Igualdade

– A alcaldesa, Digna Rivas, explica que o obxectivo deste programa é proporcionarlles ás mulleres vítimas de violencia “apoio emocional, ferramentas e recursos para fortalecer a súa autonomía e autoestima”. Estas habilidades traballaranse en grupo a través de 24 sesións desde maio ata novembro.

– No programa Xuntas traballarán as habilidades sociais, a comunicación, a saúde e o benestar. O proxecto ofrece un lugar “seguro” no que poden expresarse libremente, manifestar as súas opinións e inquedanzas e establecer unha rede de apoio social entre elas na que poder apoiarse ao finalizar o proxecto.

O Concello de Redondela pon en marcha “Xuntas”, un programa de apoderamento para mulleres vítimas de violencia de xénero no que reciben formación, apoio e asesoramento. A alcaldesa, Digna Rivas, e a concelleira de Igualdade, Iria Vilaboa, presentaron esta mañá o programa xunto á responsable do proxecto, Alexandra Román, especialista en Igualdade e Prevención da Violencia de Xénero. O obxectivo deste programa é proporcionarlles ás mulleres vítimas apoio emocional, ferramentas e recursos para fortalecer a súa autonomía e autoestima. Rivas explicou que as mulleres vítimas de violencia de xénero sofren unha diminución da súa autoestima, polo que é necesario ofrecerlles “espazos seguros de encontro e apoio profesional para fomentar o seu apoderamento”. No programa Xuntas traballaranse as habilidades sociais, a comunicación, a saúde e o benestar, así como a creación de redes de apoio. As sesións son grupais e dinámicas para fomentar a participación das mulleres e sempre dende a perspectiva de xénero e a prevención da violencia.

O programa desenvólvese a través de 24 sesións de traballo, de xeito semanal, desde maio ata novembro. Ao longo destas sesións proporcionarase ás mulleres “seguridade, confianza e apoio”, non só por parte da profesional encargada de desenvolver o proxecto, senón tamén das propias participantes. O obxectivo é crear un lugar seguro no que poidan expresarse libremente, manifestar as súas opinións e inquedanzas e que establezan unha rede de apoio social entre elas na que poidan apoiarse ao finalizar o proxecto.

– Un total de 372 alumnos e alumnas de primaria e secundaria de centros de ensino de Redondela participan nesta actividade organizada pola Concellería de Igualdade. Dentro da programación do 8M que promove o Concello estas charlas son unha ferramenta máis “para que a rapazada coñeza os perigos aos que se expoñen, e que os poidan identificar e denunciar”.

– A alcaldesa de Redondela, Digna Rivas, e a concelleira de Igualdade, Iria Vilaboa, participaron co alumnado de Porto Cabeiro nesta actividade. Trátase de charlas moi participativas nas que o alumnado pregunta as súas dúbidas, fala das súas experiencias cos xogos e redes sociais e aprenden a importancia de poñer límites.

As charlas “Tecnoloxías e novas formas de violencia de xénero” están a percorrer os centros de ensino do municipio. A rapazada entra en contacto con internet e as redes sociais a idades cada vez máis temperás “polo que é fundamental que canto antes coñezan os risco que corren”, explica o experto en ciberseguridade Javier Cancelas. Con charlas adaptadas ás súas idades e co apoio e vídeos didácticos, nenas e nenos aprenden o que é o ciberacoso ou o grooming. Un total de 372 alumnos e alumnas dos colexios Igrexa, Porto Cabeiro, Quintela, Santa Mariña e IES Floriani participan nesta actividade organizada pola Concellería de Igualdade. Dentro da programación do 8M que promove o Concello estas charlas son unha ferramenta máis “para que a rapazada coñeza os perigos aos que se expoñen, e que poidan identificalos e denuncialos”.

A alcaldesa de Redondela, Digna Rivas, e a concelleira de Igualdade, Iria Vilaboa, compartiron co alumnado de Porto Cabeiro esta actividade, na que participaron nenos e nenas de 1º, 2º e 3º de Primaria. Trátase de charlas moi participativas nas que o alumnado pregunta as súas dúbidas, fala das súas experiencias cos xogos ou as redes sociais e aprenden a importancia de poñer límites.

A rexedora destacou “a boa acollida” que ten esta actividade entre o alumnado e o profesorado dos centros, que a valoran como unha iniciativa “moi necesaria”. A rapazada utiliza teléfonos móbiles e tabletas desde idades moi temperás “e deben saber os perigos que existen en internet”.

Charlas nos Centros Culturais

A charla “Tecnoloxías e novas formas de violencia de xénero” tamén se imparte nos centros culturais das diferentes parroquias, con contidos e temáticas dirixidos ao público adulto. Esta semana comezaron en Santo Estevo de Negros e Quintela. A vindeira semana, o 21 de marzo, será no CRC de Cesantes ás 19.00 horas. No Multiúsos de Chapela será o 28 de marzo ás 19.00. O sábado 29 de marzo seré no CC A Miñoteira de Ventosela ás 19.30 e as xornadas rematarán o 4 de abril cunha charla no CC Saramagoso ás 19.00 horas. Todas estas charlas son abertas ao público.

Estas actividades fináncianse grazas ao Pacto de Estado contra a violencia de xénero do Ministerio de Igualdade.

Dentro da programación da concellería de Igualdade co gallo da celebración do 8M, o Concello de Redondela están a realizar rutas guiadas para escolares. Baixo a denominación “Mulleres: da historia á memoria” o alumnado pode coñecer o legado que moitas mulleres deixaron en Redondela, e que foron silenciadas pola historia. O percorrido a pé, cunha guía profesional, comeza na praza de Ponteareas, onde nenos e nenas coñecen a historia das mulleres do Convento de Vilavella ou a Lenda da Moura. Outra parada obrigada é a contorna da antiga fábrica de Regojo, onde a man de obra feminina fixo posible unha gran industria téxtil. O percorrido achégase ata a Casa da Torre para coñecer a Carolina García Tenreiro. Mestra e política do Partido Republicano Radical, en 1934 foi nomeada concelleira de Redondela, sendo a primeira muller nese cargo. As “madriñas” de San Simón son tamén protagonistas deste roteiro, ao igual que Ernestina Otero, Rita Regojo, Lola “a Jamaica” ou Josefa Puga “a Garavilla”. A visita rematou na Casa do Concello, onde conversaron coa alcaldesa Digna Rivas, primeira muller en ostentar este cargo en Redondela, e coa concelleira Iria Vilaboa. As rutas guiadas para escolares continuarán ao longo dos meses de marzo e abril.

Outra actividade da programación do 8M son as charlas “Tecnoloxías e novas formas de violencia de xénero”. Esta actividade estase a celebrar nos centros educativos do municipio e tamén en centros culturais de diferentes parroquias. Este venres, día 14, será no CC. Quintela, ás 19.30, e en vindeiras semanas será nos centros culturais de Cesantes, Miñoteira-Ventosela, Saramagoso e no Multiúsos de Chapela. O obxectivo de levar estas charlas formativas ás parroquias é facilitar a participación de toda a veciñanza. Serán nos meses de marzo e abril.

VI xornadas Xemma Pereira

Comezan as xornadas de emprendemento feminino “Xemma Pereira” con actividades de formación para o comercio local. Impártense nas Oficinas de Turismo con clases sobre dinamización de ventas, ciberseguridade nas ventas electrónicas, etc. Serán todos mércores, ata o 8 de abril de 20:30 a 22:00 horas. Inscrición en igualdade@redondela.gal.

Estas actividades fináncianse grazas ao Pacto de Estado contra a violencia de xénero do Ministerio de Igualdade.