.

– A votación popular estará aberta na web e redes sociais municipais ata o vindeiro 24 de maio. A alcaldesa, Digna Rivas, afirma que coa votación popular “construímos xuntos un modelo de vila máis saudable, sostible e respectuosa co benestar de todos” .

Redondela pon en marcha a súa I Semana sen Fume, unha iniciativa xurdida do grupo de traballo en saúde infanto-xuvenil da Mesa Local de Saúde. O obxectivo prioritario desta campaña é concienciar á poboación sobre os riscos derivados do tabaquismo e fomentar hábitos de vida saudables en todo o termo municipal.

A primeira actividade da programación será a votación popular organizada en colaboración coa Asociación Española Contra o Cancro (AECC). As veciñas e veciños de Redondela poderán decidir que espazo público do municipio será declarado oficialmente como “Libre de Fume”. As opcións foron propostas polo alumnado dos institutos. A rapazada participou nun concurso de carteis e vídeos no que argumentaron os motivos para protexer estes lugares do fume do tabaco. Os espazos finalistas son: paseo de Arealonga (proposta do IES Chapela); a Xunqueira (proposta do IES Illa de San Simón) e a Xunqueira e alameda Castelao (proposta do IES Mendiño). A votación realízase de xeito telemático a través da páxina web e as redes do Concello, e estará aberta ata o 24 de maio. Pódese acceder á enquisa no seguinte enlace: Espazos.Sen.Fume.Redondela.

A alcaldesa, Digna Rivas, destacou o papel dos institutos nesta campaña: “O alumnado demostrou estar moi comprometido e deseñou as propostas. Agora será a veciñanza a que escolla o espazo público que se declarará libre de fume. Deste xeito construímos xuntos unha vila máis saudable e respectuosa co benestar de todas e todos”. Pola súa banda, o concelleiro de Medio Ambiente e Saúde, Alberto Álvarez, subliñou o dobre impacto da iniciativa: “Por unha banda melloramos a calidade do aire e a saúde pública, e ao mesmo tempo evitamos a contaminación das cabichas nestes espazos públicos.”

Obradoiros informativos e acto oficial. A programación continuará o xoves 28 de maio cun obradoiro impartido por persoal técnico da AECC. Estas charlas, dirixidas ao alumnado dos institutos, abordarán as consecuencias do consumo de tabaco e dos dispositivos de vapeo (vápers). As sesións celebraranse nos multiusos de Chapela e de Redondela. Como colofón da semana, o venres 29 de maio terá lugar o acto institucional de declaración oficial como “Espazo Libre de Fume” o lugar que resulte gañador na votación popular.

La entrada A cidadanía de Redondela escolle o próximo “Espazo sen fume” do municipio se publicó primero en Concello de Redondela.

– O municipio acollerá os actos centrais de San Honorato, patrón das panaderías e pastelerías. Será o 27 de maio na Casona da Torre. O evento contará con actos abertos ao público: unha exhibición do alumnado do CIFP Manuel Antonio, enfocada en potenciar a formación, e unha conferencia do xornalista e divulgador Ibán Yarza.

– A alcaldesa, Digna Rivas, destacou os actos de recoñecemento a persoas do sector, especialmente a homenaxe póstuma a JesúsTroiteiro, da Panadería Nosa Señora da Peneda, así como o recoñecemento ás mulleres do sector: “Foron o motor invisible que sostiña os fornos e sen o seu traballo non se entendería a excelencia da nosa terra”.

O Concello de Redondela foi elixido como a sede provincial para acoller a celebración de San Honorato 2026, o patrón dos panadeiros e panadeiras e das pastelerías. A alcaldesa de Redondela, Digna Rivas, xunto co presidente da Asociación Provincial de Industriais Panadeiros e Pasteleiros de Pontevedra (APROINPPA), Francisco Sánchez, o secretario, Antonio del Río, e a concelleira de Cultura, Rita Pérez, presentaron hoxe os detalles desta xornada que porá en valor a tradición e o futuro do sector.

A alcaldesa amosou a súa gratitude á asociación por elixir Redondela como sede dunha xornada tan importante e destacou o arraigo que o oficio do pan ten no municipio. Todos os actos concentraranse o vindeiro mércores 27 de maio na Casona da Torre, no que se reunirán máis dun cento de panadeiros e panadeiras. O evento contará cunha axenda completa que conxuga a aprendizaxe técnica co recoñecemento profesional.

A xornada comezará con dúas actividades abertas ao público en xeral. Ás 12.15 horas comezará unha exhibición a cargo do alumnado do CIFP Manuel Antonio de Vigo, enfocada en potenciar a formación e o relevo das novas xeracións de panadeiros e pasteleiros. Ás 13.00 horas o recoñecido autor, xornalista e divulgador da cultura do pan, Ibán Yarza, ofrecerá unha conferencia.

As actividades da tarde están reservadas aos socios, e centrarase nos tradicionais recoñecementos a persoas vinculadas ao sector. Entre os homenaxeados deste ano estará, a título póstumo, Jesús Troiteiro, da Panadería Nosa Señora da Peneda. Rivas salientou que se trata dun negocio familiar que chega á cuarta xeración “como referente de traballo e bo facer na parroquia do Viso”. Tamén se fará un recoñecemento público ás mulleres panadeiras e pasteleiras. A alcaldesa salienta esta posta en valor do traballo feminino por parte da asociación, xa que as mulleres “foron o motor invisible que sostiña os fornos e sen o seu traballo non se entendería a excelencia da nosa terra”.

A xornada rematará cun peche festivo cos cómicos Pedro Galocha e Jonathan Seoane.

La entrada Redondela reúne ás panaderías da provincia nunha xornada de formación e homenaxes se publicó primero en Concello de Redondela.

– A Alameda Castelao acolleu onte o VI Torneo Intercentros “Xadrez na Rúa”, que congregou a un total de 382 xogadores e xogadoras procedentes de 15 colexios e institutos. A alcaldesa, Digna Rivas, sinalou que este torneo demostra que o xadrez é “unha ferramenta educativa excepcional para aprender estratexia, respecto e convivencia fóra das aulas”. O certame está coordinado por Miguel Ángel Vidal, mestre do IES Floriani, coa colaboración do Concello de Redondela. 

No acto, ademais da rexedora local, tamén estiveron presentes o concelleiro de Deportes, Antonio Cabaleiro, e o concelleiro de Ensino, Alberto Álvarez, que acompañaron aos escolares durante o desenvolvemento das partidas e a posterior entrega de premios. O torneo contou coa participación de centros de Redondela e concellos veciños: CEIP Quintela, CEIP Reboreda, CEIP Cedeira, CEIP Alexandre Bóveda, CEIP Porto Cabeiro, CEP Santa Mariña, CEIP Outeiro das Penas, Colexio Vigo, IES Mendiño, IES San Simón, IES Pedro Floriani, IES Chapela, IES Soutomaior, e os dous centros de Tui, o IES Indalecio Pérez Tizón e o IES San Paio.

A alcaldesa de Redondela, Digna Rivas, amosou a súa satisfacción polo éxito de convocatoria desta sexta edición. “Ver a Alameda Castelao chea de mocidade compartindo unha xornada en torno ao xadrez é un orgullo para o noso municipio. Este torneo demostra que o xadrez é unha ferramenta educativa excepcional para aprender estratexia, respecto e convivencia fóra das aulas”, destacou a rexedora.

A xornada destacou polo alto nivel competitivo. Na categoría de Educación Primaria, o CEIP Outeiro das Penas fixo pleno ao copar o podio. O primeiro posto foi para Gorka Leirós, seguido de Daniel Ivanov en segunda posición e Romero Correa no terceiro lugar.

Na categoría de Educación Secundaria (ESO), o triunfo individual quedou en Redondela grazas a Andrés Ojea, do IES Mendiño, que se proclamou campión. O segundo e o terceiro posto viaxaron a Tui, correspondendo a Telmo Pazo e Martín Iglesias, ambos alumnos do IES Indalecio Pérez Tizón.

A organización subliñou que a participación neste torneo seguiu a tónica habitual deste deporte, cunha presenza maioritariamente masculina. Respecto a este feito, a alcaldesa incidiu no compromiso do goberno local por reverter esta situación: “Sabemos que a fenda de xénero no xadrez é unha realidade xeral. Por iso, iniciativas como o sorteo de libros Miradas de Campeonas buscan dar referentes ás nosas nenas, visibilizar o talento feminino na historia deste deporte e animalas a participar con forza e sen complexos”.

La entrada Preto de 400 estudantes participan no VI “Xadrez na Rúa” na Alameda Castelao se publicó primero en Concello de Redondela.

– A Alameda Castelao acolleu a celebración das Letras Galegas cun acto no que participaron estudantes e a directora do IES Mendiño, a xornalista Carolina Sertal e a libreira Tania Lago.

– A alcaldesa, Digna Rivas, lembrou que o galego é un elemento “de unión e un compromiso” que nos identifica como pobo. Rivas reivindicou o legado de Caamaño como “unha muller comprometida e feminista que puxo o foco nos retos da nosa sociedade”.

O Concello de Redondela celebrou esta mañá o acto institucional co gallo do Día das Letras Galegas na Alameda Castelao. O acto centrouse na posta en valor do noso idioma e na homenaxe á xornalista, escritora e activista feminista Begoña Caamaño. A xornada comezou coas notas musicais da alborada a cargo do gaiteiro Olimpio Xiráldez. O técnico de Normalización Lingüística do Concello, Xurxo Martínez, foi o encargado de presentar o acto, no que interviron a directora do IES Mendiño, Carmen Vallejo e alumnado do centro. Alba, Anxo, Irene, María e Nerea realizaron unhas emotivas dramatizacións baseadas en textos de Morgana en Esmelle e Circe ou o pracer do azul, achegando o universo literario de Caamaño a todo público. A libreira Tania Lago e a xornalista Carolina Sertal achegaron a súa visión sobre as literatura galega, o papel das mulleres neste sector e o compromiso social da homenaxeada.

Un proxecto de lingua para todo o ano

A alcaldesa, Digna Rivas, quixo gabar o traballo do tecido asociativo local, escolas públicas, institutos e asociacións que fixeron diferentes actos ao redor das Letras Galegas. A rexedora insistiu en que o coidado do galego non debe limitarse a unha única xornada festiva, polo que desde o Concello promóvense actividades ao longo de todo ano como os contacontos musicados, a iniciativa “Unha semaniña enteira”, as xornadas de Ciencia en Galego, e a recollida de toponimia en todas as parroquias, entre outras. Para rematar, Digna Rivas fixo un chamamento á cohesión social e política en Redondela ao redor do patrimonio lingüístico. “O galego é un compromiso que identifica a Redondela desde hai moitos anos, somos un exemplo de que a lingua é un elemento de unión”.

O evento concluíu de forma moi emotiva coa tradicional ofrenda floral na estatua de Castelao e a interpretación do Himno de Galicia.

La entrada Redondela reafirma o seu compromiso coa lingua cunha homenaxe a Begoña Caamaño se publicó primero en Concello de Redondela.

– O Goberno local aposta este ano por reforzar a cita e recuperar o inicio das festas xa na fin de semana anterior, algo que non se facía desde 1989. O calendario festivo comezará o 30 de maio co I Choquiño Urban Fest e IV Urban Jam, e prolongarase ata o 7 de xuño. Inclúe grandes concertos como El Drogas, no Redondela Rock, Marc Seguí, e as orquestras Panorama e París de Noia, ademais de grupos locais e programación para o público infantil co Payaso Tallarín e Uxía Lambona.

– A alcaldesa, Digna Rivas, destaca o protagonismo das tradicións ancestrais como as danzas das Penlas e as Espadas, xunto coas alfombras florais. Rivas agradeceu a participación da veciñanza e puxo en valor “o gran traballo e a implicación de danzantes e alfombristas para manter viva a tradición”. A pregoeira este ano será Carla Abad, figura destacada do deporte local.

O Concello de Redondela presentou a nova edición da Festa da Coca, cita declarada de Interese Turístico de Galicia. O Goberno local aposta este ano por reforzar a cita e recuperar o inicio das festas xa na fin de semana anterior, algo que non se facía desde 1989. Así, a programación comeza o sábado 30 de maio e prolóngase ata o domingo 7 de xuño con actuacións de gran nivel e pensadas para todos os públicos. Durante o acto de presentación a alcaldesa Digna Rivas, manifestou o seu orgullo por unha celebración que define a identidade do municipio. “Esta é unha festa que é de todos e de todas”, sinalou a rexedora, que agradeceu “o gran traballo, esforzo e participación da veciñanza, que ano tras ano se envorca para facer lucir a nosa vila”. Na presentación participou unha representación de alfombristas e das danzas das Penlas e as Espadas, así como a pregoeira, Carla Abad, e a concelleira de Cultura, Rita Pérez.

Tradicións e participación cidadá

Os ritos ancestrais das danzas volverán conmover ao público nas rúas e prazas xunto á Coca, “a verdadeira esencia destas festas” nunhas rúas engaladas polas espectaculares alfombras florais no centro urbano e Vilavella.

A encargada de dar o pregón será Carla Abad, de quen Rivas destacou a súa traxectoria vencellada ao deporte local desde as categorías de base, e agora tamén na Federación Galega de Balonmán.

Grandes concertos e actividades para o público infantil e xuvenil

A alcaldesa salientou “o excelente nivel e a variedade” dunha oferta musical e de lecer. “Artellar unha axenda que combina figuras de renome estatal co pulo dos artistas locais para unha programación con identidade propia”, subliñou a rexedora. Rivas destacou a aposta pola mocidade e as novas tendencias con citas urbanas potentes como o Choquiño Urban Fest e o Urban Jam, sen esquecer ao público máis miúdo, que contará cunha proposta familiar estrela da man do recoñecido espectáculo musical “El Payaso Tallarín, Un Mundo Mágico”. O Rock Redondela, as orquestras Panorama e París de Noia, e o concerto de Marc Seguí son algunhas das grandes propostas destes días en Redondela.

Programa Oficial da Festa da Coca 2026

Sábado 30 de maio

• 11.00 h. Choquiño Urban Jam nas inmediacións do Skate Park da Marisma. Obradoiros de Parkour, Skate, Breaking e Stencil. Exhibición profesional de BMX FlatLand. (de balde)

• 19:30 h. Choquiño Urban Fest no Campo da Feira (Entrada de balde). Coas actuacións de: 9Louro, Ortiga, Kike Varela, DJ Valdi, DJ Ramsés López, French Riviera e Rodri Vegas.

Domingo 31 de maio

• 18:30 h. Público Infantil/Familiar: Cantaxogos “El Payaso Tallarín, Un Mundo Mágico” no Campo da Feira.

Mércores 3 de xuño

• 18:00 h. Desfile de Xigantes e Cabezudos co grupo de gaitas Airiños de San Simón.

• 19:30 h. Concerto da Orquestra de Saxos de Redondela na Praza do Concello.

• 20:00 h. Lectura do pregón por Carla Abad Alonso, Relevo das Penlas, Homenaxe ás/aos Alfombristas, Danza das Espadas e acendido da iluminación.

• 22:00 h. Concerto da Orquestra Panorama no Campo da Feira.

• Durante a noite: Elaboración das Alfombras Florais polas rúas de Redondela.

Xoves 4 de xuño

• 11:00 h. Traslado da Virxe “A Gabacha” desde Vilavella á Igrexa de Santiago, coa Danza das Espadas, as Penlas e a Banda de Música de Redondela.

• 12:00 h. Desfile da Coca cos Mordomos e Diañiños, Xigantes e Cabezudos con Son do Castro.

• 12:00 h. Misa Maior na Igrexa de Santiago de Redondela.

• 13:00 h. Procesión polas rúas decoradas, Banda de Música Municipal e Baile de homenaxe da Danza das Espadas e das Penlas na Praza da Constitución.

• 18:00 h. Concerto da Banda de Música de Redondela na Alameda de Castelao.

• 19:30 h. Público Infantil/Familiar: Concerto de Uxía Lambona e a Banda Molona na Alameda.

• 21:30 h. Concerto da Orquestra Gran Parada no Campo da Feira.

Venres 5 de xuño

• 10:30 h. Alborada coa Banda de Música Municipal de Redondela.

• 11:30 h. Retorno da Virxe “A Gabacha”.

• 18:00 h. Deporte: Balonmán na Rúa na pista da Xunqueira e Alameda.

• 20:00 h. Redondela Rock no Campo da Feira coas actuacións de: El Drogas, Los Ásperos, Chocolate Sexy, Nocheni, Vértize e Dassault.

Sábado 6 de xuño

• 11:00 h. Alborada coa Banda de Música de Arcade.

• 18:00 h. Concerto da Banda de Música de Arcade na Alameda de Castelao.

• 22:00 h. Concerto da Orquestra Los Players no Campo da Feira.

• 01:00 h. Concerto de Marc Seguí no Campo da Feira.

• 02:30 h. Sesión DJ con Rodri Vegas no Campo da Feira.

• Durante a noite: Elaboración das Alfombras Florais nas rúas de Vilavella.

Domingo 7 de xuño

• 10:00 h. Alborada coa Banda de Música de Chapela.

• 12:00 h. Desfile da Coca cos Mordomos e Diañiños co grupo O Carballo das Cen Pólas.

• 12:00 h. Misa na Igrexa de Vilavella.

• 13:00 h. Procesión en Vilavella, Danza das Espadas e das Penlas e Baile de homenaxe na Praza de Ribadavia.

• 18:00 h. Concerto da Banda de Música de Chapela na Alameda de Castelao.

• 19:00 h. Actividade familiar: Patina na Rúa na pista da Xunqueira.

• 21:30 h. Fin de festa coa Orquestra París de Noia no Campo da Feira.

La entrada A Festa da Coca recupera a tradición con actividades do 30 de maio ao 7 de xuño se publicó primero en Concello de Redondela.

Imaxes dunha edición anterior do Choquiño Urban Jam.

– O Concello organiza actividades gratuítas con obradoiros de Parkour, Skate, Breaking e Stencil. Os talleres rematarán cunha exhibición profesional de BMX FlatLand. A alcaldesa fai un chamamento á participación da rapazada: “É unha gran oportunidade para iniciarse ou perfeccionar estas disciplinas con monitores profesionais”.

– A programación de deportes urbanos na Marisma sumarase a unha competa xornada de actividades coas actuacións musicais de Ortiga, 9Louro e Kike Varela no Campo da Feira. A alcaldesa destaca a importancia de ofrecer á mocidade actividades de lecer saudables para dar saída “ao seu talento, creatividade e enerxía”. Será un evento “único e integrador onde os espazos públicos terán máis vida ca nunca”, afirma Rivas.

O Concello de Redondela aposta firmemente polas novas tendencias coa celebración do IV Choquiño Urban Jam o vindeiro sábado 30 de maio. Esta completa programación de deportes e disciplinas urbanas servirá como antesala e complemento perfecto do I Choquiño Urban Fest, o gran festival musical de balde dirixido á mocidade. A alcaldesa, Digna Rivas, destacou a importancia de ofrecer ás novas xeracións este tipo de propostas: “Queremos que Redondela sexa un referente en espazos de lecer saudable. O Choquiño Urban Jam e o Urban Fest son unha canle par o talento, a creatividade e a enerxía de toda a nosa mocidade”. Redondela celebra un evento “único, integrador e totalmente gratuíto onde os espazos públicos cobran máis vida ca nunca”, afirma Rivas. A música e o ritmo nocturno correrán a cargo de referentes da escena alternativa e electrónica galega como Ortiga, 9Louro, Kike Varela e French Rivera xunto a recoñecidos picadiscos como Rodri Vegas, Dj Valdi e Ramsés López.  A partir das 19.30 no Campo da Feira.

IV Choquiño Urban Jam

Desde as 11.00 horas a contorna do SkatePark da Marisma acollerá unha intensa xornada de acción. Para isto instalarase unha infraestrutura modular profesional que acollerá obradoiros formativos e exhibicións. Celebrarase un obradoiro de Breaking, para rapazada desde os 8 anos, con introdución á danza urbana e acrobacias. A partir dos 10 anos poderán participar nos obradoiro de Parkour (con técnicas de salto), Skate (con práctica de xiros e trucos), e un taller de Stencil (a arte urbana de customización de camisetas con sprays e plantillas). Para rematar, na zona deportiva da Marisma o público desfrutará dunha exhibición profesional de BMX FlatLand. Nesta disciplina, os pilotos executarán complexas manobras de equilibrio e xiros antes de que a música comece a soar no Campo da Feira.

A alcaldesa convida a toda a rapazada de Redondela a participar nesta xornada, “unha oportunidade inmellorable para iniciarse ou perfeccionar estas disciplinas de deporte urbano da man de monitores profesionais”.

La entrada O IV Choquiño Urban Jam completa a oferta do Urban Fest co deporte máis espectacular se publicó primero en Concello de Redondela.

– A rexedora redondelá asinou a ‘III Declaración de María Pita’ xunto a dirixentes de todo o Estado nun foro centrado no liderado feminino e a xestión cultural municipal. “A cultura non é un elemento accesorio, é unha ferramenta fundamental para construír vilas máis xustas, diversas e igualitarias. Desde o municipalismo debemos consolidar espazos de xestión con ollada feminista”, salientou Rivas.

A alcaldesa do Concello de Redondela, Digna Rivas, participou na Coruña no III Encontro de Alcaldesas celebrado onte. Esta cita de alcance estatal reúne ás principais rexedoras e mulleres referentes do sector baixo o lema “Cultura Feminista, Feminismo na Cultura. As alcaldesas falan”. O obxectivo central do foro é analizar o impacto transformador das políticas culturais locais desde unha perspectiva estritamente feminista. No Pazo Municipal de María Pita Digna Rivas rubricou, xunto ao resto de alcaldesas participantes, a III Declaración de María Pita, un manifesto conxunto que reafirma o compromiso dos gobernos locais co deseño de estratexias culturais que “visibilicen, protexan e impulsen o talento das mulleres”.

“A cultura non é un elemento accesorio, é unha ferramenta fundamental para construír vilas máis xustas, diversas e igualitarias. Cómpre compartir experiencias entre Concellos, xa que desde o municipalismo debemos consolidar estes espazos de xestión con ollada feminista”, salientou a alcaldesa de Redondela. Rivas agradeceu a iniciativa e o convite do Concello da Coruña. Con este desprazamento, o Goberno local de Redondela mantén o seu posicionamento activo nas redes de gobernanza estatal, exportando o modelo de xestión do municipio e estreitando lazos de cooperación institucional con outras administracións locais en materia de igualdade real.

La entrada Rivas reivindica na Coruña o poder da cultura como motor de igualdade no “III Encontro de Alcaldesas” se publicó primero en Concello de Redondela.

O concelleiro de Medio Ambiente, Alberto Álvarez, reuniuse co equipo de traballo de “Mariscando conCiencias para o Futuro”

– Dende marzo, máis dun cento de escolares e colectivos achegáronse aos oficios do mar da man das súas profesionais e do Future Oceans Lab da Uvigo. A colaboración da Universidade foi clave para explicar a alta mortandade de marisco e o impacto ambiental que sofre a enseada de San Simón pola contaminación e o cambio climático.

– A vindeira cita será o 2 de xuño cunha xornada sobre a pesca artesanal no mundo que contará con investigadoras e traballos audiovisuais realizados por mulleres do mar de Xapón, México ou O Salvador.

O Concello de Redondela fai un balance moi positivo do programa “Mariscando conCiencias para o Futuro” tras os seus primeiros meses de andaina. Esta iniciativa, que nace da intersección entre as ciencias do mar, a pesca artesanal e a arte comunitaria, reuniu xa a máis dun cento de persoas nas súas actividades. O obxectivo é dignificar os oficios do mar e concienciar sobre a saúde ambiental da nosa costa, así como establecer alianzas con asociacións e xente do mar para reflexionar sobre o pasado, presente e futuro da pesca artesanal.

Dende o mes de marzo, o alumnado de varios CEIPs do municipio e persoas vinculadas á asociación Lenda participaron en xornadas onde mariscadoras a pé e mariñeiros de litoral compartiron os segredos das súas artes. Os participantes aprenderon sobre as ferramentas, a organización do sector e a importancia do carácter artesanal da pesca. A parte práctica permitiu aos asistentes por as botas de auga para identificar especies como ameixas, berberechos ou longueiróns. Nesta fase, a colaboración do Future Oceans Lab (UVigo) foi clave para explicar a alta mortaldade de marisco e os impactos ambientais que sofre a enseada de San Simón pol contaminación e o cambio climático.

Próxima cita: 2 de xuño, unha ollada global

O concelleiro de Medio Ambiente, Alberto Álvarez, reuniuse co equipo de traballo nunha sesión na que perfilaron a próxima actividade. Será o 2 de xuño no Multiusos da Xunqueira cunha xornada dedicada á “Pesca costeira artesanal arredor do mundo”. Redondela será o punto de encontro para analizar a situación actual do sector. A xornada contará coa participación de investigadoras e mariscadoras que dialogarán sobre os retos globais do mar. A programación incluirá a proxección de testemuños en vídeo de mulleres do mar de países como Xapón ou México, permitindo coñecer as realidades locais coas doutros continentes. Ademais, inaugurarase unha exposición fotográfica sobre as mulleres do mar do Salvador, elaborada por ACPP Galicia que reforza o carácter multicultural da iniciativa.

“Mariscando conCiencias para o Futuro” é un proxecto promovido por Amarturmar, Artelixo, Future Oceans Lab (UVigo), Cidadania S. Coop. Galega e o Concello de Redondela, contando co financiamento da Fundación Daniel y Nina Carasso.

La entrada “Mariscando conCiencias” celebra unha xornada sobre pesca artesanal arredor do mundo se publicó primero en Concello de Redondela.