Cultura

-A estrea será o domingo 15 de xuño, ás 12.00 coa obra do grupo xuvenil “Macbeth, outra de Xekspir” e ás 19.30 coa peza do grupo de adultos “As de dentro/fóra”.

-A concelleira de Cultura, Rita Pérez, e o mestre da Aula de Teatro Municipal, Roberto Casal, animan á veciñanza a asistir a estas estreas e a participar nas actividades de teatro en próximos cursos.

A Aula de Teatro Municipal pon en escena as obras nas que estiveron traballando ao longo do curso. Será o domingo, 15 de xuño, no auditorio da Xunqueira. O grupo xuvenil, con rapazada de entre 13 e 17 anos, representará “Macbeth, outra de Xekspir”, unha obra orixinal na que volven sobre o afamado dramaturgo e as súas traxedias dunha forma particular, irónica e grotesca. O seu mestre, Roberto Casal, explica que na obra o poder e a ambición son os temas tratados polos adolescentes para propoñer un desafío ao público: Ata cando imos tolerar os excesos dos autoproclamados líderes do reino?. A obra do grupo xuvenil poderá verse ás 12.00 horas.

No caso do grupo de adultos, con 14 compoñentes entre os 30 e 65 anos, a obra que representarán titúlase “As de dentro/fóra”. A obra amosa “como encaixamos cada un de nós ser vítima e responsable ao mesmo tempo do efecto da turistificación”. A obra, en código parodia ás veces absurda e ás veces poética, “recolle elementos da nosa realidade máis achegada para falarnos de como a individualidade atravesa todos os conflitos sociais e nos brinda a posibilidade de reflexionar de forma comunitaria sobre estas cuestións”. A obra “As de dentro/fóra” poderá verse ás 19.30 horas.

Desde a concellería de Cultura, a edil Rita Pérez, anima á veciñanza á achegarse ao auditorio para gozar destas pezas teatrais. A concelleira convida tamén á rapazada, adolescentes e adultos a participar nas aulas de teatro, especialmente aos mozos e homes adultos “xa que o alumnado destas aulas é maioritariamente feminino”. Para Casal a escasa presenza masculina débese “a que aos homes cústalles máis traballar o seu lado emocional, porque non estamos educados para expoñer os nosos sentimentos”. O mestre confía en que “pouco a pouco” este rol vaia cambiando e anima aos mozos a apostar pola aulas de teatro “unha actividade diferente que lles pode ofrecer moitos beneficios”.

A concelleira de Cultura e Interior, Rita Pérez Táboas, e o concelleiro responsable de Participación Cidadá e Parroquias, Alberto Álvarez, mantiveron unha reunión coas comisións de festas das parroquias de Redondela. Neste encontro os responsables municipais explicáronlles a tramitación de permisos e medidas de seguridade para a celebración de festas e verbenas. Pérez Táboas sinala que o obxectivo deste encontro é axudar ás comisións de festas nos trámites necesarios “para o rigoroso cumprimento da normativa, garantir a máxima seguridade nos festexos e evitar situacións de risco ou perigo”.

Na reunión celebrada esta semana explicouse que as comisións deberán entregar as solicitudes e a documentación técnica con polo menos un mes de antelación. Os técnicos revisarana e farán un único requirimento, no caso de que sexa necesario, para que os promotores completen, corrixan ou aclaren a información. O goberno local explica que se trata de facer cumprir a normativa autonómica, de dar un maior nivel de seguridade ás festas, aumentando tamén as garantías xurídicas para os promotores.

Miguel Díaz, do Grupo América, Rita Pérez, concelleira de Cultura, Digna Rivas, alcaldesa, Ángel "Corenta", gaiteiro protagonista do cartel deste ano, e Manuel Conde, pregoeiro das festas.

– As alfombras florais e as danzas das Espadas e as Penlas serán as protagonistas desta festa, entre o 18 e o 22 de xuño, xunto a grandes concertos como os de Heredeiros da Crus, Grande Amore, Panorama City ou o espectáculo infantil e familiar de Uxía Lambona e a Banda Molona.

– Manuel Conde, presidente do Grupo Casa Paco e cunha longa traxectoria fomentando no fútbol base, será o pregoeiro das festas da Coca. Co gallo desta celebración tamén se organizan viaxes en barco con visita guiada á illa de San Simón os días 19, 21 e 22 de xuño.

Do 18 ao 22 de xuño Redondela celebra a súa semana grande coas Festas da Coca, onde a tradición e a mellor oferta musical van da man. O Concello de Redondela ofrece unha ampla programación con cinco días de festexos onde as tradicionais danzas das Espadas e as Penlas serán as protagonistas xunto coas alfombras florais. A concelleira de Cultura, Rita Pérez Táboas, sinala que a esta tradición secular “súmase unha potente programación musical, cunha ampla oferta de grupos e estilos que van desde a música tradicional galega, ata o pop e o rock, con grandes apostas como Heredeiros da Crus e o Grupo América, pasando polas grandes orquestras con Panorama City e verbenas”.

O mércores os concertos correrán a cargo da Orquestra de Saxos de Redondela e a orquestra Panorama City. O xoves, festividade da Coca en Redondela, as citas serán co grupo Uxía Lambona e a Banda Molona, para público infantil e familiar, e a orquestra Marbella.

Máis de 7 horas de música con Rock Redondela

O tradicional certame Rock Redondela que se inclúe na programación da Festa da Coca ofrece este ano unha xornada con cinco concertos e máis de 7 horas da mellor música rock. Será o venres, 20 de xuño, no Campo da Feira, desde as 19.30 horas con entrada de balde. Nesta ocasión son os redondeláns Perfectos Extraños, Retroblues e Elevën os que subirán ao escenario para animar ao seu público. A mítica banda galega Herdeiros da Crus, que actuará a media noite, presentará o seu último álbum “Trankimasin”. América de Vigo ofrecerá un gran espectáculo co seu tributo a toda a historia do rock and roll, facendo un repaso dos grandes éxitos de todos os tempos con dous pases, o primeiro ás 21.30 horas e o segundo ás 01.30 para pechar o festival.

Na xornada do sábado os concertos comezarán ás 22.00 horas con Gran Parada, para dar paso ás 01.00 a Grande Amore. O trío formado por Nuno Pico, Clara Redondo e María Grep presentará o seu disco “III”, avalado polo público e a crítica. O pica discos Rodri Vegas completará a oferta musical da noite.

Xa o domingo as festas pecharanse cos concertos da Banda de Música de Chapela e a orquestra Olympus. A alcaldesa, Digna Rivas, salienta tanto a calidade da programación musical como “a aposta decidida deste goberno polos grupos e artistas locais, que estarán presentes en toda a programación, xa que Redondela ten moito talento e é a nosa obriga poñelo en valor, tanto aos grupos que teñen xa unha longa traxectoria como as novos valores da música local”.

Homenaxes a alfombristas, bailaríns e relevo das Penlas

A Festa da Coca comezará o mércores, día 18, ás 18.00 co desfile de Xigantes e Cabezudos polas rúas da vila xunto ao grupo de gaitas Airiños de San Simón. A orquestra de Saxos actuará ás 19:30 na Praza do Concello e a inauguración oficial da festa será ás 20:00 coa lectura do pregón a cargo de Manuel Conde Docampo. Coñecido como “Manolo Casa Paco”, é un referente no mundo do fútbol base en toda a bisbarra, e destaca pola súa activa implicación nas actividades culturais e tradicionais de Redondela.

A continuación celebrarase o acto solemne de relevo das Penlas, e as homenaxes ás persoas que traballaron nas alfombras florais e aos bailaríns da Danza das Espadas, antes de proceder ao acendido da iluminación da festa.

Danza das Espadas e as Penlas

Os actos do xoves, festividade da Coca, comezarán ás 11.00 co traslado da Virxe “A Gabacha” da Igrexa de Vilavella á Igrexa de Santiago de Redondela, acompañado pola Danza das Espadas, das Penlas e a Banda de Música de Redondela.

Ás 12:00 será o desfile da Coca cos Mordomos e Diañiños, acompañada por Xigantes e Cabezudos ao son do grupo de gaitas Son do Castro. A Misa Maior será tamén ás 12:00 na Igrexa de Santiago de Redondela. Ás 13:00 horas será a procesión polas rúas, decoradas con alfombras florais, acompañada pola Banda de Música Municipal de Redondela. O baile de homenaxe da Danza das Espadas e das Penlas será na Praza da Constitución.

O domingo, día 22 de xuño, o desfile da Coca será tamén ás 12.00 cos Mordomos e Diañiños, acompañada por Xigantes e Cabezudos ao son do grupo de gaitas do Carballo das Cen Pólas. Tamén ás 12:00 será a misa na Igrexa de Vilavella, coa posterior procesión polas rúas de Vilavella decoradas con alfombras florais e acompañada pola Danza das Espadas e das Penlas, coa Banda de Música de Chapela. O baile de homenaxe da Danza das Espadas e das Penlas será na Praza de Ribadavia.

Deporte na rúa

O deportes tamén estará presente na programación coa competición “Balonmán na rúa” o venres desde as 18.00 horas na pista da Xunqueira e a Alameda Castelao. O domingo será a quenda da patinaxe con “Patina na rúa” ás 19.00 na pista da Xunqueira.

Viaxes á illa de San Simón

Co gallo da Festa da Coca os días 19, 21 e 22 organízanse viaxes en barco á illa de San Simón con visita guiada ao prezo de 6 euros por persoa. Haberá saídas desde o peirao do museo Meirande e desde o porto de Cesantes. Poden mercarse as entradas no museo Meirande (986 458 891), na oficina de turismo de Redondela (986 401 713) e en www.crucerosangel.com