As Bibliotecas Municipais de Redondela presentamos o novo Reto Lector 2026.

Unha proposta suxestiva, estimulante e lúdica de facer percorridos lectores ao longo do ano. Consta de 9 lecturas a completar, que se poderán desenvolver dende o luns 2 de febreiro e ata acabar 2026.

9 desafíos lectores que van desde ubicacións xeográficas, pasando por etnoloxía, xéneros literarios, paisaxes, contidos ou improntas emocionais. Un enredo no que gozaredes de ler libros diferentes, e para o que podedes contar, coma non, coas suxestións do persoal das vosas bibliotecas.

Podedes compartir a vosa participación nas Redes Sociais, co cancelo #RetoLector2026BibliotecasRedondela

• REQUISITOS:

– Para lectores e lectoras ADULTOS (a partir dos 14 anos).

– Contaranse para o reto só os libros prestados nas Bibliotecas Municipais de Redondela.

– As persoas participantes levarán o seu PASAPORTE lector.

– Con cada devolución do libro prestado, selarase cada unha das casiñas do pasaporte. Podedes facelo tanto na Biblioteca de Redondela como na de Chapela.

– Podedes facer o reto seguindo orde que prefirades. Do que se trata é de completar as 9 propostas.

– O tempo para realizalo será desde o luns 2 de febreiro e ata o 31 de decembro.

• SORTEO:

– As persoas que completen os 9 retos participarán nun sorteo dunha cesta de libros, que se celebrará nas primeiras semanas de 2027.
– Faranse dous sorteos, un para cada biblioteca:

• Biblioteca Valle-Inclán de Redondela.
• Biblioteca Xela Arias de Chapela.

– Para os premios, contaremos coa colaboración inestimable da Fundación Filomena Rivero Alonso.

• RETO CLÁSICO:

Na vindeira semana tamén a Fundación Filomena Rivero Alonso achegaranos tamén un pequeno desafío de lectura de clásicos, ao que vos animamos a que vos sumedes. Moi pronto informaremos!

La entrada As Bibliotecas Municipais de Redondela propoñen un novo RETO LECTOR para o 2026 se publicó primero en Concello de Redondela.

O 30 de xaneiro é unha data significativa para as bibliotecas de Galicia. Nese día celébrase o aniversario do nacemento de Daniel Alfonso Rodríguez Castelao e, por tal motivo, veu en ser recoñecido como o DÍA DA ILUSTRACIÓN dentro do Calendario do Libro e da Lectura de Galicia.

Unha data singular creada no ano 2014 para facer homenaxe a debuxantes, ilustradores, coloristas, e a todos os profesionais da ilustración, co obxectivo de destacar a súa labor e reivindicar o seu importante papel na industria cultural, como indica a Asociación Galega de Profesionais da Ilustración (AGPI).

Este ano homenaxea á figura de SIRO.

🎨 Dende as nosas bibliotecas tamén queremos poñer o noso gran de area para festexar este día, e para iso realizaremos unha actividade moi chula para nenos e nenas

• Xoves 29 de xaneiro, ás 18:00 h: obradoiro de ilustración para nenos e nenas, coa ilustradora Noa López.

– Para nenos e nenas de 6 a 12 anos.
– Precisa inscrición. Podedes facelo telefónicamente: 986-454-226 ou por correo electrónico: bibliotecachapela@redondela.gal.

Animádevos a pasar unha tarde sensacional na biblioteca.

La entrada DÍA DA ILUSTRACIÓN: Obradoiro infantil de ilustración na Biblioteca Xela Arias se publicó primero en Concello de Redondela.

O club infantil Tropa Creativa volta á biblioteca Xela Arias co comezo de ano.

Desta vez deixamos un pouco de descanso para a historia da arte e comezamos coa historia da literatura como temática para traballar moitas cousas.

MARTES 13 de XANEIRO, de 18:00 a 19:30 h.

Xogaremos coa literatura oral e os mitos.
E faremos os nosos traballos manuais.

O club infantil é un espazo mensual para que rapazada de 8 a 12 anos goce da aprendizaxe, da lectura de textos, de investigar, e de facer tarefas manuais. Pero, sobre todo, é un espazo de xuntanza e diversión.

Se vos apetece participar, contactade coa biblioteca!

La entrada Tropa creativa – club infantil da Biblioteca Xela Arias se publicó primero en Concello de Redondela.

As bibliotecas municipais de Redondela danlle a benvida ao Nadal con cadanseu contacontos infantil.

• A Biblioteca Valle-Inclán de Redondela, festexará o Nadal conmemorando o 250 aniversario de Jane Austen cun contacontos baseado na escritora e nas súas obras máis senlleiras.
  “Jane Austen polo Nadal”. Unha actividade organizada pola Fundación Filomena Rivero Alonso, coa contadora Olga Cuervo.

Será o luns 22 de decembro ás 18:00 h.

A actividade está pensada para nenos e nenas a partir de 4 anos e público familiar.
Inscricións na Biblioteca Valle-Inclán: 986-401-561.

• A Biblioteca Xela Arias de Chapela, festexará o Nadal achegando cun especial para estas datas dos seus “Contos da Veciñanza, especial Nadal”, grazas á participación das usuarias Lía e mais Beatriz.

Será o martes 23 de decembro ás 18:30 h.

A actividade está pensada para nenos e nenas a partir de 3 anos e público familiar.
Inscricións na Biblioteca Xela Arias: 986-454-226 ou bibliotecachapela@redondela.gal.

Lembrade que, despois destes días, as bibliotecas muncipais reducirán o seu horario durante as datas de Nadal.
Podedes consultalo aquí.

La entrada Especial Nadal nas Bibliotecas Municipais de Redondela se publicó primero en Concello de Redondela.

La entrada Actividades polo 25 de novembro – Día Internacional para a Eliminación da Violencia contra as Mulleres se publicó primero en Concello de Redondela.

Este mes de novembro a Biblioteca de Chapela comprácese en ofrecer un novo contacontos para cativos.

De novo as familias poderán inscribirse na biblioteca para gozar dunha divertida contada, que nos ofrecerá unha usuaria da biblioteca.

Será o venres 14 de novembro, ás 18:30 h, na sala infantil da Biblioteca Xela Arias.
Contaremos con Beatriz, usuaria da biblioteca, mamá e namorada da literatura infantil, que xa nos ten ofrecido outras sesións.

• Para nenos e nenas a partir dos 3 anos.
• Insricións na biblioteca.

La entrada Nova sesión de Contos da Veciñanza, contacontos para cativos na Biblioteca Xela Arias se publicó primero en Concello de Redondela.

O Servizo de Normalización Lingüística de Redondela e mais a Biblioteca Xela Arias comprácense en recibir á Dra. Carmen de Santiago Gómez, investigadora na Universidade de Santiago de Compostela e asemade no Centro Ramón Piñeiro para a Investigación en Humanidades.

Carmen de Santiago é unha xoven investigadora que en 2022 obtivo o título de Doutora (Mención internacional) coa tese titulada O cancioneiro do trobador Johan Soarez Somesso. Edición crítica e estudo, cun rigoroso traballo que non só recibiu un sobresaínte Cum Laude senón que foi recoñecido co Premio extraordinario de doutoramento pola USC.

A súa actividade investigadora céntrase fundamentalmente nos ámbitos da crítica textual, a literatura medieval (con especial atención á lírica galego-portuguesa) e as Humanidades Dixitais.

Estará con nós o mércores 21 de maio, ás 20:00 h. para ofrecernos A orixe da lírica medieval galega. Un trobador de Chapela? Unha conferencia na que nos achegará a figura do trobador Johan Soarez Somesso, identificado como o Señor de Chapela por algúns investigadores, e para debullarnos unha época de grande riqueza histórica e literaria na nosa contorna.

La entrada Conferencia na Biblioteca Xela Arias: Lírica medieval, un trobador de Chapela? se publicó primero en Concello de Redondela.

O venres 16 de maio, ás 17:00 h. , véspera das Letras Galegas, a Biblioteca Xela Arias fará o seu pequeno homenaxe á poesía popular e ás mulleres que a transmitiron a través da música e os cantos.

Faremos a nosa homenaxe ás pandereteiras e ás cantareiras da man do grupo folclórico Anaquiños.

La entrada Celebramos as Letras Galegas na Biblioteca Xela Arias se publicó primero en Concello de Redondela.

E no mes de maio…. volven os «Contos da veciñanza» á Biblioteca Xela Arias de Chapela!

E nada mellor que facelo arredor do Día Internacional das Familias. Unha data singular do calendario que nós festexaremos con este encontro veciñal arredor da narrativa oral.

Despois de dúas  sesións divertidísimas, ofrecidas por contistas voluntarias da nosa contorna, e porque non hai dous sen tres, o vindeiro xoves atreverémonos cunha terceira aposta por Contos da Veciñanza.

Unha tarde para gozar en familia, compartindo nervios, un pouco de vergoña, risas, diversión, e moitos contos coas persoas máis afoutas da veciñanza, que son aquelas que se atreven a contar en público, e que nesta ocasión serán dúas das mamás máis gaioleiras da nosa contorna: Rebeca e mais Sonia.

E, de novo, ao rematar faremos algunha pequena actividade manual para compartir entre cativos e adultos.

Será o xoves 22 de maio, ás 18:00 h. (data modificada).

– A proposta é para nenos e nenas a partir de 3 anos.
– Dado que as prazas son moi limitadas, deberedes anotarvos previamente na biblioteca.

986-454-226

bibliotecachapela@redondela.gal

Este ano a Biblioteca Xela Arias celebra o seu 20 aniversario, e quere facelo fortalecendo o seu vencello coas persoas usuarias.

Grazas á veciñanza polo seu talento e xenerosidade.

#ContosdaVeciñanza

La entrada No Día das Familias voltan os “Contos da Veciñanza” á Biblioteca Xela Arias se publicó primero en Concello de Redondela.

Como xa sabemos, o 23 de abril celébrase o Día do Libro.

Para festexar esta data a Biblioteca Xela Arias de Chapela ofrece un obradoiro creativo para nenos e nenas, da man de Costa Oeste, escola de deseño e arquitectura.

Un obradoiro para espertar a creatividade a carón dos nosos contos favoritos. Contos en construción é un taller baseado nos contos clásicos e contemporáneos. Nel as persoas participantes, mediante unha didáctica experimental onde se fomentará a creatividade individual e o traballo cooperativo, reflexionarán sobre os estereotipos que aparecen no conto e interpretarán un fragmento do relato escollido materializándoo coa construción dunha maqueta 3D.

A actividade está dirixida para nenos e nenas de entre 6 e 12 anos, que terán que inscribirse na biblioteca para participar.

Terá lugar o mércores 23 de abril, entre as 18 e as 19:30 h. e realízase grazas ao programa Ler Conta Moito, da Rede de Bibliotecas de Galicia.

A Biblioteca Xela Arias festexa este 2025 o seu 20 aniversario, que ten lugar neste abril, mes do libro.

La entrada A Biblioteca Xela Arias festexa o Día do Libro cun obradoiro creativo se publicó primero en Concello de Redondela.

A Biblioteca Xela Arias fixo onte unha bonita celebración do Día do Libro Infantil.
Cunha nova sesión de Contos da veciñanza, Lía e mais Beatriz, as nosas veciñas máis “conteiras”, achegaron a historias fermosas ao público máis cativo que veu pasar a tarde connosco.

Unha participación veciñal que nos enche de alegría nas vésperas do 20 aniversario da biblioteca.

Contamos contos relacionados coa primavera e fixemos un rato de biblioteca para levar para a casa.

Pronto saberedes de novas actividades da biblioteca, para festexar este Mes do Libro.

La entrada Festexamos o libro infantil na Biblioteca Xela Arias se publicó primero en Concello de Redondela.

Como xa ben sabedes, e non nos cansaremos de dicilo, na Biblioteca Xela Arias de Chapela temos persoas usuarias que nos fan a vida marabillosa.

Despois de poñer en marcha, no mes de febreiro, os “Contos da veciñanza” pudemos apreciar que esta actividade nos gusta a todos e a todas:

– Xuntámonos as familias da contorna
– Pasamos algo de nervios
– Un momento para compartir a creatividade… e a literatura
– Rímonos moito
– Todos xuntos participamos e aprendemos

Despois dunha exitosa sesión en febreiro, ven agora unha segunda parte mellorada, e coa que nos propoñemos festexar o Día do Libro Infantil e Xuvenil.

As contadoras Lía e mais Beatriz , que quedaron moi satisfeitas, volven ao escenario para ofrecernos contos e historias.
Remataremos facendo unha pequena actividade todos xuntos.

Será o venres 4 de abril, ás 18:30 h.

A proposta é para nenos e nenas a partir de 3 anos.
Dado que as prazas son moi limitadas, deberedes anotarvos previamente na biblioteca.

986-454-226

bibliotecachapela@redondela.gal

Este ano a Biblioteca Xela Arias celebra o seu 20 aniversario, e quere facelo fortalecendo o seu vencello coas persoas usuarias.

Grazas á veciñanza por compartir con nós o seu tempo, habelencias e talento na biblioteca.

La entrada Festexamos o Día do Libro Infantil na Biblioteca Xela Arias coa 2ª edición de “Contos da veciñanza” se publicó primero en Concello de Redondela.