Enseñanza

Alumnado dos colexios e institutos de Redondela está a visitar este mes a nova exposición do pintor e restaurador local Ángel Barros. A mostra, titulada “A luz da arte en tempos de xenocidio”, ofrece unha mirada crítica do presente marcado pola guerra e as súas consecuencias. O propio Barros, a piques de cumprir 90 anos, exerce de guía para alumnos e alumnas. Esta mañá foi a quenda do IES Mendiño. Na visita, á que tamén asistiu a alcaldesa Digna Rivas, o artista redondelán explicoulle á rapazada a historia da súa obra. Faloulle das técnicas que emprega e da súa experiencia como restaurador no museo do Louvre, entre outros traballos. O veterano pintor deulles tamén “consellos de vida”. Lembroulles que o que hoxe está a pasar en Gaza xa pasou antes noutros lugares, “sufrímolo aquí co golpe militar de 1936 e en tantos outros lugares onde os poderosos queren oprimir aos máis débiles”. Barros fíxolle tamén unha petición á mocidade, que non se “achiquen” ante as inxustizas e que defendan sempre “a dignidade e a igualdade de todas as persoas”.

A mostra estará aberta no Multiúsos da Xunqueira ata final de mes. Rivas fixo un chamamento aos centros de ensino, colectivos e cidadanía en xeral para que non deixe pasar a oportunidade de visitar esta excelente exposición con grandes obras de Ángel Barros.

– A alcaldesa, Digna Rivas, e a concelleira Rita Pérez Táboas, visitaron o CEIP Porto Cabeiro, de Vilar, onde entregaron as axendas escolares para o curso 2025/26 coas que o Concello agasalla a todo ao alumnado. Son en total 1.770 axendas que por primeira vez non se limitan ao alumnado de Primaria, senón que tamén se repartirán nos institutos de Secundaria dos centros públicos do municipio.

– A presentación das axendas realizouse na renovada pista polideportiva do centro. A instalación presentaba un firme de asfalto en moi malas condicións que foi substituído por unha pista de formigón pulido para práctica depotiva máis cómoda e segura, “tanto para o alumnado do centro como para a veciñanza da contorna”. A reforma supuxo un investimento de 47.866 euros, dos que o Concello financiou 25.884 euros e a Deputación de Pontevedra 22.131 euros.

 A alcaldesa de Redondela, Digna Rivas, e a concelleira Rita Pérez Táboas, visitaron hoxe o CEIP Porto Cabeiro, de Vilar, onde entregaron as axendas escolares para o curso 2025/26 coas que o Concello agasalla a todo ao alumnado. Son en total 1.770 axendas que por primeira vez non se limitan ao alumnado de Primaria, senón que tamén se repartirán nos institutos de Secundaria dos centros públicos do municipio. Estas axendas acompañarán á rapazada ao longo de todo o curso, e na edición deste ano as protagonistas son as cantareiras e pandeireteiras, mulleres transmisoras do patrimonio cultural ás que se homenaxeou nas Letras Galegas. As axendas inclúen tamén información sobre as tradicións de Redondela e as actividades culturais, así como mapas e outra información útil para o alumnado.

Para a alcaldesa é importante que estas axendas, ademais de ser unha ferramenta de comunicación entre alumnado, familias e profesorado, “sirvan tamén para fomentar a nosa cultura e a labor das mulleres na transmisión da cultura, un papel ás veces invisible”. Rivas lembrou que no curso anterior as axendas destacaban o papel da muller no deporte, con seis redondelás como exemplo de diferentes disciplinas como o fútbol, o balonmán ou o taekwondo. Na axenda deste ano as cantareiras tradicionais e grupos como Tanxugueiras ou Fillas de Casandra ocupan as primeiras páxinas da axenda. Tamén o redondelán Casto San Pedro, historiador e folclorista autor do Cancioneiro Musical de Galicia.

Presentación no CEIP Porto Cabeiro

A presentación destas axendas escolares realizouse esta mañá no CEIP Porto Cabeiro xunto á directora, Cecilia Rodríguez, na renovada pista polideportiva do centro. O alumnado de Porto Cabeiro estreou este curso a nova pista, de máis de 900 metros cadrados e totalmente renovada. A instalación presentaba un firme de asfalto en moi malas condicións que foi substituído por unha pista de formigón pulido cun tratamento para evitar esvaróns. Esta nova pista permite unha práctica do deporte máis cómoda e segura, “tanto para o alumnado do centro como para a veciñanza da contorna que utiliza este espazo deportivo municipal”. A comunidade educativa valorou dun xeito “moi positivo” esta obra. A reforma, incluída no plan +Provincia, supuxo un investimento de 47.866 euros, dos que o Concello financiou 25.884 euros e a Deputación de Pontevedra 22.131 euros.

O Concello de Redondela destina máis de 7.000 para as axudas de libros e material escolar para nenos e nenas de Educación Infantil no curso 2025/26. Este ano son máis dun cento as familias beneficiarias, que reúnen os requisitos da convocatoria, con nenos e nenas de 3 a 5 anos escolarizados en centros públicos do municipio. As familias reciben un vale por un importe de 70 euros que poden trocar por libros e material escolar nas librarías locais adheridas a esta convocatoria.

A alcaldesa, Digna Rivas, explica que malia que non é unha competencia municipal, o Concello fai este esforzo “para axudar ás familias que o precisan cos gastos de escolarización dos nenos e nenas”. As persoas beneficiarias poden recoller o vale no Concello, en horario de 9.00 a 11.00 horas, ou solicitar outro horario no teléfono 986 400 300.