Entrega de premios da primeira edición do concurso “Redondela Investigada”

– A cita é este venres na Casa da Cultura ás 20:30 horas. O proxecto naceu co obxectivo de fomentar “a curiosidade investigadora entre a mocidade, o espírito investigador e crítico”. Na presentación da revista agasallarase cun exemplar a cada asistente.

– A publicación inclúe seis artigos realizados por alumnado dos institutos públicos. Os temas dos artigos son a historia da SAR, o Taekondo redondelán, o Club de Remo de Cesantes, a tradición das Penlas, a historia de La Imprenta e a vida das avoas.

Sinerxías Secundarias, colectivo formado polas seccións de Xeografía e Historia dos institutos públicos de Redondela, presenta o número cero da revista “Redondela Investigada”. A publicación, realizada en colaboración co Concello, darase a coñecer este venres, 13 de marzo, na Casa da Cultura ás 20:30 horas. No acto participarán tanto o alumnado como o profesorado coordinador, xunto coa alcaldesa, Digna Rivas. Esta publicación recolle os traballos premiados e destacados da primeira edición do certame de investigación de Ciencias Sociais para alumnado de secundaria.

O proxecto, que reúne aos centros IES Chapela, Illa de San Simón, Mendiño e Pedro Floriani, nace co obxectivo de “fomentar a curiosidade investigadora entre a mocidade, o espírito investigador e crítico”. Tal como explica o editorial deste primeiro volume “é unha revista en papel que reforza a idea do libro como elemento físico, máis tamén, simbólico”. A coidada edición permite facer xustiza “á calidade dos traballos publicados e á importancia da investigación sobre o noso”.

A revista inclúe seis artigos cun percorrido por diversos temas de interese local. A investigación gañadora repasa a historia da SAR (Sociedade Atlética de Redondela) e tamén hai artigos sobre o Taekondo redondelán e o Club de Remo de Cesantes. Un cuarto texto recolle a tradición das Penlas e outro a historia da librería da Imprenta e un último artigo que ofrece unha ollada interxeracional da vida das avoas dos autores. Na presentación deste venres haberá exemplares da revista para todos os asistentes.

A alcaldesa, Digna Rivas, salienta a importancia de que a mocidade se interese polo noso pasado “mergullándose no Arquivo Municipal, nas lembranzas das súas familias e na historia viva das nosas parroquias”. Con estes premios e a publicación da revista “non só recoñecemos o esforzo académico, senón que estamos a fomentar o arraigo e o respecto polas nosas raíces entre a nosa rapazada”.

O Concello de Redondela e os institutos asinaron un acordo de colaboración para este certame. No texto, a alcaldesa, Digna Rivas, e as direccións dos centros acordan que o Concello impulsa a celebración do Certame “Redondela Investigada” para “promover o estudo e coñecemento sobre o conxunto do municipio e fomentar o espírito investigador e científico da xuventude de Redondela”. O Concello financia os premios do certame e tamén a publicación da revista “Redondela investigada” cos traballos seleccionados.

La entrada Institutos e Concello presentan a revista “Redondela Investigada” se publicó primero en Concello de Redondela.

– A alcaldesa de Redondela, Digna Rivas, e a concelleira de Igualdade, Iria Vilaboa, estiveron coa rapazada do IES Mendiñoque para presentar a charla da educadora social e axente de Igualdade Lucía Pereda. O obxectivo é formar ao alumnado en educación afectivo-sexual e advertir dos roles e estereotipos erróneos da pornografía.

– “Preocúpanos o consumo de pornografía en idades cada vez máis temperás, e por iso desde o Concello promovemos estas actividades de sensibilización”, sinala a alcaldesa. As charlas realízanse ao longo de todo o curso nos institutos e colexios do municipio e tamén abordan temas como trastornos da conduta alimentaria, que aumentan na infancia e adolescencia.

A alcaldesa de Redondela, Digna Rivas, e a concelleira de Igualdade, Iria Vilaboa, estiveron onte no IES Mendiño co alumnado que asistiu ao obradoiro impartido pola educadora e técnica en Igualdade Lucía Pereda. Esta charla “Falemos de sexo” forma parte dun amplo programa de información e sensibilización que realiza desde hai anos a concellería de Igualdade. As actividades, con diferentes formatos, están dirixidas a alumnado de Primaria, Secundaria e Bacharelato, con contidos adaptados ás idades de cada grupo.

Os estudos revelan que o consumo de pornografía comeza cada vez a idades máis temperás na infancia e na adolescencia. “Son datos que nos preocupan e, malia non ser unha competencia municipal, realizamos desde hai anos estes obradoiros”, explica a alcaldesa. O obxectivo é ofrecer aos rapaces e rapazas “información veraz e unha educación afectivo-sexual adaptada a cada grupo de idade”.

Por experiencia de anos anteriores, a maioría do alumnado considera a pornografía “unha industria coma outra calquera” e que a explotación de mulleres “é unha forma lícita de gañar cartos”. A metade da rapazada pensa tamén que a pornografía é tan só “entretemento” e 3 de cada 10 considérano “unha ferramenta adecuada para explorar a sexualidade tanto propia como da parella”. Os datos fan necesario “seguir traballando co alumnado nas aulas desde unha perspectiva de xénero”, apunta a concelleira Iria Vilaboa.

Nos obradoiros relízanse charlas tamén charlas para o alumnado de Bacharelato sobre plataformas dixitais que promoven “un falso empoderamento da muller e fomentan a violencia sexual”. No caso das actividades en Primaria céntranse sobre todo nos trastornos da conduta alimentaria, cada vez máis frecuentes na infancia e adolescencia “pola presión que exerce a publicidade e as redes sociais na imaxe da rapazada”.

La entrada O alumnado dos institutos aprende sobre sexualidade e afectividade se publicó primero en Concello de Redondela.

– A alcaldesa, Digna Rivas, explica que é un xeito divertido de explicar as Matemáticas en galego cunha sesión de maxia “para romper os prexuízos que existen ao respecto do ensino das ciencias en galego”. Esta actividades, que hoxe comezaron nos CEIP de Reboreda e Quintela co Mago Paco, percorrerán este mes todos os colexios públicos de Primaria do municipio.

O Concello de Redondela, a través do Servizo de Normalización Lingüística, celebra este mes o Día da Ciencia en Galego coa actividade “Matemaxia”. A alcaldesa, Digna Rivas, explica que é un xeito divertido de explicar as Matemáticas en galego cunha sesión de maxia “para romper os prexuízos que existen ao respecto do ensino das ciencias en galego”. Esta actividades, co Mago Paco, comezaron onte nos CEIP de Reboreda e Quintela, e percorrerán este mes todos os colexios públicos de Primaria do municipio.

Rivas lembra que o 4 de novembro conmemórase o Día da Ciencia en Galego, unha idea que nace despois de que a Consellaría de Educación obrigase por decreto en 2010 a impartir en castelán as clases de Matemáticas, Tecnoloxía, Física e Química no ensino non universitario “como se o noso idioma só servise para facer poesía”. Con esta data preténdese pór en valor o uso do galego, que coma calquera idioma “vale tanto para falar de letras como de números”.

Cada ano, como pasa co Día das Letras, escóllese a un relevante científico a quen homenaxear, e neste 2025 o escollido foi o bioquímico Fernando Calvet (1903-1988), “un absoluto transformador da Universidade”. O profesor foi o introdutor da bioquímica moderna en España, modernizador da química orgánica en Galicia e iniciador da investigación química na USC nos anos 30 do pasado século e pioneiro na aplicación da química á industria. O seu compromiso coa ciencia e con Galicia levouno ao exilio e ao cárcere en 1938. Ao saír da prisión, desde a dirección dos laboratorios Zeltia no Porriño, patentou especialidades farmacéuticas e elaboráronse fármacos hepáticos, insulinas, ou vitaminas, entre outros.

La entrada Redondela celebra o Día da Ciencia en Galego con “Matemaxia” nos coles se publicó primero en Concello de Redondela.

A alcaldesa, Digna Rivas, con alumnado do IES Illa de San Simón na charla coa educadora Lucía Pereda

– A concellería de Igualdade organiza charlas informativas para o alumnado dos institutos e colexios do municipio. As temáticas abordan cuestións como a afectividade e sexualidade, así como os trastornos da conduta alimentaria que son cada vez máis frecuentes entre nenos, nenas e adolescentes.

-A alcaldesa, Digna Rivas, estivo cos alumnos do IES Illa de San Simón que asistiron á xornada impartida pola educadora social e axente de igualdade Lucía Pereda. Rivas incidiu no riscos que as redes sociais supoñen para a xente nova “polos efectos negativos sobre a súa autoestima, a confianza e a percepción do corpo”.

concellería de Igualdade organiza charlas informativas para o alumnado dos colexios e institutos do municipio. O obxectivo destas charlas é formar aos rapaces e rapazas en educación afectivo-sexual desde a igualdade. As sesións son interactivas, participativas e dinámicas, favorecendo o intercambio de ideas. A programación inclúe tamén charlas sobre trastornos da conduta alimentaria, que son cada vez máis frecuentes entre nenos, nenas e adolescentes pola imaxe que lles trasladan as redes sociais. A alcaldesa, Digna Rivas, estivo esta mañá con alumnos e alumnas do IES Illa de San Simón que participaron na charla impartida pola educadora social e axente de igualdade Lucía Pereda. Rivas lembroulles que as imaxes que se ven nas redes están “coidadosamente seleccionadas e editadas, non son reais, e iso pode xerar malestar e afectar negativamente á autoestima e provocar graves problemas”. Para a rexedora estas charlas son “fundamentais” para que teñan acceso a información directa da man de profesionais especialistas cos que poder aclarar dúbidas ou inquedanzas.

A redondelá Lucía Pereda explica que “a presión que se vive na rapazada pola hipersexualización que se fai das mozas nos medios, as esixencias aos rapaces de demostrar a súa virilidade, son factores que inflúen directamente na súa autoestima e no seu desenvolvemento”. Abórdase tamén a influencia das plataformas dixitais na sexualidade “porque se teñen transformado en novos espazos de control e violencia”, sinala Pereda. Por estes motivos desde o Concello de Redondela entenden que este tipo de charlas formativas “son moi necesarias para a mocidade”.

As charlas, que comezaron a pasada semana, prolongaranse durante os meses de novembro, decembro e xaneiro polos diferentes centros de ensino. Trátase dunha actividade moi demandada polos centros e que tivo moito éxito en convocatorias anteriores. A concelleira de Igualdade, Iria Vilaboa, adiantou tamén que dentro da programación do 25N realizarase unha Escola de Familias para pais e nais. Nesta caso a actividade está orientada a dar asesoramento e aclarar dúbidas das familias en temas relacionados coa educación afectivo-sexual na infancia e adolescencia ou o uso das novas tecnoloxías, redes sociais e plataformas dixitais.

La entrada Alumnado de colexios e institutos aprende sobre afectividade, sexualidade e trastornos alimentarios se publicó primero en Concello de Redondela.

– A alcaldesa, Digna Rivas, sinala que con estas bolsas “garántese a escolarización, ao compensar posibles carencias de tipo familiar ou económico e evitamos situacións de risco social, ao tempo que aseguramos unha nutrición axeitada para nenos e nenas”. O prazo de solicitude está aberto ata o 4 de agosto.

– A partida destinada a estas axudas ascende a 40.000 euros para o próximo curso “co obxectivo de atender ao maior número de familias posible”. Rivas destaca “o compromiso real” do goberno local coas políticas sociais, polo que desde a súa chegada á alcaldía o orzamento desta partida duplicouse, pasando de 20.000 euros de 2019 aos 40.000 actuais.

O departamento de Servizos Sociais do Concello de Redondela ten aberto o prazo de solicitude para as axudas de comedor escolar do curso 2025/26. Trátase dunha prestación económica destinada ás familias con menores que utilizan o servizo de comedor do colexio. A alcaldesa, Digna Rivas, explica que con estas bolsas preténdese “garantir a escolarización, compensar posibles carencias de tipo familiar ou económico, evitar situacións de risco social e asegurar unha nutrición axeitada”. A partida municipal destinada a estas axudas ascende a 40.000 euros par o próximo curso “co obxectivo de atender ao maior número de familias posible”. Rivas destaca “o compromiso real” do goberno local coas políticas sociais, polo que desde a súa chegada á alcaldía o orzamento desta partida duplicouse, pasando de 20.000 euros de 2019 aos 40.000 actuais.

A concelleira Iria Vilaboa explica que esta bolsa está dirixida ao alumnado con praza no comedor escolar dalgún dos centros de ensino público que contan con este servizo, e que faga uso do comedor de maneira continuada un mínimo de 3 veces por semana. Nas bases desta axuda establécense criterios económicos (máximo 10 puntos) e de situación socio-familiar cos informes do departamento de Servizos Sociais do Concello (máximo 20 puntos).

No pasado curso foron 41 os nenos e nenas que contaron coa bolsa, e todo o alumnado usuario do departamento de Servizos Sociais tivo axuda de comedor.

As bases da convocatoria poden consultarse na páxina web do Concello de Redondela (www.redondela.gal) e no Boletín Oficial da Provincia de Pontevedra. As solicitudes deberán realizarse no impreso municipal específico para esta convocatoria, acompañadas da documentación requirida, e poden presentarse no Rexistro xeral de entrada do Concello de Redondela, tanto na oficina municipal de Chapela como na Casa do Concello, en horario de atención ao publico. Tamén pode facerse a través da sede electrónica do Concello https://redondela.sedelectronica.es. Ou en calquera dos rexistros oficiais establecidos pola lexislación vixente. O prazo de solicitudes está aberto ata o 4 de agosto.

La entrada O Concello de Redondela destina 40.000 euros para as bolsas de comedor escolar se publicó primero en Concello de Redondela.

Erica Iglesias, Valentín García, Digna Rivas, Ángel Barros, Amalia Bóveda e Noemí Moreira

– O CEIP Alexandre Bóveda celebrou o 122 aniversario do ilustre galeguista nunha emotiva xornada. O centro inaugurou un retrato de Bóveda realizado e doado polo artista redondelán Ángel Barros. A filla de Alexandre Bóveda, Amalia, inaugurou a obra xunto ao pintor, quen explicou que se trata dun retrato “inacabado intencionadamente, porque tamén a vida de Bóveda quedou inacabada”.

O CEIP Alexandre Bóveda, en Chapela, celebrou onte o 122 aniversario do ilustre galeguista que dá nome ao centro. O colexio viviu unha xornada moi emotiva na que participaron Amalia Bóveda e Valentín García, filla e o neto de Alexandre Bóveda. Co Alalá das Mariñas, interpretado por Erica Iglesias, deuse inicio aos actos. O artista redondelán Ángel Barros doou ao centro un retrato de Bóveda, que se presentou esta mañá coa participación do pintor. O propio Barros explicou que o retrato é unha obra “inacabada intencionadamente, como un símbolo, porque tamén a vida de Bóveda quedou inacabada”.

A alcaldesa, Digna Rivas, felicitou ao centro pola iniciativa e lembrou o papel de Alexandre Bóveda “na defensa dos dereitos do pobo galego e da democracia”. Rivas animou a nenos e nenas a seguir o exemplo de Bóveda “e aprender, coñecer o mundo e ler moito, porque o saber é un dos tesouros máis importantes da vida”. A rexedora agradeceu á familia de Bóveda a súa presenza e dixo sentir neles “a dignidade da memoria histórica e a lembranza das persoas que deron a súa vida pola democracia”. No acto participaron tamén Manuel Puga, neto de Ernestina Otero, Rosalía Polo, inspectora de Educación, e Xurxo Martínez, técnico de Normalización Lingüística. Alumnado do centro protagonizou unha emotiva peza teatral e non faltou a música, co alumnado cantando o “parabéns para ti” a Bóveda e o himno galego interpretado polo Carunchos. A directora do centro, Noemí Moreira, agradeceu aos convidados e a toda a comunidade educativa a súa implicación nesta celebración.

Os actos continuarán no CEIP Alexandre Bóveda o venres, 6 de xuño, cun serán aberto a toda a comunidade educativa. Será a partir das 18.30 horas coa participación do grupo folclórico Anaquiños de Chapela.

La entrada O colexio de Angorén celebra o aniversario de Alexandre Bóveda se publicó primero en Concello de Redondela.

A alcaldesa de Redondela, Digna Rivas, e o concelleiro Antonio Cabaleiro, participaron na recepción dos alumnos franceses de intercambio que convivirán co alumnado do IES Chapela. Son sete rapaces e rapazas do Lycée de Montauban, da zona da Bretaña, que convivirán coas familias dos alumnos e alumnas do IES Chapela que xa pasaron a súa estancia en Francia. Rivas e Cabaleiro participaron nun encontro cos estudantes acompañados do director do centro, Antonio Bas, o vicedirector Francisco Javier Silvela, a profesora de lingua francesa, Ángeles Alemparte, e a Xefa de Estudos, Fátima Ferreiro, no que conversaron sobre esta experiencia.

O alumnado do IES Chapela valorou dun xeito moi positivo a súa estadía en Francia nunha rexión “moi verde, con bastantes semellanzas con Galicia” e destacaron “a gran aprendizaxe” que supón este intercambio no se que se aloxan coas propias familias “porque se aprende moito sobre o idioma, pero tamén da cultura da zona”. Ademais puideron realizar interesantes visitas como unha ruta ata o Mont-Saint-Michel. Para a rapazada francesa esta será tamén unha gran oportunidade para coñecer non só o idioma, senón tamén a tradición e costumes desta terra e a paisaxe e gastronomía das Rías Baixas. Unha excursión ás illas Cíes e unha ruta por un tramo do Camiño de Santiago serán algunhas das experiencias que poderán vivir estes días.

A alcaldesa eloxiou a súa “valentía” á hora de enfrontarse a un reto como o de saír ao estranxeiro, e animounos a aproveitar ao máximo este intercambio “co que non só melloran as súas competencias no idioma, senón que tamén lles servirá como unha experiencia a nivel de autonomía e para seguir formándose” . Rivas puxo tamén en valor “o gran traballo da directiva e profesorado do IES Chapela, que sempre se implica para ofrecer ao seu alumnado a mellor formación posible, e este programa de intercambio é un exemplo”.

La entrada Chapela recibe ao alumnado francés de intercambio se publicó primero en Concello de Redondela.

– Un total de 372 alumnos e alumnas de primaria e secundaria de centros de ensino de Redondela participan nesta actividade organizada pola Concellería de Igualdade. Dentro da programación do 8M que promove o Concello estas charlas son unha ferramenta máis “para que a rapazada coñeza os perigos aos que se expoñen, e que os poidan identificar e denunciar”.

– A alcaldesa de Redondela, Digna Rivas, e a concelleira de Igualdade, Iria Vilaboa, participaron co alumnado de Porto Cabeiro nesta actividade. Trátase de charlas moi participativas nas que o alumnado pregunta as súas dúbidas, fala das súas experiencias cos xogos e redes sociais e aprenden a importancia de poñer límites.

As charlas “Tecnoloxías e novas formas de violencia de xénero” están a percorrer os centros de ensino do municipio. A rapazada entra en contacto con internet e as redes sociais a idades cada vez máis temperás “polo que é fundamental que canto antes coñezan os risco que corren”, explica o experto en ciberseguridade Javier Cancelas. Con charlas adaptadas ás súas idades e co apoio e vídeos didácticos, nenas e nenos aprenden o que é o ciberacoso ou o grooming. Un total de 372 alumnos e alumnas dos colexios Igrexa, Porto Cabeiro, Quintela, Santa Mariña e IES Floriani participan nesta actividade organizada pola Concellería de Igualdade. Dentro da programación do 8M que promove o Concello estas charlas son unha ferramenta máis “para que a rapazada coñeza os perigos aos que se expoñen, e que poidan identificalos e denuncialos”.

A alcaldesa de Redondela, Digna Rivas, e a concelleira de Igualdade, Iria Vilaboa, compartiron co alumnado de Porto Cabeiro esta actividade, na que participaron nenos e nenas de 1º, 2º e 3º de Primaria. Trátase de charlas moi participativas nas que o alumnado pregunta as súas dúbidas, fala das súas experiencias cos xogos ou as redes sociais e aprenden a importancia de poñer límites.

A rexedora destacou “a boa acollida” que ten esta actividade entre o alumnado e o profesorado dos centros, que a valoran como unha iniciativa “moi necesaria”. A rapazada utiliza teléfonos móbiles e tabletas desde idades moi temperás “e deben saber os perigos que existen en internet”.

Charlas nos Centros Culturais

A charla “Tecnoloxías e novas formas de violencia de xénero” tamén se imparte nos centros culturais das diferentes parroquias, con contidos e temáticas dirixidos ao público adulto. Esta semana comezaron en Santo Estevo de Negros e Quintela. A vindeira semana, o 21 de marzo, será no CRC de Cesantes ás 19.00 horas. No Multiúsos de Chapela será o 28 de marzo ás 19.00. O sábado 29 de marzo seré no CC A Miñoteira de Ventosela ás 19.30 e as xornadas rematarán o 4 de abril cunha charla no CC Saramagoso ás 19.00 horas. Todas estas charlas son abertas ao público.

Estas actividades fináncianse grazas ao Pacto de Estado contra a violencia de xénero do Ministerio de Igualdade.

La entrada A rapazada de Redondela aprende a protexerse dos perigos de internet se publicó primero en Concello de Redondela.

– Os graves problemas de seguridade que sofre o CEIP Laredo debido ao mal estado da súa cuberta, obrigaron a actuar ao Concello de Redondela. Esta semana comezou a instalación dun valado perimetral para “garantir que ninguén poida acceder ás zonas de risco”, e unha rede “para evitar que se desprenda calquera elemento da cuberta”, explica a alcaldesa Digna Rivas.

– Rivas sinala que o Concello asume estas obras “por responsabilidade” xa que a súa prioridade é “garantir a seguridade dos máis de 180 alumnos e alumnas do centro, así como das familias, profesorado e viandantes”. Hai tres meses que se comunicou esta grave situación á Consellería de Ensino, á que esixe que poña “data e prazos concretos para a reforma integral da cuberta”.

Os graves problemas de seguridade que sofre o CEIP Laredo debido ao mal estado da súa cuberta, obrigaron a actuar ao Concello de Redondela ante a inacción da Consellería de Ensino. O risco de desprendemento de tellas foi comunicado a Xunta de Galicia a través dun informe técnico remitido polo Concello en decembro do pasado ano no que se advertía da grave situación que presenta o tellado do centro. O informe advertía das “medidas de seguridade urxentes” que se deben adoptar, como a colocación dun valado perimetral para “garantir que ninguén poida acceder ao perímetro de seguridade”, así como unha rede “para evitar que se desprenda calquera elemento da cuberta”.

Digna Rivas comprometeuse coa dirección e da ANPA a asumir desde o Concello eses traballos de maneira urxente “malia ser unha competencia exclusiva da Xunta”. Os traballos comezaron xa esta semana, “porque a prioridade do Concello é garantir a seguridade dos máis de 180 alumnos e alumnas do centro, así como das familias, profesorado e viandantes que pasan pola beirarrúa do colexio”. Rivas sinala que “por responsabilidade” o Concello acomete as obras “para perimetrar toda a zona que presenta risco de desprendemento para evitar calquera accidente, coa instalación dunha estrutura e unha rede de protección”. Rivas agradeceu a colaboración da dirección do centro e da ANPA, que se puxeron a total disposición do Concello.

A rexedora lembra que hai tres meses que se comunicou esta grave situación á administración responsable. Técnicos da Consellería visitaron o centro e amosaron a súa preocupación, pero o Concello aínda non obtivo resposta por parte da Xunta de Galicia. Rivas esixe á administración autonómica “que de maneira urxente poña data e prazos concretos para facer a reforma integral da cuberta do CEIP Laredo, unha obra imprescindible para garantir a seguridade no centro, tan como advirte o informe técnico”. Nun pleno da corporación municipal un dos concelleiros do PP asegurou que a Xunta de Galicia acometería a obra neste 2025 “pero no Concello non consta ningunha información oficial ao respecto”.

La entrada O Concello instala medidas de seguridade no CEIP Laredo para evitar desprendementos se publicó primero en Concello de Redondela.

– A alcaldesa, Digna Rivas, e os concelleiros Antonio Cabaleiro e Roberto Villar, reuníronse coa dirección do CEIP Laredo e da ANPA para tratar os graves problemas de seguridade que sofre o centro ante o risco de desprendemento de tellas. Ante a falta de resposta por parte da Xunta de Galicia, o Concello asumirá os traballos urxentes de permietrar a zona e instalar unha rede para evitar accidentes.

– Rivas afirma que “por responsabilidade” o Concello acometerá estas obras, malia ser competencia da Xunta, porque o primeiro “é garantir a seguridade do alumnado, familias, profesorado e viandantes”. A alcaldesa demanda á Consellería de Educación “que de maneira urxente poña data para facer a reforma integral da cuberta do CEIP Laredo, unha obra imprescindible para garantir a seguridade no centro”.

A alcaldesa de Redondela, Digna Rivas, e os concelleiros de Urbanismo, Antonio Cabaleiro, e de Infraestruturas, Roberto Villar, reuníronse onte co director do CEIP Laredo, Abraham Domínguez, e o presidente da ANPA do centro, Martín Diéguez. A xuntanza tiña como obxectivo tratar os graves problemas de seguridade que sofre o centro debido ao mal estado da súa cuberta, co risco de desprendemento de tellas. O Concello de Redondela enviou hai un mes un informe técnico á Consellería de Educación da Xunta de Galicia advertindo da grave situación que presenta o tellado do centro. O informe advirte das “medidas de seguridade urxentes” que se deben adoptar, como a colocación dun valado perimetral para “garantir que ninguén poida acceder ao perímetro de seguridade”, así como unha rede de seguridade “para evitar que se desprenda calquera elemento da cuberta”.

Ante a falta de resposta por parte da Xunta de Galicia, Digna Rivas comprometeuse coa dirección e a ANPA do colexio a asumir desde o Concello eses traballos de maneira urxente “malia ser unha competencia exclusiva da Xunta”. A alcaldesa afirma que o primeiro “é garantir a seguridade dos máis de 180 alumnos e alumnas do centro, así como das familias, profesorado e viandantes que pasan pola beirarrúa do colexio”. Rivas sinala que “por responsabilidade” o Concello acometerá as obras “para perimetrar toda a zona que presenta risco de desprendemento para evitar calquera accidente, coa instalación dunha estrutura e unha rede de protección”. Os técnicos do Concello puxeron xa e marcha os trámites para a contratación destes traballos que poderían comezar a finais deste mes, ou comezos de febreiro. Rivas agradeceu a colaboración da dirección do centro e da ANPA, que se puxeron a total disposición do Concello.

A rexedora lamenta que despois dun mes de comunicar esta grave situación á administración responsable, o Concello aínda non obtivo resposta por parte da Xunta de Galicia “que é a administración que ten a competencia en materia de Ensino”. Rivas demanda á administración autonómica “que de maneira urxente poña data e prazos concretos para facer a reforma integral da cuberta do CEIP Laredo, unha obra imprescindible para garantir a seguridade no centro, tal como advirte o informe técnico”.

La entrada O Concello de Redondela acometerá as medidas de seguridade “urxentes” no CEIP Laredo se publicó primero en Concello de Redondela.

– O Concello de Redondela, en colaboración coa Asociación Érguete, pon en marcha os programas “Educando en Igualdade”, dirixida ao alumnado de 4º de Primaria, e “Xeración Violeta” para nenos e nenas de Educación Infantil e as familias. Nas actividades participarán máis de 300 nenos e nenas.

– A alcaldesa, Digna Rivas, sinalou que desde o Concello o trabállase na promoción da Igualdade “en todos os eidos e todos os días do ano” e salientou a importancia de sensibilizar aos nenos e nenas “desde as idades máis temperás, porque temos a obriga de construír entre todos unha sociedade máis xusta e igualitaria”.

O Concello de Redondela, no marco do convenio de colaboración coa Asociación Érguete, pon en marcha dous programas de Igualdade nos centros de ensino do municipio. Trátase das actividades “Educando en Igualdade”, dirixida ao alumnado de 4º de Primaria, e “Xeración Violeta” para nenos e nenas de Educación Infantil con varias sesións didácticas en cada grupo. A alcaldesa, Digna Rivas, e a concelleira de Igualdade, Iria Vilaboa visitaron onte o CEIP de Cedeira, onde comezaron a celebrarse estas charlas. A rexedora sinalou que desde o Concello o trabállase na promoción da Igualdade “en todos os eidos e todos os días do ano”. O obxectivo deste programa é achegar ao alumnado e ás familias “ferramentas de sensibilización e actuación para unha verdadeira relación de igualdade entre nenos e nenas”, sinala Rivas. A rexedora salienta a importancia de traballar en materia de igualdade “desde as idades máis temperás, porque os nenos e nenas son os homes e mulleres do futuro, e temos a obriga de construír entre todos unha sociedade máis xusta e igualitaria”. Nas sesións de traballo que se realiza nos colexios trázase unha metodoloxía que favorece o traballo cooperativo e un reparto de roles afastados dos estereotipos.

Nestes programas participarán máis de 300 nenos e nenas dos centros de ensino público de Redondela. Onte comezaron as actividades no CEIP de Cedeira, e ao longo do mes de novembro continuarán no CEP Santa Mariña, os CEIP Outeiro das Penas, Reboreda, Quintela, Laredo, Igrexa, Porto Cabeiro, Alexandre Bóveda e as escolas infantís Marisma, Ventosela e San Pedro de Cesantes.

O programa está financiado con fondos do Pacto de Estado contra a Violencia de Xénero do Ministerio de Igualdade.

La entrada Os escolares de Redondela aprenden en Igualdade se publicó primero en Concello de Redondela.

O Concello de Redondela ten aberto o prazo de solicitude de axudas para a adquisición de libros e material curricular destinadas a familias con nenos e nenas matriculados en centros públicos no segundo ciclo de Educación Infantil de Redondela (de 3 a 5 anos). O concelleiro de Ensino, Iván Valles, explica que estas axudas teñen por obxectivo establecer un réxime compensatorio para familias con carencias económicas “co fin de paliar os gastos que supón esta escolarización”. Subvenciónase a través deste procedemento a adquisición de libros e material escolar. O Concello conta cunha partida de 8.500 euros para estas axudas. O importe da subvención corresponderase co custe total de adquisición dos libros e o material escolar solicitado polo centro escolar ata unha cantidade máxima de 70 euros por vale.

Entre os requisitos para optar a estas axudas establécense uns criterios económicos polos que a renda per cápita familiar debe ser igual ou inferior a 8.800 euros. O prazo de solicitudes remata o 31 de xullo. As solicitudes poden presentarse no rexistro do Concello ou na sede electrónica.

La entrada O Concello convoca as axudas para a adquisición de libros e material escolar de Educación Infantil se publicó primero en Concello de Redondela.