Noticias

Usamos cookies con el objetivo de mejorar la experiencia de nuestro visitantes. Visita la página de Política de privacidad para conocer más detalles.

Ana González Liste, gañadora do III Premio Sesé Mateo de Xornalismo Ético

Concello de Redondela
24-11-2023
0
Ana González Liste, gañadora do III Premio Sesé Mateo de Xornalismo Ético

A xornalista viguesa foi premiada pola reportaxe publicada en Praza Pública onde denuncia a falta de recursos no sistema de vixilancia establecido (Vioxén). A edil de Igualdade, Iria Vilaboa, salienta que este ano presentáronse 12 traballos en diferentes formatos, “o que pon de relevo a calidade da reporataxe de Ana González Liste”. A alcaldesa, Digna Rivas, lembra que este premios naceron co obxectivo de recoñecer “a ética á hora de tratar informacións relacionadas coa violencia machista, fuxindo de sensacionalismos e respectando a intimidade das vítimas e as súas familias”. Ana González Liste manifestou que é “un orgullo recibir este premio que leva o nome de Sesé Mateo” ao tempo que agradece “a xenerosidade das mulleres que se abriron comigo e dedicáronme o seu tempo para que esta reportaxe fose posible”. O galardón entregarase na III Gala Premio Sesé Mateo de Xornalismo Ético que se celebra este venres ás 20.00 horas no auditorio da Xunqueira en Redondela.

 A xornalista Ana González Liste (Vigo, 1990), é a galardoada este ano co III Premio Sesé Mateo de Xornalismo Ético que promove o Concello de Redondela. Este galardón nace co obxectivo de recoñecer publicamente “a ética á hora de tratar informacións relacionadas coa violencia machista, fuxindo de sensacionalismos e respectando a intimidade das vítimas e as súas familias”, explica a alcaldesa Digna Rivas. A súa reportaxe sobre a vida das mulleres galegas vítimas de violencia de xénero que contan con seguemento telemático por parte da policía foi a premiada nesta edición. O xurado valorou no seu traballo, publicado o 23 de febreiro en Praza Pública, a denuncia que fai a xornalista da falta de recursos e os fallos no sistema establecido (Vioxén), e faino con testemuños con moita forza. A concelleria de Igualdade, Iria Vilaboa, salienta que este ano presentáronse 12 traballos en diferentes formatos, “o que pon en valor a calidade da reporataxe de Ana González Liste, que competía con outros traballos que poden resultar máis atractivos como pode ser un audiovisual”.


Ana González Liste manifestou que é “un orgullo recibir este premio que leva o nome de Sesé Mateo, á que non puiden esquecer desde o seu asasinato, que recibiu un tratamento informativo inicial infame que non sucedería se as e os profesionais do xornalismo tivésemos unha axeitada formación para abordar estes temas”. A xornalista viguesa explica que a reportaxe premiada “busca reflectir o día a día das mulleres vítimas de violencia machista que sobreviven e viven cunha pulseira que non lles permite esquecer que o perigo segue aí, pero que á vez fai posible que sigan con vida”. Por iso agradece enormemente “a xenerosidade das mulleres que se abriron comigo e dedicáronme o seu tempo para que esta reportaxe fose posible”.

Licenciada en Xornalismo pola Universidad Complutense de Madrid, Ana González ten un Máster pola Universitat de Barcelona e a Columbia Journalism School e pertence á asociación Xornalistas Galegas. Traballou nos xornais Faro de Vigo, El Paí e Nós diario, na axencia Europa Press e na revista de cultura galega Inorantes. Colabora coas publicacións Luzes, La Marea e Vinte e na actualidade traballa en Praza Pública.

III Gala Premio Sesé Mateo

A gañadora recollerá o premio, dotado con 1.500 euros, na III Gala Premio Sesé Mateo que se celebra no auditorio da Xunqueira de Redondela mañá venres, 24 de novembro, ás 20 horas. A xornalista redondelá Laura Vaqueiro será a encargada de presentar o acto, que contará coas actuacións do grupo Faíscas e a Aula Municipal de Teatro. As gañadoras das edicións anteiores, Patricia Costa (RNE) e Cristina García (CRTVG), participarán nunha charla aberta sobre o machismo nos medios de comunicación. A gala contará coa participación de Joshua Mateo, fillo de Sesé Mateo.