Cultura

– Tras un ano de traballos de restauración a cargo do Obradoiro de Emprego, o bote Manuel foi trasladado ao Centro de Interpretación da Batalla de Rande. A embarcación, con case un século de antigüidade, “xa forma parte do patrimonio do museo, presidindo esta entrada como un símbolo da nosa historia”, sinalou a alcaldesa Digna Rivas.

– O bote, que foi cedido ao Concello pola Asociación Lagoa dos Bébedos, abastecía de víveres e roupa á illa de San Simón cando foi prisión e logo como orfanato. Tamén tería un papel relevante durante a II Guerra Mundial salvando a refuxiados xudeus que chegaban á ría de Vigo, e colaborou na busca dos desaparecidos e rescate dos cadáveres en varios afundimentos.

Logo de case un ano de traballos de restauración, o bote Manuel preside desde onte a entrada do centro de interpretación da Batalla de Rande, o Meirande. A embarcación foi trasladada desde o pazo de Pousadouro, onde nos últimos meses foi sometida a unha restauración integral. Os traballos de recuperación do bote foron realizados polo alumnado do Obradoiro de Carpintería de ribeira dirixidos polos seus mestres. O bote Manuel é unha embarcación tradicional da enseada de San Simón dos anos 30 do século pasado. O que o fai único é que este bote, ademais de ser utilizado para pesca, tamén abastecía de víveres e roupa á illa de San Simón cando foi prisión e logo como orfanato. Tamén tería un papel relevante durante a II Guerra Mundial salvando a refuxiados xudeus que chegaban á ría de Vigo. Este bote participou ademais na recuperación dos galeóns da batalla de Rande e colaborou na busca dos desaparecidos e no rescate dos cadáveres en varios afundimentos. Xunto ao bote instalouse un panel informativo coa súa historia e todo o proceso de recuperación.

A alcaldesa, Digna Rivas, xunto cos concelleiros de Emprego Antonio Cabaleiro e de Cultura Rita Pérez, acompañaron ao alumnado e profesorado do Obradoiro que hoxe instalaron a embarcación no Meirande. No acto participou tamén Óscar Rodríguez, da Asociación Lagoa dos Bébedos, colectivo que doou o bote ao Concello para impulsar este obradoiro de carpintería que acabou por restaurar este histórico bote. “Con esta restauración poñemos en valor este importante elemento do noso patrimonio, que queda agora exposto no museo Meirande, presidindo esta entrada como un símbolo da nosa historia”, anunciou Rivas. A alcaldesa agradeceu a Faustino Otero, propietario da embarcación, e á Asociación A Lagoa dos Bébedos a cesión deste bote e o seu impulso para os traballos de restauración, así como o gran traballo feito polo Obradoiro de Emprego que deixou o bote en perfectas condicións para a súa exposición. No vindeiro mes de decembro o alumnado do obradoiro construirá unha réplica deste bote Manuel que será navegable, e que se poderá botarse ao mar e empregarse para cruzar a enseada de San Simón.

– A alcaldesa, Digna Rivas agradeceu aos veciños e veciñas a súa gran labor e felicitounos “polo seu compromiso e por demostrar esa gran unión que se vive na parroquia entre toda a veciñanza”.

– A Festa da Mazá Val do Maceiras celébrase os días 5 e 6 de outubro. Os asistentes poderán degustar sidra artesá e diferentes pratos elaborados coas mazás da parroquia. Tamén se venderán maceiras e froita a granel. Haberá música en directo, o pregón correrá a cargo da cineasta Diana Toucedo e o actor Pepo Suevos porá a nota de humor co seu monólogo.

O Concello de Redondela acolleu a presentación da Festa da Mazá Val do Maceiras que se celebra esta fin de semana, os días 5 e 6 de outubro. O evento está organizado pola asociación veciñal de Santo Estevo de Negros en colaboración co Concello. A alcaldesa, Digna Rivas, e a concelleira de Cultura, Rita Pérez, recibiron a unha nutrida representación do colectivo veciñal que traballa nesta festa, aos que agradeceron a súa gran labor. Rivas felicitounos “polo seu compromiso e por demostrar esa gran unión que se vive na parroquia entre toda a veciñanza”.

O presidente da asociación, Antonio Figueroa, explicou que se recolleron máis de 4.000 quilos de mazá da propia parroquia de Santo Estevo para degustar na festa en diferentes elaboracións, tanto de sidra como de pratos doces e salgados. Entre as novidades deste ano está o “membrillo de mazá” que elaboran na propia asociación e unha selección de produtos “gourmet”, así como a venda de maceiras e de mazás a granel. Como é tradicional ofreceranse pratos de chourizo á sidra, bacallau con mazá, empanada, lombo e polo con mazá e tortas elaboradas tamén con esta froita da parroquia. Figueroa destacou tamén “o gran traballo que se fai grazas á veciñanza da parroquia, son case medio cento de persoas de Santo Estevo as que participan nos preparativos e esa unión entre todos e todas é o mellor”.

Durante os dous días haberá música en directo, o pregón correrá a cargo da cineasta Diana Toucedo e o actor Pepo Suevos porá a nota de humor co seu monólogo.

– O Concello de Redondela e o Consello da Cultura Galega organizan esta actividade que se celebra o 4 de outubro na illa. Participan profesionais da historia e das políticas de memoria de diferentes institucións de Galicia, Cataluña e Navarra. A actividade é gratuíta con inscrición previa, as prazas son limitadas.

Nun espazo memorial tan simbólico como é a illa de San Simón, o Consello da Cultura Galega e o Concello de Redondela axuntan profesionais da historia e das políticas de memoria de diferentes institucións e puntos de Galicia, así como de Cataluña e Navarra, para debater os aspectos máis prácticos da xestión da memoria, partindo de experiencias concretas e comparativas. A xornada “A xestión dos lugares de memoria da represión franquista” celebrarase o 4 de outubro e propón reflexionar sobre uso destes lugares e conseguir que sigan vivos na lembranza, como homenaxe ás vítimas e fonte de aprendizaxe para a convivencia democrática no presente e no futuro.

Participarán Xosé M. Núñez Seixas, do Consello da Cultura Galega, Emilio Grandío Seoane, da Universidade de Santiago de Compostela, José Miguel Gastón, do Instituto Navarro de la Memoria e Queralt Solé, da Universitat de Barcelona. Pola tarde celebrarase unha mesa redonda na que intervirán a alcaldesa de Redondela, Digna Rivas, xunto con Manuel Pérez Lorenzo (Pazo de Meirás), Xosé Manuel Suárez (Castelo de San Filipe, Ferrol) e Cristina Fiaño (Exposición O Vello Cárcere, Lugo). Actuará como moderadora Montse Fajardo.

A actividade é gratuíta con inscrición previa, as prazas son limitadas. Máis información e inscricións na páxina web do Consello da Cultura Galega.