Redondela presentouse en Fitur un ano máis para participar nun dos grandes escaparates mundiais no sector turístico. Redondela participa da man de Galicia Suroeste para promover unha oferta baseada no seu patrimonio natural e paisaxístico, cultural e histórico. A alcaldesa de Redondela, Digna Rivas, e a concelleira de Cultura e Turismo, Rita Pérez Táboas estiveron onte na feira en Madrid para dar a coñecer unha oferta “baseada nun turismo de calidade e sostible”. A oferta turística do Concello pon en valor xoias como a illa de San Simón, declarada “Lugar de Memoria Democrática”. Esta paraxe, que suma patrimonio natural e patrimonio histórico, atesoura un pasado digno de ser coñecido, xa que foi empregada como mosteiro, lazareto, campo de concentración e fogar para orfos. A intención é “poñer en valor o patrimonio natural, paisaxístico e histórico do municipio a través do turismo”, sinala a alcaldesa Digna Rivas.

Redondela forma parte da nova campaña turística “Única”, unha proposta que reivindica a singularidade, diversidade e autenticidade deste territorio de Galicia Sur situado entre o Suído, o Miño e o Atlántico. Este territorio ten identidade propia cun patrimonio natural e cultural excepcional, e cunha oferta turística que aposta pola calidade, a sustentabilidade e a experiencia auténtica. A campaña ‘Única’ é unha chamada a descubrir un destino que non se parece a ningún outro, onde cada visitante pode atopar unha experiencia persoal, próxima e inesquecible: natureza, patrimonio, gastronomía, cultura e tradicións.

Rivas destacou experiencias “únicas” que poden vivirse no municipio redondelán como kaiak pola enseada de San Simón, visitasr o cemiterio dos Eidos ou xoias admirar arquitectónicas do século XIX como son os viadutos de Madrid e de Pontevedra. Redondela cota tamén con grandes celebracións ao longo do ano como a Festa da Coca e as ancestrais danzas das Penlas e as Espadas, a Festa do Choco ou o Festival Internacional de Títeres, ademais dunha ampla e variada programación cultural.

O acto contou coa intervención de Sandra González, presidenta de Galicia Suroeste e alcaldesa de Tomiño, e Ánxela Fernández, representante institucional do Xeodestino, e Pedro Blanco, Delegado do Goberno en Galicia.

Redondela comparte este xeodestino de Galicia Sur cos concellos de Gondomar, Nigrán, Mos, Tui, Soutomaior, Tomiño, Pazos de Borbén, Fornelos de Montes, O Porriño, O Rosal, A Guarda. Baiona e Oia.

La entrada Redondela presenta en Fitur a campaña “Única” da man de Galicia Suroeste se publicó primero en Concello de Redondela.

O Concello de Redondela e Galicia Suroeste inician os traballos de eliminación de especies exóticas invasoras na contorna da ensenada de San Simón, un dos tesouros naturais de Galicia incluído na Rede Natura 2000. Cun investimento de 18.000 euros financiados ao abeiro do PSTD ‘A Despensa de Galicia’ realizaranse melloras na contorna para protexer e adaptar este espazo ao escenario de cambio climático.

O Concello de Redondela, da man de Galicia Suroeste, pon en marcha unha nova intervención estratéxica para a prevención de danos ao ecosistema dunar do espazo natural protexido da contorna da ensenada de San Simón, grazas á financiación procedente do Plan de Sostibilidade Turística en Destino “A Despensa de Galicia”, financiado con Fondos Next Generation da UE. A concelleira de Turismo, Rita Pérez, acompañada polo Representante Institucional do Xeodestino e alcalde de Pazos de Borbén, Luciano Otero, asistiron onte ao inicio dos traballos de retirada manual de especies exóticas invasoras da zona dunar e supralitoral, unha acción crucial para protexer este enclave único que se realizará entre os meses de novembro e decembro. Coa retirada dos exemplares de Artotheca Calendula preténdese restaurar o equilibrio natural e recuperar a biodiversidade local, xa que a presenza desta especie exótica está xerando unha perda de espazo para as especies nativas e tamén, rompendo a conectividade ecolóxica básica.

Os traballos inclúen tamén a recollida na zona dunar de residuos sólidos urbanos. Este lixo que chega ao areal frea os restos de arribazón de algas e outra materia natural necesaria para nutrir a outras especies. Pérez Táboas explica que con estas intervencións contribúese a restaurar a funcionalidade ecolóxica do espazo e favorécese o uso recreativo, educativo e turístico da contorna. En concreto, con esta actuación, que conta cun investimento de 18.000 euros e que se enmarca na liña de transición verde e ecolóxica do Plan de Sostibilidade Turística en Destino (PSTD) de Galicia Suroeste, perséguese tanto a preservación ambiental coma a posta en valor do patrimonio natural da contorna, impulsando un turismo respectuoso co medio ambiente que garanta un uso sostible e equilibrado dun espazo natural único cun valor ambiental incalculable.

La entrada Redondela e Galicia Suroeste inician os traballos de rexeneración integral da ensenada de San Simón se publicó primero en Concello de Redondela.

– A XII Conmemoración da Batalla de Rande celebrarase os días 11 de outubro na vila de Redondela cun desfile e o 18 e 19 na contorna do museo Meirande. A cita, que recrea a batalla naval de 1702, contará cun mercado tradicional, obradoiros de oficios antigos, concentración de embarcacións tradicionais e recreacións teatrais.

– A alcaldesa Digna Rivas, veciña da parroquia, agradeceu “o gran traballo da ACD Rande nesta conmemoración xunto coa veciñanza e persoas voluntarias”. Rivas salientou tamén “a excelente posta en escena” da directora teatral Mónica Sueiro, na que participan actores profesionais e unha vintena de veciños e veciñas afeccionados.

Un ano máis Rande revive unha das batallas navais máis importantes da historia, a que enfrontou en 1702 as tropas angloholandesas e hispanofrancesas na ría de Vigo. A XII Conmemoración da Batalla de Rande celebrarase os días 11 de outubro na vila de Redondela e o 18 e 19 en Rande. O exterior do museo Meirande acolleu onte a presentación desta festa, que une cultura, historia e tradición. O presidente da asociación, Pedro Otero, presentou o acto no que participaron Carmen Pita, directora de Promoción de la Axencia de Turismo de Galicia, Jorge Cubela, responsable de Cultura na Deputación de Pontevedra, a alcaldesa Digna Rivas, e a concelleira de Cultura Rita Pérez Táboas.

Como alcaldesa e como veciña da parroquia, Rivas, agradeceu “o gran traballo da ACD Rande, que ao longo de todo o ano prepara esta conmemoración xunto coa veciñanza e persoas voluntarias”. Rivas salientou tamén da “excelente posta en escena” da directora teatral Mónica Sueiro, que un ano máis se encarga das representacións con actores profesionais e unha vintena de veciños e veciñas afeccionados.

A rexedora local lembrou que este episodio histórico fixo da nosa ría un lugar coñecido no mundo enteiro, “que lembra a forza, a resistencia e a identidade da xente desta terra”. Esta festa é unha das representacións históricas máis importantes do sur da provincia.

O sábado día 11 celebrarase o desfile polas rúas do centro da vila ás 18.30 da tarde, que rematará na praza da Torre. O día 18 haberá actividades ao longo de todo o día na contorna do museo Meirande con mercado tradicional, obradoiros de oficios como olaría ou acuñado de moedas, concentración de embarcacións tradicionais e representacións teatrais. Sueiro explicou que haberá “petiscos teatrais” fieis á historia da batalla de Rande e que recrearán tamén escenas cotiás da época. O domingo, tamén na contorna do Meirande, repetirase o mercado, os obradoiros e as representacións teatrais, coa última función ás 13.30 horas.

A alcaldesa convidou a toda a xente de Redondela e bisbarra a achegarse a esta celebración, á que o Concello destina este ano unha subvención de 22.000 “o que constata o compromiso do Concello con Rande, coa súa historia e a súa xente”.

La entrada Redondela, capital das festas históricas coa XII Conmemoración da Batalla de Rande se publicó primero en Concello de Redondela.

– A programación dos Roteiros Ambientais e Culturais amplíase ao mes de outubro cun total de sete actividades: actividades de exploración para a rapazada, observación de aves e rutas en caiac, entre outras propostas.

O Concello de Redondela ofrece no mes de outubro un total de sete actividades de turismo ambiental e cultural para público de todas as idades. Logo do éxito da programación de verán, as concellerías de Turismo, Sostibilidade e Medio Ambiente continúan con propostas a pé e en caiac que se realizan sempre con guías profesionais. A concelleira de Cultura e Turismo, Rita Pérez, destacou a “transversalidade” destas actividades “que apostan polo turismo sostible e responsable con saídas para coñecer o espectacular patrimonio natural e cultural de Redondela”. O concelleiro de Sostibilidade, Roberto Villar, sulila que o obxectivo destas actividades é “poñer en valor os recursos naturais de Redondela e tamén concienciar á veciñanza e ás persoas que nos visitan da importancia de respectar estes espazos e axudar a conservalos”.

Para participar nestas actividades é preciso facer a inscrición previa na oficina de turismo, no teléfono 986 40 17 13 ou no enderezo electrónico turismo@redondela.gal.

Calendario de actividades:

– Sábado 4 as 17.30-19.30 horas iniciación a observación aves na zona da portela. De balde

– Sábado 4, Paseo nocturno “A Punta de Cesantes-San Simón” 19,30h-22h. De balde

– Domingo 5. Ruta patrimonial “O río Pexegueiro” (ruta longa). De 9,30h a 13h. De balde

– Domingo 12 de tarde orientaventura en cesantes 17.00-19.00. De balde

– Domingo 12. A Vía Verde de Chapela. De 10h a 12,30h. De balde

– Sábado 18  caiac ambiental Portela 11.00-13.30. 20€/persoa

– Domingo 26. Iniciación a observación de aves na zona da portela. De 11 a 13 horas. De balde

La entrada Redondela estrea Outono con actividades de turismo ambiental para todos os públicos se publicó primero en Concello de Redondela.

– O mes con máis visitas foi xuño, con 2.812 persoas, en gran parte grupos de colexios e institutos. No verán chegan máis turistas e peregrinos, e tamén familias da contorna. Ao longo de todo o ano son habituais excursións de colectivos veciñais e culturais, centros de día e visitas dos viaxeiros que embarcan no pantalán do Meirande para visitar San Simón.

– A concelleira responsable, Rita Pérez Táboas, explica que os visitantes “valoran moito o entorno no que se atopa o centro, e tamén o xeito en que está distribuída a exposición da que disfruta tanto o público infantil como os adultos”. En canto á conservación das antigas pezas industriais do museo, desde o Concello encargouse un estudo técnico para valorar a súa situación e determinar un tratamento axeitado que evite a corrosión.

Desde o pasado mes de abril e ata a xornada de onte xoves un total de 8.528 persoas visitaron o Centro de Interpretación da Batalla de Rande, o Meirande. As estatísticas deixan unhas cifras que superan os 1.500 visitantes ao mes.

O museo, con entrada gratuíta, depende da concellería de Turismo do Concello de Redondela e resulta todo un descubrimento tanto para o público infantil como para os adultos. A concelleira responsable, Rita Pérez Táboas, explica que os visitantes “valoran moito o entorno no que se atopa o centro, e tamén o xeito en que está distribuída a exposición”. Quen máis desfruta da visita son as crianzas porque hai moitos elementos interactivos que poden tocar, pero tamén os adultos se sorprenden deste espazo. O mes con maior número de afluencia foi xuño, con 2.812 persoas, onde as visitas de centros escolares son numerosas. O mesmo acontece no mes de maio, con 1.716 visitas, onde a maioría corresponden a colexios. Tanto no mes de xullo como en agosto superáronse os 1.300 visitantes, e no que vai de setembro xa son máis de 500 as persoas que pasaron polas instalacións do Meirande. Nos meses de verán moitos dos visitantes son turistas e peregrinos, pero tamén familias de municipios da contorno como Vigo, Pontevedra ou a zona do Morrazo. Ademais son habituais ao longo de todo o ano as visitas de colectivos veciñais e culturais, excursións organizadas por centros de día, e as visitas de persoas que fan a viaxe en barco á illa de San Simón desde o pantalán do Meirande.

Como curiosidade salientar que a publicación de “O albatros negro”, de María Oruña, trouxo moitos visitantes ao Meirande. A novela recolle a historia da Batalla de Rande “e moitos lectores achegáronse ao museo para saber máis desta contenda naval”.

O museo acolle unha exposición permanente e gratuíta sobre os tesouros arqueolóxicos e culturais da Batalla de Rande de 1702, e tamén dá conta doutros fitos do patrimonio histórico e industrial da zona. O Meirande sitúase no seo dunha antiga fábrica de salgadura de peixe coñecida como “a fábrica do alemán”, de 1836. As instalacións conservan parte da antiga maquinaria da fábrica. Pérez Táboas explica que a conservación destas pezas industriais metálicas é complexa, polo que o Concello encargou un estudo técnico para valorar a súa situación e determinar un tratamento axeitado para evitar a corrosión. A concelleira lamenta as críticas do colectivo Alén Nós polo que cualifican e nega a situación de abandono das instalacións. Advirte que, se a asociación se puxese en contacto co Concello, “teriámolos informado das xestións que estamos a realizar para a conservación do patrimonio industrial do Meirande”.

La entrada O Museo Meirande recibe máis de 1.500 visitantes ao mes se publicó primero en Concello de Redondela.

– A alcaldesa de Redondela, Digna Rivas, salienta que “o feito de que en Redondela conflúan o Camiños Portugués Central e o da Costa, que é o que máis medra de todos os itinerarios, fan desta vila o punto de encontro de centos de peregrinos cada día”. A Oficina Municipal de Turismo rexistra peregrinos de máis de 40 nacionalidades diferentes. Desde o 1 de xaneiro pasaron pola vila unha media diaria de 550 peregrinos.

– A Oficina Municipal de ofrece aos visitantes información turística e cultural de Redondela e actividades de balde, como visitas guiadas polo casco histórico e rutas ambientais e culturais para coñecer o patrimonio do municipio. Son actividades “con moito éxito de público tanto entre os visitantes como entre a propia veciñanza de Redondela”, sinala a concelleira de Cultura e Turismo, Rita Pérez Táboas.

A estadística oficial da Oficina do Peregrino de Santiago de Compostela recolle que por Redondela pasaron ata o día de hoxe 133.000 peregrinos, 72.000 deles polo Camiño Portugués tradicional (un 4% máis que o ano pasado) e outros 61.000 polo camiño Portugués da Costa (un 18% máis que en 2024). Moitos fixeron a súa parada na Oficina de Turismo de Redondela. O perfil dos peregrinos que se achega á oficina varía en función da época do ano. Se ben nos meses de abril, maio e xuño son maioría os estranxeiros, en xullo e agosto os peregrinos de orixe española son maioría. O tirón do Camiño a nivel internacional déixase notar nas cifras que se rexistran na oficina municipal, onte atenderon a peregrinos de máis de 40 nacionalidades diferentes. A maioría proceden de Portugal e Alemaña, pero chegan camiñantes de todos os puntos do planeta: desde Xapón ata os EEUU, pasando por Sudáfrica, Taiwan, Rusia, Australia ou México. No caso dos españois as Comunidades Autónomas que achega máis peregrinos son Madrid, Andalucía e Valencia, aínda que tamén e numerosa a cifra de peregrinos que chegan desde Cataluña e Euskadi. A alcaldesa de Redondela, Digna Rivas, salienta que “o feito de que en Redondela conflúan o Camiño Portugués Central e o da Costa, que é o que máis medra de todos os itinerarios, fan desta vila o punto de encontro de centos de peregrinos cada día”.

A Oficina Municipal de Turismo de Redondela atende a unha media de 2.871 visitantes ao mes, son case 200 máis que no ano 2024 . Desde que abriu as súas portas no mes de abril e ata o final de agosto pasaron polas instalacións da rúa Isidoro Queimaliños un total de 14.358 persoas, das que máis de 13.000 eran peregrinos.

Actividades gratuítas con visitas guiadas na vila e Rutas Ambientais e Culturais

Na Oficina de Información ofrécese a todo aquel que se achega información turística e cultural de Redondela, datos dos aloxamentos e servizos de restauración. Tamén se entregan de xeito gratuíto mapas e folletos turísticos, a axenda de eventos e información sobre as visitas guiadas que son de balde. O programa de Roteiros Ambientais e Culturais ofrece tamén visitas guiadas de balde polas diferentes parroquias para coñecer o patrimonio do municipio. Son actividades que están a ter unha excelente acollida con moita participación nas saídas que se realizaron nos meses de xullo e agosto, e que continuarán en setembro e outubro.

La entrada Redondela acolleu máis de 133.000 peregrinos no que vai de ano se publicó primero en Concello de Redondela.

 As información e as imaxes da web non se corresponden coa realidade

– O departamento de Novas Tecnoloxías revisou a páxina e os seus contidos e en máis dun 80% dos casos son erróneos ou falsos. Faise referencia a lugares que non se atopan no municipio de Redondela e noutros casos as fotografías non se corresponden coa información á que fan referencia.

– A web utiliza un logo e unha imaxe moi semellante á da páxina oficial de Turismo do Concello “o que provoca un prexuízo a Redondela e á súa veciñanza, e sobre todo aos turistas e peregrinos que veñen a visitar a nosa vila”, advirte Digna Rivas. A web, que podería estar creada cun programa de IA, xa foi denunciada ante os organismos públicos competentes para que sexa retirada.

O Concello de Redondela denunciou ante os organismo oficiais a existencia dunha páxina web fraudulenta cuxa dirección é www.turismoredondela.es e que contén moita información errónea sobre o municipio de Redondela. O Concello tivo coñecemento da existencia desta web o pasado mes de xullo e o departamento de Novas Tecnoloxías revisou o seu contido de xeito exhaustivo. Comprobouse que nunha porcentaxe superior ao 80% os contidos da web son erróneos ou falsos. Faise referencia a lugares que non se atopan no municipio de Redondela, como o templo de San Benito, o Sendeiro das Greas ou a praia de Loureiro. A web contén tamén fotografías cuxas imaxes non se corresponden coa información á que fan referencia. A páxina ofrece tamén información de establecementos de hostalaría que non existen neste municipio “e así a gran maioría dos recursos turísticos que ofrece a páxina, que non se axusta para nada á realidade”, sinala a alcaldesa Digna Rivas.

O Concello xa comunicou este feito aos organismos públicos para que retiren a páxina de internet, tanto ao CCN (Centro Criptográfico Nacional), como ao INCIBE (Instituto Nacional de Ciberseguridade) , a AEPD (Axencia de Protección de Datos) e aos Servizo Ciberseguridade Acordo Marco ( Amtega – Xunta de Galicia)

Tamén se comunicou a Google esta situación dende o Concello de Redondela para dar conta desta situación, xa que esta páxina aparece como segunda opción neste buscador, por detrás da web oficial de turismo do Concello de Redondela. O departamento de Novas tecnoloxías tentou poñerse en contacto cos responsables da web a través do correo electrónico que se indica na páxina para solicitar a súa retirada, pero non obtivo resposta.

Esta páxina web utiliza un logo e unha imaxe moi semellante á da web oficial de Turismo do Concello de Redondela. “Esta situación está provocando un prexuízo ao Concello de Redondela e á súa veciñanza, e sobre todo aos turistas e peregrinos que veñen a visitar a nosa vila, xa que moita información que ofrece esta páxina é falsa, o que xera malestar entre os visitantes e unha mala imaxe do noso municipio cara ao turismo”, denuncia Rivas.

O informe do departamento de Novas Tecnoloxías advirte que é moi probable que esta web estea “con algún programa de IA, ou unha web que se fixo para monetizar as visitas mediante a publicidade que salta ao visitala, sen importar o contido”.

La entrada O Concello denuncia unha páxina web fraudulenta de turismo de Redondela se publicó primero en Concello de Redondela.

O Entroido de Verán reuniu a pasada fin de semana en Redondela a preto de 40.000 persoas de todas as idades. Os diferentes espazos habilitados na vila ateigáronse de participantes tanto nas actividades para o público infantil e familiar como nos concertos e a Gala Drag.

O momento álxido da noite viviuse cos galegos The Rapants, cun directo espectacular que fixo vibrar o campo da feira, con público disfrazado de persoal de voo en homenaxe ao seu tema “Avión” e coreando os seus éxitos. O recinto foi unha festa xa desde a tarde coa música dos DJ Kike Varela, Olalla González e Borja Rúa. Logo do exitoso concerto de The Rapants o público seguiu bailando con Carlos Jean e os DJ Samu Pexe e Rodri Vegas.

Fantasía e humor na Gala Drag

O redondelán Rodri Vegas foi tamén o encargado de poñer a música na Gala Drag, que este ano contou co actor e showman Carlos Veleiro como mestre de cerimonias. O xurado, presidido pola gran Gigi, premiou a orixinalidade e creatividade na escolla das propostas gañadoras con 2.000 euros en premios. A gala contou coas actuacións de Noemi, de La Voz, Carolina Smith, e a gañadora da edición do pasado ano, Ketty Ponn.

Os premios foron: 1º Elektra con 1.000 euros, patrocinado por Kaiak Ocio; 2º Josefa Sacho con 500 euros, patrocinado por Naturgalia; 3º Lola Menta con 300 euros, patrocinado por Silvocantabrica; 4º Ketty Pinn dotado con 200 euros, patrocinado polo establecemento N29.

Desde o Concellos informan que as incidencias atendidas no hospital de campaña instalado para o evento foron “mínimas” en relación aos milleiros de persoas que participaron no evento, con 58 persoas atendidas.

Lembrar tamén que nas oficinas da Policía Local depositáronse numerosos obxectos perdidos, entre eles carteiras, documentación, e teléfonos.

La entrada The Rapants fai voar Redondela no Entroido de Verán se publicó primero en Concello de Redondela.

– A programación aposta polo talento galego cos concertos de The Rapants e Brais das Hortas, ademais dos picadiscos Rodri Vegas, Samu Pexe, Borja Rúa, Olalla Gonzálezz e Kike Varela. A Gala Drag contará co showman e actor vigués Carlos Veleiro, que será o mestre de cerimonias desta edición na que se repartirán 1.800 euros en premios.

– A programación infantil e familiar incluirá inchables con auga, xincana e festa da escuma. A alcaldesa de Redondela, Digna Rivas, destaca que a intención do Concello redondelán é ofrecer unha programación ampla e variada para todos os públicos “por iso os nenos e nenas teñen os seus propios espazos con actividades específicas”.

Redondela quenta motores para o 26º Entroido de Verán, unha das citas máis agardadas da programación estival da provincia. Será o sábado 23 de agosto e ofrecerá un intenso programa de actividades para públicos de todas as idades. A alcaldesa de Redondela, Digna Rivas, destaca que a intención do Concello redondelán é ofrecer unha programación “que teña en conta tanto ao público infantil e familiar como á mocidade e público adulto, por iso os nenos e nenas teñen o seu propio espazo con actividades específicas e actuacións pensadas para eles”. Desde as concellarías de Turismo e Cultura, que dirixe Rita Pérez Táboas, faise unha aposta polos grupos locais e galegos co concerto de Brais das Horas, para o público infantil ás 20.30 na Praza da Torre. As actividades no recinto da feira comezarán ás 19.00 horas coa sesión DJ a cargo de Kike Varela, Olalla Gonzálezz e Borja Rúa.

Gala Drag

Ás 21.30 comezará a xa tradicional Gala Drag. O actor e showman Carlos Veleiro será o mestre de cerimonias desta edición. Veleiro manifestou na presentación que para el é “unha honra” e destacou o feito de que Redondela sexa “un referente na defensa da igualdade e da inclusión” e convidou a todo o mundo a participar no Entroido de verán “que é un pedazo de invento”. Repartiranse 1.800 euros en premios repartidos nun primeiro premio de 1.000 euros, o segundo dotado con 500 euros e o terceiro con 300 euros. O xurado terá en conta a orixinalidade, creatividade e elaboración das fantasías.

Finalizada a gala comezarán os concertos. Os primeiros en subir ao escenario ás 23.00 horas serán os muradáns The Rapants, un improvisado anglicismo para Os Rapantes, coa súa “máquina do bo rollo” para facer que o público o pase moi ben e baile. Un grupo “do máis alto nivel en Galicia”, apunta a concelleira Rita Pérez Táboas, que defende “a nosa identidade lingüística e o espírito retranqueiro galego”.

Ás 0.30 horas será a quenda do músico e DJ Carlos Jean, que será encargado de facer vibrar ao público no campo da feira ata as 02.00. Os Djs Samu Pexe e Rodri Vegas serán os encargados de pechar a festa cunha sesión que comezará ás 02.00 e rematará ás 04.00 horas.

Actividades para público infantil e familiar

O Concello de Redondela volve apostar polas actividades dedicadas aos máis pequenos. O Entroido de Verán ofrecerá xogos e espectáculos para toda a familia en diferentes localizacións no centro da vila. A pista da Xunqueira e a praza de Ponteareas acollerán inchables con auga desde as 18.00 ata as 21.00 horas. Na praza de Ponteareas haberá ademais unha xincana con inchables, e na pista da Xunqueira celebrarase a festa da escuma ás 21.00 horas. Na Praza da Torre, ás 20.30 horas, terá lugar o concerto de Brais das Hortas, que porá a cantar e bailar a grandes e pequenos.

Estas actividades ofrécense en tres espazos diferentes repartidos pola vila “para evitar aglomeracións e que o público infantil e familiar poida rotar polos diferentes recintos”, explica a alcaldesa, Diga Rivas.

Reforzo do de transporte público

Como en anos anteriores as empresas de transporte público ofrecen liñas especiais de ida e volta a Redondela desde Vigo, Pontevedra e O Porriño. Os autobuses sairán con destino a Redondela desde os diferentes puntos a partir das 18.00 horas, e haberá transporte de volta até as 06.00 horas.

La entrada Redondela celebra o 26º Entroido de Verán ao ritmo de The Rapants e Carlos Jean se publicó primero en Concello de Redondela.

– O mes de agosto arranca en Redondela con trece propostas de turismo ambiental e cultural para todas as idades: visitas guiadas polo casco histórico sobre lendas e supersticións da vila, rutas polo litoral de Cesantes a pé ou en kaiak e actividades para “exploradores” en busca de animais no Chan das Pipas.

– Desde o Concello de Redondela destacan a “transversalidade” destas actividades “que apostan polo turismo ambiental, sostible e cultural con saídas para coñecer o espectacular patrimonio natural e histórico de Redondela”. Para participar é preciso inscribirse na oficina de turismo, no correo electrónico turismo@redondela.gal ou no teléfono 986.401.713.

O mes de agosto chega a Redondela cargado de actividades para público de todas as idades. Á ampla e variada oferta cultural do Concello súmanse as propostas de turismo ambiental que organizan os departamentos de Turismo, Sostibilidade e Medio Ambiente. A primeira saída deste mes será mañá sábado día 2 coa ambiental “As pedras de Ventosela” ás 10.00 horas.

Unha das novidades deste verán é a ruta “Redondela oculta: entre a lenda e a superstición” a cargo da guía turística Soledad Chayán. No percorrido dáse conta das supersticións e tradicións arredor dos oficios, sobre todo dos mariñeiros, onde se destacan personaxes como a bruxa Benita, o mago Marcolfo ou Xan Carallás, mítico fundador da vila de Redondela. Haberá dúas citas con esta ruta, os martes 12 e 26 de agosto ás 21.00 horas. Tamén os martes serán as visitas guiadas ao Cemiterio dos Eidos, declarado como o cemiterio “máis bonito de España”. Serán os días 5 e 19 de agosto ás 21.00 horas.

O sábado día 9 realizarase a ruta ambiental “O litoral de Soutoxuste” , ás 10.00 horas e o domingo día 10 a denominada “A intermareal de Cesantes” con saída desde o Porto de Cesantes ás 10.00 horas.

O luns día 11 a proposta é unha ruta en kaiak pola enseada de San Simón, unha actividade familiar para dar a coñecer o patrimonio natural tanto sobre as augas como por baixo da superficie. A saída está prevista para as 10.30 horas. O mércores 20 celébrase outra saída en kaiak, neste caso pola zona da Portela para dar a coñecer o patrimonio da Portela e da enseada de San Simón. A saída será ás 11.00.

Para o sábado 16 a proposta é unha observación xeográfica, histórica e natural da ría de Vigo. Será ao serán, a partir das 20 horas. O domingo 17 realízase a ruta ambiental “O río Pexegueiro” con saída ás 10.00 horas.

Os máis pequenos terán unha actividade pensada especialmente para eles o día 27 de agosto con “Exploradores: Animais do luscofusco”. Está dirixida a rapazada de 8 a 12 anos. Nesta saída os participantes explorarán a natureza da man dun guía especializado no Chan das Pipas. O horario será de 19.15 a 21.15 horas. A última saída será o domingo 31 cunha ruta ambiental no Monte Penide ás 10.00 horas.

Para participar nestas actividades é preciso facer a inscrición previa na oficina de turismo, no teléfono 986 40 17 13 ou no enderezo electrónico turismo@redondela.gal.

La entrada Roteiros ambientais e culturais: Redondela oculta, Kaiak pola enseada, Animais do luscofusco e moito máis se publicó primero en Concello de Redondela.

A concelleira de Turismo, Rita Pérez Táboas, participou xunto ao xefe de sector de oficinas de Correos, Miguel Blanco, a directora da oficina de Correos, Nuria Freire e a xefa de equipo da oficina, Patricia Rodríguez, na presentación dunha guía para peregrinos. Trátase dunha publicación editada por O Camiño con Correos que contén unha guía práctica para os peregrinos con recomendacións ao longo desta ruta xacobea. A guía presentouse na oficina de Correos de Redondela, xa que nesta localidade conflúen o Camiño Portugués tradicional, e o Camiño Portugués pola Costa. O novo mapa xa está dispoñible de forma gratuíta na oficina de Correos de Redondela, situada na rúa Casto Sampedro, 8, permite aos peregrinos orientarse e ofrece consellos en castelán e inglés ao longo das distintas etapas adaptándose ao seu punto de inicio. Ao seu paso por Redondela, a publicación recomenda visitar os viadutos ferroviarios e achegarse á enseada de San Simón.

Con esta iniciativa, que convida a descubrir o patrimonio cultural, natural e gastronómico de cada etapa, Correos busca pór en valor as diferentes localidades do Camiño Portugués e ofrecer aos peregrinos información útil sobre esta ruta. A concelleira de Turismo de Redondela valorou dun xeito “moi positivo” esta iniciativa, que se suma ao traballo que realiza o equipo técnico da Oficina Municipal de Turismo “achegando información de interese a todos os que nos visitan e visitas guiadas gratuítas”.

La entrada Correos presenta en Redondela un mapa gratuíto do Camiño Portugués para peregrinos se publicó primero en Concello de Redondela.

– “Redondela oculta: entre a lenda e a superstición” é unha das novidades deste verán. A ruta céntrase en antigas tradicións de Redondela e personaxes como a bruxa Benita e Xan Carallás. Os roteiros de xullo inclúen saídas en kaiak, rutas polos ríos Fondón e Pexegueiro ou a observación nocturna de estrelas, entre outras propostas.

-A alcaldesa de Redondela, Digna Rivas, e os concelleiros de Turismo, Rita Pérez Táboas, e Sostibilidade, Roberto Villar, presentaron o programa de actividades xunto aos técnicos que farán as saídas. Rivas animou tanto á veciñanza como aos visitantes a participar nestes roteiros organizados para público de todas as idades.

As concellerías de Turismo, Sostibilidade e Medio Ambiente apostan unha vez máis polas actividades de ecoturismo, de educación ambiental e culturais. Logo do éxito das saídas organizadas en anos anteriores, este mes de xullo ofrecen unha ampla proposta de roteiros e actividades a pé, en bici ou en kaiak, a maioría delas de balde.

Como novidade este verán estréase a ruta “Redondela oculta: entre a lenda e a superstición” a cargo da guía turística Soledad Chayán. No percorrido dáse conta das supersiticións e tradicións arredor dos oficios, sobre todo dos mariñeiros, onde se destacan personaxes como a bruxa Benita, o mago Marcolfo ou Xan Carallás, mítico fundador da vila de Redondela. En xullo haberá dúas citas con esta ruta, os días 15 e 29.

Para esta semana hai catro interesantes propostas: mañá martes unha visita guiada ao cemiterio dos Eidos, o xoves unha divertida sesión de “Orientaventura” en bicicleta en Chan das Pipas, e na fin de semana dúas rutas ambientais: o sábado día 12 un roteiro guiado a Monte Penide e o domingo día 12 a saída será á zona intermareal de Cesantes, desde o peirao ata a Punta.

Na segunda quincena do mes haberá outras interesantes propostas como unha ruta nocturna polo río Maceiras, un roteiro ambiental polo río Pexegueiro ou unha actividade de observación de estrelas na Miñoteira, en Ventosela.

A concelleira de Cultura e Turismo, Rita Pérez, destacou a “transversalidade” destas actividades “que apostan polo turismo ambiental, sostible e cultural con saídas para coñecer o espectacular patrimonio natural e histórico de Redondela”. O concelleiro de Sostibilidade, Roberto Villar, sinalou que o obxectivo destas actividades é “poñer en valor os recursos naturais de Redondela e tamén concienciar á veciñanza e ás persoas que nos visitan da importancia de respectar estes espazos naturais e axudar a conservalos”. A alcaldesa, Digna Rivas animou tanto á veciñanza de Redondela como aos visitantes e turistas a participar nestas atractivas actividades organizados para público de todas as idades.

No mes de agosto continuarán as saídas guiadas de turismo ambiental e cultural. Para participar nestas actividades é preciso facer a inscrición previa na oficina de turismo, no teléfono 986 40 17 13 ou no enderezo electrónico turismo@redondela.gal.

La entrada Redondela ofrece roteiros ambientais e culturais para o verán se publicó primero en Concello de Redondela.