Medio Ambiente

O punto limpo móbil percorrerá todas as parroquias do noso Concello para facilitar á veciñanza a reciclaxe do lixo que non pode depositarse nos colectores comúns. Neste punto limpo poden botarse pequenos electrodomésticos, material informático, pilas e baterías, móbiles ou tabletas, cargadores, xoguetes, aerosois ou botes de pintura, entre outros residuos. Logo de pasar por Redondela, agora atópase en Chapela, e a próxima semana estará e Trasmañó, para ir rotando despois polas diferentes parroquias. O punto limpo móbil estará unha semana en cada localización. O obxectivo deste novo servizo é “facilitar á veciñanza a reciclaxe de diferentes tipos de lixo que non debe de ir aos colectores comúns”, explica o concelleiro Roberto Villar. Trátase dun servizo gratuíto para a veciñanza “pero de grande importancia para ter cada vez unha Redondela máis limpa, polo que é fundamental contar coa colaboración de todos e todas”, sinala a alcaldesa Digna Rivas. Para que a recollida sexa eficaz “é importante separar ben os residuos, polo que en caso de dúbida é mellor consultar no teléfono de información 986 388 111”, sinala Villar. O goberno local fai un balance “moi positivo” do uso que a veciñanza está a dar a este punto limpo, xa que nas dúas semanas que estivo na praza do Concello recolléronse multitude de aparellos eléctricos, material informático, botes de pintura e centos de CD’s, entre outros residuos.

CALENDARIO DE LOCALIZACIÓNS DO PUNTO LIMPO MÓBIL

TRASMAÑÓ. Ao carón do Convento

Semana do 22 de xullo

Semana do 4 de novembro

CEDEIRA. Aparcadoiro contiguo á pista deportiva na rúa Cruceiro

Semana do 29 de xullo ao 2 de agosto

Semana do 11 de novembro

CABEIRO. Aparcadoiro do Centro Cultural San Xoán de Cabeiro

Semana do 5 de agosto

Semana do 18 de novembro

VILAR. Aparcadoiro do Centro Cultural de Vilar

Semana do 12 de agosto

Semana do 25 de novembro

QUINTELA. Aparcadoiro do novo Centro Cultural de Quintela

Semana do 19 de agosto

Semana do 2 de decembro

SAXAMONDE. Área Recreativa do Camiño dos Frades

Semana do 26 de agosto

Semana do 9 de decembro

NEGROS. Aparcadoiro do Centro Cultural de Negros

Semana 2 de setembro

Semana 16 de decembro

REBOREDA. Aparcadoiro da zona do cemiterio

Semana 9 de setembro

Semana 23 de decembro

VENTOSELA. Inmediacións do CVCD Miñoteira, estrada da Fontecova

Semana do 16 de setembro

Semana do 30 de decembro ao 3 de xaneiro

O VISO. Saramagoso, ao comezo da subida á Peneda

Semana do 23 de setembro

CESANTES. Miradoiro no Alto dos Tras

Semana do 30 de setembro ao 4 de outubro

CESANTES. Catapeixe, praza de San Pedro

Semana do 7 de outubro

REDONDELA. Contorna do Concello

Semana do 14 de outubro

CHAPELA. Aparcadoiro rúa Manuel Rodríguez Casal

Semana do 21 de outubro

CHAPELA. Aparcadoiro do Pavillón Manuel González Soto

Semana do 28 de outubro ao 1 de novembro

Minipuntos Limpos

Este punto limpo móbil únese aos seis “minipuntos” que xa existen desde hai anos en diferentes rúas de Redondela e Chapela. Estes espazos para reciclar pequenos obxectos como cartuchos, lámpadas, cargadores, pilas ou baterías, están instalados nas rúas Alfonso XII, Ernestina Otero, Ribeira e Santa Mariña de Redondela, e na avda de Redondela e avda de Vigo en Chapela.

Recollida de residuos voluminosos

Para residuos máis voluminosos como mobles, colchóns ou outro tipo de enseres, xa existe un servizo de recollida “porta a porta” cun sistema moi sinxelo para os usuarios. Tan só é preciso contactar con Urbaser no teléfono 986 388 111, en horario de 9 a 14 horas, e se lle informará do día e lugar no que pode depositar estes residuos.

Rita Pérez Táboas, Roberto Villar, Digna Rivas e Pilar Martínez no tramo da Xunqueira que será peonil polas tardes

-A rúa pecharase á circulación polas tardes, desde as 19.00 horas e ata a medianoite, no tramo comprendido entre a Praza II República e o lateral do Concello. A zona, nas inmediacións da Pista da Xunqueira, é moi frecuentado por familias e nenos e deste xeito mellórase a mobilidade e seguridade dos peóns.

–A medida, que é un compromiso do goberno municipal para dar prioridade aos peóns nos lugares onde é posible, afecta a un tramo duns 200 metros no Paseo da Xunqueira e manterase durante o verán.

O Paseo da Xunqueira terá horario limitado para o tráfico rodado a partires de hoxe venres e durante todo o verán. A rúa pecharase á circulación polas tardes, desde as 19.00 horas e ata a medianoite, no tramo comprendido entre a Praza II República e o lateral do Concello. Este espazo duns 200 metros nas inmediacións da Pista da Xunqueira é moi frecuentado por familias e nenos, especialmente durante as competicións deportivas de verán. Rita Pérez Táboas, concelleira de Interior, explica que co peche ao tráfico durante as tardes “facilitamos a mobilidade do numeroso público que se achega a esta zona e melloramos a seguridade dos peóns”. A alcaldesa, Digna Rivas, explica que esta medida que agora se pon en marcha é un compromiso do goberno municipal “para crer espazos máis amables para a cidadanía, dando prioridade aos peóns nos lugares onde é posible”.

O uso peonil neste tramo do Paseo da Xunqueira en horario de tarde súmase á peonalización da rúa Padre Sarmiento realizada no pasado mes de maio. Con esta limitación parcial ao tráfico o goberno local “continúa coa transformación iniciada no marco da mobilidade sostible e da recuperación de espazos públicos para a cidadanía”. Facer unha vila con menos tráfico nos lugares onde é posible, neste caso nunha franxa horaria concreta, “supón reducir a contaminación e o ruído, o que redunda nunha maior calidade de vida para a veciñanza”, explica o concelleiro de Infraestruturas e Sostibilidade, Roberto Villar.

– As actividades comezaron esta semana cunha ruta en kaiak pola Portela, e haberá outras catro saídas ata o domingo pola Senda da Auga, visitas nocturnas pola praia de Cesantes e os muíños do Fondón e un roteiro ambiental en Monte Penide.

-Os concelleiros de Turismo, Rita Pérez Táboas, e Sostibilidade, Roberto Villar, achegáronse esta mañá á actividade celebrada na Portela e animaron tanto á veciñanza de Redondela como aos visitantes a participar nestas actividades organizadas para público de todas as idades.

As concellerías de Turismo, Sostibilidade e Medio Ambiente apostan unha vez máis polas actividades de ecoturismo e educación ambiental. Este mes de xullo ofrecen unha ampla proposta de roteiros e actividades a pé, en bico ou en kaiak, a maioría delas de balde. A primeira saída realizouse onte cunha actividade de iniciación ao kayak. Os participantes realizaron unn percorrido polos “segredos da Portela” para coñecer os fondos mariños, as pradeiras de zoostera, a zona intermareal e a Regasenda.

Ao longo desta semana haberá catro actividades máis. O xoves 18 terá está organizada unha ruta en bicicleta pola Senda da Auga con saída desde Chan das Pipas. Pódese participar con bici propia (5 euros) ou con bicis do Concello (8 euros). A actividade do venres día 19 é unha ruta nocturna pola praia de Cesantes para coñecer a zona intermareal, co saída ás 21.00 horas desde o Peirao, actividade de balde. Para o sábado día 20 tamén se está organizada unha saída nocturna, neste caso para percorrer os Muíños do río Fondón e Monte Penide. A saída será ás 21.30 desde o campo de fútbol de Trasmañó, actividade de balde. O domingo día 21 remataremos a semana cun roteiro ambiental por Monte Penide o saída ás 10.00 desde a mámoa do Rei. Actividade grautíta.

A próxima semana haberá unha saída en kayak pola enseada de san Simón o luns 22 e a programación rematará o sábado día 27 cunha actividades de observacións das estrelas no Campo de fútbol do Viso.

A concelleira de Cultura e Turismo, Rita Pérez, destacou a “transversalidade” destas actividades “que apostan polo turismo ambiental, sostible e responsable con saídas para coñecer o espectacular patrimonio natural de Redondela”. O concelleiro de Sostibilidade, Roberto Villar, sinalou que o obxectivo destas actividades é “poñer en valor os recursos naturais de Redondela e tamén concienciar á veciñanza e ás persoas que nos visitan da importancia de respectar estes espazos naturais e axudar a conservalos”.

Para participar nestas actividades é preciso facer a inscrición previa na oficina de turismo, no teléfono 986 40 17 13 ou no enderezo electrónico turismo@redondela.gal.