Igualdad

Un dos puntos habilitados nunha celebración anterior

– No Entroido de Verán, que se celebra o sábado, haberá dous “Espazos de Igualdade” cun punto fixo e outro itinerante. Este servizo fai unha labor non só na atención a posibles vítimas de agresións sexistas, “senón tamén de sensibilización á mocidade sobre a importancia da igualdade e o respecto” explica a concelleira Iria Vilaboa.

– A alcaldesa, Digna Rivas, lembra que o Entroido de Verán de Redondela foi desde sempre “un espazo de diversión e expresión libre e queremos que todos e todas poidan gozar en igualdade de condicións”.

No Entroido de Verán, que se celebra este sábado 23, o Concello de Redondela pon en marcha unha campaña especial con “Espazos de Igualdade”. Haberá un punto de atención instalado na praza do Concello, xunto ao hospital de campaña, e outro itinerante con Axentes de Igualdade percorrendo todos os espazos da festa. O “Espazos de Igualdade” na praza do Concello realizará tamén actividades de sensibilización coa rapazada e as familias de 18:00 a 02:00 horas. O punto itinerante, con dúas técnicas en Igualdade, percorrerá todos os espazos da festa desde as 22:00 ata as 06:00 horas. Este servizo fai unha importante labor non só na atención a posibles vítimas de agresións ou violencia sexista, senón tamén “para concienciar e sensibilizar á mocidade sobre a importancia da igualdade e o respecto nas relacións” explica a concelleira de Igualdade Iria Vilaboa. A edil explica que a campaña non vai dirixida só as posibles vítimas senón tamén a toda a sociedade, “xa que calquera persoa que presencie comportamentos machistas, agresións, insultos sexistas ou tocamentos non consentidos pode dar a voz de alarma”.

A alcaldesa, Digna Rivas, lembra que o Entroido de Verán de Redondela “foi desde sempre un espazo de diversión e expresión libre e queremos que todos e todas poidan gozar en igualdade de condicións”. Como nos últimos anos, os locais de ocio nocturno e os hostaleiros que instalan barras nas rúas e no recinto da festa colaboran tamén como “Espazos libre de violencias machistas” e contan con protocolos de actuación. A alcaldesa agradece “a implicación dos locais de hostalaría e lecer nocturno, que se suman a estas campañas e colaboran para un ocio con diversión e respecto”.

– O Concello de Redondela reafirma o se compromiso coa liberdade e a diversidade neste 28 de xuño, Día do Orgullo LGTBIQ+. A alcaldesa, Digna Rivas, lembra que Redondela promove “a tolerancia e a igualdade de dereitos”. Advirte Rivas que “só con respecto e tolerancia poderemos alcanzar unha sociedade máis xusta, solidaria e igualitaria”.

– A concellería de Igualdade, coa colaboración de Paula Amoedo, está a restaurar os murais da Senda Verde de Chapela que sufriron ataques vandálicos e fascistas. Son graffitis realizados en anos anteriores coas cores do arco da vella e que representan o compromiso “coa liberdade, a diversidade sexual e o respecto a todas as minorías”.

O Concello de Redondela reafirma o seu apoio á diversidade co gallo da celebración o 28 de xuño do Día do Orgullo LGTBIQ+. A concellería de Igualdade, que dirixe Iria Vilaboa, está a traballar na recuperación dos murais realizados nos últimos anos pola artista redondelá Paula Amoedo. Os deseños, nos que participou a mocidade do grupo “Axentes do cambio”, sufriron ataques vandálicos. O graffiti máis afectado é unha intervención representa unhas ás coas cores do arco da vella e que foron manchadas por riba de negro. Tamén apareceu pintado coa bandeira de España un puño multicor que acompaña á lenda “Chapela Orgullo”. A acción dos vándalos, nos muros do antigo apeadeiro de Chapela, estragou en varias ocasións o traballo e compromiso da artista e da mocidade “coa diversidade sexual e o respecto a todas as minorías, visibilizando neste caso ao colectivo LGTBIQ+”, lamentan desde o goberno local. Desde o Concello recuperaranse estes murais “vítimas de ataques fascistas” e volverán amosar “o orgullo da cidadanía redondelá por unha sociedade diversa e tolerante”. A alcaldesa, Digna Rivas, lembra que Redondela sempre defendeu “a diversidade, a tolerancia e a igualdade de dereitos”. Insiste Rivas no convencemento de que “só co respecto e a tolerancia poderemos alcanzar unha sociedade máis xusta, solidaria e igualitaria”. O Concello anima á veciñanza a sentir “o orgullo de vivir nun dos municipios que máis respectan os dereitos das persoas LGTBIQ+, que apoia asociacións e colectivos minoritarios e que conta con bancos arco iris e coa bandeira trans nas parroquias, colexios e institutos, ademais da gran bandeira da Xunqueira e graffitis coas cores LGTBIQ+ en Chapela e Redondela.

– Grazas á unha iniciativa da Subdelegación do Goberno, os Concellos que como Redondela están adheridos a VIOGEN, realizarán a campaña institucional do 25 de Novembro, Día Internacional contra a Violencia de Xénero, en colaboración coa Universidade de Vigo. A campaña está deseñada por alumnas do Máster en Dirección de Arte Publicitaria.

– A alcaldesa, Digna Rivas, explicou que Redondela escolleu o proxecto realizado por Sara Nieto, Laura González, Ana Tasende, Marta Rodal e Belén Alonso. A campaña céntrase no concepto de que a violencia machista é universal, “afecta ás mulleres dos cinco continentes, de todas as clases sociais e culturas” e promove que a resposta a esta violencia sexa tamén universal.

A Subdelegación do Goberno en Pontevedra e a Universidade de Vigo, a través do alumnado de máster de Publicidade, porán a disposición do Concello de Redondela, e os de Moaña, Ponteareas, Lalín e Sanxenxo, campañas de prevención e loita contra a violencia de xénero. O obxectivo é ir máis aló do combate policial, de cara ao próximo 25 de novembro, Día Internacional contra a Violencia de Xénero. A iniciativa foi presentada este martes polo subdelegado do Goberno, Abel Losada, xunto a representantes dos concellos participantes, como a alcaldesa de Redondela, Digna Rivas, e a de Moaña, Leticia Santos; ou o alcalde de Sanxenxo, Telmo Martín; e a tenente de alcalde de Lalín, Paz Pérez Asorey; e a concelleira de Igualdade de Ponteareas, Raquel Plana. Tamén acudiu a decana da Facultade de Ciencias Sociais, Emma Torres, así como unha representación do alumnado do máster e a xefa da Unidade de Prevención da Violencia da Subdelegación, María José Rodríguez.

As campañas están deseñadas por alumnas do Máster en Dirección de Arte Publicitaria. En Redondela escolleuse o proxecto realizado por Sara Nieto, Laura González, Ana Tasende, Marta Rodal e Belén Alonso. A campaña céntrase no concepto de que a violencia machista é universal, “afecta ás mulleres dos cinco continentes, de todas as clases sociais e culturas” e promove que a resposta a esta violencia sexa tamén universal. A campaña, que se elaborará nos vindeiros meses, darase a coñecer nos medios de comunicación tradicionais e tamén dixitais, con mensaxes nas redes e tamén nos actos institucionais do Concello.

O Subdelegado do Goberno, Abel Losada, declarou que é unha “gran satisfacción” que unha iniciativa participada pola Subdelegación, os Concellos e a Universidade calle e chegue á cidadanía nun ámbito “tan sensible”. No acto, que contou con representantes dos demais Concellos participantes (Sanxenxo, Ponteareas, Moaña e Lalín), a alcaldesa Digna Rivas destacou “a decidida implicación do Concello de Redondela na loita contra a violencia machista”. Rivas salientou as campañas de prevención que se realizan ao longo de todo o ano, especialmente entre os mozos e mozas con charlas e obradoiros nos institutos. Destacou tamén a labor que se fai desde Redondela cos Premios de Xornalismo Ético Sesé Mateo, que recoñecen “a ética á hora de tratar informacións relacionadas coa violencia machista, fuxindo de sensacionalismos e respectando a intimidade das vítimas e as súas familias”.

Na imaxe, de esquerda a dereita: Iria Vilaboa, concelleira de Igualdade, Abel Losada, subdelegado do Goberno, Sara Nieto, do máster, Digna Rivas, alcaldesa, María José Rodríguez, xefa da Unidade Viogén en Pontevedra, Laura González, do máster, e Enma Torres, decana da Facultade de Comunicación da Uvigo.