– O proxecto “Mariscando conCiencias para o futuro” levou este mes a máis dun cento de escolares e persoas adultas a coñecer o traballo do marisqueo. Asociacións como Lenda e os CEIP Laredo e Reboreda experimentaron xa o oficio e participaron en limpezas de lixo mariño no litoral de Redondela.

– A participación do Future Oceans Lab, da Universidade de Vigo, axudou a dar explicación aos impactos ambientais que está sufrindo a enseada de San Simón pola crise climática, co aumento da temperatura e as chuvias torrenciais.

Ao longo do mes de marzo máis de cen persoas participaron desta actividade que dá a coñecer os oficios da pesca costeira artesanal da man das súas profesionais. Mariscadoras a pé e mariñeiros de litoral compartiron coas persoas vinculadas a Lenda e co alumnado dos colexios CEIP Laredo e CEIP Reboreda as curiosidades dos seus oficios. O carácter artesanal, a vinculación co medio ambiente, as ferramentas e técnicas da xente do mar e a organización do sector foron algunhas das aprendizaxes que fixeron as persoas participantes. Unha vez terminou a explicación, chegou o momento de poñer en práctica os novos coñecementos. Os participantes puideron experimentar en primeira persoa a procura de ameixas, berberechos, longueiróns e outras especies, identificando as súas diferenzas e constatando a dificultade de atopar produto pesqueiro, debido á alta mortaldade. A participación do Future Oceans Lab, da Universidade de Vigo, axudou a dar explicación aos impactos ambientais que está sufrindo a enseada de San Simón. A actividade rematou coa re-sembra das ameixas atopadas.

Mariscando conCiencias para o Futuro pon o foco na intersección de saberes entre as ciencias do mar, a pesca artesanal e a arte comunitaria. Por iso a actividade continuou recollendo lixo mariño nas praias, onde se atoparon restos de téxtil, cerámica, cabichas, redes de pesca e numerosos residuos de plástico. O lixo foi clasificado e parte del será empregado para darlle unha segunda vida na elaboración de pezas artísticas que participarán no Artelixo 2026, que dará comezo a finais de marzo e que este ano leva por título “Ata aquí chegaba o mar!”

Mariscando conCiencias para o Futuro é un proxecto promovido por Amarturmar, Artelixo, Future Oceans Lab (UVigo), Cidadania S. Coop. Galega e Concello de Redondela, co financiamento da Fundación Daniel y Nina Carasso.

La entrada Mariscando conCiencias para o futuro achega o oficio do marisqueo a colexios e asociacións se publicó primero en Concello de Redondela.

– A actuación centrarase na rehabilitación integral de catro zonas críticas que presentan deterioración estrutural. Os traballos inclúen a substitución de taboleiros, o reforzo de pilotes e a limpeza a presión para evitar esvaróns na senda de madeira.

– A alcaldesa Digna Rivas destaca que esta actuación “responde á prioridade do Goberno local de manter os espazos públicos en condicións óptimas para o desfrute da veciñanza”.

O Concello de Redondela adxudicou as obras de mantemento correctivo e reparación do Paseo da Portela, unha infraestrutura clave que conecta o centro urbano co barrio da Portela a través dun carreiro peonil de 1,5 quilómetros que discorre pola desembocadura do río Alvedosa. A intervención, que conta cun investimento de 47.843,4 euros, realízase tras unha exhaustiva inspección técnica na que se revisou todo o paseo. A estrutura presenta desgaste de diversos elementos de madeira debido á exposición constante á humidade e ao paso do tempo. O obxectivo prioritario é eliminar os riscos de seguridade e devolverlle á pasarela a súa plena funcionalidade. A alcaldesa, Digna Rivas, explica que os informes técnicos identificaron catro tramos “onde a estrutura se viu comprometida pola degradación de pilotes e deformacións nos taboleiros”. De mon corrixirse estes problemas “ poderían afectar á estabilidade da pasarela”.

Para solucionalo, o proxecto contempla traballos de reforzo estrutural, coa reparación de pilotes e zapatas para asegurar a base do paseo. Reporanse os elementos danados, coa substitución de taboleiros, pontóns e varandas respectando o deseño orixinal. Unha das fases fundamentais será o lavado a presión tanto dos tramos novos como dos reutilizados para eliminar o barro e a materia orgánica acumulada, “evitando así que a superficie se volva esvaradía”.

Rivas salienta que esta actuación enmárcase dentro dun plan de mantemento que busca “preservar un espazo moi querido e utilizado polas veciñas e veciños para o paseo e o lecer”. A alcaldesa subliñou a importancia desta obra dentro da folla de ruta do seu equipo: “a seguridade das persoas que utilizan os nosos espazos públicos é innegociable. O Paseo da Portela é un dos camiños máis queridos e transitados de Redondela, e con este investimento non só aseguramos a súa estabilidade estrutural, senón que reafirmamos o noso compromiso coa mellora continua do noso entorno e a calidade de vida da veciñanza”. As obras executaranse seguindo unha orde lóxica de intervención para minimizar as molestias aos usuarios e usuarias, garantindo en todo momento o cumprimento da normativa de accesibilidade e seguridade peonil.

La entrada O Concello inviste preto de 48.000 € no paseo da Portela para garantir a seguridade peonil se publicó primero en Concello de Redondela.

– A inscrición para participar nesta edición está aberta ata o 15 de marzo no formulario ArteLixo 2026

O ArteLixo 2026 bota a andar co lema “Ata aquí chegaba o mar!”. Nesta edición o ArteLixo intégrase no proxecto Mariscando conCiencias para o Futuro que contempla a Arte Cidadá como unha composición de saberes para imaxinar e construír futuros sostibles. Unha iniciativa, na que participamos AMARTURMAR, grupo de profesionais da pesca costeira artesanal, Future Oceans Lab (Uvigo), grupo de investigación adscrito ao campus do mar da Universidade de Vigo, ArteLixo, Concello de Redondela e Cidadania S. Coop. Galega, cooperativa que promove a participación social nas políticas públicas.

O ArteLixo segue a ser un certame ecoloxista, solidario, colaborativo, con consciencia e con vontade de compartir, e abre a convocatoria para todas as persoas e colectivos que desexen participar. As obras teñen que estar feitas con material de refugallo e expoñeranse polas rúas, prazas e escaparates de Redondela durante o certame.

Como inscribirse no ArteLixo2026?

Cubrir o formulario de inscrición antes do 15 de Marzo de 2026.

A inscrición faise mediante un formulario. O formulario podedes cubrilo na ligazón Inscrición ArteLixo 2026

Unha vez rematado o prazo de inscrición a organización porase en contacto coas autoras/es das obras para concretar os detalles de localización e calquera outro que poida xurdir.

Para máis información poden dirixirse ao correo electrónico: artelixoredondela@gmail.com, ou no teléfono 604 03 92 13

PRAZO DE INSCRICIÓN: ATA O 15 DE MARZO

EXPOSICIÓN: DO 28 DE MARZO AO 11 DE ABRIL

La entrada ATA AQUÍ CHEGABA O MAR! a proposta de ArteLixo 2026 se publicó primero en Concello de Redondela.

O concelleiro Roberto Villar nunha visita ás obras de saneamento en Cabeiro

• A Concellería de Infraestruturas e Sostibilidade, dirixida por Roberto Villar, executa estas obras nos camiños do Costal e da Coutada Vella dentro da estratexia de saneamento integral das parroquias. Os traballos contan cun orzamento de case 40.000 euros.

• O Goberno local avanza simultaneamente na ampliación do saneamento en varias zonas de Vilar, Soutoxuste, O Viso, Cedeira e Ventosela, entre outros lugares. Un dos obxectivos é levar tamén a rede de sumidoiros á Rabadeira, no camiño da Silveira, malia que require de xestións complexas con particulares e outras administracións. 

O Concello de Redondela, a través da Concellería de Infraestruturas e Sostibilidade que dirixe Roberto Villar, continúa a avanzar na mellora dos servizos básicos nas parroquias coa execución das obras de ampliación da rede de saneamento en Cabeiro. Concretamente, os traballos estanse a centrar nos camiños do Costal e da Coutada Vella, onde se está a instalar a canalización necesaria para conectar as vivendas á rede municipal. Os traballos contan cun orzamento de 39.996,17 euros. Esta actuación responde á prioridade do goberno local de achegar o saneamento a pequenos núcleos de vivendas que historicamente carecían deste servizo. Segundo explica o concelleiro Roberto Villar, “o obxectivo é garantir que todos os veciños e veciñas de Redondela teñan acceso a uns servizos públicos de calidade, vivan no centro ou nas parroquias, eliminando pozos sépticos e mellorando a salubridade ambiental”.

Proxectos en tramitación. Ademais da obra en marcha en Cabeiro, a Concellería traballa intensamente noutros puntos críticos do municipio. Actualmente, o Goberno local está a impulsar os proxectos de saneamento no camiño da Chousa, en Vilar, no camiño do Lameiro, no Viso, o camiño da Landra, en Cedeira,e o do camiño Moucheiro, en Ventosela. Todos eles darán servizo varios grupos de vivendas. “Trátase de lugares pequenos a onde aínda non chega a rede, e traballamos para poñer este servizo básico a disposición da veciñanza”. Villar explica que tamén se está a rematar o proxecto da estrada Aldea de Soutoxuste. Outra das redes nas que se está a traballar é a do camiño da Silveira, na Rabadeira. Este é un proxecto máis complexo “xa que precisamos chegar a acordos con particulares para a cesión de fincas e tamén actuar na estrada N-555”. Por outra banda o Concello ten xa redactado o proxecto para executar o saneamento no camiño do Río Maior, que abrangue as parroquias de Trasmañó e Cedeira. Trátase dunha actuación “de maior calado” que está pendente da tramitación de fondos para a súa execución. Villar confía en facelo realidade “canto antes”.

La entrada O Concello amplía a rede de saneamento en Cabeiro e proxecta novas redes no Viso, Vilar, Cedeira e Ventosela se publicó primero en Concello de Redondela.

– O sendeiro circular, de 7,5 km, percorre a nacente do Monte Penide, destacando pola súa biodiversidade e os petróglifos do Coto do Corno. Coa sinalización do roteiro Redondela pon en valor a riqueza natural e arqueolóxica da zona e a historia da traída de auga en Cedeira “feita grazas ao esforzo e compromiso dos homes e mulleres que traballaron e traballan por este servizo básico”, explica a alcaldesa.

– A sinalización deste roteiro, cun orzamento de 8.600 euros, correu a cargo dos fondos participativos do Concello de Redondela transferidos ao Consello Parroquial. Esta iniciativa, en colaboración coa Comunidade de Augas de Cedeira, reafirma o compromiso do goberno local e do movemento asociativo co turismo sostible, o medio ambiente e a preservación da memoria histórica local.

O Concello de Redondela segue a apostar pola posta en valor do patrimonio natural e cultural do municipio. Esta mañá presentouse oficialmente a sinalización do Roteiro da Auga en Cedeira, un proxecto que busca dar a coñecer a riqueza paisaxística, histórica e ecolóxica da parroquia. Ao acto de presentación asistiu a alcaldesa, Digna Rivas, co concelleiro de Medio Ambiente e Ensino, Alberto Álvarez, os representantes da Comunidade de Augas coa presidenta Guadalupe Maestú, Leoncio Vidal, José Ramón Alonso e Nicanor Nieto, así como o director do CEIP Cedeira, José Luis Ojea. O colexio, nas inmediacións deste sendeiro, poderá beneficiarse desta nova ruta sinalizada que ten un marcado carácter comunitario, divulgativo e educativo. Rivas destacou que, con esta sinalización, “poñemos en valor a riqueza natural e arqueolóxica de Cedeira, e tamén o traballo e compromiso dos homes e mulleres desta parroquia coa súa terra”. A historia da traída de auga en Cedeira é protagonista do sendeiro “ un servizo básico que se conseguiu grazas á organización veciñal”.

Un roteiro entre a historia e a natureza. O Roteiro da Auga é un sendeiro circular de arredor de 7,5 km que percorre a ladeira de nacente do Monte Penide (coñecido tamén como Monte Mirallo). Esta vertente é rica en mananciais que abastecen á parroquia, polo que o camiño permite coñecer as estruturas tradicionais de captación e distribución da auga, integradas nunha paisaxe forestal diversa. Ao longo do percorrido, os sendeiristas poderán observar masas de piñeiro e eucalipto mesturadas con zonas de matogueira (toxos, xestas, uces) e tramos autóctonos con carballos, sobreiras, castiñeiros e loureiros.

Biodiversidade e Anfibios como sentinelas. O roteiro é un espazo ideal para a observación de aves forestais diúrnas, como o picapau grande, o peto verdeal ibérico, o subidor común ou diversos ferreiriños. Ademais, a ruta destaca pola súa biodiversidade ao solpor, cando é posible observar unha sorprendente diversidade de anfibios, indicadores do bo estado ecolóxico dos mananciais e regatos da zona.

O conxunto arqueolóxicos do Coto do Corno. Un dos puntos fortes do roteiro é o conxunto de petróglifos do Coto do Corno, datados de hai arredor de 4.000 anos. A pesar das alteracións sufridas no pasado por canteiros e infraestruturas, consérvanse círculos concéntricos, liñas, coviñas, muíños naviculares e a singular representación dun cervo. O Concello fai un chamamento á “responsabilidade” para a preservación deste patrimonio tan fráxil, lembrando a necesidade de “non camiñar sobre os gravados, non tocalos nin empregar auga sobre eles”.

Historia da traída de auga. O roteiro tamén pon en valor a organización veciñal. A través de códigos QR, os visitantes poden acceder a vídeos onde os propios comuneiros explican o funcionamento do sistema de traída de auga, dende os primeiros pasos veciñais ata a moderna tecnoloxía de control telemático, convertendo a ruta nunha viaxe pola historia e a xestión sostible do recurso na parroquia.

A sinalización deste roteiro, cun orzamento de 8.600 euros, correu a cargo dos fondos participativos do Concello de Redondela transferidos ao Consello Parroquial de Cedeira. Foron os propios representantes veciñais os que escolleron este proxecto. A iniciativa, realizada en colaboración coa Comunidade de Augas de Cedeira, reafirma o compromiso do goberno local e do movemento asociativo co turismo sostible, o medio ambiente e a preservación da memoria histórica local.

La entrada Cedeira estrea o “Roteiro da Auga” e pon en valor a súa riqueza natural e arqueolóxica se publicó primero en Concello de Redondela.

– O Concello de Redondela, a través da Concellaría de Medio Ambiente, conta cun servizo de préstamo gratuíto de biotrituradoras. Esta iniciativa reforza a aposta do Goberno local pola sustentabilidade e a economía circular, facilitando á veciñanza as ferramentas necesarias para a xestión de residuos orgánicos.

O Concello de Redondela, a través da Concellaría de Medio Ambiente que dirixe Alberto Álvarez, promove a compostaxe a través dun servizo de préstamo gratuíto de biotrituradoras. Esta iniciativa reforza a aposta do Goberno local pola sustentabilidade e a economía circular, facilitando á veciñanza as ferramentas necesarias para a xestión de residuos orgánicos. O obxectivo principal é que veciños e veciñas que teñan restos vexetais poidan triturar ramas de ata 4 centímetros de diámetro para xerar “estruturante”, un material esencial para o proceso de compostaxe. A alcaldesa, Digna Rivas, subliñou a importancia desta medida para “contribuír á mellora da calidade ambiental e á redución de custos no tratamento dos residuos sólidos urbanos”. Con este servizo, o Concello busca non só facilitar o mantemento das fincas particulares, senón tamén converter os restos de poda nun recurso valioso para a terra, evitando que rematen no colector de lixo convencional. De feito, depositar restos de poda e xardinaría nos colectores de lixo convencional está prohibido pola ordenanza municipal. Esta práctica considérase unha infracción que pode derivar en sancións económicas.

As persoas interesadas poden solicitar o préstamo da biotrituradora a través da web oficial do Concello, na sección de Medio Ambiente, ou ben facelo de xeito presencial nos rexistros de Redondela ou Chapela.

As dúas biotrituradoras dispoñibles contan cun motor eléctrico de 3 HP de potencia e unhas dimensións de 60x100x100 cm. Están equipadas con coitelas desfribriladoras para produtos leñosos e martelos móbiles para follas e sebes, cunha capacidade de produción de 1 metro cúbico por hora. Unha vez feita a solicitude, os usuarios reciben as instrucións necesarias para poder empregar esta ferramentas sen problemas.

La entrada Redondela fomenta a compostaxe co préstamo gratuíto de biotrituradoras se publicó primero en Concello de Redondela.

– A concellería de Medio Ambiente tramita tres sancións por vertidos incontrolados, un na Senda da Auga e dous en vías públicas de Chapela. A policía conseguiu localizar aos responsables grazas á colaboración veciñal logo dun complexo traballo de investigación. Estas infraccións carrexan sancións que van dos 750 aos 3.000 euros.

– A Concellería de Medio Ambiente lembra que existe unha normativa que prohibe os vertidos incontrolados e fai un chamamento á cidadanía para que actúe “con respecto e civismo”. Desde o Concello agradecen a implicación da veciñanza para poder detectar estes vertidos e destaca a labor policial de investigación na identificación dos infractores.

O departamento de Medio Ambiente do Concello de Redondela tramita actualmente tres sancións por vertidos incontrolados rexistrados en vías públicas de Chapela e na Senda da Auga. O concelleiro, Alberto Álvarez, sinala que estas verteduras ilegais son un dos maiores problemas ambientais para os municipios. Cascallos, restos de poda, residuos industriais, mobles, electrodomésticos, etc. localízanse “tanto en zonas rurais e forestais como en zonas urbanas ao redor dos colectores de recollida do lixo”. Isto ten “graves consecuencias ambientais, deterioran a paisaxe, xeran cheiros, proliferación de pragas, contaminan o chan e a auga, e aumenta o risco de incendios”, advirte Álvarez. Tamén é un “grave problema desde o punto de vista económico, xa que en moitos casos o Concello, co diñeiro de todos, debe asumir o gasto de retirar estes residuos incontrolados”. Estes vertidos supoñen unha infracción da Ordenanza Municipal de Xestión e Tratamento de Residuos, que o Concello de Redondela sanciona con multas que van desde os 750 ata 3.000 euros.

Un vertido na Senda da Auga e dous en Chapela

O último caso investigado detectouse en decembro na Senda da Auga, na parroquia de Vilar. Foi un veciño o que alertou dun vertido de mobles, electrodomésticos, colchóns, etc. nas proximidades do camiño Lagoa de Millarada. A policía de Medio Ambiente conseguiu localizar o vehículo responsable do vertido grazas aos testemuños dos veciños. Feitas as pescudas oportunas, localizouse a orixe do vertido nunha propiedade en reformas no Concello de Vigo. Localizado o propietario, esta semana informóuselle das consecuencias legais destes feitos e da urxencia de proceder a retirar o vertido.

No último trimestre do ano pasado investigáronse tamén dous vertidos en Chapela, na vía pública, un de restos de mobles de madeira e outro de fiestras de PVC. O primeiro localizouse por un aviso cidadá que alertou do vertido na rúa Estación, preto da antiga estación ferroviaria. Unha furgoneta descargou mobles de madeira, táboas e outros restos en varias ocasóns nas inmediacións dos contedores de lixo. Os datos recollidos pola Policía de Medio Ambiente grazas á colaboración cidadá permitiron dar coa empresa responsable.

O segundo caso deuse no camiño do Gaio, onde se detectou un vertido de restos de fiestras de PVC. A investigación realizada pola policía de Medio Ambiente determinou a orixe dos residuos nunha empresa do sector.

O concelleiro de Medio Ambiente agradece a colaboración cidadá “que está a dar os seus froitos” e destaca a gran labor policial de investigación na identificación dos infractores. O Concello de Redondela lembra que queda totalmente prohibido arroxar ou depositar residuos de calquera tipo fóra dos colectores. Neste sentido, os contedores instalados en todo o municipio están destinados á recollida dos residuos domésticos, en bolsas de lixo e dentro do horario permitido. Depositar trastes na vía pública sen autorización, en solares ou no exterior dos colectores; ou non axustarse ás programacións de recollida establecidas constitúen unha infracción. No caso das infraccións leves a ordenanza municipal contempla multas que van desde os 90 euros ata os 750, para as infraccións graves entre 750 e 1.500 euros, e no caso das moi graves as sancións van dos 1.500 aos 3.000.

Servizo de recollida de residuos voluminosos

Para o depósito de residuos voluminosos, mobles, electrodomésticos, etc. existe un servizo de recollida a domicilio sinxelo e gratuíto para os veciños e veciñas particulares. Tan só é preciso contactar con Urbaser no teléfono 986.388.111, de 9 a 14 horas, onde os informarán do día e lugar para depositar os residuos. No caso de empresas a normativa autonómica establece que deben retirar os seus residuos a través de xestores autorizados.

La entrada O Concello de Redondela sanciona a dúas empresas e un particular por vertidos incontrolados se publicó primero en Concello de Redondela.

– O Concello de Redondela traballa nun proxecto para ampliar a sinalización de rutas costeiras do municipio “que mellore a mobilidade e poña en valor o patrimonio natural, histórico e etnográfico do noso litoral”.

– Elena Herbello, xerente do GALP, explicou que tipo de proxectos vinculados cos territorios costeiros poden acollerse a esta convocatoria. A alcaldesa, Digna Rivas, animou a colectivos, asociacións, pemes e autónomos a optar a estas axudas “para crear emprego, preservar o medio ambiente e dinamizar o sector pesqueiro e marisqueiro”. A rexedora agradeceu á Asociación de Empresarios por acoller esta xornada informativa.

A alcaldesa de Redondela, Digna Rivas, e o concelleiro de Medio Ambiente, Alberto Álvarez, participaron onte na presentación das axudas dos FondosRía de Europeos FEMPA convocada polo Grupo de Acción Local do sector pesqueiro (GALP) Ría de Vigo-A Guarda. O acto, celebrado na Asociación de Empresarios de Redondela, serviu para dar a coñecer a entidades, asociacións e empresas as características destas subvencións. Elena Herbello, xerente do GALP, explicou que tipo de proxectos vinculados cos territorios costeiros poden acollerse a esta convocatoria de axudas 2026. O Concello de Redondela traballa na ampliación da sinalización e promoción de rutas costeiras do municipio “para mellorar a mobilidade e poñer en valor o patrimonio litoral do municipio”. Rivas animou a colectivos, asociacións, pemes e autónomos a informarse para optar a estas axudas “para crear emprego, preservar o medio ambiente e dinamizar o sector pesqueiro e marisqueiro”. A rexedor agradeceu á Asociación de Empresarios de Redondela o ter acollido esta xornada informativa.

A Confraría San Xoán de Redondela e o Círculo Cultural de Chapela explicaron os seus respectivos proxectos, que recibiron fondos en anteriores convocatorias. No caso da Confraría a bióloga e técnica Beatriz Crespo explicou que fixeron unha aposta ecolóxica e sostible e recibiron financiamento para un vehículo 100% eléctrico e cero emisións co que comercializarán e distribuirán produtos do mar de Redondela. Emilio Sánchez, presidente do Círculo, expuxo o seu proxecto “Muller, cultura e mar” para dar a coñecer a cultura propia da contorna, fomentar o deporte náutico, adaptar instalacións e mellorar a eficiencia enerxética.

No acto participaron o alcalde de Nigrán, Juan González, o concelleiro de Soutomaior Diego Moreira.

Poden solicitar estas axudas empresas, autónomos, confrarías, asociacións do sector pesqueiro, entidades públicas e asociacións sen ánimo de lucro. O prazo está aberto ata o 16 de febreiro.

Máis información da convocatoris de axudas na web GALP-RíadeVigo-AGuarda

La entrada Asociacións e empresas infórmanse das axudas de Fondos Europeos dos GALP se publicó primero en Concello de Redondela.

– O Concello de Redondela conta con dúas unidades móbiles de punto limpo móbil para atender as demandas da veciñanza e facilitar a reciclaxe de residuos. Os remolques están dúas semanas en cada localización. Neste mes de xaneiro estarán en Trasmañó, Cedeira e Cabeiro.

– O Concello local fai un balance “moi positivo” do uso que a veciñanza está a dar a este servizo, no se recollen multitude de residuos “o que evita o seu traslado á planta de Sogama e permite reciclalos axeitadamente”. Pequenos electrodomésticos, pintura, pilas, móbiles, material informático e xoguetes son algúns dos residuos máis comúns.

Redondela conta con dous puntos limpos móbiles para facilitar á veciñanza a reciclaxe de diferentes tipos de lixo que non debe de ir aos colectores da rúa. A concellaría de Infraestruturas e Sostibilidade e a de Medio Ambiente promoven o seu uso entre a veciñanza, xa que se trata dun servizo gratuíto para a cidadanía e de grande importancia para ter cada vez unha Redondela máis limpa, “polo que é fundamental contar coa colaboración de todos e todas”, sinalan desde o Concello.

Os dous remolques estarán a disposición dos usuarios e usuarias periodicamente en todas as parroquias, cunha estancia de dúas semanas en cada emprazamento. Os residuos que se poden depositar neste punto limpo son pequenos electrodomésticos, móbiles e tabletas, material informático, cargadores, auriculares, pilas, baterías, CDs, cartuchos e tóner de impresoras, radiografías, lámpadas, fluorescentes, cápsulas de café, material de escritura, aerosois, pintura, plásticos que non sexan envases, xoguetes ou pezas de téxtil, entre outros.

O goberno local fai un balance “moi positivo” do uso que a veciñanza está a dar a este servizo, no que se están a recoller multitude de residuos “o que evita o seu traslado á planta de Sogama e permite reciclalos axeitadamente”.

Neste mes de xaneiro os puntos limpos móbiles están nos seguintes lugares:

Ata o 11 de xaneiro:

– Aparcadoiro do Pavillón Municipal de Chapela

-Chaira do convento de Trasmañó

Do 12 ao 25 de xaneiro

– Cedeira no aparcadoiro contiguo á pista deportiva

– Centro Cultural San Xoán de Cabeiro

Do 26 de xaneiro ao 8 de febreiro:

– Vilar, no aparcadoiro Centro Cultural

– Quintela, no aparcadoiro do novo Centro Cultural de Quintela

O calendario coas localizacións de todo o ano pode consultarse nas redes sociais do Concello e na web www.redondela.gal.

Minipuntos Limpos

Os puntos limpos móbiles complementan o servizo dos seis “minipuntos” instalados en diferentes rúas de Redondela e Chapela. Serven para reciclar pequenos obxectos como cartuchos, cargadores, pilas ou baterías, e están nas rúas Alfonso XII, Ernestina Otero, Ribeira e Santa Mariña de Redondela, e nas avdas de Redondela e de Vigo en Chapela.

Recollida de residuos voluminosos

Para residuos máis voluminosos como mobles, colchóns ou electrodomésticos existe un servizo de recollida “porta a porta” cun sistema sinxelo e gratuíto para os usuarios. Tan só é preciso contactar con Urbaser no teléfono 986 388 111, en horario de 9 a 14 horas, e informaranlles do día e lugar no que pode depositar estes residuos.

La entrada O servizo do punto limpo móbil promove a reciclaxe nas parroquias se publicó primero en Concello de Redondela.

– Redondela reciclou 47.893 quilos de roupa ao longo do pasado ano 2025. O municipio conta con dez colectores de Cáritas para recollida de téxtil en diferentes puntos da vila, Chapela, Cesantes, Reboreda e Cedeira. O consumo masivo de moda barata provocou nos últimos anos un incremento de residuos téxtiles.

– A reciclaxe de roupa por parte de organizacións como Cáritas permite o seu tratamento en plantas de xestión para comercializala en puntos de venda de segunda man. “Trátase dun proxecto de economía circular que xera emprego, reduce a contaminación e o consumo de materias primas”, explican desde o goberno local.

Nos últimos anos a moda rápida disparou a cantidade de téxtil que se produce, pero tamén o que se tira. Esta industria é altamente contaminante, tanto no proceso de fabricación como despois na xestión das prendas que xa non se utilizan. Nos últimos anos tamén cambiou a forma en que nos desfacemos da roupa non desexada e é habitual tirar coas prendas en lugar de doalas. Menos da metade da roupa usada é recollida para reutilizar ou reciclar.

Desde o Concello de Redondela foméntase a reciclaxe e roupa e calzado a través da iniciativa “Moda re-” de Cáritas. O concelleiro de Medio Ambiente, Alberto Álvarez, explica que o municipio conta con dez colectores para a recollida de roupa, calzado e téxtil do fogar en diferentes puntos da vila, Chapela, Cesantes, Reboreda e Cedeira. Os colectores son baleirados cada mes por persoal de Cáritas. Ao longo do pasado ano 2025 en Redondela recolléronse 47.893 quilos de roupa, case 48 toneladas. Isto supón que unha familia de catro membros deixa, de media, máis de 6,6 quilos de roupa cada ano nestes colectores.

Depositar téxtil e calzado roupa nestes contedores específicos ten unha dobre vantaxe: por unha banda evítase que acaben na planta de tratamento de Sogama, co custe económico e ambiental que iso supón, e por outra dáse unha segunda vida a moitas prendas que aínda son útiles. Organizacións como Cáritas seleccionan e tratan esta roupa nos seus almacéns e plantas de xestión, para despois comercializala en puntos de venda de roupa de segunda man. “Trátase dun proxecto de economía circular que xera emprego, xa que a roupa precisa clasificación, limpeza, distribución e comercialización”, sinala Álvarez. A roupa que non está en condicións de poñerse á venda tamén é aproveitada e reutilízase na industria de automoción ou mesmo na construción. Por ese motivo desde o Concello faise un chamamento á cidadanía para que toda a roupa, calzado ou téxtil do fogar do que queiran desfacerse, estea en bo ou mal estado, a depositen nestes contedores.

La entrada Redondela recicla 48 toneladas de roupa usada e dálle unha segunda vida se publicó primero en Concello de Redondela.

  -> FORMULARIO DE SOLICITUDE DE COMPOSTEIRO INDIVIDUAL

   -> FORMULARIO DE SOLICITUDE DE CHAVE PARA O COMPOSTEIRO MARRÓN DE RESIDUOS ORGÁNICOS

La entrada Formularios de solicitude para composteiro individual ou chave para composteiro de residuos orgánicos se publicó primero en Concello de Redondela.

– “Mariscando conCiencias para o futuro” é unha iniciativa da cooperativa Cidadanía con Amarturmar, Future Oceans Lab (da Universidade de Vigo), Artelixo e o Concello de Redondela. O proxecto conta co financiamento da Fundación Daniel e Nina Carasso logo de ser seleccionado entre máis de 150 propostas de toda España.

– A alcaldesa, Digna Rivas, explica que se trata dun traballo colaborativo entre mariscadoras a pé, persoal investigador, artistas locais e Concello, liderado pola cooperativa galega Cidadanía. O obxectivo é extraer aprendizaxes do pasado de cara a un futuro sostible do traballo no mar.

– Desafíos como o cambio climático estarán moi presentes no proxecto que se desenvolverá na enseada de San Simón entre 2025 e 2026. A primeira cita aberta á veciñanza son os obradoiros “O pasado da pesca artesanal” os días 26 de novembro, 3 e 10 de decembro en horario de 18.00 a 20.30 horas na Oficina de Turismo.

Oxe presentouse na Oficina de Turismo de Redondela “Mariscando conCiencias para o futuro”, unha iniciativa da cooperativa Cidadanía con Amarturmar, Future Oceans Lab (da Universidade de Vigo), Artelixo e o Concello de Redondela. O proxecto conta co financiamento da Fundación Daniel e Nina Carasso logo de ser seleccionado entre máis de 150 propostas de toda España.

A alcaldesa, Digna Rivas, explica que se trata dun traballo colaborativo entre mariscadoras a pé, persoal investigador, artistas locais e Concello, liderado pola cooperativa galega Cidadanía. O obxectivo é poñer en común “narrativas e accións que extraian aprendizaxes do pasado de cara a un futuro sostible dos traballos do mar artesanais”. Desafíos como o cambio climático estarán moi presentes neste proxecto que se desenvolverá na enseada de San Simón entre 2025 e 2026. Ana González, de Cidadanía,explica que se abordará o desafío de imaxinar “como adaptar un sector produtivo aos cambios ambientais”. Rivas puxo o foco precisamente no marisqueo, un sector eminentemente feminino e artesanal no que traballan ducias de mulleres en Redondela. Grazas a esta iniciativa científicas, mariscadoras e artistas intercambiarán saberes técnicos e populares dun sector tradicional de moito arraigo no litoral galego.

O reto do cambio climático

O sector pesqueiro artesanal galego e especialmente o marisqueo enfróntase ao gran retos dos efectos do cambio climático. Ana Sotelino, da asociación Amarturmar, advirte que os problemas están a manifestarse “cunha mortalidade masiva dos bivalvos pola ausencia de chuvias, o aumento da temperatura da auga ou as chuvias torrenciais”. A contaminación é outros dos problemas que afecta ao sector do mar, así como a presenza de especies invasoras, entre outras. “Mariscando conCiencias para o futuro” busca, desde diferentes ámbitos, analizar a situación actual e proxectar futuros sostibles e realistas xunto co colectivo da pesca artesanal na enseada de San Simón.

Obradoiros “O pasado da pesca artesanal”

Ao longo dos vindeiros meses levaranse a cabo obradoiros abertos á veciñanza nos que recoller coñecementos populares, fitos do colectivo do mar, persoas referentes do sector e prácticas sostibles no mar. A primeira convocatoria é cos obradoiros “O pasado da pesca artesanal” con tres xornadas que serán os días 26 de novembro, 3 e 10 de decembro. Trátase dun espazo participativo e de conversa entre os asistentes, nos tres casos en horario de 18.00 a 20.30 horas na Oficina de Turismo de Redondela. As persoas que desexen participar están convidadas a achegar obxectos, documentos, fotos, etc. do traballo do mar en Redondela. Por motivos de organización recoméndase confirmar asistencia no teléfono 627 096 062.

Toda a información recompilada será interpretada de maneira artística nunha liña do tempo elaborada polo colectivo Artelixo.

De cara ao 2026 desvelaranse novas actividades de Mariscando conCiencias para o futuro, onde haberá un percorrido polos areais colaborando cos colexios do municipio.

La entrada Redondela percorre pasado e presente da pesca artesanal coa iniciativa “Mariscando conCiencias para o futuro” se publicó primero en Concello de Redondela.