– Uns 500 escolares dos institutos de Redondela celebraron o éxito do reto “Unha semaniña enteira” co concerto de Wöyza. A artista moañesarepasou os seus éxitos e animou á rapazada e soñar e cambiar as cousas “por unha sociedade máis xusta”.

– A alcaldesa Digna Rivas, responsable do departamento de Normalización Lingüística, valora positivamente esta campaña para a promoción do galego entre a mocidade. A rexedora confía en que retos coma este sirvan “para normalizar o uso da nosa lingua en todos os ámbitos da sociedade” e reafirma o compromiso do seu goberno “para colaborar en todas as iniciativas que se poñan e marcha a prol da lingua”.

O Concello de Redondela pechou onte na Alameda Castelao unha nova edición da campaña de dinamización lingüística “Unha semaniña enteira”. O broche de ouro correu a cargo da artista Wöyza, que fixo vibrar a uns 500 alumnos e alumnas dos catro institutos do municipio: IES Chapela, IES Floriani, IES Mendiño e IES Illa de San Simón. A súa música, feminista e reivindicativa, fusiona diferentes estilos con letras en galego cos que animou á rapazada a” soñar e cambiar as cousas para construir unha sociedade máis xusta”.

Esta iniciativa, impulsada polos equipos de Normalización Lingüística dos centros educativos co apoio do Concello, desafiou á mocidade a manter o uso do galego as 24 horas do día durante sete xornadas consecutivas. Como recompensa polo seu compromiso, os participantes gozaron do directo de Wöyza, referente da música urbana en galego, quen achegou os seus ritmos soul e hip-hop á alameda redondelá.

A alcaldesa, Digna Rivas, felicitou á rapazada por demostrar que o galego é unha lingua “viva e necesaria en todos os espazos”, animándoos a que este hábito non quede só nunha semana, senón que se estenda a todo o ano. O Servizo de Normalización Lingüística do Concello, do que Rivas é a responsable, valorou moi positivamente a xornada, que serviu non só como festa de clausura “senón como un espazo de convivencia para o alumnado dos institutos arredor da lingua propia”.

La entrada A música feminista e reivindicativa de Wöyza pecha a campaña “Unha semaniña enteira” se publicó primero en Concello de Redondela.

– As asociacións e colectivos interesados teñen ata o 21 de abril para anotarse no rexistro municipal ou na sede electrónica. A alcaldesa, Digna Rivas, destacou a importancia de manter viva esta herdanza: “Os Maios son moito máis que esculturas vexetais; son resultado do traballo colectivo e a ilusión de moitas xeracións. Convidamos a toda a veciñanza a vivir a festa”.

– O Goberno local mantén a súa aposta pola tradición consolidando as axudas de 200 euros por cada maio participante, ademais de premios en metálico para os tres mellores dotados de 200, 250 e 300 euros en cada unha das catro categorías.

Redondela prepárase para recibir a primavera coa súa emblemática Festa dos Maios, unha das citas máis senlleiras do calendario cultural galego. O Concello vén de anunciar a apertura do prazo de inscrición para o concurso de figuras e coplas, convidando a toda a veciñanza, asociacións e colectivos a ser partícipes desta explosión de arte natural e retranca que terá o seu día grande o vindeiro 1 de maio.

Tras o éxito acadado en edicións anteriores, o Concello reafirma o seu apoio a esta tradición mantendo a contía das axudas directas por participación. Así, cada grupo que presente un maio ao concurso recibirá unha subvención de 200 euros, co obxectivo de sufragar os gastos de elaboración e fomentar que ningunha parroquia quede sen representación.

A alcaldesa, Digna Rivas, destacou a importancia de manter viva esta herdanza: “Os Maios son moito máis que esculturas vexetais; son o resultado do traballo colectivo e a ilusión de moitas xeracións. Queremos que Redondela siga sendo o referente que é, onde a creatividade dos maios artísticos convive co respecto polos nosos tradicionais conos e cruceiros”. Desde o Concello convídase a todos os colectivos a que se somen a esta festa. O ano pasado superáronse as 20 agrupacións “e este ano o reto é seguir medrando para demostrar que a tradición redondelá ten o futuro asegurado”, concluíu Rivas.

O prazo para formalizar a participación estará aberto ata o vindeiro 21 de abril. As entidades interesadas poden realizar o trámite de xeito presencial no rexistro do Concello ou a través da sede electrónica municipal.

Categorías e Premios

O certame volverá contar con catro categorías competitivas: Maio Tradicional, Maio Artístico, Copla e Interpretación. Para cada unha delas, establécense premios de 300 euros para o 1º clasificado, 250 euros para o 2º e 200 euros para o 3º. En total, o Concello outorgará 12 premios que recoñecerán tanto a calidade plástica das figuras (feitas con elementos naturais como fentos, flores ou ovos) como o enxeño e a crítica social das coplas cantadas ao ritmo das castañolas.

La entrada Aberto o prazo de inscrición para o concurso da Festa dos Maios se publicó primero en Concello de Redondela.

O Multiúsos e o paseo da Xunqueira, así como os soportais do Concello, acollen a exposición colectiva de tres artistas redondeláns: Manuel Seijas, Olimpio Giráldez e José Ángel Xesteira. Esta mostraconmemorativa celebra os 60 anos da primeira vez que se reuniron para expoñer as súas obras, fito que repetiron 30 anos despois.

A exposición, que se pode ver ata o 26 de marzo, reúne obras das xa expostas nas anteriores mostras así como outras novas, con diferentes estilos e técnicas. O acto de inauguración, no que participaron a alcaldesa, Digna Rivas, e a concelleira de Cultura, Rita Pérez, congregou a un nutrido grupo de veciños e veciñas, familares e amizades dos tres artistas. Seijas, Giráldez e Xesteira conincidiron en reclamar “máis cultura, e menos guerra”. Rivas puxo o acento no dinamismo da sociedade redondelá, que é un “exemplo” de compromiso coa cultura, as liberdades, a solidariedade e a democracia “como nos demostran nesta exposición estes tres artistas, persoas ben coñecidas e queridas nesta vila”.

La entrada Exposición conmemorativa: 60 anos de arte e amizade de Seijas, Giráldez e Xesteira se publicó primero en Concello de Redondela.

FOTO: A concelleira de Cultura, Rita Pérez Táboas, e a alcaldesa Digna Rivas con Sinda López.

– Sinda López, veciña de Redondela, cedeu ao Arquivo Municipal Audiovisual 15 fotografías familiares. As imaxes son de seu pai, Castor López, garda municipal do Concello de Redondela entre os anos `50 e ’70 do pasado século, e tamén de oficios, celebracións e da vida cotiá da vila naquelas décadas. Con esta doazón o fondo conta xa con máis de 75.000 fotografías cedidas pola veciñanza.

– A alcaldesa , Digna Rivas, agradeceu o xesto desta veciña e anima á veciñanza “a seguir este exemplo e facilitar ao Arquivo Municipal fotografías que poidan ter nas súas casas do noso pasado, de tradicións ou celebracións coas que seguir ampliado o fondo audiovisual do Concello”.

Sinda López, veciña de Redondela, acaba de ceder 15 fotografías da súa colección particular relativas ao seu pai, Castor López, que foi garda municipal no Concello de Redondela entre as décadas dos ‘50 e `60 do século pasado. Son imaxes icónicas como a policía municipal posando de gala en Vilavella ou a nevada de 1963, ademais de escenas cotiás da vila nesa época: homes traballando nunha zapatería, nenos e nenas posando nunha merenda, a festa dos Maios e outras celebracións.

Todas as fotografías foron dixitalizadas polo Arquivo Municipal e xa poden consultarse tanto nas redes sociais coma en papel nas dependencias municipais do propio Arquivo. Para consultalas na web pode facer a través do Instagram, o Facebook ou o blog do Arquivo Audiovisual Municipal. As fotografías orixinais foron devoltas á propietaria xunto cun dispositivo coa copia tamén dixital das imaxes. Con esta doazón o Arquivo Audiovisual conta xa cun total de 75.016 fotografías cedidas pola veciñanza, incluído o Fondo Fotsca. O fondo municipal conta tamén coas fotografías do propio Concello, que suman aproximadamente 3.400.

A alcaldesa de Redondela, Digna Rivas, agradeceu o xesto de Sinda López e animou á cidadanía a seguir este exemplo e facilitar ao Arquivo municipal imaxes antigas que poidan ter nas súas casas de oficios, tradicións ou celebracións “para seguir ampliado o fondo audiovisual do Concello”. A rexedora fixo un chamamento especialmente á veciñanza das parroquias, “porque notamos unha carencia de fotografías das distintas parroquias de Redondela, por iso lles pedimos aos que teñan imaxes antigas que se poñan en contacto co Arquivo municipal”.

La entrada O Arquivo Municipal recupera imaxes icónicas dos anos `50 aos ’70 cedidas pola familia de Castor López se publicó primero en Concello de Redondela.

– A inscrición para participar nesta edición está aberta ata o 15 de marzo no formulario ArteLixo 2026

O ArteLixo 2026 bota a andar co lema “Ata aquí chegaba o mar!”. Nesta edición o ArteLixo intégrase no proxecto Mariscando conCiencias para o Futuro que contempla a Arte Cidadá como unha composición de saberes para imaxinar e construír futuros sostibles. Unha iniciativa, na que participamos AMARTURMAR, grupo de profesionais da pesca costeira artesanal, Future Oceans Lab (Uvigo), grupo de investigación adscrito ao campus do mar da Universidade de Vigo, ArteLixo, Concello de Redondela e Cidadania S. Coop. Galega, cooperativa que promove a participación social nas políticas públicas.

O ArteLixo segue a ser un certame ecoloxista, solidario, colaborativo, con consciencia e con vontade de compartir, e abre a convocatoria para todas as persoas e colectivos que desexen participar. As obras teñen que estar feitas con material de refugallo e expoñeranse polas rúas, prazas e escaparates de Redondela durante o certame.

Como inscribirse no ArteLixo2026?

Cubrir o formulario de inscrición antes do 15 de Marzo de 2026.

A inscrición faise mediante un formulario. O formulario podedes cubrilo na ligazón Inscrición ArteLixo 2026

Unha vez rematado o prazo de inscrición a organización porase en contacto coas autoras/es das obras para concretar os detalles de localización e calquera outro que poida xurdir.

Para máis información poden dirixirse ao correo electrónico: artelixoredondela@gmail.com, ou no teléfono 604 03 92 13

PRAZO DE INSCRICIÓN: ATA O 15 DE MARZO

EXPOSICIÓN: DO 28 DE MARZO AO 11 DE ABRIL

La entrada ATA AQUÍ CHEGABA O MAR! a proposta de ArteLixo 2026 se publicó primero en Concello de Redondela.

Recreación da reforma no entorno do CEIP Porto Cabeiro que se aprobou no pleno de febreiro

– O pleno da corporación aprobou esta semana unha partida de 2,7 millóns para o plan de mellora dos camiños municipais cos votos de PSdG-PSOE, AER e PP, malia o voto en contra do BNG. Tamén saíu adiante por unanimidade a proposta do goberno local para transformar a contorna do CEIP Porto Cabeiro, cun investimento de 401.700 euros, e a reforma do campo municipal da Gándara, no Viso, por importe de 469.000 euros, coa abstención do BNG e o voto favorable do resto dos grupos. O proxecto do novo Museo Municipal destinado a albergar a obra de Ángel Barros non foi aprobado ao votar en contra os grupos municipais de PP e BNG. 

O pleno da corporación aprobou onte tres importantes propostas do goberno local, cun investimento total de 3,6 millóns de euros. O proxecto máis ambicioso é o plan de mellora e renovación de 68 camiños municipais de todas as parroquias, cunha partida de 2.759.339. Este programa de actuación aprobouse cos votos do PSdG-PSOE, AER e PP, malia o voto en contra do BNG. A alcaldesa, Digna Rivas, agradeceu o apoio dos populares neste punto, xa que se trata dunha inversión “extraordinaria” que responde ás necesidades de cada unha das parroquias “especialmente en materia de accesibilidade, seguridade viaria e cohesión territorial”. O concelleiro de Infraestruturas e Sostibilidade, Roberto Villar, lembra que as obras que recolle este plan “foron aprobadas por unanimidade en todos os Consellos Parroquiais e responden as demandas dos propios representantes veciñais”.

Na sesión celebrada na noite do xovesnoite tamén se aprobou, neste caso por unanimidade, a transformación do entorno do CEIP Porto Cabeiro. A reforma deste espazo, de case 3.0000 m² , será unha gran mellora para os barrios de Porto Cabeiro e A Millarada. Rivas explica que o obxectivo prioritario é “transformar un espazo actualmente dominado polos vehículos nun hábitat saudable, inclusivo e, sobre todo, seguro para a infancia”.

A reforma integral do campo de fútbol municipal da Gándara, no Viso, aprobouse cos votos do PSdG-PSOE, AER e PP, e coa abstención do BNG. A remodelación do campo incluirá unha nova base con asfaltado, o cambio do céspede e melloras na drenaxe e o rego. Rivas explica que o proxecto orixinal presentaba “importantes eivas na base do terreo de xogo, que agora deben emendarse”. O investimento , de 469.280 euros, asegura a viabilidade das instalacións cun estado óptimo “tanto agora como no futuro”.

Os votos negativos dos grupos da oposición impediron sacar adiante o proxecto do novo Museo Municipal destinado a albergar a obra de Ángel Barros. Esta agardada instalacións está incluída no PAI (Plan de Acción Integral) e conta con financiamento de Fondos Europeos. O novo edificio está proxectado no espazo das coñecidas como “vivendas dos mentres”, na avenida Mendiño. A rehabilitación do edificio e a súa musealización ascenden a 1.167.000 euros, dos que os Fondos Europeos cobren o 60%, e a cantidade restante, 466.800 euros, deben ser financiados polo Concello. A proposta do goberno local de financiar a obra con fondos do remanente de 2025 foi rexeitada polos grupos do PP e BNG.

O goberno de Rivas presentaba no pleno de febreiro investimentos por un valor superior aos 4 millóns de euros, a financiar con fondos propios procedentes do remanente de Tesourería, que ascende a 5,6 millóns. Finalmente aprobáronse tres das catro propostas, por un importe total de 3.630.319 euros.

La entrada O Concello de Redondela aproba investimentos por máis de 3,6 millóns de euros se publicó primero en Concello de Redondela.

O Entroido de Redondela fixo arder o neofascismo. na praza do Concello Ao berro de: “Lume aos muros, lume ás deportacións, aos bulos e á manipulación”  onte, Martes de Entroido, queimouse o Meco, representado na figura de Donald Trump. O pregón, na voz do actor redondelán Tatán, comezou co son dunha alarma nuclear. O manifestou lembrou que “non é unha película, non é ficción” porque a ameaza nuclear existe cando no mundo manda un home “con demasiado ego, demasiado odio, demasiado medo”. O Meco condenouno porque “aplaude a Israel sen mirar ás vítimas, mira a Rusia con admiración, coquetea con Corea do Norte e humilla aos pobos con aranceis de sumisión”. O lume do Entroido non esqueceu que o mandatario norteamericano “quixo mercar Groenlandia coma quen compra un capricho, porque para Trump todo é negocio, mesmo a terra, mesmo a dignidade, mesmo a nación”.

Centos de persoas ateigaron a Alameda Castelao e as rúas do centro da vila para vivir o espectáculo. Co Meco queimouse “ o supremacismo, a violencia, o machismo e a impunidade, os que atacan a democracia mentres berran “patria” e sementan desigualdade”. O Meco pediu que das lapas saia “memoria, xustiza, dignidade e razón, porque en Redondela sabemos que o odio non é unha opción”.

Os lumes de artificio, proxeccións e marionetas xigantes do espectáculo “Hexagonum”, de Troula Animación, completaron a xornada festiva e reivindicativa. O concerto da Mekánica Rolling Band, un dos grupos máis festivos de Galicia, puxo o broche ao Martes de Entroido coa súa explosiva mestura de ritmos populares e punk brass.

CONCURSO DE DISFRACES

Na modalidade individual, o primeiro premio foi para Carrusel, e o segundo premio recaeu en Medusita. Na categoría de parellas, o primeiro posto foi para Almanaques e o segundo para Rapunzel. Finalmente, na modalidade de grupos, o primeiro premio foi para A Coca é Nosa, unha proposta inspirada na tradición da Coca de Redondela, e o segundo premio foi para a comparsa Pandilla Pirata.

O xurado estivo composto polo Mister RNB España, Guillermo Lago, Ian, dos Axentes do Cambio, Manolo Conde, do Grupo Casa Paco e as concelleiras Rita Pérez e Iria Vilaboa.

La entrada “Lume aos muros, lume ás deportacións, aos bulos e á manipulación” se publicó primero en Concello de Redondela.

A alcaldesa Digna Rivas e a concelleira Rita Pérez con Carmen Filgueira e Rubén Casal, autores do Meco.

– As cruentas redadas do ICE, o racismo institucionalizado, a intención de anexionar Groenlandia e o seu papel no do xenocidio en Gaza representan “o desprezo aos dereitos humanos máis básicos”, sinala a alcaldesa, Digna Rivas. O Meco lémbranos que o auxe da ultradereita en todo o mundo é unha ameaza para a democracia e a igualdade.

– A Queima do Meco será o Martes de Entroido, día 17, ás 19.00 horas. O espectáculo “Hexagonum”, de Troula Animación, ofrecerá marionetas xigantes, proxeccións audiovisuais, pirotecnia e lume. A festa continuará pola noite co concerto da Mekánica Rolling Band ás 20.30 horas na praza da Constitución.

O Entroido de Redondela, fiel á súa tradición de sátira social, instalou este mediodía na praza do Concello o Meco 2026. A figura representa ao presidente dos EUA, Donald Trump, montado nun mísil nuclear. Cun forte matiz crítico, a vila redondelá sinala ao mandatario estadounidense como máximo expoñente da extrema dereita e o fascismo moderno, denunciando o impacto devastador das súas políticas tanto a nivel interno como internacional.

Contra o racismo e a persecución de inmigrantes

O Concello xustifica esta elección como un acto de repulsa ante as cruentas redadas do ICE e a sistemática persecución da poboación inmigrante baixo a administración Trump. A memoria das vítimas de Minneapolis e a persistencia do racismo institucionalizado son eixos centrais dunha queima que busca purificar, a través do lume, o odio sementado polas políticas supremacistas. A nota crítica esténdese á política internacional de Washington. Redondela alza a voz contra o que cualifica como un “imperialismo sen complexos”, exemplificado na intención de Trump de anexionar Groenlandia e o seu papel determinante no mantemento do xenocidio en Gaza. Para o Entroido de Redondela, este Meco representa “o desprezo aos dereitos humanos máis básicos”, sinala a alcaldesa Digna Rivas. “Queimar a figura de Trump é queimar o fascismo, a xenofobia e a guerra. É unha aposta simbólica por un mundo onde a vida estea por riba dos intereses xeopolíticos”. O Meco, obra do artista local Rubén Casal, representa a Donald Trump montado nun misil.

A tradicional queima será o Martes de Entroido, o día 17, ás 19.00 horas, na praza do Concello. “Hexagonum”, de Troula Animación, será o espectáculo que dea paso ao lume con pasarrúas de marionetas xigantes, proxeccións audiovisuais, pirotecnia e lume. A festa continuará pola noite co concerto da Mekánica Rolling Band, unha das agrupacións máis festivas de Galicia e coñecida pola súa explosiva mestura de ritmos populares, punk brass e interacción co público. Desde as 20.30 horas na praza da Constitución.

La entrada Redondela planta cara ao neofascismo: o Meco de Donald Trump arderá no Entroido se publicó primero en Concello de Redondela.

A alcaldesa e o edil de Urbanismo explicaron o proxecto á asociación que divulga a obra de Ángel Barros

– O Concello de Redondela conta xa co proxecto do novo Museo Municipal que ocupará o espazo das antigas casas dos mestres. O edificio, con 740 metros cadrados repartidos en tres plantas, terá salas de exposicións e aulas polivalentes. Será un edificio totalmente accesible e coa mellor cualificación en eficiencia enerxética.

– A alcaldesa, Digna Rivas, e o concelleiro de Urbanismo, Antonio Cabaleiro, reuníronse coa asociación que divulga a obra de Ángel Barros para amosarlles o proxecto. As obras comezarán este ano cun investimento de 1.167.000 euros. O museo ocupará un lugar “privilexiado” na avda. Mendiño que será “totalmente reformada”.

O Concello de Redondela conta xa co proxecto definitivo para a construción do novo Museo Municipal que albergará, entre outras obras, a colección do artista local Ángel Barros. Esta agardada instalacións está incluída no PAI (Plan de Acción Integral) e conta con financiamento de Fondos Europeos. O novo edificio ocupará o espazo das coñecidas como “vivendas dos mentres”, na avenida Mendiño. A alcaldesa, Digna Rivas, e o concelleiro de Urbanismo, Antonio Cabaleiro, reuníronse con membros da asociación que divulga a obra do pintor redondelán para amosarlles o proxecto. Malia que estaba prevista a participación do propio Ángel Barros, finalmente non puido participar na reunión por motivos de saúde.“Para nós era moi importante compartir con eles este proxecto e que coñeceran de primeira man como vai ser o futuro museo”, afirma Rivas.

A alcaldesa explicou que o edificio terá tres plantas, cun total de 740 metros cadrados con varias salas de exposicións. A instalación terá aulas polivalentes nas que poderán realizarse obradoiros, proxeccións ou charlas “que poderán ser utilizadas tamén polos centros de ensino e terán un uso didáctico”.A obra de Ángel Barros ocupará un lugar destacado no museo, na planta principal do edificio. A cuberta exterior do edificio será “moderna e funcional”. Optimizarase a súa eficiencia enerxética con melloras en illamento, impermeabilización, sistema de climatización e novas instalacións eléctricas e de iluminación. A actuación contou coas achegas recollidas no proceso de participación cidadá da Axenda Urbana. Rivas amosouse “moi satisfeita” por facer realidade este museo “tan longamente reivindicado pola cidadanía”. A licitación das obras está pendente dos trámites administrativos e as obras comezarán este ano. Noemí Moreira, secretaria da asociación, valorou moi positivamente esta nova e agradeceu que o Concello “faga realidade este museo para Redondela e para a obra de Barros”.

Museo Municipal na renovada Avenida Mendiño

Rivas salientou que o novo museo ocupará un lugar destacado na avda Mendiño, unha estrada que se vai humanizar e transformar totalmente con nova pavimentación, mobiliario urbano e zonas verdes. “Queremos unha avenida á altura do que merecen os veciños e veciñas de Redondela nesta contorna dos colexios, institutos, instalacións deportivas e centro de saúde”, explica Rivas. “O novo Museo Municipal será, sen dúbida, un gran espazo público para a cultura e o ensino aberto a toda a cidadanía”, conclúe a alcaldesa.

La entrada Rivas presenta o novo Museo Municipal que acollerá a obra de Ángel Barros se publicó primero en Concello de Redondela.

Digna Rivas e Rita Pérez con membros de “Bico de Toupa”, Grupo América e orquestra Lá Fórmula

-As celebracións comezarán o sábado 14 de febreiro co Entroido Infantil e Xuvenil, xogos e obradoiros na Alameda Castelao e pasarrúas con The Turre´s Band. O campo da feira acollerá o gran concerto da orquestra La Fórmula, que estreará en Redondela o seu novo espectáculo. O domingo 15 será o desfile de comparsas.

– O Martes de Entroido será o concurso de disfraces, Queima do Meco e o espectáculo “Hexagonum” con monecos xigantes, proxeccións e lume. A xornada rematará co concerto da Mekánika Rolling Band. En Chapela o Entroido celebrarase o día 21 co desfile de comparsas, o Enterro do Berete e o concerto do Grupo América de Vigo.

– A alcaldesa, Digna Rivas, animou a toda a cidadanía a participar nesta tradicional festa que se vive “con gran intensidade” en Redondela. O Entroido “reúne a grupos de amigos e familias completas que viven esta festa nas rúas da vila” e desde o Concello ofrécese unha ampla programación para todos os públicos.

O sábado 14 de febreiro comezan as celebracións do Entroido en Redondela. A rapazada será a protagonista desta xornada co Entroido Infantil e Xuvenil. As actividades comezan ás 16.00 horas con “Un Mar de Xogos” de Bico de Toupa e obradoiros na Alameda de Castelao ata e as 19.30 horas. A música correrá a cargo do grupo The Turre´s Band cun animado pasarrúas polo centro da vila desde as 18.00 horas. A partir das 21.30 horas o Entroido deste 2026 vibrará co concerto da orquestra “La Fórmula”, que estreará en Redondela o seu novo espectáculo para esta temporada. “Será un gran comezo do Entroido para animar á veciñanza a gozar e bailar nestas datas tan especiais”, sinala a concelleira de Cultura Rita Pérez, que contará tamén con sesión DJ.

O 15 de febreiro, domingo de Entroido, comezará ás 17.00 horas a concentración das comparsas no Campo da Feira. Ás 18.00 fará o seu pasarrúas Tío Emilio, a tradicional comparsa representativa do Entroido redondelán. A continuación será o desfile de comparsas que percorrerá as principais rúas da vila e ás 20.30 horas será a entrega de premios.

Martes de Entroido

O día 17, Martes de Entroido, é un día grande en Redondela, coa participación de veciños e veciñas de todas as idades. A alcaldesa, Digna Rivas, sinala a importancia desta xornada tan tradicional nas festividades de Redondela “que reúne a grupos de amigos e familias completas con participantes de todas as idades que viven o Entroido na rúa, por iso desde o Concello poñemos todo da nosa parte para que sexa un día moi especial cheo de actividades”. Ás 17.00 horas comezará o Desfile-Concurso de Disfraces individual e colectivo. As inscricións para participar poderán facerse nos soportais do Concello desde as 16.00 e a entrega de premios será ás 18.45 horas.

Os máis pequenos terán o seu espazo na Alameda Castelao con diferentes obradoiros desde as 17.00 e ata as 19.30 horas. As rúas contarán con moita animación e ritmo grazas á percusión e os tamboriles do grupo Aperta.

Ás 19.00 horas, fiel á súa cita, celebrarase a tradicional Queima do Meco “unha das citas con máis expectación do entroido redondelán”. “Hexagonum”, de Troula Animación, será o espectáculo que dea paso á queima con marionetas xigantes, proxeccións audiovisuais, pirotecnia e lume. A festa continuará pola noite co concerto da Mekánica Rolling Band, unha das agrupacións máis festivas de Galicia e coñecida pola súa explosiva mestura de ritmos populares, punk brass e interacción co público. Ás 20.30 horas na praza da Constitución.

Entroido en Chapela

O sábado 21 de febreiro celebrarase o Entroido en Chapela. As comparsas reuniranse ás 17.00 horas do alto da Encarnación. Ás 18.00 horas sairá o desfile acompañado polos percusionistas e tamborileiros de Aperta. Pecharán a comitiva os participantes do Enterro do Berete que fará o seu percorrido ata a praia de Arealonga. A queima do Berete será ás 20.15 comezará. A xornada pecharase co concerto do grupo América de Vigo que ofrecerá un gran espectáculo co seu tributo a toda a historia do rock and roll, facendo un repaso dos grandes éxitos de todos os tempos. Será a partir das 21.00 horas no paseo marítimo de Chapela e con sesión do Dj Mesu.

O Concello prepara unha ampla programación “con festa rachada” durante catro días para darlle “máis pulo aínda” a esta tradicional festa “que con tanto entusiasmo viven no municipio veciños e veciñas de todas as idades”, conclúe Digna Rivas.

La entrada Redondela celebra o Entroido con catro días de “festa rachada” se publicó primero en Concello de Redondela.

– “Monstros”, de Producións Teatrais Excéntricas, abrirá este domingo o VIII Ciclo de Teatro Infantil de Redondela. Esta aclamada obra teatral reflexiona sobre o medo a través do humor. A compañía Malasombra, Cayetano Lledó, Redrum Teatro e Rouxa Cía. completan unha programación variada e de gran calidade para o público familiar.

Redondela estrea esta fin de semana o VIII Ciclo de Teatro Infantil, con funcións no Auditorio Municipal da Xunqueira durante os próximos meses. A concellería de Cultura escolleu para esta edición cinco representacións moi variadas para que o público infantil e familiar poida gozar do mellor teatro en directo.

A programación comeza este domingo, día 25 de xaneiro ás 18:00 horas cunha proposta de gran nivel: “Monstros”, de Producións Teatrais Excéntricas. Patricia Vázquez, Rocío González e Víctor Mosqueira son os protagonistas da obra con música en directo de Piti Sanz e a dirección de Marcos Orsi. “Monstros” é un espectáculo que reflexiona sobre aquelo que consideramos monstruoso e tal vez por iso nos aterroriza. Pero faino desde o humor, “porque a risa é o mellor antídoto contra o que nos asusta”. Este espectáculo é unha viaxe na que asistimos a un desfile de criaturas terroríficas que nos acaban ensinando que o atroz está nos ollos de quen mira.

O domingo 1 de febreiro será a quenda de “Teatro de Papel” de Rauxa Cía. O 1 de marzo a maxia e o humor serán os protagonistas de “Un Show Incríbel” con Cayetano Lledó. O 15 de marzo será a quenda de “Os Contos do Lobicán” con Redrum Teatro e o ciclo rematará o 12 de abril coa compañía Malasombra e “Os Fabulosos Cleaners» .

A concelleira de Cultura, Rita Pérez Táboas, agarda que o ciclo “sexa un éxito, igual que en anos anteriores”. Sinala que en Redondela “hai moita tradición e moito gusto polo teatro, e desde o Concello esforzámonos por traer cada ano as mellores propostas do panorama galego cunha oferta variada ”.

Todas as funcións serán ás 18.00 horas. O prezo das entradas é de 3 euros e poden retirarse no propio Multiúsos da Xunqueira.

La entrada O mellor teatro infantil de Galicia chega a Redondela con cinco funcións se publicó primero en Concello de Redondela.

– O concerto Pre Fin de Ano celebrase no Campo da Feira de Redondela mañá martes a partir das 21.00 horas. O público despedirá o ano ao ritmo dos clásicos que marcaron as décadas dos 80 e os 90. A disco móbil CDC, Rodri Vegas e a música en directo de Nuevo Plan prometen unha noite para cantar e bailar sen parar.

– O evento, organizado pola concellería de Cultura, contará coas tradicionais uvas da sorte que se repartirán entre o público para despedir o ano por adiantado ao son das badaladas. A alcaldesa, Digna Rivas, anima á veciñanza a participar neste evento “no que amizades e familias poderán divertirse e gozar do mellor ambiente”.

Como xa é tradición, Redondela despedirá mañá o ano de xeito anticipado cunha gran festa no Campo da Feira. Desde as 21.00 horas o recinto transformarase nunha macro pista de baile para vibrar cos grandes temas que marcaron as décadas dos 80 e os 90. Os encargados de facer bailar ao público serán a disco móbil CDC e o Dj redondelán Rodri Vegas, ademais da música en directo de Nuevo Plan, banda que compartiu escenario con músicos da talla de Burning, La Unión, Nacha Pop, La Guardia, Loquillo, Mikel Erentxun ou Siniestro, entre outros. Ao longo da noite soarán grandes éxitos do pop e o rock que marcaron toda unha época desde os grupos españois da movida até as grandes bandas internacionais.

O evento, organizado pola concellería de Cultura, contará coas tradicionais uvas da sorte que se repartirán de balde entre o público. Rodri Vegas será o mestre de cerimonias para despedir o ano con 24 horas de antelación ao son das doce badaladas.

A alcaldesa, Digna Rivas, anima á veciñanza a participar neste evento “no que amizades e familias poderán aproveitar para reencontrarse, divertirse xuntos e gozar do mellor ambiente”. A cita comezará ás 21:00 e prolongarse ata as 03:00 horas para cantar, bailar e pasalo ben revivindo os “temazos” de sempre.

O III Ciclo Infantil de Nadal Interparroquial

As actividades da programación infantil e familiar deste Nadal continúan nos vindeiros días por todas as parroquias. Mañá martes será a quenda do polifacético Ce Orquestra Pantasma, que actuará no Centro Cultural de Reboreda ás 18.00 horas. O mes de xaneiro comezará coa gran compañía redondelá Tanxarina, que actuará no Centro Cultural de Cabeiro o 2 de xaneiro coa súa premiada obra Titiricircus. O ritmo rockeiro chegará da man de Pakolas cun espectáculo musical no Centro Cultural de Vilar de Infesta o 3 de xaneiro. A programación deste ciclo rematará o 4 de xaneiro cunha das familias máis coñecidas de Galicia, “Os Bolechas”, que estarán no auditorio do Piñeiral do Crego en Chapela. Todos os espectáculos serán ás 18.00 horas.

O Festival de Panxoliñas e Canto Tradicional será os días 3 e 4 de xaneiro no auditorio da Xunqueira ás 18.00 horas.

La entrada Redondela celebra o fin de ano por adiantado con badaladas, uvas e a mellor música dos 80’ e 90’ se publicó primero en Concello de Redondela.